Matie 16 - A SƐB-SÕW

A Zifʋ mɩnɛ nɩ-bɛrɛ bɔbr'ɩ bãwfʋ kãw

¹ A Faarizɩ̃ɛ mɩnɛ nɩ a Sadiseyɛ̃ mɩnɛ tɩ taw na ta a Yeezu zie bɔbr kɛ́ bɛ ɩ ʋ kaa. Bɛ tɩ zɛlɩ ʋ na k'ʋʋ wul bɛ bãwfʋ na yi Naaŋmɩn zie a.

² Ʋ tɩ sɔw bɛ na: «Zaanʋɔra wa ta a, nyɩ mɩ́ yel'a: “A salom ɩ n zɩɛ ɓõɓõ, a zie na vɩɛl'a”.

³ Ɛ́ a biɓaara nyɩ yel: “Dɩ̃a a, a zie kʋ̃ vɩɛl ɛ, a salom na ɩ zɩɛ wʋlʋlʋ a ƴãw.” A na ɩ lɛ a, nyɩ bãw nɩ a salom ŋmɛ̃a jɩ́rʋ, ɛ́ kʋ̃ tʋ̃ɔ́ bãw a dɩ̃a zie ŋa bãwfʋ al jɩ́rʋ ɛ.

⁴ A dɩ̃a nɩbɛ, na ɩ nɩ-faar ɛ́ bɛ tuur a Naaŋmɩn a, zɛlɛ nɩ bãwfʋ. Ɛcɛ bɛ kʋ̃ wul bɛ bãwfʋ kãw za ʋ bɛ ɩ a Zonasɩ dem ɛ.» Ʋ tɩ bɛr bɛ nɩ a be ɛ́ tɔl cen.

A Faarizɩ̃ɛ mɩnɛ nɩ a Sadiseyɛ̃ mɩnɛ dãbɩl yele

⁵ Bɛ na tɩ gãwnɛ a gãwn a, a ʋ po-tuurbɛ tɩ yiir'ɩ a dipɛ̃ deb.

⁶ A Yeezu tɩ yel bɛ na: «Hei! Nyɩ gùre nyɩ tʋɔra a Faarizɩ̃ɛ mɩnɛ nɩ a Sadiseyɛ̃ mɩnɛ dãbɩl ƴãw.»

⁷ A po-tuurbɛ tɩ tɩɛrɛ nɩ bɛ pʋɔ yere nɩ: «Tɩ na bɛ de a dipɛ̃ a n'a so ʋ ƴɛ̀r à à ŋá.»

⁸ Ɛcɛ a Yeezu tɩ bãwnɩ a na yel bɛ: «Naaŋmɩn-sàwfʋ pʋrɩ dem bɛ ŋa! Bʋ̃ʋ n'ʋ so nyɩ tɩɛrɛ nyɩ pʋɔ yere nɩ nyɩ na bɛ tɛr dipɛ̃ a?

⁹ Nyɩ cãà bɛ bãw a pɛr ɛ? Nyɩ yiir'ɩ a dipɛ̃ anũu bɛ na põ nɩbɛ túr-anũu (5 000) a, nɩ a peli nʋɔr nyɩ na tuo kul'ɩ a?

¹⁰ Bɩɩ nyɩ yiir'ɩ a dipɛ̃ ayopõi yele bɛ na põ a nɩbɛ túr-anaar (4 000) a, nɩ a peli nʋɔr nyɩ na tuo kul'ɩ a?

¹¹ Ŋmɩŋmɩn za n'a nyɩ bɛ bãw a pɛr, k'ɩ̃ɩ bɛ tɩ ƴɛ̀rɛ dipɛ̃ ƴɛ̀rʋ a nyɩ zie a lɛn daar ɩ̃ na tɩ yere kʋ̀rɛ nyɩ: nyɩ gùre nyɩ tʋɔra a Faarizɩ̃ɛ mɩnɛ nɩ a Sadiseyɛ̃ mɩnɛ dãbɩl ƴãw a?»

¹² Lɛ n'a a ʋ po-tuurbɛ pãa tɩ bãw k'ʋʋ bɛ tɩ yel kɛ́ bɛ gùre bɛ tʋɔra dipɛ̃ dãbɩl ƴãw ɛ, ɛcɛ bɛ gùre bɛ tʋɔra a Faarizɩ̃ɛ mɩnɛ nɩ a Sadiseyɛ̃ mɩnɛ wulu ƴãw.

A Pɩɛr na yel k'aa Yeezu n'ɩ a Naaŋmɩn Nɩ-kabra a

¹³ A Yeezu na wa ta a Filib tẽw Sezaare a, ʋ sowr'ɩ a ʋ po-tuurbɛ: «A nɩbɛ zie a, ãa n'ɩ a Nɩsaal Bie?»

¹⁴ Bɛ tɩ sɔw na: «Bɛ mɩnɛ zie, Zã-Bati n'ʋ, bɛ mɩnɛ zie ʋ ɩ Eli, bɛ mɩnɛ zie ʋ ɩ Zeremi bɩɩ naaŋmɩn-ƴɛ̀r-manɛ kãw.»

¹⁵ Ʋ lɛb sowri bɛ: «Ɛ́ a nyɩɩm, nyɩ yel kɛ́ ãa nɛ m?»

¹⁶ Sɩmʋ̃ Pɩɛr tɩ sɔw na: «Fʋ̃ʋ n'ɩ a Nɩ-kabra, a Naaŋmɩn na vʋʋrɛ a Bie.»

¹⁷ Lɛ n'a a Yeezu tɩ lɛb de a ƴɛ̀rʋ yel ʋ: «Zu-nʋ̃ɔ̀ sob nɛ b, Zonasɩ bidɛb Sɩmʋ̃ ʋ, nɩsaal bɛ n'ʋ wul fʋ a yel ŋa ɩ, a ɩ̃ Sãà na be a tẽ-vla pʋɔ a n'ʋ.

¹⁸ Ɛ́ ɩ̃ yere na kʋ̀rɛ fʋ, fʋ ɩ n Pɩɛr, a pɛr lɛ kɛ́ kʋsɩɛr, ɛ́ a kʋsɩɛr ŋa zu n'a ɩ̃ na ŋmãa a ɩ̃ Lãw-yir, ɛ́ a kũu kpɛnʋ bʋʋrɛ za kʋ̃ tʋ̃ɔ́ ɩ ʋ bom za ɩ.

¹⁹ Ɩ̃ na kʋ̀ b'ɩ a tẽ-vla Naalʋ dɩ̃dɔr pime: bom nɛ za fʋ na na 'lẽ a tẽw zu ka a, mɩ̀ na 'lẽ nɩ a tẽ-vla pʋɔ, ɛ́ bom nɛ za fʋ na na cɛ̀r bɛr a tẽw zu ka a, mɩ̀ na cɛ̀r'ɩ a tẽ-vla pʋɔ.»

²⁰ Lɛ n'a ʋ tɩ kpãa a ʋ po-tuurbɛ kɛ́ bɛ taa yere kʋ̀rɛ nɩr za kɛ́ ʋlɛ n'ɩ a Nɩ-kabra ɩ.

A Yeezu na dãw de niwn yel a ʋ kũu nɩ a ʋ kũu-pʋɔ-lɛb-yibu yele a

²¹ A ʋlɩ daar nɛ n'a a Yeezu tɩ tĩ yere kʋ̀rɛ a ʋ po-tuurbɛ, k'aa fɛr'a k'ʋʋ cen a Zerizalɛm, tɩ wõ tuo yaga a nɩ-kore nɩ a bàwr-maal-nɩ-bɛrɛ nɩ a Naaŋmɩn wulu sɛ-sɛbrbɛ nuru pʋɔ, bɛ kʋ ʋ, ɛ́ a bibie ata sob ʋ lɛb yi a kũu pʋɔ.

²² Lɛ n'a a Pɩɛr tɩ tɛr ʋ yi n pùor tɩ nyɔw ʋ yere: «Naaŋmɩn kʋ̃ sàw ɛ, Sore e! Ʋ̃ʋ'hʋ̃, a yele á ŋá kʋ̃ ta b ɛ!»

²³ Ɛcɛ a Yeezu tɩ lɩɛb'a yel a Pɩɛr: «Cen taw zaa a ɩ̃ zie, Sɩtaana a! Fʋ piwr mɛ̃ nɩ sɔ́r. A fʋ tɩɛrʋ bɛ ɩ Naaŋmɩn dem ɛ, nɩsaalbɛ dem'a.»

²⁴ Lɛ n'a a Yeezu tɩ yel a ʋ po-tuurbɛ: «Nɩr wa bɔbr k'ʋʋ tuur mɛ̃ a, ʋ ta cãà tɩɛrɛ a ʋl mɩŋa yele ɩ, ɛ́ de a ʋ da-gara tuur'ɩ mɛ̃.

²⁵ Sob nɛ na sɩrɩ bɔbr k'ʋʋ faa a ʋ nyɔ-vʋʋrʋ a, na bɔr ʋ na bɛr, ɛ́ sob nɛ na bɔr a ʋ nyɔ-vʋʋrʋ bɛr a mãa ƴãw a na páw ʋ na.

²⁶ Bʋnʋ tɔnɛ n'a a nɩsaal na nyɛ̃, ʋlɛ wa páw a tẽ-daa za ɛ́ a ʋ nyɔ-vʋʋrʋ bɔr a? Bɩɩ bʋ̃ʋ n'ʋ a nɩsaal na tʋ̃ɔ́ tɩr ya de nɩ a ʋ nyɔ-vʋʋrʋ?

²⁷ A Nɩsaal Bie na sɩrɩ na wa a ʋ Sãà yúor-vɩɛlʋ-danʋ pʋɔ, ʋlɛ nɩ a ʋ malkɩ mɩnɛ, lɛ n'a ʋ na mɩ́ ya ŋa za man nɩ a ʋ ɩb.

²⁸ Yel-mɩŋa sɩza, ɩ̃ yere na kʋ̀rɛ nyɩ, a nɩbɛ na be a ka a, a bɛ pʋɔ a, bɛ mɩnɛ na nyɛ̃ nɩ a Nɩsaal Bie ʋ waar mɛ̃ nãà a, ɛ́ bɛ bãw kpi.»