Matie 15 - A SƐB-SÕWA sãàkʋm-kore ɩ-ɩrɩ tub yele ( Mark 7:1-13 ) 1 Faarizɩ̃ɛ mɩnɛ nɩ Naaŋmɩn wulu sɛ-sɛbrbɛ bɛ mɩnɛ kãw tɩ yi n a Zerizalɛm wa páw a Yeezu sowr'ʋ: 2 «Bʋ̃ʋ n'ʋ so a fʋ po-tuurbɛ sãwnɛ a tɩ sãàkʋm-kore ciiru? Bɛ na bɛ mɩ́ pɛ́w a bɛ nuru mɛ̃ a lɛ a tɩ puoru sɔ́r na yel, ɛ́ bãw dɩ a.» 3 A Yeezu tɩ sɔw bɛ na: «Ɛ́ a nyɩɩm, bʋ̃ʋ n'ʋ so nyɩ bɛ tuur a Naaŋmɩn nɔ-ƴãwna a nyɩ sãàkʋm-kore ciiru zũú? 4 A Naaŋmɩn yel'a: “Ƴãwnɛ a fʋ sãà nɩ a fʋ mã”, nɩ kɛ́: “Nɩr wa tʋ ʋ sãà bɩɩ ʋ mã a, a fɛr'a kɛ́ bɛ kʋ ʋ.” 5 Ɛ́ nyɩɩm mɩ́ yel: “Nɩr wa yel ʋ sãà bɩɩ ʋ mã: a bom nɛ ɩ̃ nãá sõw nɩ fʋ a, ɩ̃ de ʋ na kʋ̀ Naaŋmɩn a”, 6 ʋ bɛ mɩ́ lɛb cãà tɛr a ʋ sãà ƴãwfʋ san ɛ. À ŋá n'a nyɩ mɩ́ ŋmɛ a Naaŋmɩn ƴɛ̀rʋ lɔb, a nyɩ nɩ-kore ciiru zũú. 7 Nɩsaal-libelibe bɛ ŋa! A naaŋmɩn-ƴɛ̀r-manɛ Ɩzayi tɩ ƴɛ̀r'ɩ vla càar'ɩ nyɩ, a lɛn daar ʋ na tɩ ƴɛ̀r a ƴɛ̀r-bie á ŋá a: 8 “Nɛ́ɛ tɛwr'a a nɩbɛ bɛ ŋa ƴãwnɛ nɩ mɛ̃, ɛcɛ a bɛ pʋʋr zãá nɩ mɛ̃. 9 A bɛ puoru bɛ na puore mɛ̃ a, bɛ tɛr pɛr ɛ, ɛ́ a bɛ wulu bɛ na wule a ɩ nɩsaalbɛ nɛ-ƴãwnɩ tɛwr.”» A bome al na dɛwr a nɩsaal a ( Mark 7:14-23 ) 10 Al pùorí, a Yeezu tɩ bʋɔl'ɩ a zu-sɛbla wa yel bɛ: «Nyɩ bɛr wõ vla, ɛ́ bãw a pɛr! 11 Bom nɛ na kpɩɛr a nʋɔrɩ́ a, ʋlɛ bɛ n'ʋ dɛwr a nɩsaal ɛ. Bom nɛ na yire a nʋɔrɩ́ a, ʋlɛ n'ʋ dɛwr a nɩsaal.» 12 Lɛ n'a a ʋ po-tuurbɛ tɩ taw ta yel ʋ: «Fʋ bãwnɩ a na k'aa fʋ ƴɛ̀rʋ ŋa a Faarizɩ̃ɛ mɩnɛ na wõ a, ʋ dam bɛ na a?» 13 Ʋ tɩ sɔw: «Tɩɛ nɛ za, a ɩ̃ Sãà na be a tẽ-vla pʋɔ a na bɛ sɛl a, bɛ na vʋ̃ɔ ʋ na bɛr. 14 Nyɩ bɛr bɛ: zɔn nɛbɛ tawr zɔn. Ɛcɛ zɔ̃w wa tawr zɔ̃w a, bɛ za ayi na lo n bɔw pʋɔ.» 15 Pɩɛr tɩ de nɩ a ƴɛ̀rʋ yel ʋ: «Ír a zʋkpar-kpɛ̃w ŋa pɛr kʋ̀ tɩ.» 16 A Yeezu tɩ yel a: «A nyɩɩm mɩ̀, nyɩ cãà bɛ tɛr yã sɛr ɛ? 17 Nyɩ bɛ bãw kɛ́ bom nɛ za na kpɩɛr a nʋɔrɩ́ a, tɔlɛ na siwr a pùorí, ɛ́ na tɩ yi a sɩmanɩ́ ɛ? 18 Ɛcɛ a al na yire a nʋɔrɩ́ a, socir pʋɔ sɩrɩ n'a a mɩ́ yi, ɛ́ alɛ n'a dɛwr a nɩsaal. 19 A nɩsaal socir pʋɔ sɩrɩ n'a a tɩɛr-faar, nɩbɛ kʋb, pɔw-gaa, nɩ-fa-ɩb, nyãnyuwlu, dãsɩ-ziri nɩ zʋmɛ mɩ́ yire. 20 Á ŋá n'a dɛwr a nɩsaal. Ɛcɛ dɩ kɛ́ bɛ dãw de niwn pɛ́w nũu mɛ̃ a lɛ a puoru sɔ́r na yel a, al bɛ dɛwr nɩsaal ɛ.» Pɔw kãw, na bɛ ɩ Zifʋ a, sàw na de a Yeezu yele ( Mark 7:24-30 ) 21 A Yeezu tɩ yi n a be ɛ́ cen Tɩ́ɩ̀r nɩ Sɩdɔ̃ ten lowr. 22 Kanãa tẽw pɔw kãw tɩ yi n a be wa ŋmɩɛr cɛlsɩ yere nɩ: «Sore e, Daviir bidɛb i, zɔ ɩ̃ nɩbaalʋ! Kɔ̃tɔn kãw dɔwrɛ nɩ a ɩ̃ pɔwyale bɛ dɩ vuo ɩ!» 23 Ɛcɛ a Yeezu bɛ tɩ ƴɛ̀r ƴɛ̀rʋ za sɔw ʋ ɛ. A ʋ po-tuurbɛ tɩ taw na ta zɛlɛ ʋ yere nɩ: «Ƴãw ʋ lɛb! Ʋ na ɩrɛ gɔmɛ tuur'ɩ tɩ a.» 24 A Yeezu tɩ sɔw na: «A Ɩsɩrayɛl bʋʋrɛ nɩbɛ, na ɩ mɛ̃ píir na bɔr a, tɛwr zie n'a bɛ tõ m.» 25 Ɛcɛ a pɔw tɩ wa na wa lo gbĩ dume a ʋ niŋé ɛ́ yel: «Sore e, sõw mɛ̃!» 26 A Yeezu tɩ sɔw na: «A bɛ sɛw kɛ́ bɛ mɩ́ de a bibiir bʋ̃-dɩrɩ lɔb ƴãw bali ɛ.» 27 A pɔw lɛb yel ʋ: «Yel-mɩŋa n'a, Sore e, ɛcɛ a bali mɩ́ tuure nɩ a nɩbɛ na so a a bʋ̃-dɩ-ŋmaarɛ na lore a dɩrɛ.» 28 A lɛ n'a a Yeezu tɩ sɔw ʋ: «Pɔw i, a fʋ naaŋmɩn-sàwfʋ ɩ n kpɛ̃ɛ! A tu a lɛ fʋ na bɔbr a!» Ɛ́ a tɛm nɛ pʋɔ, a ʋ pɔwyale tɩ sanɩ na. A Yeezu sanɩ nɩ bàalbɛ yaga 29 A Yeezu tɩ yi n a be cen a Galile kʋ̃ɔ-kpɛ̃ɛ nʋɔr. Ʋ tɩ do n tãw zu tɩ zɩ̃ a be. 30 Zu-sɛbla na bɛ dɩ vuo a, tɩ wa n a ʋ zie, lãw tɛr wʋbr, zɔn, nɩ-kɔwr, wõw-takpalɛ nɩ bàalbɛ yaga. Bɛ wa bin bɛ nɩ a ʋ pile ʋ sanɩ bɛ. 31 A nɩbɛ na tɩ nyɛ̃ a wõw-takpalɛ bɛ ƴɛ̀rɛ a, a nɩ-kɔwr bɛ lɛb kpɛ̃w a, a wʋbr bɛ cere dẽdẽ a, ɛ́ a zɔn nyɛrɛ a, a tɩ ɩ n nɔ-ɓãa-yel a bɛ zie, bɛ íre a Ɩsɩrayɛl Naaŋmɩn yúor-vɩɛlʋ-danʋ. A Yeezu guol'ɩ nɩbɛ túr-anaar ( Mark 8:1-10 ) 32 A Yeezu tɩ bʋɔl'ɩ a ʋ po-tuurbɛ wa yel bɛ: «A nɩbɛ bɛ ŋa ɩrɛ mɛ̃ nɩ nɩbaalʋ. Bibie ata n'ɩ á ŋá bɛ na be a ɩ̃ zie, ɛ́ bɛ tɛr bʋ̃-dɩra a. Ɩ̃ bɛ bɔbr k'ɩ̃ɩ bɛr bɛ bɛ lɛb kule nɩ a kɔ̃ ɩ, bɛ nãà mab'a lo a sɔ́r zu.» 33 A ʋ po-tuurbɛ tɩ sowr'ʋ na: «Nyɩnɛ n'a tɩ na páw dipɛ̃ a sɛw tʋ̃ɔ́ tɩw a nɩbɛ bɛ ŋa za, a wɛja pʋɔ ka?» 34 A Yeezu tɩ sowri bɛ na: «Dipɛ̃ a ŋmɩn n'a nyɩ tɛr?» Bɛ tɩ sɔw na: «Ayopõi nɩ zʋm-bili blã.» 35 Lɛ n'a a Yeezu tɩ ƴãw a nɩbɛ zɩ̃ tẽw, 36 ʋʋ de a dipɛ̃ ayopõi nɩ a zʋ́mɛ́ al, puori a Naaŋmɩn barka, ɛ́ ŋma kʋ̀ a ʋ po-tuurbɛ, a ʋ po-tuurbɛ de kʋ̀ a zu-sɛbla. 37 A nɩbɛ za tɩ dɩ na tɩw, ɛ́ bɛ wob a bʋ̃-ŋmaarɛ paalɩ peli ayopõi kul'ɩ. 38 Ɛcɛ, a nɩbɛ bɛl za na tɩ dɩ a, tɩ ɩ n dɛbr túr-anaar (4 000), ɛ́ bɛ bɛ tɩ sɔ́r a pɔwbɛ nɩ a bibiir ƴãw ɛ. 39 A Yeezu na wa bɛr a zu-sɛbla bɛ kule a, ʋ kpɛ n a gbor pʋɔ cere Magadã tẽw lowr. |
La Bible en Dagara © Alliance Biblique du Burkina Faso, 2013.
Bible Society of Burkina Faso