Matie 14 - A SƐB-SÕW

A Zã-Bati kũu yele

¹ A lɛn daar, a Galile tẽw nãà Erɔdɩ tɩ wõ na bɛ ƴɛ̀rɛ a Yeezu ƴɛ̀rʋ.

² Ʋ tɩ yel'ɩ a ʋ nɩbɛ: «Zã-Bati n'ɩ a nɩr ŋa! Ʋ lɛb'a yi a kũuni pʋɔ, alɛ so ʋ tɛr a nɔ-ɓãa-yele maalʋ fãw.»

³ Bʋ̃ʋ n'ʋ vɛ̃, a Erɔdɩ tɩ ƴãw na bɛ nyɔw a Zã 'lẽ lɔb ƴãw gaso pʋɔ, a ʋ yɛb Filib pɔw Erodɩadɩ ƴãw.

⁴ Bʋ̃ʋ n'ʋ vɛ̃, a Zã tɩ yere na kʋ̀rɛ a Erɔdɩ: «Sɔ́r bɛ ka be fʋ tɛr a Erodɩadɩ ʋ ɩ a fʋ pɔw ɛ.»

⁵ A Erɔdɩ tɩ bɔbr'ɩ a Zã kʋb, ʋʋ tɩ zɔrɛ nɩ a zu-sɛbla dɛ̃bɩ̃ɛ, bɛl zie a, a Zã tɩ ɩ n naaŋmɩn-ƴɛ̀r-manɛ.

⁶ Zɩ̃ kɛ́ a Erɔdɩ dɔwfʋ cuw bibir a, a Erodɩadɩ pɔwyaa tɩ ƴaw nɩ bɩnɛ a cuw dem niŋé nʋ̃ɔ̀ tɩ kpɛ a Erɔdɩ yaga za,

⁷ ʋ pɔ yel a pɔwsɩrale kɛ́ ʋlɩ bom nɛ za ʋ na na zɛlɩ a, ʋ na kʋ̀ ʋ na.

⁸ A ʋ mã tɩ cã ʋ na ƴãw ʋ yel a nãà: «Kʋ̀ m a Zã-Bati zu laa pʋɔ a ka.»

⁹ Nʋ̃ɔ̀ bɛ tɩ kpɛ a nãà ɩ, ɛcɛ a pɔb ʋ na faa tɩ pɔ a, nɩ a cuw dem zũú, ʋ tɩ yel'a kɛ́ bɛ kʋ̀ ʋ,

¹⁰ ɛ́ tõ nɩr ʋ cen a gaso pʋɔ tɩ cɛ a Zã zu ŋmãa.

¹¹ Bɛ tɩ wa n nɩ a zu laa pʋɔ wa kʋ̀ a pɔwsɩrale, ʋ de tɩ kʋ̀ a ʋ mã.

¹² A Zã po-tuurbɛ tɩ wa na wa ɓáw a kũu tɩ ũù, ɛ́ cen tɩ yel kʋ̀ a Yeezu.

A Yeezu guol'ɩ nɩbɛ túr-anũu

¹³ A Yeezu na wa wõ a Zã kũu a, ʋ yi n a be, kpɛ gbor k'ʋʋ taw yi pùor, wɛja pʋɔ, ʋ yõ zie. A zu-sɛbla na tɩ bãwnɩ a a, bɛ yi n a bɛ ten pʋɔ nɩ gbɛ́ɛ, cere lanɛ a kʋ̃ɔ-kpɛ̃ɛ tuur a Yeezu.

¹⁴ Ʋ na tɩ siwr a gbor pʋɔ a, ʋ nyɛ̃ nɩ zu-sɛbla na bɛ dɩ vuo a. Nɩbaalʋ tɩ kpɛ ʋ nɩ a bɛ ƴãw, ʋ sanɩ a bɛ bàalbɛ.

¹⁵ A zaanʋɔra na wa ta a, a ʋ po-tuurbɛ tɩ taw na ta a ʋ zie yel ʋ: «Wɛja pʋɔ n'ɩ a ka, ɛ́ a zie sɔbr, bɛr a nɩbɛ bɛ ŋa za bɛ cen a tẽli pʋɔ tɩ da bʋ̃-dɩrɩ dɩ.»

¹⁶ A Yeezu tɩ sɔw bɛ na: «Bɛ bɛ tɛr a be cenu yel-ɩra ɩ: a nyɩɩm tɛɛ za, nyɩ kʋ̀ bɛ a bʋ̃-dɩrɩ.»

¹⁷ Lɛ n'a bɛ tɩ yel ʋ: «Dipɛ̃ anũu nɩ zʋ́mɛ́ ayi tɛwr'a tɩ tɛr a ka.»

¹⁸ Ʋ yel bɛ: «Nyɩ de a wa n ka wa kʋ̀ m.»

¹⁹ Al pùorí, ʋ tɩ ƴãw na a nɩbɛ zɩ̃ a mʋ̃ɔ zu, ʋʋ de a dipɛ̃ anũu nɩ a zʋ́mɛ́ ayi al, úori kaa a salom, ɛ́ maalɩ a, ɛ́ ŋma kʋ̀ a ʋ po-tuurbɛ, bɛ mɩ̀ de kʋ̀ a zu-sɛbla.

²⁰ A nɩbɛ za tɩ dɩ na tɩw, ɛ́ bɛ wob a bʋ̃-ŋmaarɛ paalɩ peli pie nɩ ayi kul'ɩ.

²¹ Ɛcɛ a bɛlɩ dem na tɩ dɩ a, tɩ ta n dɛbr túr-anũu (5 000), ɛ́ bɛ bɛ tɩ sɔ́r a pɔwbɛ nɩ a bibiir ƴãw ɛ.

A Yeezu na cen a kʋ̃ɔ zu a

²² Daadaalɛ, a Yeezu tɩ fɛr'ɩ a ʋ po-tuurbɛ ƴãw bɛ kpɛ a gbor de ʋ niwn gãwnɛ a gãwn ŋa lowr, ʋʋ ƴãwnɛ a zu-sɛbla a sɔ́rɩ́.

²³ Ʋ na wa ƴãw a zu-sɛbla a sɔ́rɩ́ baarɩ a, ʋ do n tãw zu k'ʋʋ tɩ puori. A zaanʋɔra na wa ta a, ʋ tɩ ɩ n ʋ yõ a be.

²⁴ A gbor tɩ zãá nɩ nɩ a tẽw baarɩ. A kʋ̃ɔ mie tɩ ìre na ŋmɩɛr a gbor, a sɛsɛb na tɩ fure tuore a ƴãw.

²⁵ A zie na wa wɛlɛ a, a Yeezu tɩ cen nɩ a kʋ̃ɔ-kpɛ̃ɛ zu wa a ʋ po-tuurbɛ zie.

²⁶ A ʋ po-tuurbɛ na wa nyɛ̃ ʋ ʋ cere a kʋ̃ɔ zu a, pʋ̀lá vʋ̃ɔ bɛ na bɛ yere: «Nyãakpɩ̃ɩn n'ʋ!» Ɛ́ dɛ ŋmɩɛr dɛ̃bɩ̃ɛ cɛlsɩ.

²⁷ Ɛcɛ a Yeezu tɩ ƴɛ̀r a sɔw bɛ daadaalɛ yel: «Nyɩ nyɔw nyɩ mɩŋa, mãa n'ʋ, nyɩ ta zɔrɛ dɛ̃bɩ̃ɛ ɩ!»

²⁸ A Pɩɛr tɩ de nɩ a ƴɛ̀rʋ yel ʋ: «Sore e, fʋ̃ʋ sɩrɩ wa n'ʋ a, fʋ̃ʋ ƴãw ɩ̃ cen a kʋ̃ɔ zu wa a fʋ zie.»

²⁹ A Yeezu sɔw yel ʋ: «Wa.» A Pɩɛr tɩ yi n a gbor pʋɔ cere a kʋ̃ɔ zu a Yeezu zie.

³⁰ Ɛcɛ ʋ tɩ nyɛ̃ nɩ a sɛsɛb dɛ̃bɩ̃ɛ kpɛ ʋ, ʋʋ na tɩ tĩ limne a kʋ̃ɔ pʋɔ a, ʋ lɔb'ɩ cɛl: «Sore e, faa mɛ̃!»

³¹ A Yeezu tɩ tur'ɩ nũu daadaalɛ nyɔw ʋ, ɛ́ yel: «Naaŋmɩn-sàwfʋ pʋrɩ sob ŋa, bʋ̃ʋ n'ʋ so fʋ bʋnɩ?»

³² Bɛ na wa do kpɛ a gbor pʋɔ a, a sɛsɛb ŋmãa na.

³³ A po-tuurbɛ bɛl na tɩ be a gbor pʋɔ a, tɩ lo na gbĩ dume a ʋ niŋé ɛ́ yel: «Yel-mɩŋa sɩza, fʋ ɩ n Naaŋmɩn Bie!»

Zenezarɛtɩ tẽw bàalbɛ sanʋ

³⁴ Bɛ tɩ gãw nɩ a kʋ̃ɔ-kpɛ̃ɛ ta a Zenezarɛtɩ tẽw.

³⁵ A be dem tɩ nyɛ̃ nɩ a Yeezu bãw, ɛ́ ƴãw bɛ yel kʋ̀ a vuo ʋl nɩbɛ za, bɛ tɛr a bàalbɛ za wa n a ʋ zie.

³⁶ Bɛ tɩ zɛlɛ ʋ nɩ yãayãa, k'ʋʋ sàw bɛ nɩ̃ɛ tɔ a ʋ kparʋ zʋɔrɛ tɛwr, ɛ́ a bɛlɩ dem za na mɩ́ tɩ tɔ a, mɩ́ tɩ sanɩ na.