Matie 11 - A SƐB-SÕW

Zã-Bati tõ n ʋ po-tuurbɛ bɛ mɩnɛ a Yeezu zie

¹ A Yeezu na tɩ kpaalɩ a ʋ po-tuurbɛ pie nɩ ayi à à ŋá baar'a, ʋ yi n a be cen k'ʋʋ tɩ kanɛ nɩ a nɩbɛ ɛ́ hiere a Yel-nʋ̃ɔ̀ a ʋlɩ vuo nɛ pʋɔ.

² Zɩ̃ kɛ́ a Zã-Bati na be a gaso pʋɔ a, tɩ wõ n a Kɩrɩta tome ʋ na tone a. Lɛ n'a ʋ tɩ tõ a ʋ po-tuurbɛ bɛ mɩnɛ kɛ́ bɛ tɩ sowri a Yeezu:

³ «Fʋ̃ʋ n'ɩ a Nɩ-kabra na na wa a, bɩɩ tɩ cãà cɛlɛ nɩ-yũo?»

⁴ A Yeezu tɩ sɔw bɛ na: «Nyɩ cen tɩ manɩ a yele nyɩ na nyɛrɛ ɛ́ wone a, kʋ̀ a Zã:

⁵ a zɔn nyɛrɛ na, a wʋbr cere dẽdẽ, a kɔn lɛb vɩɛl, ɛ́ a won wone, a kũuni lɛbr yire, ɛ́ a Yel-nʋ̃ɔ̀ hieri ta a nan dem.

⁶ Zu-nʋ̃ɔ̀ sob'ɩ a ʋlɩ sob nɛ na kʋ̃ zawrɩ a ɩ̃ sàw-deb bɛr a.»

⁷ Bɛ na tɩ lɛb cere a, a Yeezu tɩ tĩ na ƴɛ̀rɛ a Zã ƴɛ̀rʋ a zu-sɛbla zie. Ʋ tɩ sowre bɛ na: «Bʋ̃ʋ n'ʋ nyɩ cen tɩ nyɛ̃ a wɛja-kpalɛ pʋɔ? Bàa-kɛkɛr sɛsɛb na fure damnɛ a n'ʋ bɩɩ?

⁸ Bʋ̃ʋ n'ʋ nyɩ cen tɩ nyɛ̃ mɔ̃? Nɩr na su dɛpaal-kparɩ a n'ʋ bɩɩ? Ɛcɛ a dɛpaal-kpar-suurbɛ a, na-mɩnɛ yie pʋɔ n'a bɛ mɩ́ kpɩɛr.

⁹ A na ɩ lɛ a, bʋ̃ʋ n'ʋ nyɩ cen tɩ nyɛ̃? Naaŋmɩn-ƴɛ̀r-manɛ n'ʋ bɩɩ? Ʋ̃ʋ, mãa n'ʋ yere kʋ̀rɛ nyɩ, ʋ zuo nɩ naaŋmɩn-ƴɛ̀r-manɛ.

¹⁰ A Zã ƴãw n'a a Sɛb-sõw yel a ƴɛ̀r-bie á ŋá: “A ɩ̃ nɩr'ɩ ŋa ɩ̃ tone a fʋ nidaa, ʋ na tɩ cɔbr'ɩ a fʋ sɔ́r bɛr fʋ.”

¹¹ Yel-mɩŋa sɩza, ɩ̃ yere na kʋ̀rɛ nyɩ, a pɔwbɛ bʋ̃-dɔwrɩ za pʋɔ a, kãw za bɛ be be ɩ kpɛ̃ɛ zuo a Zã-Bati ɛ, ɛcɛ a tẽ-vla Naalʋ pʋɔ nɩ-pʋrɩ pʋrɩ ɩ n kpɛ̃ɛ zuo ʋ.

¹² A Zã-Bati daar za wa tɔ dɩ̃a a, gãdaalʋ n'a bɛ ɩrɛ nɩ a tẽ-vla Naalʋ, ɛ́ gãdaar nɛbɛ mɩ́ faa ʋ.

¹³ A naaŋmɩn-ƴɛ̀r-manbɛ za nɩ a Naaŋmɩn wulu ƴɛ̀r'ɩ a Naalʋ ŋa ƴɛ̀rʋ tɩ ta n a Zã daar.

¹⁴ Nyɩmɛ wa sàw a, a Zã n'ɩ a Eli na na lɛb wa a.

¹⁵ Sob nɛ na tɛr tobe bɛr-wob ƴãw a, ʋ bɛrɛ wone!

¹⁶ Ãa n'ʋ ɩ̃ na de a dɩ̃a nɩbɛ bɛ ŋa man nɩ? Bɛ ŋmɛ̃ na mɛ̃ bibiir na zɩ̃ nɩ-yaga tuor-taa zie ɛ́ bʋɔlɛ taa yere nɩ:

¹⁷ “Tɩ pɛbl'ɩ weli ƴãw nyɩ, ɛ́ nyɩ bɛ ƴaw ɛ! Tɩ ŋmãa nɩ lãw-mʋɔlɛ, ɛ́ nyɩ bɛ kõ ɩ!”

¹⁸ Bʋ̃ʋ n'ʋ vɛ̃, Zã wa na, bɛ dɩrɛ ɩ, bɛ nyúur ɛ, ɛ́ bɛ yel kɛ́: “Kɔ̃tɔ̃-ìre n'ʋ!”

¹⁹ A Nɩsaal Bie wa dɩrɛ ɛ́ nyúur, ɛ̀ bɛ yel kɛ́: “Bʋ̃-dɩ-nɔ̃wnɛ nɩ dã-kuole n'ʋ! Zuru-yar-dierbɛ nɩ yel-bier-maalbɛ bá-pɛr'ʋ!” Ɛcɛ a Naaŋmɩn yã-bãwfʋ wul'ɩ a ʋ yel-mɩnʋ a sãá a ʋ ɩ-ɩrɩ pʋɔ.»

A tẽ-bɛrɛ al na bɛ sàw de a Yeezu a

²⁰ Lɛ n'a a Yeezu tɩ nyɔw a tẽ-bɛrɛ al pʋɔ ʋ na maalɩ a ʋ nɔ-ɓãa-yele yaga zie a yere, a ten á ŋá nɩbɛ na bɛ tɩ sàw lɩɛbɩ a bɛ ɩb a ƴãw. Ʋ tɩ yere na:

²¹ «We ãɩ, Korazin i! We ãɩ, Bɛtɩsayida a! A nɔ-ɓãa-yele na sɩrɩ maalɩ a nyɩ zie a, alɛ tɩ maalɩ Tɩ́ɩ̀r nɩ Sɩdɔ̃ a, koro za n'a a bɛ nɩbɛ nãá lɩɛbɩ a bɛ ɩb, su vʋɔrɩ kparɩ ŋmɛ n tãpɛlʋ.

²² Alɛ so ɩ̃ yere kʋ̀rɛ nyɩ, a ƴɛ̀rʋ-dɩb bibir a, a Tɩ́ɩ̀r nɩ a Sɩdɔ̃ ten dɔwrʋ kʋ̃ ta a nyɩ dem ɛ.

²³ Ɛ́ fʋ̃ʋ, Kafarnawɔm i, fʋ tɩɛrɛ kɛ́ fʋ na do na tɩ tɔ a salom bɩɩ? Fʋ na siwri na tɩ ta a kpɩmɛ tẽw. Bʋ̃ʋ n'ʋ vɛ̃, a nɔ-ɓãa-yele na maalɩ a fʋ zie a, a Sodɔm tẽw tɩ n'a a, ʋ nãá cãà nɩ be nɩ dɩ̃a.

²⁴ Lɛ so, ɩ̃ yere kʋ̀rɛ nyɩ, a ƴɛ̀rʋ-dɩb bibir a, a Sodɔm dɔwrʋ kʋ̃ ta a fʋ dem ɛ.»

Nyɩ wa a ɩ̃ zie wa nyɛ̃ pɩ̃ɛnʋ

²⁵ A lɛn daar, a Yeezu tɩ de nɩ a ƴɛ̀rʋ yel: «Ɩ̃ danɛ fʋ na, ɩ̃ Sãà a, salom nɩ tẽw za Sore e, fʋ na sɔwlɩ a yele á ŋá a yã-bãwnbɛ nɩ a bãw-bãwnbɛ zie, ɛ́ wul a a bibi-cãpili a.

²⁶ Ɩ̃ Sãà a, à ŋá n'a fʋ nɔnɛ k'aa ɩ.»

²⁷ A ɩ̃ Sãà de nɩ bom za kʋ̀ m. Nɩr za bɛ bãw a Bie a bɛ ɩ a Sãà n'ʋ ɛ, ɛ́ nɩr za bɛ bãw a Sãà a bɛ ɩ a Bie n'ʋ ɛ, nɩ ʋlɩ sob a Bie na bɔbr wul ʋ bãw a.

²⁸ Nyɩ wa a ɩ̃ zie, nyɩɩm za na tuo to-tɩbrʋ bàl a, ɩ̃ɩ na kʋ̀ nyɩ nɩ a pɩ̃ɛnʋ.

²⁹ Nyɩ sàw de a ɩ̃ nɩ-kpɛ̃ɛnʋ a nyɩ zu, ɛ́ bɛr ɩ̃ wule nyɩ, ɩ̃ ɩ n soci-baalʋ sob nɩ su-siwra sob, ɛ́ nyɩ na nyɛ̃ nɩ a pɩ̃ɛnʋ.

³⁰ Sɩza, a ɩ̃ nɩ-kpɛ̃ɛnʋ dɩb a nyɩ zu sɩrɩ bɛ 'wɔbr ɛ, ɛ́ a ɩ̃ tuor ɩ zelfel.