Matie 1 - A SƐB-SÕW

A Yeezu Kɩrɩta sãàkʋm-kore

¹ A Yeezu Kɩrɩta, a Daviir bidɛb, a Abraham bidɛb sãàkʋm-kore yée sɛbɛ n'ɩ à ŋà.

² A Abraham tɩ dɔw nɩ Ɩzaakɩ, Ɩzaakɩ dɔw Zakɔb, Zakɔb dɔw Zuda nɩ a ʋ yɛbr.

³ Zuda tɩ páw nɩ Tamaar dɔw Faarɛsɩ nɩ Zaara, Faarɛsɩ dɔw Ɛsɩrɔm, Ɛsɩrɔm dɔw Aram.

⁴ Aram dɔw Amɩnadab, Amɩnadab dɔw Naasɔ̃, Naasɔ̃ dɔw Salmɔ̃.

⁵ Salmɔ̃ tɩ páw nɩ Arahab dɔw Bowaazʋ, Bowaazʋ páw Urutɩ dɔw Ovɛdɩ, Ovɛdɩ dɔw Zese,

⁶ Zese dɔw a nãà Daviir. A nãà Daviir tɩ páw nɩ a Uuri pɔw dɔw Salomɔ̃,

⁷ Salomɔ̃ dɔw Orobowam, Orobowam dɔw Abɩa, Abɩa dɔw Asa,

⁸ Asa dɔw Zuzɛfaar, Zuzɛfaar dɔw Zoram, Zoram dɔw Ozɩasɩ,

⁹ Ozɩasɩ dɔw Zoatam, Zoatam dɔw Akaazɩ, Akaazɩ dɔw Ezekɩasɩ,

¹⁰ Ezekɩasɩ dɔw Manase, Manase dɔw Amɔ̃, Amɔ̃ dɔw Zozɩasɩ,

¹¹ Zozɩasɩ dɔw Zekonɩasɩ nɩ a ʋ yɛbr, a lɛn daar bɛ na tɩ diw a Ɩsɩrayɛl nɩbɛ cen nɩ a Babɩlɔn tẽw a.

¹² A Babɩlɔn tẽw diw-cenu pùorí, Zekonɩasɩ tɩ dɔw nɩ Salatɩɛl, Salatɩɛl dɔw Zorobabɛl,

¹³ Zorobabɛl dɔw Abiyudɩ, Abiyudɩ dɔw Elɩakɩm, Elɩakɩm dɔw Azɔɔr,

¹⁴ Azɔɔr dɔw Sadɔkɩ, Sadɔkɩ dɔw Akɩm, Akɩm dɔw Eliyudɩ,

¹⁵ Eliyudɩ dɔw Eleazaar, Eleazaar dɔw Matan, Matan dɔw Zakɔb,

¹⁶ Zakɔb dɔw a Marya sɩr Zuzɛb, ɛ́ a Marya dɔw a Yeezu bɛ na bʋɔlɛ a Kɩrɩta a.

¹⁷ A na ɩ à ŋá a, a sãàkʋm-kore dɔw-tu-taa ɩ n pie nɩ anaar, a Abraham tɩ tɔ n a Daviir, pie nɩ anaar a Daviir tɩ tɔ n a Babɩlɔn tẽw diw-cenu, pie nɩ anaar a Babɩlɔn tẽw diw-cenu tɩ tɔ n a Kɩrɩta dɔwfʋ.

A Yeezu Kɩrɩta dɔwfʋ yele

¹⁸ À ŋá n'a a Yeezu Kɩrɩta dɔwfʋ tɩ tu. A ʋ mã Marya tɩ ɩ n Zuzɛb ƴãwnɩ-yúor, ɛcɛ bɛ bɛ tɩ lãw kpɛ sɛr ɛ, ɛ́ a Vʋʋrʋ Sõw ɩ a Marya tɛr pʋɔ.

¹⁹ A ʋ sɩr Zuzɛb na tɩ ɩ nɩ-mɩŋa a, ɛ́ bɛ tɩ bɔbr k'ʋʋ wo ʋ a, tɩ yel'a k'ʋʋ na sɔwl'a zawr'ʋ bɛr.

²⁰ À ŋá n'a ʋ tɩ tɩɛrɛ, ɛ́ wa gã zànɩ nyɛ̃ Sore malkɩ ʋ yel ʋ: «Daviir bidɛb Zuzɛb i, ta zɔrɛ dɛ̃bɩ̃ɛ a fʋ pɔw Marya tɛrʋ ƴãw ɛ, a pʋɔ ŋa ʋ na tɛr a yi n Vʋʋrʋ Sõw zie.

²¹ Ʋ na dɔw nɩ dɛble fʋ por a yúor kɛ́ Yeezu, ʋlɛ n'ʋ na faa a ʋ nɩ-bʋʋrɛ a bɛ yel-bebe pʋɔ.»

²² À á ŋá za tɩ ɩ na, k'aa lɛ a Sore na tɩ dãw ƴãw a ʋ ƴɛ̀r-manɛ yel a tu:

²³ «A pɔwsɩrale n'ɩ ŋan na tɛr pʋɔ dɔw dɛble bɛ por a yúor kɛ́ Ɩmanɩɛl, a pɛr lɛ kɛ́: “Ŋmɩn-be-n-tɩ-zie.”»

²⁴ A Zuzɛb na wa ìr a, ʋ tu n a lɛ a Sore malkɩ na tɩ yel kʋ̀ ʋ a, ʋ tɛr'ɩ a ʋ pɔw Marya wa n a ʋ yir.

²⁵ Ɛcɛ ʋ bɛ tɩ bãw ʋ ɛ, ɛ́ gù ʋ tɩ dɔw a dɛble ʋ por a yúor kɛ́ Yeezu.