Markɩ 9 - A SƐB-SÕW1 A Yeezu tɩ cãà na yere kʋ̀rɛ bɛ: «Yel-mɩŋa sɩza, ɩ̃ yere na kʋ̀rɛ nyɩ, a nɩbɛ na be a ka a, bɛ mɩnɛ na nyɛ̃ nɩ a Naaŋmɩn Naalʋ ʋ ta nɩ fãw, ɛ́ bɛ bãw kpi.» A Yeezu niwn lɩɛbʋ ( Mat 17:1-13 , Luk 9:28-36 ) 2 Bibie ayʋɔb pùorí, a Yeezu tɩ tɛr'ɩ Pɩɛr nɩ Zakɩ nɩ Zã do n tã-kpɛ̃ɛ kãw zu bɛ tɛwr zie. Ʋ tɩ lɩɛb'ɩ nɩ-yũo a bɛ niŋé. 3 A ʋ bʋ̃-suuri tɩ pɛlɩ na nyɩwrɛ bɛ tɛr tɔ ɩ. A tɩ pɛlɩ nɩ pɛlʋ kãw bʋʋrɛ, fɔbr-pɛwrɛ kãw za a tẽw zu na kʋ̃ tʋ̃ɔ́ ɩ a pɛlɩ a ɩ. 4 Eli nɩ Moyiir wa sãá nɩ a bɛ zie ƴɛ̀rɛ nɩ a Yeezu. 5 Pɩɛr tɩ yel'ɩ a Yeezu: «Arabi i, a ɩ n vla kɛ́ tɩ be a ka. Tɩ maalɩ pɛnɛ-sɛwr ata: fʋ so been, Moyiir so been, Eli mɩ̀ so been.» 6 Ʋ bɛ tɩ bãw lɛ ʋ na na yel a ɩ, dɛ̃bɩ̃ɛ na tɩ nyɔw ʋlɛ nɩ a ʋ taabɛ ayi bɛl yaga a ƴãw. 7 Zũzuwr tɩ yi na, a ɓaarʋ pàw bɛ, ɛ́ kɔkɔr yire a zũzuwr pʋɔ yere: «A ɩ̃ Bi-nɔna za n'ɩ à ŋà, nyɩ bɛrɛ wone a ʋ ƴɛ̀rʋ.» 8 Daadaalɛ, bɛ piwr'ɩ a be bɛ lɛb nyɛ̃ nɩr za ɩ, a bɛ ɩ a Yeezu yõ nɩ a bɛl tɛwr ɛ. 9 Bɛ na tɩ lɛb yi a tãw zu siwr a, a Yeezu tɩ kpaalɩ bɛ na kɛ́ bɛ taa wa manɛ à á ŋá bɛ na nyɛ̃ a kʋ̀rɛ nɩr za ɩ, ɛ́ gùre a Nɩsaal Bie tɩ lɛb yi a kũuni pʋɔ. 10 Bɛ tɩ sàw nɩ a ʋ nʋɔr, ɛ́ sowre taa kɛ́ bʋ̃ʋ n'ɩ a kũu-pʋɔ-lɛb-yibu ʋ na yere a. 11 Al pùorí, a ʋ po-tuurbɛ tɩ sowre ʋ na: «Bʋ̃ʋ n'ʋ so a Naaŋmɩn wulu sɛ-sɛbrbɛ yere kɛ́ a ɩ n fɛrʋ kɛ́ a Eli wa baarɩ?» 12 Ʋ tɩ sɔw bɛ na: «Yel-mɩŋa n'a, a fɛr'a kɛ́ a Eli de niwn wa, wa maalɩ bom za ƴãw. Ɛcɛ, bʋ̃ʋ ƴãw n'a bɛ sɛb kɛ́ a ɩ n fɛrʋ kɛ́ a Nɩsaal Bie wõ tuo yaga, ɛ́ bɛ ɩ ʋ la? 13 Mãa a, ɩ̃ yere na kʋ̀rɛ nyɩ: a Eli wa na, ɛcɛ bɛ ɩ ʋ nɩ a lɛ za bɛ na bɔbr a, mɛ̃ a lɛ bɛ na sɛb a ʋ ƴãw a.» A Yeezu sanɩ nɩ bie kãw kɔ̃tɔ̃-faa na nyɔw a ( Mat 17:14-21 , Luk 9:37-43a ) 14 Bɛ na tɩ lɛb wa a po-tuurbɛ zie a, bɛ nyɛ̃ nɩ nɩ-yaga bɛ ŋmãa viiri koli bɛ, ɛ́ bɛlɛ nɩ Naaŋmɩn wulu sɛ-sɛbrbɛ ŋmɩɛr nɔkpɛn. 15 A nɩbɛ na wa nyɛrɛ a Yeezu wa báarɛ a, a tɩ ùr'ɩ bɛ za bɛ dɩ vuo ɩ, bɛ zɔrɛ cere kɛ́ bɛ tɩ puor'ʋ. 16 Ʋ tɩ sowr'ɩ a ʋ po-tuurbɛ: «Bʋ̃ʋ nɔkpɛn n'a nyɩɩm nɩ a bɛl ŋmɩɛr?» 17 Nɩr kãw tɩ sɔw nɩ a nɩ-yaga pʋɔ: «Wul-wul-kara a, a ɩ̃ bie n'ʋ kɔ̃tɔ̃-wõw-takpal nyɔw, ɩ̃ tɛr wa n a fʋ zie. 18 Ʋ mɩ́ ìr ʋ nɩ zie za, nyɔw ʋ lɔb tẽw, a bie mɩ́ pu mʋta-puuru ɛ́ 'wɔbr nyɩmɛ, ɛ́ dɛ mɩ́ tãà dɩlaa a. Ɩ̃ zɛlɩ nɩ a fʋ po-tuurbɛ kɛ́ bɛ diw a kɔ̃tɔn ŋa bɛr ʋ, ɛcɛ bɛ bɛ tʋ̃ɔ́ ɩ.» 19 A Yeezu tɩ de nɩ a ƴɛ̀rʋ yel: «Alɛ! Nyɩɩm dɩ̃a nɩbɛ na bɛ sàw de Naaŋmɩn a! Debor daar'a ɩ̃ na be a nyɩ sɔgɔ tɩ ta? Nyɩ bɔbr'a k'ɩ̃ɩ cãà wone nɩ nyɩ a tuo ɛ́ gù debor? Nyɩ tɛr a bie wa kʋ̀ m!» 20 Bɛ tɩ tɛr ʋ na cen nɩ tɩ kʋ̀ ʋ. A kɔ̃tɔn na wa nyɛrɛ a Yeezu wa báarɛ a, ʋ dam'ɩ a bie faa faa, ɩ ʋ lo gã tẽw pu mʋta-puuru bile nɩ. 21 A Yeezu tɩ sowr'ɩ a sãà: «Debor daar'a a tĩ ʋ?» Ʋ sɔw: «A ʋ bibile daarɩ́ za n'a. 22 Gb'aa yaga za, a kɔ̃tɔn tɩ ɓáw ʋ na lɔb ƴãw vũumí bɩɩ kʋ̃ɔmɩ́ k'ʋʋ kʋ ʋ. Fʋ̃ʋ na na tʋ̃ɔ́ ɩ ɩb kãw a, fʋ̃ʋ zɔ tɩ nɩbaalʋ ɛ́ sõw tɩ!» 23 A Yeezu lɛb yel ʋ: «Fʋ̃ʋ na na tʋ̃ɔ́ a yaa? Sob nɛ na tɛr naaŋmɩn-sàw-deb a, bom za mɩ́ tʋ̃ɔ́ nɩ a ʋ zie.» 24 Daadaalɛ, a bie sãà ŋmɛ cɛl yel: «Ɩ̃ sàw na de! Ɛcɛ sõw mɛ̃ ɩ̃ na bɛ tʋɔr sàwr dier vla a!» 25 A Yeezu na tɩ nyɛ̃ a nɩbɛ bɛ zɔrɛ waar wa gbone taa a, ʋ tanɩ nɩ a kɔ̃tɔn yere nɩ: «Kɔ̃tɔ̃-wõw-takpal i, fʋ̃ʋ n'ʋ ɩ̃ yere: yi zaa a bie ŋa pʋɔ, ɛ́ taa lɛb kpɩɛr a ʋ pʋɔ towtow ɛ!» 26 A kɔ̃tɔn tɩ cɩɩr'a, ɛ́ dam a bie yaga ɛ́ yi. A bie tɩ ɩ na mɛ̃ ʋ kpi na a, lɛ n'a a nɩbɛ za tɩ yere: «Ʋ kpi na!» 27 Ɛcɛ a Yeezu tɩ nyɔw ʋ nɩ nũú, ɩ k'ʋ ìr àr. 28 A Yeezu na tɩ lɛb kul a yir a, a ʋ po-tuurbɛ tɩ sowr'ʋ nɩ bɛ tɛwr zie: «Bʋ̃ʋ n'ʋ so a tɩɩm, tɩ bɛ tʋ̃ɔ́ diw a kɔ̃tɔn ŋa?» 29 A Yeezu sɔw bɛ: «Puoru tɛwr'a na tʋ̃ɔ́ ír a kɔ̃tɔn ŋa bʋʋrɛ.» A Yeezu na yel a gb'a ayi sob ƴãw k'ʋʋ na kpi na ɛ́ lɛb yi a ( Mat 17:22-23 , Luk 9:43b-45 ) 30 Bɛ na tɩ yi a be a, bɛ tu na tɔl a Galile tẽw pʋɔ. A Yeezu bɛ tɩ bɔbr k'aa nɩbɛ bãwnɩ a ɩ. 31 Bʋ̃ʋ n'ʋ vɛ̃, ʋ tɩ kanɛ nɩ nɩ a ʋ po-tuurbɛ yere: «Bɛ na nyɔw nɩ a Nɩsaal Bie ƴãw a nɩsaalbɛ nuru pʋɔ, a nɩsaalbɛ na kʋ ʋ na, ɛcɛ bibie ata pùorí, ʋ na lɛb'a yi a kũu pʋɔ.» 32 Ɛcɛ a ʋ po-tuurbɛ bɛ tɩ bãw a ƴɛ̀rʋ ŋa pɛr ɛ, ɛ́ tɩ zɔrɛ dɛ̃bɩ̃ɛ a ʋ sowru ƴãw. Ãa n'ʋ ɩ kpɛ̃ɛ zuo a bɛ za? ( Mat 18:1-5 , Luk 9:46-48 ) 33 Bɛ tɩ ta n a Kafarnawɔm. Bɛ na wa ta a yir a, a Yeezu sowr'ɩ a ʋ po-tuurbɛ: «Bʋ̃ʋ nɔkpɛn n'a nyɩ tɩ ŋmɩɛr a sɔ́r zu?» 34 Ɛcɛ bɛ tɩ ɩ n gbili, bɛ na tɩ ŋmɩɛr a nɔkpɛn a sɔ́r zu kɛ́ bɛ bãw ãa n'ɩ a bɛ za kpɛ̃ɛ a ƴãw. 35 A Yeezu tɩ bʋɔl'ɩ a ʋ Nɩ-toni pie nɩ ayi zɩ̃ nɩ ɛ́ yel bɛ: «Nɩr wa bɔbr k'ʋʋ ɩ a niw-diere a, ʋ ɩ a bɛ za po-pàwrɛ nɩ a bɛ za tõ-tone.» 36 Ʋ tɩ nyɔw nɩ bi-cãpile ƴãw a bɛ sɔgɔ, nyɔw ʋ weri ɛ́ yel bɛ: 37 «Sob nɛ wa de a bibi-cãpile ŋa tɔ sob a ɩ̃ yúor ƴãw a, mãa tɔr za n'ʋ ʋ de, ɛ́ sob nɛ za na de m a, mãa bɛ n'ʋ ʋ de ɩ, a ʋlɩ sob na tõ m a n'ʋ ʋ de.» Ʋlɩ sob na bɛ ɩ a tɩ dɔ̃ sob a lãw nɩ tɩ na ( Luk 9:49-50 ) 38 Zã tɩ yel'ɩ a Yeezu: «Wul-wul-kara a, tɩ nyɛ̃ nɩ nɩr kãw ʋ pore a fʋ yúor diwr'ɩ kɔ̃tɔmɛ, ɛ̀ tɩ tɩ bɔbr kɛ́ tɩ diw ʋ bɛr, ʋ na bɛ pʋɔ a tɩ pʋɔ tuur fʋ a ƴãw.» 39 Ɛcɛ a Yeezu tɩ sɔw na: «Nyɩ ta diwr ʋ bɛrɛ ɩ, nɩr za kʋ̃ tʋ̃ɔ́ maalɩ nɔ-ɓãa-yel a ɩ̃ yúor ƴãw, ɛ́ a pùorí ʋ lɛb sãwnɛ a ɩ̃ yúor a pɛr nɛ pʋɔ ɩ. 40 Ʋlɩ sob na bɛ ɩ a tɩ dɔ̃ sob a, lãw nɩ tɩ na. 41 Ɛ́ sob nɛ za nãà wa kʋ̀ nyɩ ŋmale pʋɔ kʋ̃ɔ, nyɩ na ɩ kɩrɩta-nɩbɛ a ƴãw a, yel-mɩŋa sɩza, ɩ̃ yere na kʋ̀rɛ nyɩ, ʋ kʋ̃ guu a ʋ sã-ya ɩ.» Nyɩ gùre nyɩ mɩŋa ( Mat 18:6-9 , Luk 17:1-2 ) 42 «Ʋlɩ sob wa ɩ a bibi-cãpili bɛ ŋa kãw, na sàw de a ɩ̃ yele a, ʋ lo a yel-bier pʋɔ a, bɛlɛ de kʋsɛ-kpɛ̃ɛ 'lẽ ƴãw ʋ kɔkɔrɩ́ ɛ́ dáa ʋ lɔb ƴãw kʋ̃ɔ-kpɛ̃ɛ pʋɔ a, alɛ sa. 43 A fʋ nũu wa tawr fʋ ƴãwn yel-bier pʋɔ a, ŋmãa ʋ bɛr. Fʋ na na kpɛ a nyɔ-vʋʋrʋ na be kʋralɛ a pʋɔ nɩ a nũ-ŋmãa a, alɛ sa fʋ na na tɛr a fʋ nuru a za ayi cen nɩ a tẽ-faa pʋɔ, a vũu na bɛ kpiire a pʋɔ a. [ 44 A be a, a zãzule bɛ tɛr kũu daar ɛ, ɛ́ a vũu bɛ tɛr kpiiru daar ɛ.] 45 A fʋ gbɛ́r wa tawr fʋ ƴãwn yel-bier pʋɔ a, ŋmãa ʋ bɛr, fʋ na na kpɛ a nyɔ-vʋʋrʋ na be kʋralɛ a pʋɔ nɩ a gbɛ-gãw a, alɛ sa bɛ na na lɔb fʋ ƴãw a tẽ-faa pʋɔ nɩ a fʋ gbɛɛ a za ayi a. [ 46 A be a, a zãzule bɛ tɛr kũu daar ɛ, ɛ́ a vũu bɛ tɛr kpiiru daar ɛ.] 47 Ɛ́ a fʋ mimir wa n'ʋ tawr fʋ ƴãwn a yel-bier pʋɔ a, 'lòw ʋ ír bɛr. Fʋ na na kpɛ a Naaŋmɩn Naalʋ pʋɔ nɩ mimi-fɩɔ a, alɛ sa bɛ na na lɔb fʋ ƴãw a tẽ-faa pʋɔ nɩ a fʋ mimie a za ayi a, 48 be zãzule na bɛ tɛr kũu daar, ɛ́ vũu mɩ̀ bɛ tɛr kpiiru daar a. 49 Bʋ̃ʋ n'ʋ vɛ̃, bɛ na ƴãw nɩ vũu nyaarʋ nɩsaal za ƴãw. 50 A nyaarʋ ɩ n bʋ̃-nʋ̃ɔ̀, ɛcɛ a nyaarʋ nʋ̃ɔ̀ wa yi a, bʋ̃ʋ n'a nyɩ na ƴãw a lɛb nʋmɛ? Nyɩ tɛr nyaarʋ a nyɩ pʋ̃ɔmɩ, ɛ́ ɩrɛ ƴã-ɓaarʋ ɩb kʋ̀rɛ taa.» |
La Bible en Dagara © Alliance Biblique du Burkina Faso, 2013.
Bible Society of Burkina Faso