Markɩ 8 - A SƐB-SÕW

A Yeezu guol'ɩ nɩbɛ túr-anaar

¹ A alɩ bibie nɛ pʋɔ, nɩ-yaga tɩ lɛb'a gbõ taa a Yeezu zie, ɛ́ bɛ tɩ tɛr bʋ̃-dɩrɩ ɛ. Lɛ n'a a Yeezu tɩ bʋɔlɩ a ʋ po-tuurbɛ wa yel bɛ:

² «A nɩbɛ bɛ ŋa ɩrɛ mɛ̃ nɩ nɩbaalʋ, bibie ata n'ɩ à ŋá bɛ na be a ɩ̃ zie a, ɛ́ bɛ cãà tɛr bʋ̃-dɩra za a.

³ Mãa wa bɛr bɛ bɛ kule nɩ a kɔ̃ a, bɛ na lo n a sɔ́r zu, bɛ mɩnɛ yi n zi-zãána wa.»

⁴ A po-tuurbɛ tɩ sɔw ʋ na: «Nyɩnɛ n'a nɩr na páw dipɛ̃ a wɛja pʋɔ ka kʋ̀ bɛ bɛ dɩ tɩw?»

⁵ A Yeezu tɩ sowri bɛ na: «Dipɛ̃ a ŋmɩn n'a nyɩ tɛr?» Ɛ̀ bɛ sɔw: «Ayopõi!»

⁶ Lɛ n'a ʋ tɩ ƴãw kɛ́ a nɩbɛ zɩ̃ tẽw. Al pùorí ʋ tɩ de nɩ a dipɛ̃ ayopõi al, puori a Naaŋmɩn barka ɛ́ ŋma põ kʋ̀ a ʋ po-tuurbɛ kɛ́ bɛ de põ a nɩbɛ. Ɛ̀ bɛ de põ a nɩbɛ.

⁷ Bɛ mɩ̀ tɩ tɛr'ɩ zʋm-bili blã. A Yeezu tɩ maalɩ a na, ɛ́ yel kɛ́ a po-tuurbɛ mɩ̀ de põ a nɩbɛ.

⁸ A nɩbɛ tɩ dɩ na tɩw, ɛ́ bɛ wob a ŋmaarɛ paalɩ peli ayopõi kul'ɩ.

⁹ Ɛcɛ bɛ tɩ ta n nɩbɛ túr-anaar (4 000). A al pùorí, a Yeezu bɛr bɛ na bɛ kule.

¹⁰ Ɛ́ daadaalɛ ʋ kpɛ a gbor pʋɔ nɩ a ʋ po-tuurbɛ cere Dalmanuta tẽw lowr.

A Faarizɩ̃ɛ mɩnɛ bɔbr'ɩ bãwfʋ na yi Naaŋmɩn zie a

¹¹ A Faarizɩ̃ɛ mɩnɛ tɩ wa na wa tĩ ŋmɩɛr'ɩ a Yeezu nɔkpɛn. Bɛ na tɩ bɔbr kɛ́ bɛ ɩ ʋ kaa a, bɛ tɩ yel'a k'ʋʋ wul bãwfʋ na yi Naaŋmɩn zie a.

¹² A Yeezu vʋʋrɩ fãaa, ɛ́ yel: «Bʋ̃ʋ n'ʋ so a dɩ̃a nɩbɛ bɛ ŋa bɔbr kɛ́ bɛ nyɛ̃ bãwfʋ? Yel-mɩŋa n'a ɩ̃ yere kʋ̀rɛ nyɩ, a dɩ̃a nɩbɛ bɛ ŋa bɛ nyɛrɛ bãwfʋ been kãw za ɩ.»

¹³ Lɛ n'a ʋ tɩ bɛr bɛ, ɛ́ lɛb do kpɛ a gbor gãwnɛ a gãwn ŋa.

A Yeezu kpãanɛ nɩ a ʋ po-tuurbɛ

¹⁴ A po-tuurbɛ tɩ yiiri nɩ a dipɛ̃ deb: dipɛ̃-been yõ n'ʋ bɛ tɩ tɛr a gbor pʋɔ.

¹⁵ A Yeezu tɩ kpãanɛ bɛ na yere: «Nyɩ gùre nyɩ tʋɔra a Faarizɩ̃ɛ mɩnɛ nɩ a Erɔdɩ dãbɩl ƴãw.»

¹⁶ A ʋ po-tuurbɛ tɩ ŋmɩɛr'ɩ nɔkpɛn a bɛ cara pʋɔ, a dipɛ̃ bɛ na bɛ tɩ tɛr a ƴãw.

¹⁷ A Yeezu na tɩ bãwnɩ a, ʋ sowri bɛ na: «Bʋ̃ʋ n'ʋ so nyɩ ŋmɩɛr a nɔkpɛn nyɩ na bɛ tɛr a dipɛ̃ a ƴãw? Nyɩ cãà bɛ bãw a pɛr sɛr ɛ? Nyɩ cãà bɛ nyɛrɛ ɩ? A nyɩ yã cãà bɛ yuo ɩ?

¹⁸ Nyɩ tɛr'ɩ mimie, nyɩ bɛ nyɛrɛ ɩ? Nyɩ tɛr'ɩ tobe, nyɩ bɛ wone ɩ? Nyɩ tɩɛrɩ nyɛ̃,

¹⁹ ɩ̃ na tɩ ŋma a dipɛ̃ anũu a nɩbɛ túr-anũu (5 000) ƴãw a, peli a ŋmɩn n'a nyɩ tɩ wob a ŋmaarɛ paalɩ?» Ɛ̀ bɛ sɔw: «Pie nɩ ayi!»

²⁰ «Ɩ̃ɩ na tɩ ŋma a dipɛ̃ ayopõi a nɩbɛ túr-anaar (4 000) ƴãw a, peli a ŋmɩn n'a nyɩ tɩ wob a ŋmaarɛ paalɩ?» Ɛ̀ bɛ sɔw: «Ayopõi!»

²¹ Lɛ n'a a Yeezu lɛb yel bɛ: «Nyɩ cãà bɛ bãw a pɛr ɛ?»

A Yeezu sanɩ nɩ zɔ̃w Bɛtɩsayida tẽw

²² Bɛ tɩ ta n a Bɛtɩsayida tẽw. Nɩbɛ tɩ tɛr'ɩ zɔ̃w wa n wa zɛlɛ yãayãa kɛ́ a Yeezu tɔ ʋ.

²³ A Yeezu tɩ nyɔw nɩ a zɔ̃w nũú, taw ʋ yi n a tẽw pʋɔ, tɩ ɩ mʋtaar sɔ ʋ a mimie, ɛ́ ír nuru dɔwlɩ a ʋ zu ɛ́ sowr'ʋ: «Fʋ nyɛ̃ nɩ bom ɩ?»

²⁴ A zɔ̃w yuo a mimie ɛ́ yel: «Ɩ̃ nyɛ̃ nɩ a nɩbɛ, ɩ̃ nyɛ̃ bɛ na bɛ ɩ mɛ̃ tɩrʋ a, ɛcɛ bɛ cere na!»

²⁵ A Yeezu tɩ lɛb'a ír nuru tɔ n a nɩr nɛ mimie, ʋʋ nyɛrɛ vla vla, ʋ tɩ sanɩ na, mɩ́ nyɛ̃ a bom za vla.

²⁶ Lɛ n'a a Yeezu tɩ bɛr ʋ sɔ́r k'ʋʋ kule ɛ́ yel ʋ: «Taa wa kpɩɛr a tẽw pʋɔ mɩ̀ ɛ!»

A Pɩɛr na yel kɛ́ a Yeezu n'ɩ a Naaŋmɩn Nɩ-kabra a

²⁷ A Yeezu nɩ a ʋ po-tuurbɛ tɩ cere nɩ a teli al na pɩɛlɩ a Filib tẽw Sezaare a. Ʋ tɩ sowri bɛ nɩ a sɔ́r zu: «A nɩsaalbɛ yere na kɛ́ ãa nɛ m?»

²⁸ Bɛ tɩ sɔw na: «Nɩbɛ bɛ mɩnɛ yere na kɛ́ Zã-Bati nɛ b, bɛ mɩnɛ yere kɛ́ Eli nɛ b, bɛ mɩnɛ yere kɛ́ naaŋmɩn-ƴɛ̀r-manɛ kãw nɛ b!»

²⁹ Ʋ tɩ lɛb'a sowri bɛ: «Ɛ́ a nyɩɩm, nyɩ yel kɛ́ ãa nɛ m?» Pɩɛr tɩ de nɩ a ƴɛ̀rʋ sɔw: «Fʋ̃ʋ n'ɩ a Nɩ-kabra!»

³⁰ A Yeezu tɩ kpãa bɛ nɩ kpɛ̃w kpɛ̃w za, kɛ́ bɛ taa ƴɛ̀rɛ a ʋ ƴɛ̀rʋ kʋ̀rɛ nɩr za ɩ.

A Yeezu na dãw de niwn yel a ʋ kũu nɩ a ʋ kũu-pʋɔ-lɛb-yibu a

³¹ Al pùorí, a Yeezu tɩ tĩ na kanɛ nɩ a ʋ po-tuurbɛ, kɛ́ a fɛr'a a Nɩsaal Bie wõ tuo yaga, kɛ́ a fɛr'a a Zifʋ mɩnɛ Nɩ-kore nɩ a bàwr-maal-nɩ-bɛrɛ nɩ a Naaŋmɩn wulu sɛ-sɛbrbɛ zawr'ʋ bɛr, kɛ́ a fɛr'a bɛ kʋ ʋ, ɛcɛ a bibie ata pùorí ʋ lɛb yi a kũu pʋɔ.

³² Ʋ tɩ yere nɩ à á ŋá za kʋ̀rɛ bɛ cãàmɩlɛ. Lɛ n'a a Pɩɛr tɩ taw ʋ yi n pùor tɩ nyɔw ʋ yere.

³³ Ɛcɛ a Yeezu tɩ lɩɛb'a jɩ́r a ʋ po-tuurbɛ kaa ɛ́ tanɩ a Pɩɛr: «Cen taw zaa a ɩ̃ zie, Sɩtaana a, a fʋ tɩɛrʋ bɛ ɩ Naaŋmɩn tɩɛrʋ ɛ, nɩsaalbɛ dem'a!»

³⁴ Al pùorí, ʋ tɩ bʋɔl'ɩ a zu-sɛbla nɩ a ʋ po-tuurbɛ wa yel bɛ: «Nɩr wa bɔbr k'ʋʋ tuur mɛ̃ a, a fɛr'a k'ʋʋ ta tɩɛrɛ a ʋ mɩŋa yele ɩ, ʋ ɓáw a ʋ da-gara tuo tuur'ɩ mɛ̃.

³⁵ Bʋ̃ʋ n'ʋ vɛ̃, nɩr wa bɔbr ʋ tʋɔra nyɔ-vʋʋrʋ faafʋ a, ʋ na bɔr ʋ na bɛr, ɛ́ nɩr wa bɔr a ʋ nyɔ-vʋʋrʋ bɛr a mãa nɩ a Yel-nʋ̃ɔ̀ ƴãw a, ʋ na faa ʋ na.

³⁶ Bʋ̃ʋ tɔnɛ n'a a nɩsaal na nyɛ̃, ʋlɛ wa páw a tẽ-daa, ɛ́ a ɩ a ʋ nyɔ-vʋʋrʋ n'ʋ ʋ de da n a?

³⁷ Bʋ̃ʋ n'ʋ a nɩsaal na tʋ̃ɔ́ ya de nɩ a ʋ nyɔ-vʋʋrʋ?

³⁸ Nɩr wa zɔrɛ a mãa nɩ a ɩ̃ ƴɛ̀r-bie vĩ, a dɩ̃a nɩbɛ sɔgɔ na bɛ tu Naaŋmɩn ɛ́ ɩrɛ ɩ-faar a, a Nɩsaal Bie mɩ̀ na zɔ n a sob nɛ vĩ, a lɛn daar ʋ nãà wa wa a ʋ Sãà yúor-vɩɛlʋ-danʋ pʋɔ, ʋlɛ nɩ a malkɩ son a.»