Markɩ 7 - A SƐB-SÕW

A sãàkʋm-kore ɩ-ɩrɩ tub yele

¹ A Faarizɩ̃ɛ mɩnɛ nɩ a Naaŋmɩn wulu sɛ-sɛbrbɛ bɛ mɩnɛ, na tɩ yi a Zerizalɛm wa a, tɩ ɓã n taa a Yeezu zie.

² Bɛ tɩ nyɛ̃ nɩ a ʋ po-tuurbɛ bɛ mɩnɛ bɛ dɩrɛ a bɛ bʋ̃-dɩrɩ nɩ nũ-dɛgɛ, a pɛr lɛ kɛ́ bɛ bɛ pɛ́w a nuru mɛ̃ a lɛ a Zifʋ mɩnɛ puoru nʋɔr na bin a ɩ.

³ Bʋ̃ʋ n'ʋ vɛ̃, a Faarizɩ̃ɛ mɩnɛ nɩ a Zifʋ mɩnɛ za tuur'ɩ a sãàkʋm-kore tub: bɛ bɛ dɩrɛ bom, ɛ́ bɛ dãw de niwn pɛ́w a nuru vla ɩ,

⁴ ɛ́ bɛlɛ wa yi dàa pʋɔ wa kpɛ a, bɛlɛ bɛ wa so kʋ̃ɔ a, bɛ bɛ dɩrɛ ɩ. A bɛ sãàkʋm-kore ɩ-ɩrɩ a mɩnɛ bɛ na cãà tuur a, a yãwmɛ na: mɛ̃ a koli-nyúuri nɩ a ku-labɛ nɩ a ziduwli pɛwfʋ, mɛ̃ a lɛ a na fɛr kɛ́ bɛ mɩ́ pɛ́w a.

⁵ Lɛ n'a a Faarizɩ̃ɛ mɩnɛ nɩ a Naaŋmɩn wulu sɛ-sɛbrbɛ bɛ ŋa tɩ sowri a Yeezu: «Bʋ̃ʋ n'ʋ so a fʋ po-tuurbɛ bɛ tuur a sãàkʋm-kore ɩ-ɩrɩ ɛ́ mɩ́ dɩrɛ nɩ nũ-dɛgɛ?»

⁶ Ʋ sɔw yel bɛ: «Nyɩɩm nɩsaal-libelibe bɛ ŋa! A nyɩ ƴãw n'a a naaŋmɩn-ƴɛ̀r-manɛ Ɩzayi tɩ dãw ƴɛ̀r a ƴɛ̀r-bie á ŋá bɛ na sɛb a: “Nʋɔr tɛwr'ʋ a nɩbɛ bɛ ŋa ƴãwnɛ nɩ mɛ̃, ɛcɛ a bɛ socie zãá nɩ mɛ̃ na.

⁷ A bɛ puoru bɛ na puore mɛ̃ a, bɛ tɛr pɛr ɛ, a wulu bɛ na wule a nɩbɛ a, tu n nɩsaalbɛ nɛ́ɛ tɛwr bɛ na ƴãw a.”

⁸ Nyɩ mɩ́ vɩrɩ nɩ a Naaŋmɩn nɔ-ƴãwna bɛr kõkowrí, ɛ́ fɩɩrɩ a nɩsaalbɛ sãàkʋm-kore ɩ-ɩrɩ tɛr.»

⁹ Ʋ tɩ yel'a ƴãw pʋɔ: «Nyɩ sʋ̃ɔm'a bul zawrɩ a Naaŋmɩn nɔ-ƴãwna bɛr ɛ́ tuur a nyɩ ɩ-ɩrɩ.

¹⁰ A Moyiir yel'a: “Ƴãwnɛ a fʋ sãà nɩ a fʋ mã.” Lɛ nɩ kɛ́: “Nɩr wa tʋ a ʋ sãà bɩɩ a ʋ mã a, a fɛr'a k'ʋʋ kpi.”

¹¹ Ɛ́ nyɩɩm mɩ́ yel: “Nɩr wa yel a ʋ sãà bɩɩ a ʋ mã: a alɩ bome nɛ za ɩ̃ nãá sõw nɩ fʋ a, ɩ n kɔrban”, a pɛr lɛ kɛ́ Naaŋmɩn bàwr-maal-bom a,

¹² nyɩ mɩ́ sàw na k'ʋʋ ta lɛb ɩ bom za kʋ̀ a ʋ sãà bɩɩ a ʋ mã ɩ.

¹³ À ŋá n'a nyɩ mɩ́ zawrɩ a Naaŋmɩn ƴɛ̀rʋ, ɛ́ tu a nyɩ sãàkʋm-kore ɩ-ɩrɩ nyɩ na lʋɔrɛ kʋ̀rɛ taa wa tɔ a dɩ̃a a. A yele á ŋá taabɛ yaga n'a nyɩ cãà maalɛ.»

A alɩ bome nɛ na waar'ɩ dɛwr a nɩsaal zie a

¹⁴ A al pùorí, a Yeezu tɩ lɛb'a bʋɔlɩ a zu-sɛbla wa yel bɛ: «Nyɩ ƴãw tobr nyɩ za, ɛ́ bãw a yel ŋa pɛr vla:

¹⁵ bom za na yi yẽw kpɩɛr a nɩsaal pʋɔ a, bɛ dɛwr ʋ ɛ, a al na yire a nɩsaal pʋɔ a, alɛ n'a dɛwr a nɩsaal.» [

¹⁶ Sob nɛ na tɛr tobe wob ƴãw a, ʋ bɛrɛ wone.]

¹⁷ A Yeezu na wa bɛr a nɩbɛ ɛ́ lɛb kul a yir a, a ʋ po-tuurbɛ tɩ sowre ʋ nɩ a zʋkpar ŋa pɛr.

¹⁸ Ʋ tɩ yel bɛ na: «A nyɩɩm mɩ̀, nyɩ cãà bɛ bãw a pɛr ɛ? Nyɩ bɛ bãw kɛ́ bom za na yi yẽw kpɩɛr a nɩsaal pʋɔ a, kʋ̃ tʋ̃ɔ́ dɛw a nɩsaal ɛ?

¹⁹ A al bɛ kpɩɛr a ʋ socir pʋɔ ɩ, púorí n'a a siwr tɩ cãà tɔlɛ yire a sɩmanɩ́!» À ŋá n'a ʋ tɩ yel kɛ́ ciiru bɛ ka bʋ̃-dɩra kãw za ƴãw ɛ.

²⁰ Ʋ tɩ yere na: «Alɩ bome nɛ na yire a nɩsaal pʋ̃ɔmɩ a, alɛ n'a dɛwr a nɩsaal.

²¹ Sɩza n'a, a nɩsaal pʋ̃ɔmɩ, a ʋ socir pʋɔ n'a a tɩɛr-faar za mɩ́ yi: a nɩ-fa-ɩb, a nyãnyuwlu, a nɩbɛ kʋb,

²² a pɔw-gaa-yel-bier, a tɛra nɔ̃w-zuo, a po-tuolu, a nɩsaal-libelibe ɩb, a pɩ̃ɔ-yele, a nyuur, a zʋmɛ, a pɔ̀lʋ, a dãbolu.

²³ A yel-faar á ŋá za a, a nɩsaal pʋ̃ɔmɩ n'a a mɩ́ yi dɛwr a nɩsaal.»

Pɔw kãw sàw na de a Yeezu yele

²⁴ A Yeezu tɩ yi n a be, ɛ́ cen a Tɩ́ɩ̀r tẽw lowr. Ʋ tɩ kpɛ n yir kãw pʋɔ, ɛ́ bɛ tɩ bɔbr kɛ́ nɩr bãwnɩ a ɩ. Ɛcɛ ʋ bɛ tɩ tʋ̃ɔ́ sɔwlɩ ɛ.

²⁵ Pɔw kãw, kɔ̃tɔ̃-faa na tɩ nyɔw a pɔwyaa a, tɩ wõ n a Yeezu yele. Ʋ tɩ wa n daadaalɛ wa lo gbĩ dume a ʋ pile.

²⁶ A pɔw nɛ bɛ tɩ ɩ Zifʋ bʋʋrɛ nɩr ɛ, Siiro-Fenisi tẽw n'a ʋ tɩ dɔw. Ʋ tɩ zɛlɛ na k'aa Yeezu diw a kɔ̃tɔ̃-faa bɛr a ʋ pɔwyale zie.

²⁷ Ɛcɛ a Yeezu tɩ yel ʋ na: «Bɛr a bibiir bɛ dɩ tɩw baarɩ, a bɛ sɛw kɛ́ bɛ de a bibiir bʋ̃-dɩrɩ lɔb ƴãw bali ɛ.»

²⁸ A pɔw tɩ sɔw ʋ na: «Sɩza n'a Sore e, ɛcɛ a bali mɩ́ gã nɩ a bibiir pile wobr a bɛ bʋ̃-dɩ-ŋmaarɛ na lore a.»

²⁹ Lɛ n'a a Yeezu lɛb yel ʋ: «A fʋ ƴɛ̀r-bir ŋa ƴãw, kule, a kɔ̃tɔn yi na ɛ́ bɛr a fʋ pɔwyaa.»

³⁰ Ʋ tɩ lɛb'a kul tɩ nyɛ̃ a bie ʋ gã a gado zu. A kɔ̃tɔ̃-faa tɩ yi na ɛ́ bɛr ʋ.

A Yeezu sanɩ nɩ wõw-takpal kãw

³¹ Al pùorí, a Yeezu tɩ yi n a Tɩ́ɩ̀r tẽw lowr, tu Sɩdɔ̃ tẽw lowr kpɛ tɔl a Dekapol vuo pʋɔ lɛb wa a Galile kʋ̃ɔ-kpɛ̃ɛ lowr.

³² Nɩbɛ kãw tɩ tɛr'ɩ wõw na bɛ tʋɔr ƴɛ̀rɛ a, wa n a ʋ zie wa zɛlɛ yãayãa k'ʋʋ ír nũu dɔwlɩ a ʋ zu.

³³ A Yeezu tɩ tɛr ʋ na yi n bɛ tɛwr zie zãá nɩ a nɩbɛ, tɩ ír a ʋ nobie tõ a nɩr nɛ tobe pʋɔ, ɛ́ ɩ a ʋ mʋtaar tɔ n a ʋ zɛl.

³⁴ Al pùorí, ʋ úori kaa a salom, ɛ́ vʋʋrɩ fãaa, ɛ́ yel: «Ɛfata!» a pɛr lɛ kɛ́: «Yuo fʋ tʋɔra!»

³⁵ Daadaalɛ, a ʋ tobe tɩ yuo na, ɛ́ a ʋ zɛl cɛ̀r ʋ ƴɛ̀rɛ welwel.

³⁶ A Yeezu tɩ kpãa bɛ na kɛ́ bɛ taa wa pore a yúor kʋ̀rɛ nɩr za ɩ. Ɛcɛ a lɛ ʋ na tɩ kpãanɛ bɛ a, lɛ tɔr za n'a bɛ mɩ́ tɩ manɛ a yel ŋa a ziir za.

³⁷ Nʋɔr tɩ ɓãá bɛ nɩ yaga bɛ yere: «Ʋ maal'ɩ a yele za vla. Ʋ ɩrɛ na a won wone, ɛ́ a wõw-takpalɛ ƴɛ̀rɛ.»