Markɩ 5 - A SƐB-SÕW

A Yeezu na sanɩ a Zerazenɩ̃ɛ mɩnɛ tẽw kɔ̃tɔ̃-ìre kãw a

¹ Bɛ tɩ ta n a Galile kʋ̃ɔ-kpɛ̃ɛ gãwn ŋa lowr, a Zerazenɩ̃ɛ mɩnɛ tẽw.

² A Yeezu na tɩ yire a gbor pʋɔ wa báarɛ a, daadaalɛ, nɩr kãw kɔ̃tɔ̃-faa na nyɔw a, tɩ yi n yarʋ pʋɔ tuore ʋ.

³ Ʋ tɩ kpɩɛr'ɩ yarʋ bɔwrɩ pʋɔ ɛ́ nɩr za bɛ mɩ́ lɛb cãà tʋ̃ɔ́ nyɔw ʋ 'lẽ ɩ, alɛ saa ɩ bamɛ n'a a.

⁴ Gb'aa yaga za, bɛ tɩ ƴãw ʋ nɩ kpule ɛ́ 'lẽ a ʋ nuru nɩ bamɛ, ɛcɛ ʋ mɩ́ tɩ taw nɩ a za ŋma, ɛ́ nɩr za bɛ tɩ tʋɔr ʋ ɛ.

⁵ Kʋrakʋralɛ, mʋ̃tɔ̃w nɩ tɩ̃ɩsɔw za, ʋ mɩ́ tɩ be n a yarʋ bɔwrɩ pʋɔ nɩ a tan pʋɔ, ŋmɩɛr cɛlsɩ ɛ́ wɛrɛ ʋ tʋɔra nɩ kʋsɛbɛ.

⁶ Ʋ na tɩ cãà zãá ɛ́ nyɛ̃ a Yeezu a, ʋ zɔ na wa lo gbĩ dume a ʋ niŋé.

⁷ Ʋ tɩ cɩɩr'ɩ kpɛ̃w za yel: «Naaŋmɩn-na-do-saa-bɛ-pɩɛl-a Bie, Yeezu u, mãa nɩ fʋ̃ʋ mɩ̀ bʋnʋ? Ɩ̃ zɛlɛ fʋ nɩ yãayãa, a Naaŋmɩn yúor ƴãw, taa dɔwrɛ mɛ̃ ɩ.»

⁸ A Yeezu na tɩ yel ʋ: «Yi zaa a nɩr ŋa pʋɔ, kɔ̃tɔ̃-faa a!», alɛ n'a so ʋ tɩ ƴɛ̀r à à ŋá.

⁹ A Yeezu tɩ sowr'ʋ na: «A fʋ yúor dɩ na kɛ́ bo?» Ʋ sɔw: «Ɩ̃ yúor dɩ na kɛ́: “Bɛ-tɛr-nʋɔr”, tɩ na yãwmɛ a ƴãw.»

¹⁰ Ʋʋ tɩ zɛlɛ ʋ nɩ yãayãa za, k'ʋʋ ta diw bɛ bɛr a tẽw pʋɔ ɩ.

¹¹ Zɩ̃ kɛ́ dobaar na bɛ tɛr vuo a tɩ àr'ɩ a tãw ƴãw be bɔbr a bʋ̃-dɩrɩ.

¹² A kɔ̃tɔ̃-faar tɩ zɛlɛ nɩ a Yeezu yãayãa yere nɩ: «Ƴãw tɩ cen a dobaar á ŋá zie tɩ kpɛ a pʋɔ.»

¹³ Ʋ tɩ kʋ̀ a nɩ sɔ́r. A tɩ yi na tɩ kpɛ a dobaar pʋɔ. A lɛ n'a a dobaar za, na tɩ ta túr-ayi a, tɩ yi a tãw na ɩ cũgbulu a zu, ɛ́ dãw taa tɩ lo a kʋ̃ɔ-kpɛ̃ɛ pʋɔ tu kʋ̃ɔ.

¹⁴ A doba-cɩ̃ɩnbɛ tɩ zɔ na kul tɩ manɩ a yel ŋa kʋ̀ a nɩbɛ a tẽw pʋɔ nɩ a gue pʋɔ, ɛ̀ bɛ zɔ cen kɛ́ bɛ tɩ nyɛ̃.

¹⁵ Bɛ tɩ wa n a Yeezu zie, wa nyɛ̃ a kɔ̃tɔ̃-ìre ʋl na tɩ dãw tɛr a kɔ̃tɔ̃-faar yaga bɛ tɛr nʋɔr a, ʋ zɩ̃ su bome ɛ́ lɛb bãw yã. Dɛ̃bɩ̃ɛ tɩ kpɛ bɛ na.

¹⁶ A bɛlɩ dem na tɩ nyɛ̃ a lɛ a yele na ɩ a, tɩ man na kʋ̀ a nɩbɛ a lɛ a na tɩ ɩ a kɔ̃tɔ̃-ìre zie nɩ a dobaar zie a.

¹⁷ Lɛ n'a a nɩbɛ tɩ nyɔw zɛlʋ a Yeezu zie, zɛlɛ ʋ yãayãa k'ʋʋ yi zaa a bɛ tẽw pʋɔ.

¹⁸ A Yeezu na tɩ kpɩɛr a gbor pʋɔ a, a sob nɛ na tɩ dãw ìre a kɔ̃tɔmɛ a, tɩ zɛlɛ ʋ nɩ yãayãa, k'ʋʋ sàw ʋ be a ʋ zie.

¹⁹ A Yeezu bɛ tɩ sàw ɛ, ɛ́ yel ʋ: «Lɛb kul a fʋ yir, a fʋ yir nɩbɛ zie, tɩ manɩ a yele al za a Sore na maalɩ kʋ̀ b a ʋ su-ɓaarʋ pʋɔ a.»

²⁰ A nɩr ʋl tɩ lɛb'a kul tɩ nyɔw a manʋ, manɩ pàw a Dekapol vuo ʋl pʋɔ, a yele al za a Yeezu na tɩ maalɩ a ʋ ƴãw a. A tɩ ɩ n nɔ-ɓãan a nɩbɛ za zie.

A Yeezu sanɩ nɩ pɔw kãw ɛ́ sɩ̃w Zayiir pɔwyale na tɩ kpi a

²¹ A Yeezu na tɩ lɛb kpɛ a gbor gãw a kʋ̃ɔ-kpɛ̃ɛ a, nɩ-yaga tɩ gbõ n taa ŋmãa viiri koli ʋ, ʋʋ tɩ àr a kʋ̃ɔ-kpɛ̃ɛ nʋɔr.

²² Puoru-dĩo nɩ-kpɛ̃ɛ kãw, bɛ na bʋɔlɛ kɛ́ Zayiir a, tɩ ta na. Ʋ na tɩ nyɛ̃ a Yeezu a, ʋ lo na gbĩ dume a ʋ pile,

²³ ɛ́ zɛlɛ ʋ yãayãa za yere nɩ: «Ɩ̃ pɔwyale ŋmaar'ɩ vʋʋrʋ, wa ír nuru dɔwlɩ a ʋ zu, ʋ tʋ̃ɔ́ nyɛ̃ a faafʋ ɛ́ ta kpi ɛ.»

²⁴ A Yeezu tɩ páw ʋ na cere. Nɩ-yaga yaga tɩ tuur'ɩ a Yeezu, ɛ́ tɩ fɩɩrɛ ʋ a ziir za.

²⁵ Pɔw kãw tɩ be n be, a sɩɛ cire tɩ maalɩ yome pie nɩ ayi, ɛ́ a zɩ̃ɩ cãà bɛ ŋmãa ɩ.

²⁶ Ʋ tɩ wõ n tuo yaga a tɩ̃ɩnɩ dem zie, sãw nɩ a ʋ libie za bɛr ɛ́ a cãà bɛ tɛr saba ɩ, ɛ́ a bàalʋ nɩ̃ɛ lɛb bãw kpɛ faa.

²⁷ Ʋ na tɩ wõ a Yeezu yele a, ʋ yi n a pùorí, a nɩ-yaga pʋɔ luwluw wa tɔ a Yeezu kparʋ.

²⁸ Ʋ tɩ tɩɛr'ɩ ʋ pʋɔ: «Mãa ɩ mɛ̃ ɩ̃ tʋ̃ɔ́ na tɔ a ʋ bʋ̃-suuri tɛwr'a, ɩ̃ na sanɩ na.»

²⁹ A ʋlɩ pɛr nɛ pʋɔ, a ʋ zɩ̃ɩ na tɩ cire a tɩ ŋmãa na, ʋʋ nyɛ̃ bãw k'ʋʋ sanɩ na.

³⁰ Daadaalɛ, a Yeezu tɩ bãwnɩ a na fãw na yi a ʋ pʋɔ a. Ʋ tɩ lɩɛb'ɩ a nɩ-yaga pʋɔ sowre: «Ãa n'ʋ tɔ a ɩ̃ bʋ̃-suuri?»

³¹ A ʋ po-tuurbɛ tɩ sɔw ʋ na: «Fʋ nyɛ̃ nɩ a zu-sɛbla na nɛbr fʋ a ziir za a, ɛ́ fʋ sowre: “Ãa n'ʋ tɔ m?”»

³² Ɛcɛ a Yeezu tɩ jɩ́rɛ nɩ a ziir za k'ʋʋ bãw a ʋlɩ pɔw nɛ na n'ʋ ɩ a lɛ a.

³³ A pɔw na tɩ bãw ʋlɩ bom na ɩ ʋ a, dɛ̃bɩ̃ɛ kpɛ ʋ na ʋ màwr, ɛ́ cen tɩ lo gbĩ dume a Yeezu pile ɛ́ yel a yel-mɩŋa za kʋ̀ ʋ.

³⁴ Ɛcɛ a Yeezu tɩ yel ʋ na: «Ɩ̃ pɔwyaa a, a fʋ naaŋmɩn-sàw-deb faa fʋ na: cere nɩ ƴã-ɓaarʋ ɛ́ a fʋ bàalʋ baarɩ.»

³⁵ A Yeezu na tɩ cãà ƴɛ̀rɛ a, nɩbɛ tɩ yi n a puoru-dĩo nɩ-kpɛ̃ɛ yir wa yere kʋ̀rɛ a puoru-dĩo nɩ-kpɛ̃ɛ: «A fʋ pɔwyaa kpi na, bʋnʋ ƴãw n'a fʋ cãà bàlɛ a Wul-wul-kara?»

³⁶ A Yeezu bɛ tɩ cɛlɛ a bɛ ƴɛ̀rʋ á ŋá zie ɩ, ɛ́ tɩ yel a puoru-dĩo nɩ-kpɛ̃ɛ: «Ta zɔrɛ dɛ̃bɩ̃ɛ ɩ, bɛr bom za ɛ́ sàw de Naaŋmɩn.»

³⁷ Ʋʋ bɛ tɩ sàw nɩr za bɩɛlɩ ʋ ɛ, alɛ bɛ ɩ Pɩɛr, Zakɩ nɩ a ʋ yɛb Zã a.

³⁸ Bɛ tɩ ta n a puoru-dĩo nɩ-kpɛ̃ɛ yir. A Yeezu nyɛ̃ nɩbɛ na zɔrɛ tʋɔr-taa, kone ŋmɩɛr'ɩ cɛlsɩ yaga za a.

³⁹ Ʋ tɩ kpɛ na yel bɛ: «Bʋ̃ʋ n'ʋ so nyɩ zɔrɛ tʋɔr taa kone ŋmɩɛr'ɩ cɛlsɩ à ŋá? A powle bɛ kpi ɛ, ʋ gúre na!»

⁴⁰ Ɛcɛ a nɩbɛ tɩ ɩrɛ ʋ na laar. Ʋ tɩ ƴãw na bɛ yi bɛ za, ʋʋ tɛr a bie sãà nɩ a ʋ mã nɩ a po-tuurbɛ ata bɛl na tɩ bɩɛl'ʋ a, kpɛ n a be a bie na be a.

⁴¹ Ʋ tɩ nyɔw nɩ a bie nũú ɛ́ yel ʋ: «Talita kum», a pɛr lɛ kɛ́: «Powle e, fʋ̃ʋ n'ʋ ɩ̃ yere, ìr.»

⁴² Daadaalɛ, a powle tɩ ìr'a cere. Ʋ tɩ tɛr'ɩ yome pie nɩ ayi. Bɛ na tɩ nyɛ̃ a lɛ a, a tɩ ɩ n nɔ-ɓãan a bɛ zie bɛ dɩ vuo ɩ.

⁴³ Ɛcɛ a Yeezu tɩ kpãa bɛ nɩ kpɛ̃w za, kɛ́ bɛ taa wa sàw nɩr za bãwnɩ a ɩ, ɛ́ yel kɛ́ bɛ kʋ̀ bʋ̃-dɩrɩ a powle.