Markɩ 4 - A SƐB-SÕW

A bʋ̀r-bʋ̀rɛ zʋkpar a Yeezu na lɔb a

¹ A Yeezu tɩ lɛb'a maal nyɔw a nɩbɛ wulu a kʋ̃ɔ-kpɛ̃ɛ nʋɔr. Zu-sɛbla tɩ gbõ n taa a ʋ zie bɛ dɩ vuo ɩ, a tɩ fɛr k'ʋ kpɛ zɩ̃ gbor pʋɔ a kʋ̃ɔmɩ́, ɛ́ a nɩbɛ be a tẽsɔw, a kʋ̃ɔ-kpɛ̃ɛ nʋɔr.

² Ʋ tɩ lɔbr'ɩ zʋkpaɩ wule nɩ bɛ yele yaga. Ʋ tɩ yere nɩ à ŋá kʋ̀rɛ bɛ a ʋ wulu pʋɔ:

³ «Nyɩ bɛrɛ wone vla. A bʋ̀r-bʋ̀rɛ tɩ yi na k'ʋʋ tɩ bʋ̀r.

⁴ Zɩ̃ k'ʋʋ na tɩ bʋ̀rɛ a, a bʋ̃-bie a mɩnɛ tɩ lo n sɔ́r nʋɔr, lili siw dɩ a za.

⁵ Bʋ̃-bie a mɩnɛ mɩ̀ tɩ lo n zi-wɔ̃cɔ pʋɔ, be tẽ-buwr na bɛ saalɩ a, a bʋ̃-bie tɩ bul'ɩ daadaalɛ, a tanɛ na bɛ tɩ yãwmɛ a ƴãw.

⁶ Ɛcɛ a mʋ̃tɔ̃w na wa do a, ʋ dɩ n a bʋ̃-bule, ɛ́ a na bɛ tɩ tɛ nyɩgɛ siw a, a ko.

⁷ A bʋ̃-bie a mɩnɛ mɩ̀ tɩ lo n gʋʋr pʋɔ, a gʋʋr ìr fɩɩr'a kʋ, a bɛ tʋ̃ɔ́ wɔ̃ ɩ.

⁸ A bʋ̃-bie a mɩnɛ tɩ lo n tẽsɔw-vla pʋɔ, bul kɛrɩ ɛ́ wɔ̃: a kãw bʋ̃-bie lɩzɛr'ɩ pie, a kãw lɩz'a ata, a kãw kʋba (100).»

⁹ A Yeezu tɩ yere na: «Sob nɛ na tɛr tobe bɛr-wob ƴãw a, ʋ bɛrɛ wone.»

Bʋ̃ʋ n'ʋ so a Yeezu lɔbr zʋkpaɩ

¹⁰ A Yeezu na wa taw yi pùor baar'a, a bɛl na mɩ́ tɩ tuur ʋ a, nɩ a ʋ Nɩ-toni pie nɩ ayi tɩ sowr'ʋ nɩ a zʋkpaɩ ʋ na lɔbr a pɛr.

¹¹ Ʋ tɩ sɔw na yel bɛ: «A nyɩɩm a, bɛ wul nyɩ na nyɩ bãw a Naaŋmɩn Naalʋ yel-sɔwla, ɛcɛ a bɛl na cɛ a zie a, a za mɩ́ ɩ n zʋkpaɩ,

¹² kɛ́ bɛ mɩ́ jɩ́rɛ ɛ́ ta nyɛ̃ bom ɛ, kɛ́ bɛ mɩ́ wone ɛ́ ta bãw a pɛr ɛ, bɛ nãà mab'a lɩɛbɩ a bɛ ɩb ɛ̀ Naaŋmɩn dɩ a bɛ yel-bebe suur kʋ̀ bɛ.»

A Yeezu na ír a bʋ̀r-bʋ̀rɛ zʋkpar pɛr a

¹³ Al pùorí, a Yeezu tɩ sowri bɛ na: «Nyɩ bɛ bãw a zʋkpar ŋa pɛr ɛ? Ɛ́ ŋmɩŋmɩn n'a nyɩ na bãw a zʋkpaɩ al za na cɛ a pɛr?

¹⁴ A bʋ̀r-bʋ̀rɛ bʋ̀rɛ nɩ a Naaŋmɩn ƴɛ̀rʋ.

¹⁵ A nɩbɛ bɛ mɩnɛ n'ɩ a sɔ́r nʋɔr be bɛ na bʋ̀r a Naaŋmɩn ƴɛ̀rʋ a: bɛlɛ wa wone ʋ wa báarɛ a, a Sɩtaana mɩ́ wa na wa ír a ƴɛ̀rʋ bɛ na bʋ̀r a bɛ pʋ̃ɔmɩ a.

¹⁶ Bɛ mɩnɛ n'ɩ a bʋ̃-bie al na bʋ̀r a zi-wɔ̃cɔ pʋɔ a: bɛ mɩ́ wõ n a Naaŋmɩn ƴɛ̀rʋ ɛ́ sàw de daadaalɛ nɩ nʋ̃ɔ̀.

¹⁷ Ɛcɛ bɛ bɛ mɩ́ bɛr ʋ ʋ tɛ nyɩgɛ a bɛ pʋɔ ɩ, a bɛ tɩɛrʋ bɛ mɩ́ yaa kɛ́ lɩɛbɩ ɛ. A Naaŋmɩn ƴɛ̀rʋ wa waar'ɩ kpɩɛrʋ bɩɩ dɔwrʋ a, bɛ mɩ́ faa na lo daadaalɛ.

¹⁸ Bɛ mɩnɛ mɩ̀ cãà n'ɩ a bʋ̃-bie al na bʋ̀r a gʋʋr pʋɔ a: bɛ wõ n a Naaŋmɩn ƴɛ̀rʋ,

¹⁹ ɛcɛ a tẽw zu yele, a naalʋ bɛlʋ nɩ a bʋ̃-bɔbrɩ mɩ́ kpɛ n a bɛ socie pʋɔ fɩɩrɩ a Naaŋmɩn ƴɛ̀rʋ kʋ, ʋ bɛ tʋ̃ɔ́ wɔ̃ ɩ.

²⁰ A nɩbɛ bɛ mɩnɛ pãa mɩ̀ ɩ n a bʋ̃-bie al na bʋ̀r a tẽsɔw-vla pʋɔ a. Bɛ mɩ́ wõ n a Naaŋmɩn ƴɛ̀rʋ ɛ́ sàw de, ɛ́ wɔ̃ wɔmɛ: bɛ ŋa lɩzɛr nɩ pie, bɛ ŋa lɩz'a ata, bɛ ŋa kʋba (100).»

A fɩ̃tɩlɛ nɩ a bʋ̃-mána zʋkpar

²¹ A Yeezu tɩ yere na kʋ̀rɛ bɛ: «Ãa dãw tɔ̃w fɩ̃tɩlɛ ɛ́ de gara vɔblɩ pàw, bɩɩ de su gado pile? Bɛ bɛ tʋ̃ɔ́ mɩ́ dɔwl'ʋ kpul zu ɛ!

²² Yel-sɔwla za bɛ ka be bɛ kʋ̃ʋ wa bãw ɛ, ɛ́ bom za bɛ be be sɔwlɩ kʋ̃ʋ wa yi cãàmɩ́ ɛ.

²³ Nɩr wa tɛr tobe bɛr-wob ƴãw a, ʋ bɛrɛ wone.»

²⁴ Ʋ tɩ cãà na yere kʋ̀rɛ bɛ: «Nyɩ maal ɩrɛ a yele nyɩ na mɩ́ wone a ƴãw: a bʋ̃-mána ʋl nyɩ na tɛr manɛ nɩ a, ʋlɛ n'ʋ bɛ mɩ́ na manɩ nɩ kʋ̀ nyɩ, ɛ́ cãà kʋ̀ nyɩ dɔwlɩ.

²⁵ Bʋ̃ʋ n'ʋ vɛ̃, sob nɛ na tɛr a a, bɛ na kʋ̀ ʋ na dɔwlɩ, ɛ́ sob nɛ na bɛ tɛr a a, bɛ na de nɩ a pʋrɩ al ʋ na tɛr a.»

A bʋ̃-bʋʋrɛ na bule a tʋɔra a zʋkpar

²⁶ A Yeezu tɩ cãà na yere: «A Naaŋmɩn Naalʋ ŋmɛ̃ na taa nɩ nɩr na bʋ̀r bʋ̃-bʋʋrɛ a.

²⁷ Ʋ na gúre nɩ a tɩ̃ɩsɔw ìre nɩ a mʋ̃tɔ̃w, ɛ́ a bʋ̃-bʋʋrɛ búle ɛ́ kɛrɛ ìre, ʋʋ bɛ bãw ŋmɩŋmɩn za n'a ɩ.

²⁸ A tẽsɔw tɔr za mɩ́ ɩ na a bʋ̃-bʋʋrɛ bul: váar'a mɩ́ de niwn be be, a pùorí a ble-zu-dɔ̃wmɛ, a pùorí a bie pãa paalɩ a ble-zu-dɔ̃wmɛ.

²⁹ A bʋ̃-kʋɔrɩ wa bɩrɛ wa báarɛ a, bɛ mɩ́ de nɩ a sʋɔ kpɛ n, bʋ̃ʋ n'ʋ vɛ̃, a bʋ̃-dieri deb'a ta.»

A seneve bir zʋkpar a Yeezu na lɔb a

³⁰ A Yeezu tɩ cãà na yere: «Bʋ̃ʋ n'ʋ tɩ na tʋ̃ɔ́ de a Naaŋmɩn Naalʋ man nɩ wul? Bɩɩ zʋkpar buor'ʋ na tʋ̃ɔ́ ɩ ʋ sãá daadaalɛ?

³¹ Ʋ ŋmɛ̃ na mɛ̃ zɛ-va-tɩɛ kãw bɛ na bʋɔlɛ kɛ́ seneve a bir. Bɛlɛ wa bʋ̀rɛ ʋ a, ʋ mɩ́ ɩ n a pʋrɩ woro a tẽw zu bʋ̃-bʋʋrɛ za pʋɔ.

³² Ɛcɛ bɛlɛ wa bʋ̀r ʋ baar'a, ʋ mɩ́ bul'a ɩ kpɛ̃ɛ zuo a zɛ-va-tɩɩr za. Ʋ mɩ́ vo n wuli-bɛrɛ, a saa-zu lili mɩ́ wa wóbr a cowr a ʋ wuli ɓaarʋ́.»

³³ A zʋkpa-yaga á ŋá taabɛ n'a a Yeezu mɩ́ tɩ lɔbr hiere nɩ a Naaŋmɩn ƴɛ̀rʋ kʋ̀rɛ a nɩbɛ, mɛ̃ a lɛ bɛ na na tʋ̃ɔ́ bãw a pɛr a.

³⁴ Ʋ bɛ mɩ́ tɩ ƴɛ̀rɛ a bɛ zie ɛ́ bɛ lɔbr zʋkpaɩ ɛ, ɛcɛ ʋ mɩ́ tɩ ír'ɩ a za pɛr kʋ̀ a ʋ po-tuurbɛ a bɛ tɛwr zie.

A Yeezu na maalɩ nɔ-ɓãa-yel a sɛsɛb kpɛ̃ɛ ŋmãa a

³⁵ A ʋlɩ bibir nɛ zaanʋɔra, a Yeezu tɩ yel'ɩ a ʋ po-tuurbɛ: «Nyɩ ɩ tɩ gãw a gãwn ŋa lowr.»

³⁶ Bɛ tɩ bɛr'ɩ a zu-sɛbla, ɛ́ tɛr a Yeezu a gbor ʋl pʋɔ ʋ na tɩ be a gãwnɛ nɩ. Gbee a mɩnɛ mɩ̀ tɩ pʋɔ na gãwnɛ.

³⁷ Bɛ wa bere na sɛsɛb-pɩl kpɛ̃ɛ ìr pili pàw bɛ, a kʋ̃ɔ-mie ìre ŋmɩɛr a gbor ʋ tɩ paalɛ kʋ̃ɔ.

³⁸ Ɛcɛ a Yeezu tɩ be n a gbor pɛrɩ́ kɔw zu nɩ zu-kɔwra gúre nɩ. A ʋ po-tuurbɛ tɩ sɩ̃w ʋ na yere kʋ̀rɛ ʋ: «Wul-wul-kara a, a bɛ ɩrɛ fʋ bom za tɩ na kpiir a ɩ?»

³⁹ Ʋ tɩ ìr'a tanɩ a sɛsɛb ɛ́ yel a kʋ̃ɔ-kpɛ̃ɛ: «Ɩ gbili! Bɛr gɔmɛ!» A sɛsɛb tɩ ŋmãa na ɛ́ a zie ŋmãa vʋʋrʋ cɩ̃ɩɩ!

⁴⁰ A Yeezu tɩ sowri bɛ na: «Bʋ̃ʋ n'ʋ so dɛ̃bɩ̃ɛ ɩrɛ nyɩ sɛw à à ŋá? Nyɩ cãà bɛ sàw de a ɩ̃ yele ɩ?»

⁴¹ Dɛ̃bɩ̃ɛ tɩ nyɔw bɛ nɩ yaga bɛ sowre taa: «Nɩ-bʋ̃ʋ pãa n'ɩ a nɩr ŋa, a sɛsɛb nɩ a kʋ̃ɔ-kpɛ̃ɛ za wa sàwr a ʋ nʋɔr?»