Markɩ 12 - A SƐB-SÕW

A divɛ̃ tɩɩr po-kaarbɛ na ɩ po-to-dem a zʋkpar

¹ Al pùorí, a Yeezu tɩ tĩ na lɔbr zʋkpaɩ kʋ̀rɛ bɛ. Ʋ tɩ yel'a: «Nɩr kãw tɩ kɔ n divɛ̃ tɩɩr púo. Ʋ tɩ mɛ n dacin viiri koli ʋ, ɛ́ tuw bɔw a wɔmɛ nɛbrʋ ƴãw, ɛ́ maalɩ a bʋ̃-gùre zaba. Al pùorí, ʋ de ʋ na kʋ̀ nɩbɛ kɛ́ bɛ kaarɛ, ɛ́ yɔ.

² A wɔmɛ deb daar na wa ta a, ʋ tõ n tõ-tõ-bie k'ʋʋ cen a po-kaarbɛ tɩ pɔr a wɔmɛ ír a ʋ dem tɩr.

³ A po-kaarbɛ tɩ nyɔw ʋ na pɔb pɔb, ɛ́ bɛr ʋ ʋ lɛb kul nũ-zawlɛ.

⁴ A púo sob tɩ lɛb'a tõ a kãw a bɛ zie, bɛ nyɔw ʋ pɔb a zũú, ɛ́ tʋ tʋ bɛr.

⁵ Ʋ tɩ lɛb'a tõ a kãw. A ʋl a, bɛ nyɔw ʋ na kʋ. Al pùorí, ʋ lɛb'a tõ tõ-tõ-biir yaga, bɛ nyɔw a bɛ mɩnɛ pɔb pɔb, ɛ́ kʋ bɛ mɩnɛ.

⁶ A ʋ bi-nɔna yõ n'ʋ pãa tɩ cɛ ʋ. Ʋ pãa baa tõ ʋ a bɛ zie ɛ́ tɩɛrɛ yere nɩ: “Bɛ na ƴãwnɛ nɩ a ɩ̃ bie.”

⁷ Ɛcɛ a po-kaarbɛ bɛ ŋa tɩ yel'a kʋ̀ taa: “A gbã-dɩrɛ n'ɩ à ŋà! Nyɩ wa tɩ kʋ ʋ, ɛ́ tɩ na so nɩ a púo.”

⁸ Bɛ tɩ nyɔw nɩ a bie a divɛ̃ tɩɩr púo pʋɔ kʋ lɔb bɛr yẽw.»

⁹ A Yeezu tɩ sowri bɛ na: «Bʋ̃ʋ n'ʋ a púo sob na ɩ? Ʋ na wa na wa kʋ a po-kaarbɛ ɛ́ de a púo kʋ̀ nɩ-yoru.

¹⁰ Nyɩ bɛ kanɩ a Sɛb-sõw ƴɛ̀r-bie á ŋá bɩɩ? “A kʋsɩɛr ʋl a yir-mɩɛrbɛ na ír lɔb bɛr a, ʋ lɩɛb'ɩ a yir pɛr kʋsɩɛr.

¹¹ A Sore n'ʋ tõ à à ŋá: nɔ-ɓãa-yel'ʋ a tɩ zie.”»

¹² A Zifʋ mɩnɛ Nɩ-kore tɩ bɔbr'ɩ a Yeezu nyɔwfʋ, ɛcɛ bɛ tɩ zɔrɛ nɩ a zu-sɛbla dɛ̃bɩ̃ɛ. Bɛ tɩ bãwnɩ a na kɛ́ bɛlɛ nɛbɛ ʋ lɔb a zʋkpar ŋa jɩɛr'ɩ. Bɛ tɩ bɛr ʋ na ɛ́ tɔlɛ cere.

A zuru-yar bɛ na ya kʋ̀ a Sezaar a

¹³ Bɛ tɩ tõ n Faarizɩ̃ɛ bɛ mɩnɛ nɩ a Erɔdɩ nɩbɛ bɛ mɩnɛ a Yeezu zie, kɛ́ bɛ tɩ ŋmãa pùor sowri nyɔw ʋ a ʋ ƴɛ̀rʋ pʋɔ.

¹⁴ Bɛ tɩ cen na tɩ yel ʋ: «Wul-wul-kara a, tɩ bãw na kɛ́ fʋ yere nɩ yel-mɩŋa, ɛ́ bɛ zɔrɛ nɩr za ɩ: fʋ bɛ owre ɩ, ɛ́ wule a Naaŋmɩn sɔ́r nɩ yel-mɩŋa. Sɔ́r be n be kɛ́ bɛ mɩ́ ya a zuru-yar kʋ̀ a Sezaar bɩɩ? A ɩ n fɛrʋ kɛ́ tɩ mɩ́ ya bɩɩ tɩ ta mɩ́ ya?»

¹⁵ Ɛcɛ a Yeezu na tɩ bãwnɩ a kɛ́ bɛ sɔwlɛ nɩ a bɛ pʋ-tɩɛrʋ a, ʋ yel bɛ na: «Bʋ̃ʋ n'ʋ so nyɩ yel kɛ́ nyɩ ŋmãa mɛ̃ pùor? Nyɩ wa n libir ɩ̃ jɩ́r nyɛ̃!»

¹⁶ Bɛ tɩ de nɩ kãw wa n, a Yeezu wa sowri bɛ: «Ãa niwn nɩ ãa yúor'ɩ à á ŋá na wi a libir zu a?» Bɛ sɔw: «Sezaar dem'a!»

¹⁷ Lɛ n'a a Yeezu tɩ yel bɛ: «Nyɩ kʋ̀ a Sezaar a ʋ bome, ɛ́ kʋ̀ a Naaŋmɩn a ʋ dem.» A ʋ sɔwfʋ ŋa tɩ ɓãá bɛ nɩ nʋɔr.

A kũu-pʋɔ-lɛb-yibu yele

¹⁸ Sadiseyɛ̃ bɛ mɩnɛ kãw, a bɛl na mɩ́ yel kɛ́ kũu-pʋɔ-lɛb-yibu bɛ be a, tɩ wa na wa páw a Yeezu sowr'ʋ à ŋá:

¹⁹ «Wul-wul-kara a, Moyiir sɛb'ɩ a nɔ-ƴãwna ŋa kʋ̀ tɩ: “Nɩr wa tɛr yɛb ʋ bɛ dɔw bie, ɛ́ kpi ɛ́ bɛr a pɔw a, a ʋ yɛb, ʋ kul a pɔw-kʋɔr dɔw bibiir kʋ̀ a ʋ yɛb na kpi a.”

²⁰ Yɛbr ayopõi kãw tɩ be n be. A dãw-niwn sob kul a pɔw, bɛ dɔw bie ɩ, ɛ́ kpi.

²¹ A ayi sob de a ʋ pɔw, ɛ́ mɩ̀ lɛb kpi ɛ́ bɛ dɔw bie ɩ. A mɩ̀ ɩ a lɛ a ata sob zie.

²² Bɛ za ayopõi bɛ tʋ̃ɔ́ dɔw bie ɩ. Bɛ na wa kpi baar'a, a pɔw mɩ̀ tɩ kpi na.

²³ A kũu-pʋɔ-lɛb-yibu daar bɛlɛ wa lɛb yi a, ãa na so a pɔw ŋa, bɛ za na faa kul ʋ a?»

²⁴ A Yeezu sɔw bɛ: «Nyɩ na bɛ bãw a Sɛb-son nɩ a Naaŋmɩn fãw a, al ƴãw bɛ n'a nyɩ be tulu pʋɔ ɩ?

²⁵ Bʋ̃ʋ n'ʋ vɛ̃, a kũu-pʋɔ-lɛb-yibu daar, a dɛbr bɛ kule pɔwbɛ ɩ, ɛ́ a pɔwbɛ bɛ kule sɩrbɛ ɩ, bɛ na ɩ na mɛ̃ malkɩ mɩnɛ na be a tẽ-vla pʋɔ a.

²⁶ Ɛ́ a kũuni na lɛb yire a ƴãw a, nyɩ bɛ dãw kanɩ a Moyiir sɛbɛ pʋɔ a tuw na nyɔw vũu dɩrɛ a yele ɩ? Bɛ sɛb'ɩ a be kɛ́ a Naaŋmɩn yel'ɩ a Moyiir: “Ɩ̃ ɩ n a Abraham Naaŋmɩn, a Ɩzaakɩ Naaŋmɩn nɩ a Zakɔb Naaŋmɩn.”

²⁷ Ʋ bɛ ɩ kũuni Naaŋmɩn ɛ, ʋ ɩ n nɩ-vʋʋrɩ Naaŋmɩn. Nyɩ be n tulu kpɛ̃ɛ pʋɔ.»

A Naaŋmɩn nɛ-ƴãwnɩ za pʋɔ nɔ-kpɛ̃ɛ

²⁸ Naaŋmɩn wulu sɛ-sɛbrɛ kãw na tɩ wõ a bɛ nɔkpɛn a, ɛ́ nyɛ̃ kɛ́ a Yeezu sɔw nɩ vla kʋ̀ a Sadiseyɛ̃ mɩnɛ a, tɩ taw na pɩɛlɩ ɛ́ sowri: «A Naaŋmɩn nɛ-ƴãwnɩ za pʋɔ a, nɔ-buor'ɩ a dãw-niwn sob?»

²⁹ A Yeezu sɔw ʋ: «Nyɛ̃ a dãw-niwn sob: “Bɛrɛ wone Ɩsɩrayɛl i, a Sore tɩ Naaŋmɩn n'ɩ a Sore been yõ.

³⁰ Fʋ na nɔnɛ nɩ a Sore fʋ Naaŋmɩn nɩ a fʋ socir za, nɩ a fʋ sɩ́ɛ za, nɩ a fʋ tɩɛrʋ za, nɩ a fʋ fãw za.”

³¹ Ɛ́ nyɛ̃ a ayi sob: “Fʋ na nɔnɛ nɩ a fʋ tɔ sob mɛ̃ a fʋ mɩŋa a.” Naaŋmɩn nɔ-ƴãwna kãw za bɛ lɛb be be ɩ kpɛ̃ɛ zuo à á ŋá ayi ɛ.»

³² A Naaŋmɩn wulu sɛ-sɛbrɛ yel ʋ: «Wul-wul-kara a, a vɩɛl'ɩ yaga, yel-mɩŋa n'a fʋ yel: a Sore Naaŋmɩn ɩ n been yõ, kãw za bɛ lɛb ka be ƴãw pʋɔ a ʋ ƴãw ɛ.

³³ Ɛ́ fʋ na na nɔnɛ ʋ nɩ a fʋ socir za, nɩ a fʋ yã za, nɩ a fʋ fãw za, ɛ́ nɔnɛ a fʋ tɔ sob mɛ̃ a fʋ mɩŋa a, a vɩɛl'a zuo a nyɩw-a-za-bàwr nɩ a bàwr bʋʋrɛ za.»

³⁴ A Yeezu na tɩ nyɛ̃ ʋ sɔw nɩ yã a, ʋ yel ʋ na: «Fʋ bɛ zãá nɩ a Naaŋmɩn Naalʋ ɛ!» Ɛ́ nɩr za bɛ lɛb tɩ cãà sàwr sowre ʋ bom ɛ.

A Naaŋmɩn Nɩ-kabra nɩ a Daviir yele

³⁵ A Yeezu na tɩ kanɛ nɩ a nɩbɛ a Ŋmɩn-yir-kpɛ̃ɛ pʋɔ a, ʋ wa tɩ sowr'ɩ a sowru ŋa: «Ŋmɩŋmɩn za n'a a Naaŋmɩn wulu sɛ-sɛbrbɛ yel kɛ́ a Nɩ-kabra ɩ n Daviir bidɛb?

³⁶ A Vʋʋrʋ Sõw tɩ waal'a kʋ̀ a Daviir tɔr za ʋ yel: “A Sore Naaŋmɩn yel'ɩ a ɩ̃ Sore: zɩ̃ a ɩ̃ dʋrʋ lowr, ɛ́ gù ɩ̃ wa tɩ nɛb a fʋ dɔ̃ dem bin a fʋ pile.”

³⁷ A Daviir tɔr za bʋɔlɛ ʋ nɩ Sore, ɛ́ ŋmɩŋmɩn za n'a ʋ na tʋ̃ɔ́ ɩ a ʋ bidɛb?» Zu-sɛbla na bɛ tɛr vuo a tɩ bɛrɛ na wone a Yeezu ƴɛ̀rʋ nɩ nʋ̃ɔ̀.

A Yeezu kpãanɛ nɩ a nɩbɛ a Naaŋmɩn wulu sɛ-sɛbrbɛ ƴãw

³⁸ Ʋ tɩ kanɛ nɩ bɛ na yere: «Nyɩ gùre nyɩ tʋɔra a Naaŋmɩn wulu sɛ-sɛbrbɛ ƴãw, bɛ mɩ́ su n kpar-wowr cɔlɛ nɩ, ɛ́ mɩ́ nɔnɛ kɛ́ a nɩbɛ puore bɛ a nɩ-yaga tuor-taa ziir.

³⁹ Bɛ mɩ́ bɔbr'ɩ a nidaa dà-kɔwr a puoru-dirú nɩ a cuwr zie.

⁴⁰ Bɛ mɩ́ dɩrɛ nɩ a pɔw-kɔbɛ lɔbr, ɛ́ mɩ́ bɛlɩ puore puor-wowr. Bɛ na nyɛ̃ nɩ dɔwrʋ na ta dɔwrʋ a!»

Pɔw-kʋɔr nã́w sob kãw de-kʋ̀b bom yele

⁴¹ A Yeezu tɩ zɩ̃ na tori a Ŋmɩn-yir-kpɛ̃ɛ libie daga, ɛ́ jɩ́rɛ a lɛ a nɩbɛ na ƴãwnɛ a libie a daga pʋɔ a. Na-mɩnɛ yaga tɩ nyarɛ nɩ a libie ƴãwn.

⁴² Pɔw-kʋɔr nã́w sob kãw mɩ̀ tɩ wa na wa ƴãw wɛr-bi-ɓɛlɛ ayi.

⁴³ A Yeezu tɩ bʋɔl'ɩ a ʋ po-tuurbɛ tɩ yel bɛ: «Yel-mɩŋa sɩza, ɩ̃ yere na kʋ̀rɛ nyɩ, a pɔw-kʋɔr nã́w sob ŋa ƴãw na zuo a nɩbɛ za na ƴãw a libie a daga pʋɔ a.

⁴⁴ A bɛl za a, a bɛ libi-dɔwlɛ n'a bɛ ƴãw, ɛcɛ a ʋl a, a ʋ nã́w pʋɔ a, a ʋ tɛra za n'a ʋ de tɩr, a al za ʋ na tɩ tɛr a ʋ dɩb ƴãw a.»