Malasɩ 1 - A SƐB-SÕW

¹ Ƴɛ̀rʋ ŋa n'ʋ a Sore ƴãw Malasɩ ƴɛ̀r kʋ̀ a Ɩsɩrayɛl nɩbɛ.

A Sore nɔ̃w na kaa ír a Ɩsɩrayɛl nɩbɛ

² A Sore yere nɩ a ʋ nɩbɛ zie: «Ɩ̃ nɔnɛ nyɩ na, ɛ́ nyɩɩm sowre mɛ̃: “Nyɩn lowr'a fʋ nɔnɛ tɩ?”» Ɩ̃ sɔwr nyɩ na: «A Zakɔb yɛb bɛ tɩ n'ɩ a Ezawu ɛ? Ɛcɛ ɩ̃ nɔ̃w nɩ a Zakɔb

³ zuo a Ezawu. A tan a Ezawu bʋʋrɛ na tɩ kpɩɛr a, ɩ̃ ɩ na a kpal a za, ɩ̃ɩ de a bɛ tẽw kʋ̀ wɛja-kpalɛ gbõgbo-cili.

⁴ Kapaw a Edɔm tẽw dem na yere na: “Bɛ tʋ̃ɔ́ tɩ nɩ pẽlẽpẽlẽ, ɛcɛ tɩ na lɛb'a mɛ a tɩ ten bɛ na ŋmɛr bɛr a.” À ŋá n'a, a mãa, a Sore kpɛnʋ-za-sob, yere: Bɛ lɛb mɛ, ɛcɛ mãa na da a na lɔb. A nɩbɛ na bʋɔlɛ bɛ na kɛ́: “Faalʋ tẽw”, nɩ kɛ́: “Nɩ-bʋʋrɛ a Sore na nyɛ̃ nɩ suur kʋralɛ a”.

⁵ A nyɩɩm Ɩsɩrayɛl nɩbɛ, nyɩ na nyɛ̃ nɩ a yel ŋa nɩ mimir ɛ́ yel: “A Sore wul'ɩ a ʋ kpɛnʋ tɩ gãw nɩ a Ɩsɩrayɛl tẽw tʋr-bɔwrɩ bɛr!”»

A Sore yere nɩ a bàwr-maalbɛ

⁶ A mãa, a Sore Kpɛnʋ-za-sob, ɩ̃ yere nɩ à ŋá kʋ̀rɛ a bàwr-maalbɛ: «Bie mɩ́ ƴãwnɛ nɩ ʋ sãà, ɛ́ tõ-tõ-bie ƴãwnɛ a ʋ nɩ-kpɛ̃ɛ. Ɛcɛ, mãa wa ɩ sãà a, a ƴãwfʋ wa nyɩ na ƴãwnɛ mɛ̃ a? Ɛ́ mãa wa ɩ nɩ-kpɛ̃ɛ a, a ƴãwfʋ a na fɛr kɛ́ nyɩ ƴãwnɛ mɛ̃ a, ʋ wa? Nyɩ bɛ bʋɔlɛ mɛ̃ nɩr ɛ, ɛ́ yere: “Nyɩn lowr'a tɩ bɛ bʋɔlɩ fʋ nɩr?”

⁷ Nyɩ mɩ́ wa n nɩ bʋ̃-dɩ-dɛwr wa bin a ɩ̃ bàwr-maal-kuur zu, ɛ́ yere: “Nyɩn lowr'a tɩ bɛ tɛr a fʋ ƴãwfʋ?” Nyɩ na mɩ́ yere k'aa Sore bàwr-maal-kuur bɛ tɛr pɛr a n'a.

⁸ A dʋ̃-zɔ̃w nyɩ na mɩ́ nyɔw maal'ɩ a bàwr kʋ̀ m a, a vɩɛl'a a? Nyɩ na mɩ́ wa wa n a kãw ʋ cɛwrɛ bɩɩ ɩ bàal a, a mɩ́ vɩɛl'a a? Nyɩ cen nɩ a dʋ̃w ŋa tɔ tɩ kʋ̀ a nyɩ na-kpɛ̃ɛ-lɩɛrɛ kɛ́ nyɛ̃! Nʋ̃ɔ̀ na kpɩɛr ʋ na a? Ʋ na jɩ́r nyɩ na kaa a? Mãa n'ʋ sowre nyɩ, mãa, a Sore Kpɛnʋ-za-sob.

⁹ Ƴɛrɛŋa a, nyɩ pãa puori mɛ̃ kɛ́ nyɛ̃, a mãa nyɩ Naaŋmɩn, nyɩ puori mɛ̃, k'ɩ̃ɩ zɔ a nyɩ nɩbaalʋ. Ɩ̃ na jɩ́r nyɩ na kaa nɩ nɔ̃wfʋ, à à ŋá nyɩ na ɩ a? Mãa n'ʋ sowre nyɩ, a mãa, a Sore Kpɛnʋ-za-sob.

¹⁰ Bʋ̃ʋ pãa ɩ, a nyɩ kãw kʋ̃ tʋ̃ɔ́ nyɔw a ɩ̃ yir-kpɛ̃ɛ pamɛ pàw, kɛ̀ nyɩ ta gbɔwr vũu a ɩ̃ bàwr-maal-kuur zu zawlalɛ a? Bʋ̃ʋ n'ʋ vɛ̃, a ɩ̃ pʋɔ bɛ pɛlɩ a nyɩ ƴãw ɛ, kʋraa! Ɛ́ a nyɩ de-kʋ̀b bome nyɩ na ture cɔwr mɛ̃ a, bɛ nʋmɛ a ɩ̃ zie ɩ, mãa n'ʋ yere kʋ̀rɛ nyɩ, mãa, a Sore Kpɛnʋ-za-sob.

¹¹ Ɛcɛ, a mʋ̃tɔ̃w puru zie tɩ tɔ a ʋ kpɛb zie a, a ɩ̃ yúor yi n a nɩ-bʋʋr-yoru sɔgɔ. A ziir za, bɛ nyɩwr'ɩ tɩ-suur-zɔ̃-na-nyùur-vla-vla-a, a ɩ̃ ƴãwfʋ ƴãw, ɛ́ ture de-kʋ̀b bome na vɩɛl a cɔwr mɛ̃. A mãa Sore Kpɛnʋ-za-sob, mãa n'ʋ yere, a nɩ-bʋʋr-yoru bãwnɩ a na a ɩ̃ yúor na yi a.

¹² Ɛcɛ nyɩɩm sãwnɛ ʋ na, nyɩ na mɩ́ yel kɛ́: “A Sore bàwr-maal-kuur tɛr'ɩ dɛwr, ɛ́ a ʋ bʋ̃-dɩrɩ bɛ tɛr pɛr a.”

¹³ Nyɩ mɩ̀ mɩ́ yere na: “Nyɛ̃ niw-sʋba a!” Nyɩ bɛ bʋɔlɛ mɛ̃ nɩr ɛ, a mãa, a Sore Kpɛnʋ-za-sob! Nyɩ mɩ́ wa n nɩ dʋ̃-zuri, dʋn na cɛwrɛ a, bɩɩ dʋ̃-bàalbɛ kɛ́ nyɩ wa kʋ̀ m. Ŋmɩŋmɩn n'a ɩ̃ na tʋ̃ɔ́ sàw de a de-kʋ̀b bome á ŋá taabɛ a nyɩ nũú? Nyɩmɛ nɛbɛ ɩ̃ sowre.

¹⁴ Baw-bio sob'ɩ a nyãnyu-yã-sob, na tɛr dʋ̃-kpɛn a ʋ dʋn pʋɔ, ɛ́ kõ nʋɔr nyɔw dʋ̃-bàal maal'ɩ bàwr kʋ̀ m a! Baw-bio sob'ʋ, bʋ̃ʋ n'ʋ vɛ̃, ɩ̃ ɩ n na-kpɛ̃ɛ a nɩ-bʋʋr-yoru na zɔrɛ a. A mãa, Sore Kpɛnʋ-za-sob, mãa n'ʋ yere.»