Luka 23 - A SƐB-SÕW

Bɛ tɛr'ɩ a Yeezu cen nɩ a Pɩlatɩ zie

¹ A ƴɛ̀rʋ-dɩb-lãw nɩbɛ za tɩ ír'a tɛr a Yeezu cen nɩ a Pɩlatɩ zie.

² Bɛ tɩ nyɔw nɩ a ʋ sãwna manʋ yere nɩ: «Tɩ nyɛ̃ nɩ a nɩr ŋa ʋ ƴãwnɛ damnʋ a tɩ bʋʋrɛ pʋɔ, ɛ́ diwr a nɩbɛ bɛrɛ kɛ́ bɛ ta yarɛ a zuru-yar kʋ̀rɛ a Sezaar ɛ, ɛ́ yere kɛ́ ʋlɛ n'ɩ a Kɩrɩta, a Nãà.»

³ A Pɩlatɩ tɩ sowr'ɩ a Yeezu à ŋá: «Fʋ ɩ n a Zifʋ mɩnɛ nãà bɩɩ?» A Yeezu sɔw: «Fʋ̃ʋ n'ʋ yere.»

⁴ A Pɩlatɩ tɩ yel'ɩ a bàwr-maal-nɩ-bɛrɛ nɩ a zu-sɛbla: «Ɩ̃ bɛ nyɛ̃ yel-faa za a nɩr ŋa zie ʋ sɛwnɩ dɔwrʋ ɛ.»

⁵ Ɛ̀ bɛ lɛb tur yel ʋ: «Ʋ damnɛ nɩ a nɩbɛ a Zude tẽw za pʋɔ nɩ a ʋ kanʋ, ɛcɛ a Galile tẽw n'a ʋ tĩ wa ta n a ka.»

Bɛ tɛr'ɩ a Yeezu cen nɩ a Erɔdɩ zie

⁶ A Pɩlatɩ na wa wõ a ƴɛ̀r-bie á ŋá a, ʋ sowr'a: «Galile tẽw nɩr'ʋ bɩɩ?»

⁷ Ʋʋ na wa bãw ʋ ɩ Erɔdɩ tẽw nɩr a, ʋ tɩɛ ʋ na bɛr kɛ́ bɛ cen nɩ ʋ a Erɔdɩ zie, ʋ mɩ̀ na tɩ be a Zerizalɛm a bibie al pʋɔ a.

⁸ A Erɔdɩ na tɩ nyɛ̃ a Yeezu a, nʋ̃ɔ̀ tɩ ɩrɛ ʋ nɩ yaga. Koro za n'a ʋ tɩ bɔbr a ʋ nyɛ́b. Ʋ tɩ wone na bɛ na manɛ a ʋ yele yaga a, lɛ so ʋ tɩ tɩɛrɛ k'ʋʋ nãá maalɩ nɔ-ɓãa-yel kãw ʋ nyɛ̃.

⁹ Ʋ tɩ tɛr'ɩ sowru yaga a ʋ zie, ɛcɛ a Yeezu bɛ tɩ sɔw bom za ɩ.

¹⁰ A bàwr-maal-nɩ-bɛrɛ, nɩ a Naaŋmɩn wulu sɛ-sɛbrbɛ tɩ àr'a ƴɛ̀rɛ kpɛ̃w za manɛ a Yeezu sãwna.

¹¹ A Erɔdɩ nɩ a sojarɩ bɛl na gùre ʋ a, tɩ jewr'ɩ a Yeezu, ɛ́ ɩ ʋ la. Bɛ tɩ de nɩ dɛpaal-kparʋ su ʋ, ɛ́ lɛb dáa ʋ bɛr a Pɩlatɩ zie.

¹² A ʋlɩ bibir nɛ tɔr za, a Erɔdɩ nɩ a Pɩlatɩ na tɩ ɩ dɔ̃ dem a, bɛ tɩ lɩɛb'ɩ bárɩ.

A Pɩlatɩ tɩr'ɩ sɔ́r kɛ́ bɛ kʋ a Yeezu

¹³ A Pɩlatɩ tɩ bʋɔl'ɩ a bàwr-maal-nɩ-bɛrɛ nɩ a Zifʋ mɩnɛ nɩ-kore ɓã taa,

¹⁴ ɛ́ yel bɛ: «Nyɩ nyɔw nɩ a nɩr ŋa wa n a ɩ̃ zie, wa yel k'ʋʋ damnɛ nɩ a nɩbɛ. Mãa mɩŋa sowr'ʋ nɩ a nyɩ niŋé, ɛ́ bɛ nyɛ̃ sãwna kãw za a yele al pʋɔ nyɩ na mɩlɛ nɩ ʋ a ɩ.

¹⁵ A Erɔdɩ mɩ̀ bɛ tɩ nyɛ̃ sãwna a ʋ zie ɩ, ʋ na lɛb dáa ʋ bɛr kʋ̀ tɩ a. A na ɩ à ŋá a, a nɩr ŋa bɛ maalɩ yel za na sɛwnɩ kũu a ɩ.

¹⁶ Lɛ so, ɩ̃ na ƴãw na bɛ fɔb ʋ ɛ́ lɛb bɛr ʋ.» [

¹⁷ A Tɔl-gãw cuw za a, a mɩ́ tɩ fɛr'a ʋ lɛb bɛr nɩ-pàwra kãw kʋ̀ bɛ.]

¹⁸ Bɛ za tɩ lãw na cɩɩrɛ yere nɩ: «Kʋ a nɩr ŋa! Ɛ́ lɛb bɛr a Barabasɩ kʋ̀ tɩ!»

¹⁹ A Barabasɩ nɛ tɩ kʋ n nɩr damnʋ kãw pʋɔ na tɩ dam a tẽw pʋɔ a, ɛ̀ bɛ nyɔw ʋ pàw.

²⁰ A Pɩlatɩ na tɩ bɔbr k'ʋʋ faa a Yeezu a, ʋ tɩ lɛb'a de a ƴɛ̀rʋ a bɛ zie.

²¹ Ɛcɛ bɛ tɩ cɩɩrɛ na yere nɩ: «Kpa ʋ da-gara zu! Kpa ʋ da-gara zu!»

²² A Pɩlatɩ tɩ lɛb'a yel bɛ a gb'a ata sob ƴãw: «Bʋnʋ yel-faa n'ʋ ʋ maalɩ? Ɩ̃ bɛ nyɛ̃ bom za na sɛwnɩ kũu a ɩ. Ɩ̃ na ƴãw na bɛ fɔb ʋ, ɩ̃ɩ lɛb bɛr ʋ.»

²³ Bɛ tɩ lɛb'a bãw ŋmɩɛr cɛlsɩ yere nɩ k'ʋʋ kpa ʋ da-gara zu. A bɛ cɛlsɩ tɩ ìre na dúor.

²⁴ Lɛ n'a a Pɩlatɩ tɩ yel k'ʋʋ na sàw nɩ a bɛ zɛlʋ.

²⁵ Ʋ tɩ lɛb'a bɛr a sob nɛ na tɩ be a gaso pʋɔ damnʋ nɩ nɩr kʋb ƴãw a, a ʋl a nɩbɛ na tɩ bɔbr kɛ́ bɛ lɛb bɛr a. A Yeezu ʋl a, ʋ tɩ bɛr ʋ na kʋ̀ bɛ kɛ́ bɛ maal'ɩ a bɛ pʋ-tɩɛrʋ.

A Yeezu bɛ na kpa a da-gara zu a

²⁶ Bɛ na tɩ tɛr a Yeezu cere nɩ a, bɛ nyɔw nɩ Sɩɩrɛn tẽw dɛb kãw na tɩ dɩ kɛ́ Sɩmʋ̃ a, ɛ́ tɩ yi wɩ̀ɛ pʋɔ kule a, ƴãw k'ʋ tuo a da-gara tuur'ɩ a Yeezu.

²⁷ A Zerizalɛm tẽw dem nɩ-yaga tɩ tuur'ɩ a Yeezu. Pɔwbɛ tɩ pʋɔ na tuo nuru zũú kone nɩ a ʋ ƴãw.

²⁸ A Yeezu tɩ lɩɛb'a yel bɛ: «Zerizalɛm pɔwbɛ ɛ, nyɩ ta kone mãa ƴãw ɛ! Nyɩ kone a nyɩɩm mɩŋa ƴãw, nɩ a nyɩ bibiir ƴãw.

²⁹ Bibie waar'a na vɩɛ bɛ na yere: “Zu-nʋ̃ɔ̀ dem'ɩ a pɔw-ãanbɛ nɩ a bɛl na bɛ ƴɛnɩ bibiir a, nɩ a pɔwbɛ bɛl na bɛ dɔw a!”

³⁰ A lɛn daar a, bɛ na yere nɩ a tan: “Nyɩ lo gùri tɩ!” ɛ́ yere a tãli: “Nyɩ sɔwlɩ tɩ!”

³¹ Bɛlɛ wa ɩrɛ a dà-ɓaar à ŋá a, ŋmɩŋmɩn n'a bɛ nãà ɩ a dà-kõw?»

³² Bɛ mɩ̀ tɩ tɛr'ɩ yel-fa-maalbɛ ayi kãw lãwnɩ a Yeezu cere nɩ a kʋb.

³³ Bɛ na wa ta a zie nɛ bɛ na bʋɔlɛ kɛ́ «Zuŋman» a, bɛ kpa n a Yeezu a da-gara zu, lãwnɩ a yel-fa-maalbɛ, a kãw a ʋ dʋrʋ lowr, ɛ́ a kãw a ʋ gʋba lowr.

³⁴ A Yeezu tɩ yel'a: «Ɩ̃ Sãà a, dɩ suur kʋ̀ bɛ: bʋ̃ʋ n'ʋ vɛ̃, bɛ bɛ bãw ʋlɩ bom nɛ bɛ na ɩrɛ a ɩ.» Al pùorí, bɛ tɩ gba n a ʋ kparɩ põ.

³⁵ A nɩbɛ tɩ àr'a bɛlɛ. A nɩ-bɛrɛ bɛl tɩ kpɔwrɛ ʋ na yere nɩ: «Ʋ faa nɩ nɩ-yoru, ʋ faa ʋ tʋɔra, ʋlɛ wa n'ɩ a Nɩ-kabra, a ʋl ʋ na kaa ír a.»

³⁶ A sojarɩ mɩ̀ tɩ ɩrɛ ʋ na laar, ɛ́ mɩ́ tɩ taw pɩɛlɩ ture ʋ dã-miiru

³⁷ ɛ́ yere: «Fʋ̃ʋ wa ɩ a Zifʋ mɩnɛ nãà a, fʋ̃ʋ faa fʋ tʋɔra!»

³⁸ Bɛ tɩ sɛb'a ƴãw a ʋ zu-sɔw: «A sob ŋa n'ɩ a Zifʋ mɩnɛ nãà.»

³⁹ A yel-fa-maalbɛ bɛl bɛ na tɩ kpa a da-gara zu a, a kãw mɩ̀ tɩ tʋʋr'ɩ a Yeezu yere nɩ: «Fʋ̃ʋ bɛ tʋ̃ɔ́ n'ɩ a Naaŋmɩn Nɩ-kabra ɩ? Faa fʋ tʋɔra lãwnɩ tɩ!»

⁴⁰ A ʋ tɔ sob tɩ sɔw ʋ na, ɛ́ nyɔw ʋ gɔnɛ yere nɩ: «Fʋ dɛ bɛ zɔrɛ a Naaŋmɩn bɩɩ? Fʋ̃ʋ mɩ̀ na be a tuo-been nɛ pʋɔ a?

⁴¹ Tɩɩm dem sɛw na: a tɩ ɩ-ɩrɩ san n'a tɩ yarɛ. Ɛcɛ ʋl bɛ maalɩ yel-faa kãw za ɩ.»

⁴² Ɛ́ tɩ yel: «Yeezu u, fʋ̃ʋ wa dɩ a naalʋ a lɛn daar a, fʋ̃ʋ taa yiire mɛ̃ bɛrɛ ɩ.»

⁴³ A Yeezu lɛb yel ʋ: «Yel-mɩŋa sɩza n'a ɩ̃ yere kʋ̀rɛ fʋ, a dɩ̃a, fʋ na lãwnɩ mɛ̃ na be a tẽ-vla pʋɔ.»

A Yeezu kũu

⁴⁴ A gbãgbãw na tɩ cɛ blã na ŋmɛ a, lige tɩ yɛ́r'a pàw a tẽ-daa za tɩ ta n a mʋ̃tɔ̃w gɔ̃wfʋ daar,

⁴⁵ a mʋ̃tɔ̃w na tɩ bɔr a ƴãw. Lɛ n'a a Ŋmɩn-yir-kpɛ̃ɛ pʋɔ pɛn tɩ man a sɔwlɩsɔw ɛ́ ɓar ziir ayi.

⁴⁶ A Yeezu tɩ lɔb'ɩ cɛl yel: «Ɩ̃ Sãà a, ɩ̃ de nɩ a ɩ̃ vʋʋrʋ ƴãw a fʋ nuru pʋɔ.» Ʋ na wa yel à ŋá baar'a, ʋ ŋmãa nɩ vʋʋrʋ.

⁴⁷ A sojarɩ kʋba nɩ-kpɛ̃ɛ na tɩ nyɛ̃ a yele á ŋá na ɩ a, ʋ danɩ nɩ a Naaŋmɩn yel: «Sɩza, a nɩr ŋa tɩ ɩ n Nɩ-mɩŋa!»

⁴⁸ A nɩbɛ bɛl za na tɩ wa àr bɛ́lɛ a, bɛ na wa nyɛ̃ a yele á ŋá a, bɛ lɛb'a kone a bɛ sãwna kule nɩ.

⁴⁹ A Yeezu nɩ-bãwnɩ za tɩ àr'a zãá, lãwnɩ a pɔwbɛ bɛl na tɩ yi a Galile tu ʋ wa a, bɛ za tɩ bɛ́lɛ nɩ a yele á ŋá.

A Yeezu ũufʋ

^50-51 Dɛb kãw na tɩ dɩ kɛ́ Zuzɛb a, tɩ pʋɔ nɩ a nɩ-bɛrɛ lãw nɛ pʋɔ na so a ƴɛ̀rʋ-maalʋ a. Ʋ tɩ ɩ n nɩ-vla nɩ nɩ-mɩŋa, ʋ bɛ tɩ sàw tu a bɛ pʋ-tɩɛrʋ nɩ a bɛ ɩ-ɩrɩ a Yeezu ƴãw ɛ. Ʋ tɩ yi n Arimate, Zude tẽw, ɛ́ tɩ gùre a Naaŋmɩn Naalʋ.

⁵² Ʋ tɩ cen na tɩ páw a Pɩlatɩ zɛlɩ a Yeezu ƴã-gan,

⁵³ yaw ʋ a da-gara zu pili nɩ gãw, ũù yaa pʋɔ bɛ na tɩ tuw kʋsɩɛr pʋɔ ɛ́ bɛ ũù nɩr sɛr a.

⁵⁴ A pɩ̃ɛnʋ-bibir cɔbrʋ tɩ n'a, ɛ́ a pɩ̃ɛnʋ-bibir tɩ tĩ tarɛ.

⁵⁵ A pɔwbɛ bɛl na tɩ bɩɛlɩ a Yeezu a Galile wa n a, tɩ tu n a Zuzɛb. Bɛ tɩ jɩ́r'ɩ a yaa, nɩ a lɛ bɛ na tɩ gaalɩ a Yeezu ƴã-gan a.

⁵⁶ Al pùorí, bɛ tɩ lɛb'a kul tɩ cɔbrɩ kãa-nyuure nɩ parfɛ̃. Ɛ́ a pɩ̃ɛnʋ-bibir a, bɛ tɩ zɩ̃ na pɩ̃ɛnɩ, mɛ̃ a lɛ a nʋɔr na ƴãw a.