Luka 21 - A SƐB-SÕW

A pɔw-kʋɔr nã́w sob kãw de-kʋ̀b bom yele

¹ A Yeezu tɩ zɛw nɩ zu nyɛ̃ a nɩbɛ na ƴãwnɛ a bɛ de-kʋ̀b bome a Ŋmɩn-yir-kpɛ̃ɛ libie daga pʋɔ a. Tɛra dem tɩ nɛbɛ.

² Ʋ mɩ̀ tɩ nyɛ̃ nɩ pɔw-kʋɔr nã́w sob kãw ʋ lɔb wɛr-bi-ɓɛlɛ ayi ƴãw.

³ A Yeezu tɩ yel'a: «Yel-mɩŋa sɩza, ɩ̃ yere na kʋ̀rɛ nyɩ, a pɔw-kʋɔr nã́w sob ŋa tɩr'a zuo a ŋmãa bɛ ŋa za.

⁴ Bʋ̃ʋ n'ʋ vɛ̃, a bɛ ŋa za a, a bɛ libi-dɔwlɛ pʋɔ n'a bɛ ír tɩr. Ɛcɛ a ʋl a, a ʋ nã́w pʋɔ a, a al za ʋ na tɛr nãá faa nɩ ʋ tʋɔra a, alɛ n'a ʋ de tɩr.»

A Yeezu yel'a kɛ́ bɛ na ŋmɛr'ɩ a Ŋmɩn-yir-kpɛ̃ɛ bɛr

⁵ Nɩbɛ bɛ mɩnɛ tɩ ƴɛ̀rɛ nɩ a Ŋmɩn-yir-kpɛ̃ɛ vɩɛlʋ ƴɛ̀rʋ, a kʋsɛ-vɩɛlɩ nɩ a Naaŋmɩn barka puoru bome na tɩ ɩ ʋ vɩɛl a. A Yeezu tɩ yel bɛ na:

⁶ «À á ŋá nyɩ na jɩ́rɛ a, bibir na vɩɛ na kʋsɛ-ŋmale kʋ̃ cãà dɔwlɩ kʋsɩɛr zu ɛ, bɛ na ŋmɛr'ɩ a za bɛr.»

Kpɩɛrʋ nɩ dɔwrʋ yele

⁷ Bɛ tɩ sowr'ʋ na: «Wul-wul-kara a, debor daar'a a yele á ŋá na ta? Ɛ́ a bãwfʋ n'ɩ buor na na wul kɛ́ a ta na a?»

⁸ A Yeezu tɩ sɔw na: «Nyɩ gù vla bɛ taa wa tule nyɩ ɛ. Nɩ-yaga na wa na yel kɛ́ a mãa yúor ƴãw n'a, wa yere: “Mãa n'ɩ a Kɩrɩta”, nɩ kɛ́: “A daar ta na.” Nyɩ taa tuur bɛ ɩ.

⁹ Nyɩmɛ wa wone bɛ ƴɛ̀rɛ zɛbr nɩ dam-taa ƴɛ̀rʋ a, nyɩ ta zɔrɛ dɛ̃bɩ̃ɛ ɩ, a fɛr'a kɛ́ à á ŋá za ta baarɩ, ɛ́ a cãà kʋ̃ ɩ a baarʋ n'a pɛtɛlʋlɛ ɩ.»

¹⁰ A Yeezu tɩ yel'a ƴãw pʋɔ: «Tẽw nɩ tẽw na mɩ́ ìr'a taw tuori taa, ɛ́ nãà nɩ nãà taw tuori taa.

¹¹ A tẽsɔw-kɔbr na damnɛ nɩ yaga. Bàal-faar nɩ kɔ̃ na be n a ziir a mɩnɛ. Nyɩ na nyɛ̃ nɩ pʋl-vʋ̃ɔ yele nɩ nɔ-ɓãa-yele na yi a salom zu a.

¹² Ɛcɛ bɛ na dãw na nyɔw nyɩ, dɔwrɩ nyɩ, ɛ́ à á ŋá za bãw ta. Bɛ na nyɔw nyɩ na kʋ̀ a Zifʋ mɩnɛ puoru-diru nɩ-bɛrɛ. Bɛ na ƴãw nyɩ nɩ gaso pʋɔ, bɛ na tɛr nyɩ na cen nɩ ƴɛ̀rʋ zie, na-mɩnɛ nɩ a na-kpɛ̃ɛ-lɩɛrbɛ niŋé a ɩ̃ yúor ƴãw:

¹³ a na ɩ na nyɩ dɩ a ɩ̃ dãsɩɛ.

¹⁴ Nyɩ ta dɩ tuo cɔbrɛ a lɛ nyɩ na na ƴɛ̀r faa nyɩ tʋɔra a ɩ.

¹⁵ Mãa mɩŋa na ƴãw nɩ ƴɛ̀rʋ a nyɩ nʋɔrɩ́, ɛ́ kʋ̀ nyɩ yã-bãwfʋ na na ɩ a nyɩ dɔ̃ dem ƴɛ̀rʋ bɔr a.

¹⁶ A nyɩ sãà nɩ a nyɩ mã tɛɛ za na nyɔw nyɩ na, a nyɩ yɛbr, a nyɩ yir dem, nɩ a nyɩ bárɩ, ɛ́ bɛ na ƴãw na bɛ kʋ nɩ-yaga a nyɩ pʋɔ.

¹⁷ Nɩbɛ za na hɩ̃ɛn nyɩ nɩ a ɩ̃ yúor ƴãw.

¹⁸ Ɛcɛ a nyɩ zukɔbr been bɛ bɔrɛ ɩ.

¹⁹ A nyɩ kanyir dɩb pʋɔ n'a nyɩ na páw a nyɔ-vʋʋrʋ.»

A Yeezu yel'a kɛ́ bɛ na ŋmɛr'ɩ a Zerizalɛm tẽw

²⁰ «Nyɩmɛ wa nyɛ̃ sojarɩ bɛ jil koli a Zerizalɛm tẽw a, nyɩɩm bãwnɩ a a lɛn daar kɛ́ a ʋ ŋmɛr-bɛrʋ ta na.

²¹ A lɛn daar, bɛlɩ dem nãà wa be Zude tẽw a, bɛ zɔrɛ dúor tan pʋɔ. Bɛlɩ dem nãà wa be a tẽw pʋɔ a, bɛ yi zaa. Bɛlɩ dem nãà wa be wɛrʋ pʋɔ a, bɛ ta lɛb kule a tẽw pʋɔ ɩ.

²² A alɩ bibie nɛ pʋɔ, a Naaŋmɩn na ɩ na kpɩɛrʋ páw a ʋ nɩ-bʋʋrɛ. Lɛ n'a a yele al za na sɛb a na tu.

²³ Baw-bio dem'ɩ a pɔwbɛ bɛl na na ɩ pɔw-pée bɩɩ ƴɛnɛ bibiir a bibie á ŋá pʋɔ a. Wahala kpɛ̃ɛ na sɩrɩ na lo a tẽw pʋɔ, ɛ́ a Naaŋmɩn suur ìr a nɩ-bʋʋrɛ bɛ ŋa ƴãw.

²⁴ A bɛ dɔ̃ dem na kʋ n bɛ mɩnɛ nɩ zɛbr-sɔ-bɛrɛ, ɛ́ nyɔw a bɛ ŋmaarɛ cen nɩ a nɩ-bʋʋr-yoru za sɔgɔ. A tɩbɛ dem na ŋmɛr'ɩ a Zerizalɛm bɛr cʋmcʋm, ɛ́ gù a tɩbɛ dem naalʋ tɩ baarɩ.»

A Nɩsaal Bie waa yele

²⁵ «Bãwfʋ na sãá nɩ a mʋ̃tɔ̃w pʋɔ, a cuw nɩ a ŋmar-bie pʋɔ. Ɛ́ a tẽw zu ka a, dɛ̃bɩ̃-kpɛ̃ɛ na nyɔw nɩ a nɩ-bʋʋrɛ za, a kʋ̃ɔ-kpɛ̃ɛ damnʋ nɩ a kʋ̃ɔ-mie gɔmɛ na ƴãw bɛ nɩ pʋl-vʋ̃ɔ.

²⁶ A kpɩɛrʋ na na páw a tẽ-daa za a dɛ̃bɩ̃ɛ na gbini nɩ a nɩbɛ, bʋ̃ʋ n'ʋ vɛ̃, a salom zu bʋ̃-íri na dam'ɩ a za.

²⁷ Lɛ na bɛ na nyɛ̃ a Nɩsaal Bie ʋ be zũzuwr pʋɔ waar, tɛr kpɛnʋ nɩ yúor-vɩɛlʋ-danʋ.

²⁸ A yele á ŋá wa tĩ ɩrɛ a, nyɩɩm dʋɔ zuru, a nyɩ faafʋ pɩɛlɛ na.»

A kãkã-tɩɛ zʋkpar

²⁹ A Yeezu tɩ lɔb'ɩ zʋkpar ŋa kʋ̀ bɛ: «Nyɩ nyɛ̃ a kãkã-tɩɛ nɩ a tɩrʋ za a:

³⁰ alɛ wa tɔmnɛ va-paalɛ nɩ wuli paalɛ a, nyɩ mɩ́ bãwnɩ a na, ɛ́ nɩr bɛ yel kʋ̀ nyɩ ɛ, kɛ́ a nyĩi daar tarɛ na.

³¹ Lɛ mɩ̀ n'a, nyɩmɛ wa nyɛ̃ à á ŋá za a ɩrɛ a, nyɩ bãw kɛ́ a Naaŋmɩn Naalʋ pɩɛl'a.

³² Yel-mɩŋa sɩza, ɩ̃ yere na kʋ̀rɛ nyɩ, a dɩ̃a nɩbɛ bɛ ŋa kʋ̃ kpi baar ɛ, ɛ́ à á ŋá za ta.

³³ A tẽsɔw nɩ a salom na tɔl'a, ɛcɛ a ɩ̃ ƴɛ̀rʋ bɛ be za na tɔl ɛ.»

Nyɩ bɛr gʋ̃ɔ ɛ́ gùre nyɩ tʋɔra

³⁴ «Nyɩ gùre nyɩ tʋɔra vla, ta sàw a faalʋ, a dãa-kuolu nɩ a tẽw ŋa zu nyɔ-vʋʋrʋ bʋ̃-bɔbrɩ wa dĩ a nyɩ socie tɛr ɛ. Nyɩ ta sàw a bibir ŋa wa ùr vɩɛ a nyɩ zu ɛ.

³⁵ Ʋ na sɩrɩ na lo pàw a tẽ-daa nɩbɛ za mɛ̃ mɩ̃ɛ a.

³⁶ Nyɩ bɛr gʋ̃ɔ ɛ́ puore kʋralɛ: lɛ n'a bɛ na nyɛ̃ nyɩ bɛ sɛwnɩ a yel-tuor á ŋá za na waar a ɩ, ɛ́ nyɛ̃ nyɩ sɛwnɩ saaƴẽwn àrʋ a Nɩsaal Bie niŋé.»

³⁷ A mʋ̃tɔ̃w, a Yeezu mɩ́ tɩ be n a Ŋmɩn-yir-kpɛ̃ɛ pʋɔ kanɛ nɩ a nɩbɛ, ɛ́ a zie wa sɔb a, ʋ̃ʋ cen a tãw ʋl zu bɛ na bʋɔlɛ kɛ́ Olivʋ tɩɩr tãw a, tɩ gã.

³⁸ Ɛ́ a zie wa vɩɛrɛ a, a nɩbɛ za mɩ́ wa n a ʋ zie a Ŋmɩn-yir-kpɛ̃ɛ pʋɔ, kɛ́ bɛ wa bɛr wõ a ʋ ƴɛ̀rʋ.