Luka 17 - A SƐB-SÕW

A yel-bier nɩ a suur-dɩ-kʋ̀b yele

¹ A Yeezu tɩ yel'ɩ a ʋ po-tuurbɛ: «A bɛ tɛr ɩb ɛ, yele na be n be tawr a nɩbɛ ƴãwn a yel-bier pʋɔ. Ɛcɛ baw-bio sob'ɩ a sob nɛ na mɩ́ wa n a yele á ŋá a.

² Bɛlɛ ɩ mɛ̃ bɛ 'lẽ nɩ kʋsɛ-kpɛ̃ɛ ƴãw ʋ kɔkɔrɩ́, ɛ́ dáa ʋ lɔb ƴãw kʋ̃ɔ-kpɛ̃ɛ pʋɔ a, alɛ na sa ʋ, ʋ na na ɩ a bãbàalbɛ bɛ ŋa kãw ʋ lo a yel-bier pʋɔ a.

³ Nyɩ gù nyɩ tʋɔra vla.» «A fʋ yɛb wa ɩ sãw fʋ a, wul ʋ. Ɛ́ ʋlɛ wa sàw a ʋ sãwna a, dɩ suur kʋ̀ ʋ.

⁴ Ɛ́ bibi-been pʋɔ, ʋlɛ wa sãw fʋ gb'a ayopõi, ɛ́ a gb'a ayopõi ƴãw ʋ lɛb wa yel fʋ: “Ɩ̃ sãw na” a, fʋ na dɩ n suur kʋ̀ ʋ.»

A naaŋmɩn-sàw-deb yele

⁵ A nɩ-toni tɩ yel'ɩ a Sore: «Ɩ a tɩ naaŋmɩn-sàw-deb ʋ bɛrmɛ dɔwlɩ.»

⁶ A Sore tɩ sɔw na: «Nyɩmɛ tɩ ɩ mɛ̃ nyɩ tɛr'ɩ a naaŋmɩn-sàw-deb ʋ bɛrmɛ mɛ̃ seneve bir a, nyɩ nãá tɩ yel'ɩ a sɩkomɔɔr tɩɛ ŋa na àr a: “Vʋ̃ɔ tɩ bà a kʋ̃ɔ-kpɛ̃ɛ pʋɔ”, ʋʋ nãá sàw nɩ a nyɩ nʋɔr.»

A tõ-tõ-bie na tõ a ʋ tome a

⁷ «Nyɩ buor sob'ʋ na tɛr tõ-tõ-bie ʋ kʋɔr bɩɩ àrɛ nɩ bome, ɛ́ wa yi a wɩ̀ɛ pʋɔ wa ta ʋ yel ʋ: “Wa fɔ̃w wa zɩ̃ dɩ”?

⁸ Ʋ kʋ̃ nɩ̃ɛ vɛ̃ kɛ́ yel ʋ: “Maalɩ a bʋ̃-dɩrɩ kʋ̀ m, su a fʋ tõ-tõ-kparɩ kaa nɩ ɩ̃ zie, ɩ̃ dɩ kɛ́ nyũ baarɩ, al pùorí, fʋ mɩ̀ na dɩ na kɛ́ nyũ ɛ?”

⁹ Ʋ tɛr'ɩ puoru san a tõ-tõ-bie ŋa zie, ʋ na tu a lɛ ʋ na ƴãw a nʋɔr kʋ̀ ʋ a bɩɩ?

¹⁰ Lɛ n'a a mɩ̀ ŋmɛ̃ a nyɩ zie: nyɩmɛ wa maalɩ a alɩ bome nɛ za a Naaŋmɩn na yel a, nyɩɩm yel nyɩ tʋɔra: “Tõ-tõ-biir tɛwr'ɩ tɩ, tɩ tome n'a tɩ tõ.”»

A Yeezu na sanɩ kɔn pie a

¹¹ A Yeezu na tɩ cere a Zerizalɛm a, ʋ tɩ tu na yi a Samaari nɩ a Galile ten cara pʋɔ.

¹² Ʋ na tɩ kpɩɛr tẽ-cãpile kãw pʋɔ a, kɔn pie tɩ wa na wa tuor'ʋ. Bɛ tɩ tɛw na àr zãá,

¹³ ɛ́ cɩɩrɛ kpɛ̃w za: «Yeezu, Wul-wul-kara a, zɔ tɩ nɩbaalʋ!»

¹⁴ A Yeezu tɩ nyɛ̃ bɛ na ɛ́ yel bɛ: «Nyɩ cen tɩ wul nyɩ tʋɔra a Naaŋmɩn bàwr-maalbɛ.» Zɩ̃ kɛ́ bɛ na tɩ be a sɔ́r zu cere a, bɛ tɩ sanɩ na.

¹⁵ A bɛ kãw na tɩ nyɛ̃ ʋ sanɩ a, ʋ lɩɛb'ɩ pùor zɛw kɔkɔr danɛ nɩ a Naaŋmɩn waar'ɩ,

¹⁶ wa lo vɔblɩ muru a Yeezu gbɛ́ɛ ƴãw, puore ʋ yãanɩ. Ɛcɛ Samaari tẽw nɩr tɩ n'ʋ.

¹⁷ Lɛ n'a a Yeezu pãa tɩ sowri: «A bɛ za pie bɛ nɛbɛ sanɩ ɛ? A piwaɩ bɛl na cɛ a, nyɩnɛ n'a bɛ be?

¹⁸ A bɛ kãw za bɛ yel k'ʋʋ lɛb wa danɩ a Naaŋmɩn, a bɛ ɩ a sãan ŋa yõ ɩ?»

¹⁹ Al pùorí, a Yeezu tɩ yel ʋ na: «Ìr cere, a fʋ naaŋmɩn-sàw-deb faa fʋ na.»

A Naaŋmɩn Naalʋ tab yele

²⁰ A Faarizɩ̃ɛ mɩnɛ tɩ sowr'ɩ a Yeezu: «Debor daar'a a Naaŋmɩn Naalʋ na ta?» Ʋ tɩ sɔw bɛ na: «A Naaŋmɩn Naalʋ waa kʋ̃ sãá ɩ.

²¹ Bɛ kʋ̃ yel a ʋ ƴãw kɛ́: “Nyɛ̃ ʋ ka”, bɩɩ: “Ʋlɛ n'ɩ ŋan ka lowr ɛ”. Bʋ̃ʋ n'ʋ vɛ̃, nyɩ bãwnɩ a, a Naaŋmɩn Naalʋ be n a nyɩ sɔgɔ.»

²² Lɛ n'a ʋ tɩ yel a ʋ po-tuurbɛ: «Bibie waar'a na vɩɛ, ɛ̀ nyɩ na bɔbr kɛ́ nyɩ nyɛ̃ a Nɩsaal Bie daar mʋ̃tɔ̃-been yõ, ɛ́ kʋ̃ nyɛ̃ ʋ ɛ.

²³ Bɛ na yere na kʋ̀rɛ nyɩ: “Nyɩ nyɛ̃ ʋ ka, ʋ be n ka lowr.” Nyɩ taa cere ɩ, nyɩ taa dãwnɛ taa a be ɩ.

²⁴ Mɛ̃ a lɛ saa na mɩ́ nyɩwrɩ yi ka tɩ sãá ka a, lɛ n'a a Nɩsaal Bie mɩ̀ na ŋmɛ̃ a ʋ waa bibir.

²⁵ Ɛcɛ a fɛr'a k'ʋʋ wõ tuo yaga, ɛ́ a dɩ̃a nɩbɛ bɛ ŋa zawr'ʋ bɛr baarɩ.

²⁶ A lɛ a yele na tɩ ɩ a Nowe daar a, lɛ n'a a mɩ̀ na ɩ a Nɩsaal Bie daar.

²⁷ A nɩbɛ tɩ dɩrɛ na ɛ́ nyúur, a dɛbr tɩ kule nɩ pɔwbɛ, ɛ́ a pɔwbɛ kule sɩrbɛ, tɩ ta n a ʋlɩ bibir nɛ a Nowe na kpɛ a gbor-kpɛ̃ɛ pʋɔ a. Lɛ n'a a kʋ̃ɔ-paalʋ tɩ wa, a nɩbɛ za tu kʋ̃ɔ kpi.

²⁸ A mɩ̀ na cãà na lɛb ŋmɛ̃ mɛ̃ a Lɔtɩ daar a: a nɩbɛ tɩ dɩrɛ na ɛ́ nyúur, bɛ tɩ dàar'ɩ bome ɛ́ kʋɔrɛ bome, bɛ tɩ kʋɔr'a ɛ́ mɩɛr yie.

²⁹ Ɛcɛ a ʋlɩ bibir nɛ za a Lɔtɩ na tɩ yi a Sodɔm tẽw pʋɔ a, Naaŋmɩn ɩ na vũu nɩ cirbi siw a Sodɔm zu mɛ̃ saa a, kʋ a nɩbɛ za.

³⁰ À ŋá n'a a mɩ̀ na ŋmɛ̃ a ʋlɩ bibir a Nɩsaal Bie na na wul ʋ tʋɔra a.»

³¹ «A ʋlɩ bibir nɛ a, sob nɛ wa be gàrʋ́ ɛ́ a ʋ bome be dĩó a, ʋ ta siw k'ʋʋ tɩ de a ɩ. Lɛ mɩ̀ n'a, sob nɛ na be pu-pʋɔ a, ʋ ta lɛb pùor kul yir ɛ.

³² Nyɩ lɛb tɩɛrɩ a Lɔtɩ pɔw yele.

³³ Sob nɛ na cɩrɛ nɩ a ʋ nyɔ-vʋʋrʋ a, na bɔr ʋ na bɛr, ɛ́ sob nɛ wa bɔr a ʋ nyɔ-vʋʋrʋ bɛr a, ʋ na páw ʋ na.

³⁴ Ɩ̃ yere na kʋ̀rɛ nyɩ, a ʋlɩ tɩ̃ɩsɔw nɛ a, nɩbɛ ayi na be n gado-been zu, bɛ wa tɛr been ɛ́ bɛr been.

³⁵ Pɔwbɛ ayi na lãw na ƴɛ̀rɛ zɔ̃, bɛ wa tɛr been ɛ́ bɛr been. [

³⁶ Dɛbr ayi na be n pu-pʋɔ, bɛ wa tɛr been ɛ́ bɛr been.»]

³⁷ A po-tuurbɛ tɩ de nɩ a ƴɛ̀rʋ sowr'ʋ: «Nyɩnɛ n'a à á ŋá za na ɩ, Sore e?» Ʋ tɩ sɔw bɛ na: «A be a bʋ̃-kũu na na be a, be n'a a sidume mɩ̀ na gbone taa.»