Luka 14 - A SƐB-SÕW

A Yeezu sanɩ nɩ po-paal sob kãw pɩ̃ɛnʋ-bibir

¹ Pɩ̃ɛnʋ-bibir kãw, a Yeezu tɩ kpɛ n a Faarizɩ̃ɛ mɩnɛ nɩ-kpɛ̃ɛ kãw zie a dɩb ƴãw. A nɩbɛ tɩ piwre ʋ na.

² Zɩ̃ kɛ́ po-paal sob kãw tɩ àr'ɩ a Yeezu niŋé.

³ A Yeezu tɩ de nɩ a ƴɛ̀rʋ sowri a Naaŋmɩn wulu bãw-bãw-karɩ nɩ a Faarizɩ̃ɛ mɩnɛ: «Bɛ na tʋ̃ɔ́ na sanɩ bàal a pɩ̃ɛnʋ-bibir bɩɩ bɛ kʋ̃ tʋ̃ɔ́?»

⁴ Ɛcɛ bɛ tɩ ɩ n gbili. A lɛ n'a a Yeezu tɩ tɔ a bàal sanɩ ʋ, ɛ́ ƴãw ʋ kule.

⁵ Al pùorí ʋ yel bɛ: «A nyɩ buor sob bie bɩɩ náab'ʋ na lo bule pʋɔ ʋ bɛ cen tɩ ír ʋ daadaalɛ, a pɩ̃ɛnʋ-bibir saa n'a a?»

⁶ Bɛ bɛ tɩ tʋ̃ɔ́ nyɛ̃ sɔwfʋ a ka ɩ.

Sob nɛ wa siwre ʋ tʋɔra a, bɛ na zɛw ʋ na

⁷ A Yeezu na tɩ nyɛ̃ a nɩbɛ bɛ na bʋɔlɩ a cuw zie, bɛ kaarɛ íre a dà-kɔwr na bin a nisɔw a, ʋ lɔb'ɩ zʋkpar ŋa kʋ̀ bɛ:

⁸ «Bɛlɛ wa bʋɔlɩ fʋ kul-taa cuw zie a, fʋ̃ʋ ta cen tɩ kaa ír zɩma zie zɩ̃ a nisɔw ɛ. Bɛ nãà mab'a bʋɔlɩ nɩr na zuo fʋ a, ɛ́ a ʋlɩ sob nɛ na bʋɔlɩ nyɩ a,

⁹ fʋ̃ʋ nɩ a fʋ tɔ sob a, nãà mab'a yel fʋ: “Ìr ɛcɛ a fʋ zɩma zie kʋ̀ ʋ.” Fʋ na ìr'a nɩ vĩ siw a pɛrɩ́.

¹⁰ Bɛlɛ wa bʋɔlɩ fʋ cuw zie a, fʋ̃ʋ nɩ̃ɛ tɩ zɩ̃ a pɛrɩ́ za. Lɛ n'a a ʋlɩ sob na bʋɔlɩ fʋ a wa wa a, ʋ na yel fʋ na: “Ɩ̃ bá a, ìr tɔl do nidaa.” A lɛ pʋɔ a, fʋ na nyɛ̃ nɩ ƴãwfʋ a cuw-dɩrbɛ za niŋé.

¹¹ Sob nɛ za na zɛwr ʋ tʋɔra a, bɛ na siwr'ʋ na, ɛ́ sob nɛ za na siwre ʋ tʋɔra a, bɛ na zɛw ʋ na.»

¹² A Yeezu mɩ̀ tɩ yel'ɩ a sob nɛ na bʋɔl'ʋ a: «Fʋ̃ʋ mɩ́ wa bʋɔlɛ nɩbɛ dɩb ƴãw, gbãgbãw daar bɩɩ zaanʋɔra a, ta mɩ́ bʋɔlɩ a fʋ bárɩ, nɩ a fʋ yɛbr, nɩ a fʋ nɩbɛ nɩ a fʋ sɩman dem bɛl na tɛr a a ɩ, alɛ bɛ ɩ lɛ, bɛ mɩ́ nãà bʋɔlɩ fʋ na tɩ ƴãw fʋ yáa a san.

¹³ A na ɩ lɛ a, fʋ̃ʋ wa maalɛ cuw a, fʋ̃ʋ bʋɔlɩ a nan dem, a nɩ-kɔwr, a wʋbr nɩ a zɔn.

¹⁴ Ɛcɛ nʋ̃ɔ̀ na kpɩɛr fʋ na, bɛ na kʋ̃ tʋ̃ɔ́ kʋ̀ b bom za yáa a san a. A nɩ-mɩn kũu-pʋɔ-lɛb-yibu daar a, fʋ na páw nɩ a sã-ya.»

A nɩbɛ bɛ na bʋɔlɩ a cuw ƴãw bɛ zawrɩ a zʋkpar

¹⁵ Nɩr kãw na tɩ lãw dɩrɛ nɩ bɛ a, na wa wõ a ƴɛ̀r-bie á ŋá a, ʋ yel'ɩ a Yeezu: «Zu-nʋ̃ɔ̀ sob'ɩ a sob nɛ na na pʋɔ a Naaŋmɩn Naalʋ cuw dɩb pʋɔ a!»

¹⁶ A Yeezu tɩ yel ʋ na: «Nɩr kãw tɩ cɔbr'ɩ cuw dɩb bʋɔlɩ nɩ nɩ-yaga.

¹⁷ A dɩb daar na wa ta a, ʋ tõ n a ʋ tõ-tõ-bie k'ʋʋ tɩ yel a nɩbɛ ʋ na bʋɔlɩ a: “Nyɩ pãa wa, bom za cɔbr'a baarɩ!”

¹⁸ Ɛcɛ bɛ za been been tɩ yere na bɛ na kʋ̃ tʋ̃ɔ́ a. A dãw-niwn sob tɩ yel ʋ na: “Ɩ̃ dà n púo daar yɩ̃ɛ ŋa, a fɛr k'ɩ̃ɩ cen tɩ jɩ́r kaa. Ɩ̃ zɛlɛ na kɛ́ fʋ ƴãw mɛ̃ gaafara.”

¹⁹ A ƴen sob kãw tɩ yel ʋ na: “Ɩ̃ daar da n ni-kʋ́ɔrɩ pie cere nɩ k'ɩ̃ɩ tɩ kɔ n kaa. Ɩ̃ zɛlɛ na kɛ́ fʋ ƴãw mɛ̃ gaafara.”

²⁰ Kãw mɩ̀ lɛb tɩ yel'a: “Pɔw n'ʋ ɩ̃ cãà kul baar à ŋá, alɛ so ɩ̃ kʋ̃ tʋ̃ɔ́ wa ɩ.”

²¹ A tõ-tõ-bie tɩ lɛb'a kul tɩ yel a sɔwfʋ á ŋá bɛ na sɔw a, kʋ̀ a ʋ nɩ-kpɛ̃ɛ. A yir nɩ-kpɛ̃ɛ tɩ nyɛ̃ nɩ suur ɛ́ yel a tõ-tõ-bie: “Yi cen fɔ̃w a nɩbɛ tuor-taa ziir, nɩ a tẽw pʋɔ sɛ́ɛ pʋɔ tɩ tɛr a nan dem, a nɩ-kɔwr, a zɔn nɩ a wʋbr wa n a ka.”

²² A tõ-tõ-bie tɩ lɛb'a wa a pùorí wa yel: “Nɩ-kpɛ̃ɛ ɛ, ɩ̃ tõ n a lɛ fʋ na yel a, ɛcɛ a zie cãà bɛ paalɩ ɛ!”

²³ Lɛ n'a a nɩ-kpɛ̃ɛ tɩ yel ʋ: “Yi lo a póru sɛ́ɛ, lanɛ a dàbáwr ɛ́ fɛr a nɩbɛ ƴãw bɛ wa kpɛ, a ɩ̃ yir tʋ̃ɔ́ paalɩ.

²⁴ Mãa n'ʋ yere kʋ̀rɛ nyɩ, a bɛlɩ dem ɩ̃ na tɩ bʋɔlɩ a, a bɛ kãw za kʋ̃ lɛm a ɩ̃ bʋ̃-dɩrɩ ɛ.”»

A Yeezu pùor-tub yele

²⁵ Zu-sɛbla na bɛ dɩ vuo a, tɩ páw nɩ a Yeezu lo a sɔ́r cere. Ʋ tɩ lɩɛb'a yel bɛ:

²⁶ «Nɩr wa wa a ɩ̃ zie ɛ́ bɛ nɔnɛ mɛ̃ zuo a ʋ sãà, a ʋ mã, a ʋ pɔw, a ʋ bibiir, a ʋ yɛbr nɩ yeepuuli, nɩ a ʋ nyɔ-vʋʋrʋ tɔr za a, ʋ kʋ̃ tʋ̃ɔ́ ɩ a ɩ̃ po-tuure ɩ.

²⁷ Sob nɛ na bɛ tuo a ʋ da-gara tuur'ɩ mɛ̃ a, kʋ̃ tʋ̃ɔ́ ɩ a ɩ̃ po-tuure ɩ.

²⁸ A nyɩ buor sob'ʋ na bɔbr k'ʋʋ ŋmãa yir-cõcowla, ɛ́ bɛ dãw de niwn zɩ̃ tẽw sɔ́r a libie nyɛ̃, a na ta na bɩɩ a kʋ̃ ta.

²⁹ Alɛ bɛ ɩ lɛ, ɛ́ ʋlɛ wa sʋ̃ɔ́ a yir pɛr ɛ́ bɛ tʋ̃ɔ́ mɛ baar'a, bɛlɩ dem za nãà mɩ́ wa nyɛ̃ ʋ a, na mɩ́ ɩrɛ ʋ na laar,

³⁰ ɛ́ yere: “Nyɛ̃ nɩr na tĩ yir pɛr, ɛ́ bɛ tʋ̃ɔ́ ŋmãa baar'a!”

³¹ Bɩɩ, nà-buor sob'ʋ na ìr tuore a ʋ tɔ sob kɛ́ bɛ zɛb, ɛ́ bɛ dãw de niwn zɩ̃ kɛ́ bɛl nyɛ̃, ʋ na tʋ̃ɔ́ na nɩ nɩbɛ tùr-pie (10 000) zɛb'ɩ a ʋ tɔ sob na waar a ʋ ƴãw nɩ nɩbɛ tùr-lɩzɛr (20 000) a bɩɩ?

³² Ʋlɛ wa nyɛ̃ ʋ kʋ̃ tʋ̃ɔ́ a, ɛcɛ a ʋ tɔ sob na cãà zãá a, ʋ na tõ n nɩbɛ bɛ tɩ zɛlɩ a ƴã-ɓaarʋ.

³³ Lɛ mɩ̀ n'a, a nyɩ pʋɔ a, nɩr bɛ wa zawrɩ a ʋ bʋ̃-tɛrɩ za bɛr a, ʋ kʋ̃ tʋ̃ɔ́ ɩ a ɩ̃ po-tuure ɩ.»

A nyaarʋ zʋkpar

³⁴ «Sɩza n'a, a nyaarʋ ɩ n bʋ̃-nʋ̃ɔ̀. Ɛcɛ a nyaarʋ nʋ̃ɔ̀ wa yi a, bʋ̃ʋ n'ʋ bɛ na ƴãw a lɛb nʋmɛ?

³⁵ A bɛ cãà vɩɛl a tẽsɔw ƴãw nɩ a pʋɔrʋ ƴãw ɛ, bɛ mɩ́ lɔb a na bɛr yẽw. Sob nɛ na tɛr tobe bɛr-wob ƴãw a, ʋ bɛrɛ wone.»