Levitɩ mɩnɛ 9 - A SƐB-SÕW

A Aarɔ̃ nɩ a ʋ bidɛbr tĩ nɩ a bɛ tome

¹ A bibie ani sob a, a Moyiir tɩ bʋɔl'ɩ a Aarɔ̃ nɩ a ʋ bidɛbr nɩ a Ɩsɩrayɛl nɩbɛ nɩ-kore wa n.

² Ʋ tɩ yel'ɩ a Aarɔ̃ à ŋá: «Bɔ nále yel-bier-ír-bɛrʋ bàwr maalʋ ƴãw, nɩ pʋ́ra nyɩw-a-za-bàwr maalʋ ƴãw, a za ayi ƴã-gamɛ zie kãw za kʋ̃ sãw ɛ. Fʋ na tɛr a na wa n a Sore niŋé.

³ Al pùorí, fʋ na ƴɛ̀r'ɩ à ŋá a Ɩsɩrayɛl nɩbɛ zie: “Nyɩ nyɔw bʋra yel-bier-ír-bɛrʋ bàwr maalʋ ƴãw, ɛ́ nyɔw yũon-been nále nɩ yũon-been péle a ƴã-gamɛ zie kãw za na bɛ sãw a, nyɩw-a-za-bàwr ƴãw.

⁴ Nyɩ mɩ̀ nyɔw nadɛr nɩ pʋ́ra maal'ɩ lãw-taa bàwr kʋ̀ a Sore, lãwnɩ kukur bom de-kʋ̀b na naw nɩ kãá a. Bʋ̃ʋ n'ʋ vɛ̃, a dɩ̃a tɔr za a, a Sore na ɩ na nyɩ nyɛ̃ ʋ.”»

⁵ Bɛ tɩ wa n nɩ a bome á ŋá a Moyiir na yel a, a tuor-taa pɛn-sɛw dɩ̃dɔr nʋɔr, ɛ́ a lãw nɩbɛ za taw ta àr a Sore niŋé.

⁶ A Moyiir tɩ yel'a: «Ɩ̃ na wul nyɩ nɩ a lɛ a Sore na yel kɛ́ nyɩ ɩ, a ʋ yúor-vɩɛlʋ-danʋ tʋ̃ɔ́ sãá a nyɩ zie a.»

⁷ Al pùorí, ʋ yel a Aarɔ̃: «Taw pɩɛlɩ a bàwr-maal-kuur maalɩ a fʋ yel-bier-ír-bɛrʋ bàwr nɩ a fʋ nyɩw-a-za-bàwr, ɛ́ tu a yel-bebe suur-dɩ-kʋ̀b tub fʋ̃ʋ nɩ a nɩbɛ ƴãw. Al pùorí, maalɩ a nɩbɛ bàwr, ɛ́ lɛb tu a yel-bebe suur-dɩ-kʋ̀b tub a bɛ ƴãw, mɛ̃ a lɛ a Sore na yel a.»

⁸ A Aarɔ̃ tɩ taw na pɩɛlɩ a bàwr-maal-kuur, ŋmãa a ʋl mɩŋa yel-bier-ír-bɛrʋ bàwr nále kɔkɔr.

⁹ A ʋ bidɛbr tɩ tur ʋ nɩ a dʋ̃w zɩ̃ɩ, ʋ mɩ́ tõ nobir ɩ n a zɩ̃ɩ ƴãw a bàwr-maal-kuur ɩ́lɛ́ ƴãw, al pùorí, ʋ cir a zɩ̃ɩ na cɛ a ƴãw a bàwr-maal-kuur sɩɛ ƴãw.

¹⁰ Ʋ tɩ nyɩw nɩ a nɛn-kãánɩ, a alãbie nɩ a sabr lõbowr-kpɛ̃ɛ a bàwr-maal-kuur zu, mɛ̃ a lɛ a Sore na tɩ yel kʋ̀ a Moyiir a.

¹¹ A nɛn nɩ a gán al a, bɛ tɩ yi na zaa nɩ a laɩ pʋɔ tɩ nyɩw bɛr.

¹² A Aarɔ̃ tɩ ŋmãa nɩ a nyɩw-a-za-bàwr pʋ́ra kɔkɔr. A ʋ bidɛbr tɩ kʋ̀ ʋ nɩ a zɩ̃ɩ, ʋ mɩr'ɩ a bàwr-maal-kuur kõkowe.

¹³ Bɛ mɩ̀ tɩ kʋ̀ ʋ nɩ a zu nɩ a ƴã-gan bɛ na vár vár ŋma a, ʋ nyɩw a a bàwr-maal-kuur zu.

¹⁴ Ʋ tɩ pɛ́w nɩ a nyagɛ nɩ a púor nɩ a gbɛ́ɛ, nyɩw a a bàwr-maal-kuur zu, lãwnɩ a nɛnɛ al na tɩ be be a.

¹⁵ Al pùorí, ʋ tɩ de nɩ a nɩbɛ bagɛ kʋ̀ a Sore. Ʋ tɩ de nɩ a bʋra a nɩbɛ na wa n a yel-bier-ír-bɛrʋ bàwr ƴãw a, ŋmãa a kɔkɔr maal'ɩ a bàwr, mɛ̃ a lɛ ʋ na tɩ ɩ a nále ƴãw a.

¹⁶ Ʋ tɩ de nɩ a nyɩw-a-za-bàwr dʋn ayi tɩr, ɛ́ kʋ a maal'ɩ a bàwr, mɛ̃ a lɛ a tub na tuur a.

¹⁷ Ʋ tɩ de nɩ a kukur bom de-kʋ̀b tɩr, ɩ nũ-kur zɔ̃ nyɩw a bàwr-maal-kuur zu, ƴãw pʋɔ a biɓaarɛ za nyɩw-a-za-bàwr ƴãw.

¹⁸ Ʋ tɩ ŋmãa nɩ a nadɛr nɩ a pʋ́ra a nɩbɛ na wa n a lãw-taa bàwr ƴãw a kɔkɛɛ. A ʋ bidɛbr tɩ kʋ̀ ʋ nɩ a dʋn á ŋá zɩ̃ɩ, ʋ mɩr'ɩ a bàwr-maal-kuur kõkowe.

¹⁹ Bɛ mɩ̀ tɩ kʋ̀ ʋ nɩ a nadɛr nɩ a pʋ́ra nɛn-kãánɩ, a pɛr lɛ k'aa zʋʋr, a kãá na pàw a nyagɛ nɩ a púor a, a alãbie a za ayi nɩ a sabr lõbowr-kpɛ̃ɛ.

²⁰ A Aarɔ̃ bidɛbr tɩ dɔwl'ɩ a nɛnɛ á ŋá a dʋn ayi nyarʋ zu, al pùorí, a Aarɔ̃ nyɩw a nɛn-kãánɩ a bàwr-maal-kuur zu.

²¹ A Aarɔ̃ tɩ tu n a bom de-tɩrʋ tub, de a nyarʋ nɩ a pɛrɩ́ dʋrʋ-gbɛ́r kʋ̀ a Sore mɛ̃ a lɛ a Moyiir na tɩ yel a.

²² A Aarɔ̃ na tɩ maalɩ a yel-bier-ír-bɛrʋ bagɛ, a nyɩw-a-za-bagɛ nɩ a lãw-taa bagɛ baar'a, ʋ zɛw nɩ a nuru cɔw a nɩbɛ, ƴɛ̀r nɔ-vla ƴãw bɛ, ɛ́ lɛb siw a bàwr-maal-kuur zu.

²³ A Moyiir nɩ a Aarɔ̃ tɩ kpɛ n a tuor-taa pɛn-sɛw pʋɔ. Bɛ na tɩ lɛb yi a be a, bɛ ƴɛ̀r'ɩ nɔ-vla ƴãw a nɩbɛ. Lɛ n'a a Sore yúor-vɩɛlʋ-danʋ tɩ sãá a nɩbɛ za nyɛ̃.

²⁴ Vũu-zɛl tɩ yi n a Sore niŋé dɩ a nyɩw-a-za-bagɛ nɩ a bàwr-yoru nɛn-kãánɩ a bàwr-maal-kuur zu. A nɩbɛ za tɩ nyɛ̃ a na. Bɛ tɩ lɔb'ɩ nʋ̃ɔ̀ cɛlsɩ, ɛ́ lo vɔblɩ muru.