Levitɩ mɩnɛ 7 - A SƐB-SÕW

c. A lɛb-kpɛ-taa bàwr

¹ «A lɛb-kpɛ-taa bàwr tub n'ɩ à ŋá: bàwr-maal-bom na ɩ sõw yaga za a n'ʋ.

² A be bɛ na mɩ́ ŋma a nyɩw-a-za-bagɛ dʋn kɔkɛɛ a, be n'a bɛ ŋmaarɛ a lɛb-kpɛ-taa bàwr dʋ̃w kɔkɔr, al pùorí, a bàwr-maalɛ mɩr a bàwr-maal-kuur kõkowe nɩ a zɩ̃ɩ.

³ Nɛn-kãánɩ á ŋá n'a ʋ na de kʋ̀ a Sore: a zʋʋr, a kãá na pàw a nyagɛ nɩ a púor a,

⁴ a alãbie a za ayi nɩ a kãá na pàw a ɛ́ mɛr a dʋ̃w lõbowe ƴãw a, pãa de nɩ a sabr lõbowr-kpɛ̃ɛ bɛ na ír lãwnɩ a alãbie a.

⁵ A bàwr-maalɛ na nyɩw nɩ à á ŋá za a bàwr-maal-kuur zu. Bàwr nɛn bɛ na nyɩw a Sore ƴãw a n'ʋ: a lɛb-kpɛ-taa bàwr'ɩ à ŋà.

⁶ A bàwr-maalbɛ yie dɛbr tɛwr nɛbɛ na tʋ̃ɔ́ 'wɔb a nɛn ŋa, ɛ́ zie na ɩ sõw a pʋɔ n'a bɛ na 'wɔb ʋ, ʋ na ɩ bàwr-maal-bom na ɩ sõw yaga za a ƴãw.

⁷ A lɛ a yel-bier-ír-bɛrʋ bàwr na ŋmɛ̃ a, lɛ n'a a lɛb-kpɛ-taa bàwr mɩ̀ ŋmɛ̃. Tub been n'ʋ a za ayi ƴãw. A bàwr-maalɛ ʋl na tu a yel-bier suur-dɩ-kʋ̀b tub a, ʋlɛ so a dʋ̃w nɛn.»

d. A bàwr-maalɛ sób

⁸ «Nɩr wa maalɛ nyɩw-a-za-bàwr a, a bàwr-maalɛ ʋl na de a niwn a yele maalʋ ƴãw a, ʋlɛ so a dʋ̃w gán.

⁹ A kukur bome bɛ na mɩ́ de tɩr a, bɛ ɩ na a bɩ dam-tʋlʋ pʋɔ bɩɩ kure-sɛr pʋɔ bɩɩ kur-pãgala zu a, a bàwr-maalɛ ʋl na de a niwn a yele maalʋ pʋɔ a, ʋlɛ so a.

¹⁰ Ɛcɛ a de-kʋ̀b bome al na ɩ bʋ̃-kɛrɛ a, bɛ cɔbrɩ a na nɩ kãá bɩɩ bɛ bɛ cɔbrɩ a nɩ kãá a, a Aarɔ̃ bidɛbr za so a. Bɛ na mɩ́ põ na a zɛ̃ taa.»

e. A lãw-taa bàwr

¹¹ «A tub na càarɩ a lãw-taa bàwr bɛ na maalɩ kʋ̀ a Sore a n'ɩ á ŋá:

¹² Nɩr wa maalɛ lãw-taa bàwr k'ʋʋ lãwnɩ danʋ yielu a, ʋ na wa n nɩ gato na maal'ɩ kãá ɛ́ bɛ ƴãw dãbɩl a, nɩ sɛ̃sɛ̃ na bɛ ƴãw dãbɩl ɛ́ bɛ waarɩ kãá a, nɩ gato bɛ na maal'ɩ zɔ̃ na naw nɩ kãá a, ƴãw pʋɔ a bàwr-maal dʋ̃w ƴãw.

¹³ Ʋ mɩ̀ na wa n nɩ dipɛ̃ na ƴãw dãbɩl a wa lãwnɩ a danʋ bàwr.

¹⁴ Ʋ na ír'ɩ bʋ̃-beƴeni a de-kʋ̀b bome á ŋá pʋɔ a Sore ƴãw. A bàwr-maalɛ na mɩr a bàwr-maal-kuur kõkowe nɩ a zɩ̃ɩ a, ʋlɛ so a bome á ŋá.

¹⁵ A dʋ̃w bɛ na kʋ maal'ɩ a danʋ bàwr a, bɛ na 'wɔb'ɩ a ʋ nɛn a ʋlɩ bibir nɛ za, bɛ bɛ bɛrɛ bom bine bio ɛ.»

¹⁶ «Nɩr wa nɔnɛ maalɩ lɛb-kpɛ-taa bàwr, bɩɩ ʋlɛ wa maalɩ ʋ, nʋɔr ʋ na kõ a íru ƴãw a, bɛ na tʋ̃ɔ́ na 'wɔb a nɛn ŋmãa a bàwr bibir tɔr za, ɛ́ 'wɔb a ŋmãa a bio daarɩ́.

¹⁷ Nɛn wa cãà gúu a deyere daarɩ́ a, bɛ na lɔb ʋ na ƴãw vũumí.

¹⁸ Nɩr wa cãà 'wɔb a bàwr nɛn a bibie ata sob a, Naaŋmɩn bɛ dier a ʋ bàwr ɛ, a ʋ bàwr bɛ pʋɔ ɩ, bʋ̃ʋ n'ʋ vɛ̃, nɛn na bɛ cãà sɛw taa nɩ a n'ʋ. Ɛ́ sob nɛ za na 'wɔbr ʋ a ɩ n sãwna sob.

¹⁹ Lɛb waar, a nɛn wa tɔ bom na tɛr dɛwr a, bɛ bɛ 'wɔbr ʋ ɛ, bɛ na lɔb ʋ na ƴãw vũumí.» «A fɛr'a k'aa nɩr mɩ́ vɩɛl tʋ̃ɔ́ 'wɔb a bàwr nɛn.

²⁰ Nɩr wa tɛr dɛwr ɛ́ 'wɔb a lɛb-kpɛ-taa bàwr bɛ na maalɩ kʋ̀ a Sore a nɛn a, bɛ na ír ʋ na bɛr a Ɩsɩrayɛl nɩbɛ lãw pʋɔ.

²¹ Nɩr mɩ̀ wa tɔ nɩsaal na tɛr dɛwr a, dʋ̃w na tɛr dɛwr a, bɩɩ bom za na tɛr dɛwr a, ɛ́ 'wɔb a lɛb-kpɛ-taa bàwr bɛ na maalɩ kʋ̀ a Sore a nɛn a, bɛ na ír ʋ na bɛr a Ɩsɩrayɛl nɩbɛ lãw pʋɔ.»

A tub al na ƴãw a nɩbɛ za ƴãw a

²² A Sore tɩ yel'ɩ a Moyiir

²³ k'ʋʋ manɩ a tub á ŋá kʋ̀ a Ɩsɩrayɛl nɩbɛ: «Náab, pɛrʋ bɩɩ bʋɔ nɛn-kãá kãw za a, nyɩ bɛ 'wɔbr ʋ ɛ.

²⁴ Nyɩ bɛ 'wɔbr dʋ̃-kũu kãá ɛ́ mɩ̀ bɛ 'wɔbr dʋ̃w wɛ-dʋ̃w na kʋ a kãá ɩ, ɛcɛ bɛ na tʋ̃ɔ́ na ɩ n bom za a kãá á ŋá.

²⁵ Nɩr wa 'wɔb dʋ̃w nɛn-kãá bɛ na na nyɩw, ʋ ɩ bàwr a Sore ƴãw a, bɛ na ír ʋ na bɛr a Ɩsɩrayɛl nɩbɛ lãw pʋɔ.

²⁶ Nyɩ mɩ̀ bɛ 'wɔbr lile zɩ̃ɩ bɩɩ dʋ̃w zɩ̃ɩ towtow ɛ, zie nɛ za nyɩ nãà wa kpɩɛr a.

²⁷ Nɩr wa 'wɔb zɩ̃ɩ a, bɛ mɩ̀ na ír ʋ na bɛr a Ɩsɩrayɛl nɩbɛ lãw pʋɔ.»

²⁸ A Sore tɩ yel'ɩ a Moyiir

²⁹ k'ʋʋ mɩ̀ cãà lɛb manɩ a tub á ŋá kʋ̀ a Ɩsɩrayɛl nɩbɛ: «Nɩr wa maalɛ lãw-taa bàwr a, ʋ na mɩ́ wa n nɩ a bome al a Sore na so a, wa kʋ̀ ʋ.

³⁰ Ʋl mɩŋa na mɩ́ wa n nɩ a al a Sore na so a, a pɛr lɛ kɛ́ a nɛn-kãánɩ nɩ a dʋ̃w nyãa. A fɛr'a k'ʋʋ mɩ́ tu a bom tɩrʋ tub, kʋ̀ a Sore a dʋ̃w nyãa.

³¹ Lɛ n'a a bàwr-maalɛ na nyɩw a nɛn-kãánɩ a bàwr-maal-kuur zu. A nyãa ʋl a, a Aarɔ̃ nɩ a ʋ bidɛbr so ʋ.

³² A dʋ̃w nyɩ na maal'ɩ a bàwr a, nyɩ mɩ̀ na ír'ɩ a pɛrɩ́ dʋrʋ-gbɛ́r kʋ̀ a bàwr-maalɛ.

³³ A pɛrɩ́ dʋrʋ-gbɛ́r ŋa a, a Aarɔ̃ bidɛb ʋl na de a zɩ̃ɩ nɩ a nɛn-kãánɩ tɩr a dem'ʋ.

³⁴ À ŋá sɩrɩ n'a a Sore ƴãwnɛ a nʋɔr kʋ̀rɛ nyɩ, nyɩɩm Ɩsɩrayɛl nɩbɛ ɛ: a dʋn nyɩ na mɩ́ kʋ maal'ɩ a lãw-taa bàwr a, nyɩ na mɩ́ ír'ɩ a nyãa nɩ a pɛrɩ́ dʋrʋ-gbɛ́r kʋ̀ a bàwr-maalɛ Aarɔ̃ nɩ a ʋ bidɛbr, bʋ̃ʋ n'ʋ vɛ̃, bɛlɛ so a nɛnɛ á ŋá kʋralɛ.»

³⁵ A Aarɔ̃ nɩ a ʋ bidɛbr dem'ɩ à á ŋá bɛ na na mɩ́ ír a bàwr-maal nɛnɛ pʋɔ, a lɛn daar bɛ na mɩ́ maalɩ bagɛ kʋ̀ a Sore ɛ́ nyɩw a nɛnɛ a mɩnɛ a. Bɛlɛ na mɩ́ so a, a ʋlɩ bibir nɛ bɛ na dɛ lɩɛbɛ a bàwr-maalbɛ a Sore tome tob ƴãw a.

³⁶ A Sore ƴãw nɩ nʋɔr kʋ̀ a Ɩsɩrayɛl nɩbɛ, kɛ́ bɛ mɩ́ kʋ̀ bɛ a bome á ŋá, a ʋlɩ bibir nɛ za bɛ na cir a kãá ƴãw bɛ a zũú a. Nʋɔr na bɛ tɛr lɩɛbʋ a n'ʋ a nɩbɛ na dɔwr lɩɛrɛ taa a zie.

³⁷ A tub na càarɩ a nyɩw-a-za-bagɛ, a kukur bome de-kʋ̀b, a yel-bier-ír-bɛrʋ bagɛ, a lɛb-kpɛ-taa bagɛ, a bàwr-maalbɛ tome tib bagɛ nɩ a lãw-taa bagɛ a, n'ɩ à á ŋá.

³⁸ A Sore tɩ kʋ̀ n a tub á ŋá a Moyiir a wɛja-kpalɛ pʋɔ, a Sinayi tãw zu, a ʋlɩ bibir ʋ na tɩ yel a Ɩsɩrayɛl nɩbɛ kɛ́ bɛ wa n a bɛ de-kʋ̀b bome a.