Levitɩ mɩnɛ 6 - A SƐB-SÕW

Tub na ƴãw a bàwr-maalbɛ ƴãw a a. A nyɩw-a-za-bàwr

¹ A Sore tɩ yel'ɩ a Moyiir

² k'ʋʋ manɩ a tub á ŋá kʋ̀ a Aarɔ̃ nɩ a ʋ bidɛbr: «A tub al na càarɩ a nyɩw-a-za-bàwr a n'ɩ á ŋá: a nyɩw-a-za-bàwr ŋa bom na mɩ́ be n a bàwr-maal-kuur vũu zu, a tɩ̃ɩsɔw za tɩ ta n a biɓaara, ɛ́ a vũu cãà dɩrɛ.

³ Al pùorí, a bàwr-maalɛ na su n a ʋ lɛ̃ pɛn kparʋ nɩ a ʋ lɛ̃ pɛn tɔ̃tɔl, wob'ɩ a bàwr-maal-bom na dɩ a tãpɛl-kãá bin a bàwr-maal-kuur pɛr.

⁴ Al pùorí, ʋ lɩɛrɩ a ʋ bʋ̃-suuri, ɛ́ de a tãpɛlʋ yi zaa nɩ a laɩ pʋɔ tɩ bin zie na bɛ tɛr dɛwr a.

⁵ A vũu na dɩrɛ a bàwr-maal-kuur zu a, bɛ kpiire ɩ: biɓaara za a, a bàwr-maalɛ na mɩ́ ƴãw nɩ dà-ŋmaarɛ ɛ́ de a nyɩw-a-za-bàwr dʋ̃w dɔwlɩ, ɛ́ bãw nyɩw a lãw-taa bagɛ nɛn-kãánɩ.

⁶ Vũu na bɛ kpiire a na dɩrɛ nɩ a bàwr-maal-kuur zu bɛ tɛr kpiiru daar ɛ.»

b. A kukur bom de-kʋ̀b

⁷ «A tub na càarɩ a kukur bom de-kʋ̀b a n'ɩ ŋa: a Aarɔ̃ bidɛbr nɛbɛ na mɩ́ de ʋ kʋ̀ a Sore a bàwr-maal-kuur niŋé.

⁸ A bàwr-maalɛ kãw na ɩ n nũ-kur zɔ̃ na jɛr'ɩ a kãá a, a de-kʋ̀b bom pʋɔ, de nɩ a tɩ-suur-zɔ̃-na-nyùur-vla-vla-a za, nyɩw a a bàwr-maal-kuur zu, a ɩ a “Cãà-bãwnɩ.” A Sore nɔnɛ nɩ a de-kʋ̀b bom zʋ̀ʋ́r na nyùur vla vla a.

⁹ A Aarɔ̃ nɩ a ʋ bidɛbr na tʋ̃ɔ́ na dɩ a de-kʋ̀b bʋ̃-ŋmãa na cɛ a, ɛ́ taa ƴãwnɛ dãbɩl ɛ. A tuor-taa pɛn-sɛw davʋra zie kãw na ɩ sõw a pʋɔ n'a bɛ na dɩ ʋ.

¹⁰ A na ɩ à ŋá a, bɛ bɛ ƴãwnɛ dãbɩl ɩrɛ nɩ a bɩrɛ ɩ, bʋ̃ʋ n'ʋ vɛ̃, a al a Sore na kʋ̀rɛ bɛ à à ŋá a, a yi n a bome bɛ na mɩ́ de kʋ̀ ʋ a pʋɔ. Bome na ɩ son yaga mɛ̃ a yel-bier-ír-bɛrʋ bàwr bɩɩ a lɛb-kpɛ-taa bàwr bome na cɛ a n'a.

¹¹ A Aarɔ̃ bʋ̃-dɔwrɩ pʋɔ dɛbr tɛwr nɛbɛ na mɩ́ tʋ̃ɔ́ dɩ a, bʋ̃ʋ n'ʋ vɛ̃, a bome bɛ na mɩ́ wa n wa de kʋ̀ a Sore a pʋɔ a, a bɛ dem n'ɩ à á ŋá kʋralɛ. À ŋá n'a so, bom za wa tʋɔr a a na ɩ n Naaŋmɩn bʋ̃-sora.»

¹² A Sore tɩ yel'ɩ a Moyiir:

¹³ «Bɛlɛ wa cire a kãá ƴãwn bɛ a zũú wa báarɛ a, a Aarɔ̃ nɩ a ʋ bidɛbr na mɩ́ de nɩ kilo ata zɔ̃ kʋ̀ a Sore, bibir za. A zɔ̃ põ-zɛ̃-taa a biɓaara, ɛ́ a ŋmãa a zaanʋɔra.

¹⁴ Bɛ na mɩ́ naw nɩ a zɔ̃ nɩ kãá ɛ́ sɛ̃ a zɔ̃-nawra ŋa kur-pãgala zu, al pùorí bɛ nyɔw a sɛ̃sɛ̃ ŋa ŋma ŋma, ɛ́ bãw de ʋ kʋ̀ a Sore. A Sore na nɔ̃w nɩ a ʋ zʋ̀ʋ́r nyũu.

¹⁵ Bɛlɛ wa cir a kãá ƴãw a Aarɔ̃ bidɛb kãw, ɩ k'ʋ ɩ sõw, lɩɛbɩ a bàwr-maal-kara lɩɛrɩ a Aarɔ̃ a, ʋ na tɛr'ɩ a tub ŋa: de-kʋ̀b bom na be be kʋralɛ bɛ na mɩ́ nyɩw ʋ za bɛr a Sore ƴãw a n'ʋ.

¹⁶ Bʋ̃ʋ n'ʋ vɛ̃, bàwr-maalɛ kukur bom de-kʋ̀b mɩ́ ɩ n ʋ za, bɛ bɛ dɩrɛ bom za a ʋ pʋɔ ɩ.»

ɓ. A yel-bier-ír-bɛrʋ bàwr

¹⁷ A Sore tɩ yel'ɩ a Moyiir

¹⁸ k'ʋʋ ƴãw tub á ŋá kʋ̀ a Aarɔ̃ nɩ a ʋ bidɛbr: «A tub na càarɩ a yel-bier-ír-bɛrʋ bàwr a n'ɩ á ŋá: bɛ na mɩ́ ŋmãa nɩ a dʋ̃w kɔkɔr a Sore niŋé, a be bɛ na mɩ́ ŋma a nyɩw-a-za-bagɛ dʋn kɔkɛɛ a, bàwr-maal-bom na ɩ sõw yaga za a n'ʋ.

¹⁹ A bàwr-maalɛ na maalɩ a bàwr a na tʋ̃ɔ́ na 'wɔb a nɛn a tuor-taa pɛn-sɛw davʋra zie kãw na ɩ sõw a pʋɔ.

²⁰ Bom za na tʋɔr a bàwr-maal nɛn ŋa a na ɩ n bʋ̃-sõw: a dʋ̃w zɩ̃ɩ wa ƴaw ƴãw kparʋ ƴãw a, bɛ na pɛ́w nɩ a be a zɩ̃ɩ na tɔ a, zie na ɩ sõw a pʋɔ.

²¹ Yawra ziduwle wa n'ʋ bɛ dʋw nɩ a nɛn a, bɛ na ŋmɛr ʋ na bɛr a pùorí, ɛcɛ daasɩ̃ɛ wa n'ʋ bɛ dʋw nɩ a, bɛ na fɔw nɩ a pʋɔ, ɛ́ ɩ kʋ̃ɔ yaga sɔ́w nɩ bɛr.

²² Bàwr-maalbɛ yie dɛbr tɛwr nɛbɛ 'wɔbr a nɛn ŋa, ʋ na ɩ bàwr-maal bʋ̃-sõw yaga za a ƴãw.

²³ Ɛcɛ dʋ̃w bɛ na maal'ɩ a bàwr a, bɛlɛ wa de a ʋ zɩ̃ɩ kpɛ n a tuor-taa pɛn-sɛw pʋɔ tɩ tu n a yel-bier suur-dɩ-kʋ̀b tub a zi-sõw pʋɔ a, bɛ bɛ 'wɔbr a dʋ̃w ŋa nɛn ɛ, a fɛr'a kɛ́ bɛ nyɩw ʋ bɛr.»