Levitɩ mɩnɛ 5 - A SƐB-SÕW

d. A yel-bier-ír-bɛrʋ bagɛ a mɩnɛ

¹ «Dãsɩɛ sob na wõ ƴɛ̀rʋ bɛ ƴɛ̀r lãwnɩ ŋmɛ-ƴãwfʋ, ʋʋ bɛ dɩ a dãsɩɛ yel a ʋlɩ bom nɛ ʋ na nyɛ̃ bɩɩ wõ a, ʋ maal'ɩ yel-bier, ʋʋ na tuo nɩ a ʋ sãwna.»

² «Bɩɩ nɩr na tɔ bom za na tɛr dɛwr a, dʋ̃-dɛwr na kpi a, wɛ-dʋ̃w bɩɩ yir-dʋ̃w bɩɩ dʋ̃wli-dɛwr za na kpi a, ʋlɛ mɩ̀ saa bɛ tɩ bãwnɩ a, ʋ lɩɛb'ɩ dɛwr sob ɛ́ tɛr sãwna.»

³ «Bɩɩ nɩr na tɔ nɩsaal na tɛr dɛwr na lʋɔrɛ a, kapaw ʋ bɛ tɩ bãwnɩ a a pɛr nɛ pʋɔ ɩ, ɛcɛ ʋlɛ wa dɛ bãwnɩ a a, ʋ tɛr'ɩ sãwna.»

⁴ «Bɩɩ nɩr na bɛ tɩɛrɩ tɔ ɛ́ pɔ yel kãw za ƴãw bɛ na na tʋ̃ɔ́ pɔ a, pɔb na na tʋ̃ɔ́ màl nɩr bɩɩ maalɩ ʋ a, ʋlɛ wa bãwnɩ a a lɛn daar a, ʋ tɛr'ɩ sãwna.»

⁵ «Nɩr wa sãw a yele á ŋá kãw pʋɔ bɛ na manɩ a ƴɛrɛŋa a, a fɛr'a k'ʋʋ wo a yel ʋl ʋ na sãw a.

⁶ Al pùorí, a sãwna suur páwfʋ ƴãw a, ʋ na wa n nɩ pɛr-nyãw bɩɩ bʋ-nyãw wa maal'ɩ bàwr kʋ̀ a Sore a yel-bier-ír-bɛrʋ ƴãw. Lɛ n'a a bàwr-maalɛ pãa na tu a yel-bebe suur-dɩ-kʋ̀b tub a ʋ ƴãw.»

e. A nan dem bàwr

⁷ «Nɩr bɛ wa tɛr fãw na ír pɛr-nyãw bɩɩ bʋ-nyãw a sãwna ʋ na sãw a ƴãw a, ʋ na tʋ̃ɔ́ na wa n ŋmamɛ ayi bɩɩ naŋmamɛ ayi wa kʋ̀ a Sore. A kãw na ɩ n yel-bier-ír-bɛrʋ bàwr ƴãw, ɛ́ a kãw ɩ nyɩw-a-za-bàwr ƴãw.

⁸ Ʋ na kʋ̀ a nɩ a bàwr-maalɛ, ʋ de niwn kʋ̀ a Sore a yel-bier-ír-bɛrʋ bàwr lile: ʋ na ŋmɛlɩ nɩ a lile nyũu ka ɛ́ ta taw a zu ŋmãa ír ɛ,

⁹ ʋ na ɩ n a zɩ̃ɩ ŋmãa cir vʋɔrɩ a bàwr-maal-kuur kõkowr, ɛ́ tɛblɩ a zɩ̃ɩ ŋmãa na cɛ a waarɩ a bàwr-maal-kuur sɩɛ. Yel-bier-ír-bɛrʋ bàwr'ʋ.

¹⁰ Al pùorí, a bàwr-maalɛ na kʋ n a lili ayi sob maal'ɩ nyɩw-a-za-bàwr, mɛ̃ a lɛ a na tuur a. Lɛ n'a ʋ pãa na tu a yel-bebe suur-dɩ-kʋ̀b tub a sãwna sob ƴãw, a Naaŋmɩn dɩ suur kʋ̀ ʋ.»

¹¹ «A ŋmamɛ ayi bɩɩ a naŋmamɛ ayi bɛ wa be nɩr nũú a, ʋ na tʋ̃ɔ́ na wa n kilo ata zɔ̃, a yel-bier-ír-bɛrʋ bàwr ƴãw, ɛcɛ ʋ bɛ cire kãá ƴãwn a zɔ̃ zu bɩɩ dɔwlɛ tɩ-suur-zɔ̃-na-nyùur-vla-vla-a ɩ, yel-bier-ír-bɛrʋ bàwr na n'ʋ a ƴãw.

¹² Ʋ na wa n nɩ a zɔ̃ wa kʋ̀ a bàwr-maalɛ, ʋ sɛ̀m paalɩ a nũu a ɩ a “Cãà-bãwnɩ”, ʋ nyɩw a a bàwr-maal-kuur zu lãwnɩ a bàwr nɛnɛ al bɛ na nyɩw a Sore ƴãw a. Yel-bier-ír-bɛrʋ bàwr'ʋ.

¹³ A bàwr-maalɛ na tu n a yel-bebe suur-dɩ-kʋ̀b tub a sãwna sob zu, a ʋ yel-bier ƴãw. Lɛ n'a a Naaŋmɩn na dɩ suur kʋ̀ a sob nɛ.» «A bàwr-maalɛ na tu n a tub ŋa mɛ̃ a lɛ a na ɩrɛ a kukur bom de-kʋ̀b ƴãw a.»

A lɛb-kpɛ-taa bàwr

¹⁴ A Sore tɩ yel'ɩ a Moyiir:

¹⁵ «Nɩr bɛ wa bãwnɩ a ɛ́ sãw, a sãwna ɩ kpɛ̃ɛ, ɛ́ càarɩ a bome a na fɛr kɛ́ bɛ mɩ́ de kʋ̀ a Sore a, à ŋá n'a a fɛr k'ʋʋ tu: ʋ na nyɔw nɩ a ʋ píir pʋɔ pʋ́ra a ƴã-gan zie kãw za na bɛ sãw a, wa n wa kʋ̀ a Sore a sãwna ŋa maalʋ ƴãw. A fɛr'a k'aa pʋ́ra ta tab kãw. Salm-pla libie n'a bɛ na manɩ nɩ a tab ʋ na ta a, ɛ́ a zi-sõw pʋɔ tɩbrʋ bʋ̃-mána n'ʋ bɛ na de man nɩ. Ʋ na tɩr'ɩ a dʋ̃w ŋa lɛb-kpɛ-taa bàwr maalʋ ƴãw.

¹⁶ Lɛb waar mɩ̀, ʋ na ya n a sãwfʋ ʋ na sãw a zi-sõw a, ɛ́ cãà lɛb dɔwlɩ a yar na põ ziir anũu a, a zi-been sob, ɛ́ de a za kʋ̀ a bàwr-maalɛ. A bàwr-maalɛ na maal'ɩ nɩ a dʋ̃w bàwr, ɛ́ tu a yel-bebe suur-dɩ-kʋ̀b tub a sãwna sob ƴãw, a Naaŋmɩn dɩ suur kʋ̀ ʋ.»

¹⁷ «Nɩr bɛ wa bãwnɩ a ɛ́ maalɩ yel-bier, gãw a Sore nɔ-ƴãwna kãw na yel kɛ́ bɛ ta ɩ bom a, ʋ ɩ n sãwna sob, ʋʋ zu yel'ʋ.

¹⁸ Ʋ na nyɔw nɩ a ʋ píir pʋɔ pʋ́ra a ƴã-gan zie kãw za na bɛ sãw a, wa n wa kʋ̀ a bàwr-maalɛ. A pʋ́ra ŋa na ta n a lɛ na ƴãw a lɛb-kpɛ-taa bàwr maalʋ dʋn ƴãw a. A bàwr-maalɛ na tu n a yel-bebe suur-dɩ-kʋ̀b tub a sãwna sob ƴãw, a yel-bier ʋ na bɛ bãwnɩ kɛ́ maalɩ a ƴãw, ɛ́ a Naaŋmɩn na dɩ n suur kʋ̀ a sob nɛ.

¹⁹ Lɛb-kpɛ-taa bàwr'ʋ, bʋ̃ʋ n'ʋ vɛ̃, a nɩr ŋa tɩ sɩrɩ na sãw a Sore.»

²⁰ A Sore tɩ yel'ɩ a Moyiir:

²¹ «Á ɩ mɛ̃ nɩr sãw nɩ a Sore, a sãwna ɩ kpɛ̃ɛ ʋ na màl a ʋ tɔ a ƴãw: mɛ̃ à ŋá a, ʋ ŋmãa nɩ ziri bom bɛ na kʋ̀ ʋ k'ʋʋ bin a ƴãw, bom ʋ na pɛ̃w a ƴãw, bom ʋ na zu bɩɩ faa a ƴãw,

²² bɩɩ bom ʋ na pìiri ɛ́ ciire a, bɩɩ ʋ pɔ na ɛ́ a ɩ ziri k'ʋʋ tʋ̃ɔ́ sɔwlɩ a sãwna á ŋá taabɛ.

²³ A na ɩ à ŋá a, a nɩr ŋa maal'ɩ yel-bier, ɛ́ ɩ sãwna sob, a fɛr'a k'ʋʋ lɛb tɩr a bom ʋ na zu a, ʋ na faa a, ʋ na pìiri a, bɩɩ bɛ na kʋ̀ ʋ ʋ bin a,

²⁴ bɩɩ a bom ʋl ƴãw ʋ na pɔ ɛ́ a ɩ a ziri a. Tɩrʋ tɛwr bɛ n'a ʋ na lɛb tɩr a bom ɛ, ʋ na dɔwl'ɩ a bom daarʋ na põ ziir anũu a, zi-been sob. Ʋlɛ wa dɛ bãwnɩ a ʋ sãwna a, ʋ lɛb'a kʋ̀rɛ a bom sob à á ŋá.

²⁵ Al pùorí, ʋ na wa n nɩ pʋ́ra a ƴã-gan zie kãw za na bɛ sãw a, pʋ́ra ʋ na nyɔw a ʋ píir pʋɔ a, wa kʋ̀ a bàwr-maalɛ ʋ maal'ɩ lɛb-kpɛ-taa bàwr kʋ̀ a Sore. A pʋ́ra na ta n a lɛb-kpɛ-taa bàwr maalʋ dʋ̃w.

²⁶ Lɛ n'a a Sore niŋé, a bàwr-maalɛ na tu a yel-bebe suur-dɩ-kʋ̀b tub a sãwna sob zu, a yel-bier ʋ na maalɩ a ƴãw. Ɛ́ a Naaŋmɩn na dɩ n suur kʋ̀ a sob nɛ.»