Levitɩ mɩnɛ 22 - A SƐB-SÕW

ɓ. A ciiru al na càarɩ a bàwr-maal bʋ̃-dɩrɩ a

¹ A Sore tɩ yel'ɩ a Moyiir à ŋá:

² «Manɩ wul a Aarɔ̃ nɩ a ʋ bidɛbr a lɛn daar bɛ na kʋ̃ mɩ́ dɩ a bàwr-maal-bome a Ɩsɩrayɛl nɩbɛ na kʋ̀rɛ mɛ̃ a. Alɛ bɛ ɩ lɛ, bɛ nãà wa sãwnɛ nɩ a ɩ̃ yo-sõw. Mãa n'ɩ a Sore.

³ Yel à ŋá kʋ̀ bɛ: A nɩbɛ nãà wa dɔwr lɩɛrɛ taa a pʋɔ a, bàwr-maalɛ yir nɩr wa tɛr dɛwr, ɛ́ taw pɩɛlɩ a bàwr-maal-bome a Ɩsɩrayɛl nɩbɛ na kʋ̀ a mãa, Sore a, bɛ na yel ʋ na k'ʋʋ ta cãà tone a ɩ̃ tome ɩ. Mãa n'ɩ a Sore.

⁴ Bàwr-maalɛ na tɛr kɔnʋ bàalʋ a, bɩɩ kʋ̃ɔ na yire a ʋ yʋɔrɩ́ a, ʋlɛ bɛ wa so a ʋ dɛwr bɛr a, ʋ bɛ dɩrɛ bàwr-maal-bom kãw za a Naaŋmɩn na so a ɩ. Lɛ n'a a mɩ̀ ŋmɛ̃ sob nɛ na tɔ nɩr na tɔ kũu páw dɛwr a zie, nɩr a yɔ-kʋ̃ɔ na cir a zie,

⁵ nɩr na tɔ dʋ̃-cãcãpile kãw a zie, bɩɩ nɩr na tɔ nɩr a tɔb na waar'ɩ dɛwr a zie, a dɛwr ʋl saa ɩ ŋmɩŋmɩn a.

⁶ Sob nɛ na tɔ a tɔb á ŋá bʋʋrɛ a ɩ n dɛwr sob, tɩ ta a zaanʋɔra, ɛ́ bɛ dɩrɛ a bàwr-maal-bome a Naaŋmɩn na so a ɩ, ʋlɛ bɛ wa so kʋ̃ɔ a.

⁷ A mʋ̃tɔ̃w wa kpɩɛr wa báarɛ a, a ʋ dɛwr baar'a, ʋ na tʋ̃ɔ́ na mɩ́ lɛb dɩ a bàwr-maal-bome a Naaŋmɩn na so a, bʋ̃ʋ n'ʋ vɛ̃, a ʋ bʋ̃-dɩrɩ n'a.

⁸ Bàwr-maalɛ bɛ 'wɔbr dʋ̃-kũu bɩɩ dʋ̃w wɛ-dʋ̃w na nyɔw a nɛn ɛ, a na ɩ na ʋ ɩ dɛwr sob. Mãa n'ɩ a Sore.»

⁹ «A fɛr'a k'aa bàwr-maalbɛ tuur a lɛ ɩ̃ na ƴãw a nʋɔr kʋ̀ bɛ a vla, taa wa tɛrɛ sãwna bʋ̃-dɩra ƴãw ɛ. Bɛlɛ bɛ wa tɛr maal-ɩb a bʋ̃-dɩrɩ á ŋá ƴãw a, bɛ na tʋ̃ɔ́ na kpi a al kũu. Mãa n'ɩ a Sore, ɛ́ mãa n'ʋ maalɩ bɛ bɛ ɩ son a ɩ̃ tome ƴãw.»

¹⁰ «Nɩ-zawla za bɛ dɩrɛ a bʋ̃-dɩra a Naaŋmɩn na so a ɩ: a bàwr-maalɛ sãan mɩ̀ saa n'ʋ, bɩɩ a ʋ tõ-tõ-bie ʋ na yarɛ a saa n'ʋ a, bɛ bɛ tɛr sɔ́r ɛ.

¹¹ Ɛcɛ bàwr-maalɛ wa ír libir dà n nɩr a, a sob nɛ na tʋ̃ɔ́ na mɩ́ dɩ a bàwr-maalɛ bʋ̃-dɩra, mɛ̃ a tõ-tõ-bie na dɔw a yir pʋɔ a.

¹² Bàwr-maalɛ pɔwyaa wa kul nɩ-zawla a, ʋ bɛ tɛr sɔ́r na mɩ́ dɩ a al bɛ na mɩ́ ír a bàwr-maal-bome a Naaŋmɩn na so a pʋɔ ɩ.

¹³ Ɛcɛ bàwr-maalɛ pɔwyaa na ɩ pɔw-kʋɔr bɩɩ a sɩr na zawrɩ bɛr, ʋʋ bɛ tɛr bibiir, ɛ́ lɛb wa zɩ̃ a sãà yir mɛ̃ a lɛn daar ʋ na bɛ tɩ kul sɩr a, ʋ na tʋ̃ɔ́ na dɩrɛ a bʋ̃-dɩrɩ a sãà na dɩrɛ a. Alɛ bɛ wa ɩ à à ŋá n'a a, nɩ-zawla za bɛ dɩrɛ bʋ̃-dɩra Naaŋmɩn na so a ɩ.»

¹⁴ «Nɩr bɛ wa bãwnɩ a bʋ̃-dɩra ŋa ɛ́ dɩ a, a fɛr'a k'ʋʋ kʋ̀ a bàwr-maalɛ bom na zɛ̃ a bʋ̃-dɩra ŋa a, ɛ́ cãà lɛb dɔwlɩ a bom zɛ̃a na põ ziir anũu a zi-been sob.»

¹⁵ «A Ɩsɩrayɛl nɩbɛ bàwr-maal bʋ̃-son a, a al bɛ na mɩ́ ír a Sore ƴãw a, a bàwr-maalbɛ bɛ tɛr sɔ́r kɛ́ bɛ bʋɔlɛ a bʋ̃-zaalɛ ɩ:

¹⁶ bɛlɛ wa dɩ a a lɛn daar bɛ na bɛ sɛwnɩ a, a Ɩsɩrayɛl nɩbɛ nɛbɛ bɛ tuore sãwna a na fɛr kɛ́ bɛ maalɩ a. Mãa n'ɩ a Sore, ɛ́ mãa n'ʋ mɩ́ maalɩ a bàwr-maalbɛ bɛ ɩ son a ɩ̃ tome tob ƴãw.»

A bàwr-maal-dʋn kaa-íru

¹⁷ A Sore tɩ yel'ɩ a Moyiir

¹⁸ k'ʋʋ tɛr wulu á ŋá a Aarɔ̃, a ʋ bidɛbr nɩ a Ɩsɩrayɛl nɩbɛ za zie: «A ɩ mɛ̃ nɩr kãw a nyɩ pʋɔ, Ɩsɩrayɛl nɩr'ʋ bɩɩ nʋʋra na kpɩɛr a Ɩsɩrayɛl tẽw pʋɔ a n'ʋ, bɔbr k'ʋʋ maalɩ nyɩw-a-za-bàwr kʋ̀ m, ʋ na nɔnɛ a, bɩɩ nʋɔr ʋ na kõ a íru ƴãw a:

¹⁹ ʋlɛ wa bɔbr k'aa ɩ̃ pʋɔ pɛlɩ a ʋ ƴãw a, a fɛr'a k'ʋʋ wa n dʋ̃-daa a ƴã-gan zie kãw za na bɛ sãw a, nadɛr, pʋ́ra bɩɩ bʋra.

²⁰ Ʋ bɛ waar'ɩ dʋ̃w a ƴã-gan zie kãw na sãw a ɩ, ɩ̃ bɛ dier ʋ ɛ.

²¹ Lãw-taa bàwr wa n'ʋ nɩr maalɛ k'ʋʋ ír nʋɔr ʋ na kõ a, bɩɩ bàwr ʋ na nɔnɛ maalɛ a, ɩ̃ na sàw na de náab, pɛrʋ bɩɩ bʋɔ, a dʋ̃w ŋa kãw a ƴã-gan zie kãw za bɛ wa sãw a.

²² A na ɩ à ŋá a, nyɩ taa waar'ɩ dʋ̃w kãw na zɔ̃w a ɩ, na ka gbɛ́r bɩɩ ŋmãa gbɛ́r a ɩ, dʋ̃w na tɛr natɩɛ, na tɛr kpálɛ bɩɩ ƴã-gan bàalʋ kãw a ɩ. Nyɩ taa maalɛ nɩ a dʋ̃w ŋa tɔ bàwr nyɩ na na nyɩw a ɩ̃ bàwr-maal-kuur zu a ɩ.

²³ Náab, pɛ́rʋ bɩɩ bʋɔ ƴã-gan bɛ wa ɩ a ɩb a, bɩɩ a gbɛ́ɛ wa gãw taa a, bàwr nɩr na nɔnɛ maalɛ a n'ʋ bɛ na tʋ̃ɔ́ maal'ɩ ʋ, ɛcɛ ɩ̃ bɛ dier ʋ nʋɔr-íru bàwr ƴãw ɛ.

²⁴ Nyɩ taa kʋ̀rɛ mɛ̃ dʋ̃w a lamɛ na ŋmɛr bɩɩ na sãw a ɩ, dʋ̃w bɛ na vaarɩ bɩɩ ŋma a lamɛ a ɩ. Nyɩ taa ɩrɛ à à ŋá a nyɩ tẽw pʋɔ ɩ,

²⁵ ɛ́ taa dàar a dʋn á ŋá taabɛ nɩ-sãan zie, kɛ́ nyɩ maal'ɩ bàwr kʋ̀ a mãa nyɩ Naaŋmɩn ɛ. À à ŋá bɛ na ɩ a tɛr faalʋ a, ɩ̃ bɛ dier a a nyɩ zie ɩ.»

²⁶ A Sore tɩ lɛb'a yel a Moyiir:

²⁷ «Nále, péle bɩɩ bʋle wa dɔw a, ʋ na be n a mã zie maalɩ bibie ayopõi. Ɛ́ a na tĩ a bibie ani sob a, ɩ̃ sàw na kɛ́ bɛ maal'ɩ ʋ bàwr bɛ na nyɩw a kʋ̀ m.

²⁸ Ɛcɛ nyɩ taa kʋrɛ náab, pɛ́rʋ bɩɩ bʋɔ nɩ a ʋ bile, bibi-been ɛ.»

²⁹ «Nyɩmɛ wa maalɛ danʋ bàwr kʋ̀rɛ mɛ̃ a, nyɩ na maal'ʋ na ʋ tu a tub, a ɩ̃ pʋɔ tʋ̃ɔ́ pɛlɩ a nyɩ ƴãw:

³⁰ nyɩ 'wɔb a nɛn a ʋlɩ bibir nɛ, ɛ́ taa cɩɛr bom bɛrɛ a bio daarɩ́ ɛ. Mãa n'ɩ a Sore.»

³¹ «Nyɩ maal tɛr a ɩ̃ nɛ-ƴãwnɩ ɛ́ sàwr a, mãa n'ɩ a Sore.

³² Nyɩ taa sãwnɛ a ɩ̃ yo-sõw ɛ. A nyɩɩm Ɩsɩrayɛl nɩbɛ a, nyɩ nɩ̃ɛ wul kɛ́ mãa n'ɩ a Naaŋmɩn-sɩza. A mãa Sore a, mãa so nyɩ.

³³ Ɩ̃ ɩ na nyɩ yi a Eziptɩ tẽw k'ɩ̃ɩ ɩ a nyɩ Naaŋmɩn. Mãa n'ɩ a Sore.»