Levitɩ mɩnɛ 21 - A SƐB-SÕW

Tub na càarɩ a bàwr-maalbɛ a a. A tub al na càarɩ a bàwr-maalbɛ mɩŋa nyɔ-vʋʋrʋ a

¹ A Sore tɩ yel'ɩ a Moyiir k'ʋʋ tɛr wulu á ŋá a bàwr-maalbɛ, a Aarɔ̃ bidɛbr zie: «Bàwr-maalɛ bɛ tɛr sɔ́r na taw pɩɛlɩ a ʋ nɩr kãw kũu páw dɛwr ɛ,

² alɛ bɛ wa ɩ nɩr na pɩɛl'ʋ yaga za a: mɛ̃ a ʋ mã, a ʋ sãà, a ʋ bidɛb, a ʋ pɔwyaa bɩɩ a ʋ yɛb a.

³ A ʋ yeepuule kãw na bɛ kul sɩr a ƴãw wa n'a a, ʋ na tʋ̃ɔ́ na sàw páw dɛwr, ʋ cãà na ɩ a ʋ yir nɩr, ʋ na bɛ kpɛ nɩ-yũo yir pʋɔ a.

⁴ A bàwr-maalɛ ɩ n nɩ-kpɛ̃ɛ a ʋ yir nɩbɛ pʋɔ. A lɛ pʋɔ a, ʋ ta ɩrɛ wa tɛr dɛwr ɛ, ʋ na sãw nɩ a ʋ yúor.»

⁵ «A bàwr-maalbɛ wa tɛr kuor a, bɛ bɛ fɔrɛ a bɛ zu-sɔwlɩsɔw bɛrɛ ɩ, bɛ bɛ pòne a bɛ tɩɛm kõkowe ɛ́ bɛ cɩ̀rɛ a bɛ ƴã-gamɛ ɩ.

⁶ Bɛ na be n a ɩ̃ tome tob ƴãw ɛ́ ta sãwnɛ a ɩ̃ yúor ɛ. Bɛlɛ nɛbɛ dier a bàwr-maal-bome na ɩ a ɩ̃ dɩb a kʋ̀rɛ mɛ̃, a mãa, a Sore bɛ Naaŋmɩn, alɛ so a fɛr kɛ́ bɛ ɩ son.»

⁷ «Bàwr-maalɛ bɛ kule pɔw-yɛm ɛ, bɩɩ pɔw dɛb na sãw bɛr a ɩ, bɩɩ pɔw a sɩr na zawrɩ bɛr a ɩ, bʋ̃ʋ n'ʋ vɛ̃, a bàwr-maalɛ be n a ɩ̃ tome tob ƴãw.

⁸ Ɩsɩrayɛl nɩr za n'ʋ a fɛr k'ʋʋ ƴãwnɛ a bàwr-maalbɛ mɛ̃ nɩ-son a, bʋ̃ʋ n'ʋ vɛ̃, a dɩb nyɩ na kʋ̀rɛ mɛ̃ a, bɛlɛ nɛbɛ mɩ́ de a kʋ̀ m, a mãa nyɩ Naaŋmɩn. A bàwr-maalbɛ na ɩ n nɩ-son a nyɩ zie, a mãa Sore na ɩ sõw a ƴãw, ɩ̃ɩ kaa na ír a Ɩsɩrayɛl nɩbɛ kɛ́ bɛ ɩ nɩ-bʋʋr-son.»

⁹ «Bàwr-maalɛ kãw pɔwyaa wa tõ pɔw-yɛm tome sãw a ʋl mɩŋa yúor bɛr a, a ʋ sãà tɔr za yúor'ʋ ʋ sãw bɛr, bɛ na nyɩw ʋ na bɛr.»

¹⁰ «A bàwr-maal-kara n'ɩ a bàwr-maalbɛ nɩ-kpɛ̃ɛ. Bɛ maalɩ ʋ na nɩ a kãá-cir-ƴãwfʋ kãá a ʋlɩ bibir nɛ ʋ na de a tome a, ʋʋ na tʋ̃ɔ́ na mɩ́ su a kpar-son. Alɛ so, ʋ bɛ tɛr sɔ́r na mɩ́ bɛr a ʋ zukɔbɛ a ɩ zarkpara ɩ, ʋ bɛ tɛr sɔ́r na mɩ́ taw a ʋ kparɩ cɩɛrɩ,

¹¹ bɩɩ taw pɩɛlɩ kũu ɛ. Ʋ bɛ tɛrɛ dɛwr ɛ, a ʋ sãà bɩɩ a ʋ mã kũu daar saa n'a a.

¹² Ʋ bɛ tɛr sɔ́r na yi zaa a zi-sõw pʋɔ ɩ, ʋ nãà mab'a ɩ a zi-sõw ʋ tɛr dɛwr, bʋ̃ʋ n'ʋ vɛ̃, bɛ maal'ʋ na nɩ a kãá a ɩ̃ tome tob ƴãw. Mãa n'ɩ a Sore.»

¹³ «Pɔw na bɛ páw dɛb sɛr a yõ n'ʋ a bàwr-maal-kara kule.

¹⁴ Ʋ bɛ kule pɔw-kʋɔr ɛ, bɛ kule pɔw a sɩr na zawrɩ bɛr a ɩ, bɩɩ pɔw na tõ pɔw-yɛm tome sãw a ʋ yúor bɛr a ɩ. A ʋ yir dɔwlʋ pɔwsɩrale kãw n'ʋ a fɛr k'ʋʋ kul,

¹⁵ à ŋá n'a ʋ kʋ̃ ƴãw zawlɛ kpɛ a ʋ yir pʋɔ ɩ, mãa n'ɩ a Sore na maal'ʋ ʋ be a ɩ̃ tome tob ƴãw a.»

b. A ciiru al na càarɩ a bàwr-maalɛ lɩɛbʋ a

¹⁶ A Sore tɩ yel'ɩ a Moyiir

¹⁷ k'ʋʋ tɛr a wulu á ŋá a Aarɔ̃ zie: «A nɩbɛ nãà wa dɔwr lɩɛrɛ taa a pʋɔ a, a fʋ bʋʋrɛ nɩr kãw za wa tɛr ƴã-gan zi-sãwna a, ʋ kʋ̃ tɛr sɔ́r taw pɩɛlɩ a bàwr-maal-kuur k'ʋʋ de a ɩ̃ dɩb kʋ̀ m ɛ.

¹⁸ Ƴã-gan zi-sãwna sob kãw za bɛ tone a ton ŋa ɩ: zɔ̃w n'ʋ bɩɩ wʋba n'ʋ a, nɩr a niwn na sãw a, nɩr a ƴã-gã-ɓɛrmɛ na bɛ ɩ a ɩb a,

¹⁹ gbɛ-kaba sob bɩɩ kpãkpãw-kaba sob,

²⁰ nɩr na yi gʋrɛ, bɩɩ nɩr na ɩ gbãale a, nɩr a mimie na tɛr bàalʋ a, nɩr a ƴã-gan na tɛr bàalʋ a, bɩɩ dɛ-vár.

²¹ A fʋ bʋʋrɛ nɩr kãw za na tɛr ƴã-gan zi-sãwna a, ʋ bɛ tawr pɩɛlɛ a bàwr-maal-kuur dier a ɩ̃ dɩb kʋ̀rɛ mɛ̃ ɩ. A ʋ ƴã-gan zi-sãwna zũú a, ʋ bɛ tawr pɩɛlɛ a bàwr-maal-kuur ɛ.

²² Ʋ na tʋ̃ɔ́ na mɩ́ dɩ a bàwr bɛ na maalɩ kʋ̀ m a bome, a bʋ̃-dɩrɩ al a mãa yõ na so a, nɩ a bʋ̃-dɩrɩ al na cɛ a.

²³ Ɛcɛ, ʋ bɛ tawr pɩɛlɛ a zi-sõw pɛn-yawla ɩ, bɛ tawr tarɛ a bàwr-maal-kuur ɛ, a ʋ ƴã-gan zi-sãwna zũú. A bɛ tɛr sɔ́r k'ʋʋ sãw a ɩ̃ zi-sõw bɛr ɛ, bʋ̃ʋ n'ʋ vɛ̃, mãa n'ɩ a Sore, ɛ́ mãa n'ʋ mɩ́ maalɩ a bàwr-maalbɛ bɛ ɩ son a ɩ̃ tome ƴãw.»

²⁴ A Moyiir tɩ ƴɛ̀r'ɩ a ƴɛ̀rʋ á ŋá kʋ̀ a Aarɔ̃, a Aarɔ̃ bidɛbr nɩ a Ɩsɩrayɛl nɩbɛ za.