Levitɩ mɩnɛ 20 - A SƐB-SÕW

A puoru ɩ-ɩrɩ al na ciir a

¹ A Sore tɩ yel'ɩ a Moyiir

² k'ʋʋ tɛr wulu á ŋá a Ɩsɩrayɛl nɩbɛ zie: «Ɩsɩrayɛl nɩr bɩɩ nʋʋra na kpɩɛr a Ɩsɩrayɛl tẽw pʋɔ a wa de a ʋ bie kãw maal'ɩ bàwr kʋ̀ a ŋmɩn Molɛkɩ a, a fɛr'a kɛ́ bɛ kʋ ʋ. A tẽw dem na lɔb'ɩ ʋ nɩ kʋsɛbɛ kʋ,

³ bʋ̃ʋ n'ʋ vɛ̃, mãa mɩŋa na ìr'ɩ a nɩr ŋa ƴãw. Ɩ̃ na ír ʋ na bɛr a Ɩsɩrayɛl nɩbɛ pʋɔ, ʋ na de a ʋ bie kʋ̀ a Molɛkɩ a ƴãw, nɩ ʋ na dɛw a ɩ̃ zi-sõw bɛr ɛ́ sãw a ɩ̃ yo-sõw a ƴãw.

⁴ A tẽw dem wa pàw a bɛ mimie a nɩr ŋa ɩ-ɩrɩ ƴãw kɛ́ bɛ taa wa kʋrɛ ʋ a,

⁵ mãa mɩŋa na ìr'ɩ a nɩr ŋa nɩ a ʋ yir dem ƴãw. Ɩ̃ na ír bɛ na bɛr a Ɩsɩrayɛl nɩbɛ pʋɔ, ʋlɛ nɩ a bɛlɩ dem za na na lãw nɩ ʋ puori a Molɛkɩ, a ɩ tɩɩb'ʋ bɛ maalɩ a.»

⁶ «Nɩr wa sowre kpɩ̃ɩn, sowru bʋʋrɛ kãw za a, tɩbɛ maalʋ kãw n'a, ɩ̃ na ìr'ɩ a sob ƴãw, ír ʋ bɛr a Ɩsɩrayɛl bʋʋrɛ pʋɔ.»

⁷ «Nyɩ ɩrɛ nɩ-son ɩb, ɩ̃ na ɩ a Sore nyɩ Naaŋmɩn a ƴãw.»

A sãwna al na waar'ɩ dɔwrʋ na tɩbrɛ a

⁸ «Nyɩ maal tɛr a ɩ̃ nɛ́ɛ ɛ́ sàwr a. Mãa n'ɩ a Sore na ɩrɛ nyɩ ɩ nɩ-son a.»

⁹ «Nɩr wa tʋ a ʋ sãà bɩɩ a ʋ mã a, bɛ na kʋ ʋ na. Ʋl yõ so a ʋ kũu, ʋ na tʋ a ʋ sãà bɩɩ a ʋ mã a ƴãw.»

¹⁰ «Nɩr wa maalɩ pɩ̃ɔ-yele nɩ a ʋ tɔ pɔw a, bɛ na kʋ n a dɛb nɩ a pɔw za.»

¹¹ «Dɛb wa gã nɩ a ʋ sãà pɔw kãw a, ʋ ƴãw nɩ a ʋ sãà vĩ. Bɛ na kʋ n a sãwna dem bɛ za ayi. Bɛl yõ so a bɛ kũu.»

¹² «Dɛb wa gã nɩ a ʋ bie-pɔw a, bɛ na kʋ n bɛ za ayi, bɛ na tõ tõ-faa na bɛ sɛw a ƴãw. Bɛl yõ so a bɛ kũu.»

¹³ «Dɛb wa gã nɩ a ʋ dɛb-tɔ, mɛ̃ a lɛ bɛ na mɩ́ gã nɩ pɔw a, bɛ tõ n tõ-faa na bɛ maal'ɩ wob a, a fɛr'a kɛ́ bɛ kʋ bɛ. Bɛl yõ so a bɛ kũu.»

¹⁴ «Dɛb wa lãw kul pɔwyaa nɩ a ʋ mã a, vĩ-yel'ʋ. Bɛ na nyɩw nɩ a dɛb nɩ a pɔwbɛ bɛ za ayi. À ŋá n'a a vĩ-yel ŋa kʋ̃ be a nyɩ sɔgɔ ɩ.»

¹⁵ «Dɛb wa do dʋ̃w a, bɛ na kʋ ʋ na, ɛ́ kʋ a dʋ̃w.»

¹⁶ «Pɔw wa ɩ dʋ̃w do ʋ a, bɛ na kʋ n a pɔw nɩ a dʋ̃w za, bɛl yõ so a bɛ kũu.»

¹⁷ «Dɛb wa kul a ʋ yeepuule, a ʋ sãà bɩɩ a ʋ mã pɔwyaa kãw, ɛ́ bɛ gã nɩ taa a, vĩ-yel'ʋ, bɛ na ƴãw bɛ nɩ dɔwrʋ a Ɩsɩrayɛl nɩbɛ na cɛ a niŋé. A dɛb ŋa gã nɩ nɩ a ʋ yeepuule, ʋlɛ na so a ʋ sãwna.»

¹⁸ «Dɛb wa gã nɩ pɔw na lo sɩɛ a, bɛ na ír'ɩ bɛ za ayi bɛr a Ɩsɩrayɛl nɩbɛ pʋɔ, bɛ na wõ taa nyɛ̃ a zɩ̃ɩ yib zie a ƴãw.»

¹⁹ «Nyɩ bɛ ganɛ nɩ a nyɩ mã yɛb kãw bɩɩ a nyɩ pùre kãw ɛ. Nɩr wa gã nɩ a ʋ nɩr kãw a, bɛ za ayi na so nɩ a bɛ sãwna.»

²⁰ «Dɛb wa gã nɩ a ʋ sãà yɛb pɔw a, a ʋ sãà yɛb'ʋ ʋ ƴãw vĩ. A sãwna dem bɛ ŋa ayi na so nɩ a bɛ yel-bier, ɛ́ bɛ na kpi na ɛ́ bɛ tɛr bibiir ɛ.»

²¹ «Dɛb wa kul a ʋ yɛb pɔw a, dɛwr'a. Bɛ kʋ̃ tɛr bibiir ɛ, ʋ na ƴãw a ʋ yɛb vĩ a ƴãw.»

²² «Nyɩ maal tɛr a ɩ̃ nɛ́ɛ nɩ a ɩ̃ tub, ɛ́ sàwr a. Lɛ n'a a tẽw ʋl ɩ̃ na tɛr nyɩ cere nɩ na tɩ ƴãw nyɩ kpɩɛr a kʋ̃ zawrɩ nyɩ bɛr ɛ.

²³ Nyɩ taa tuur a nɩ-bʋʋrɛ ɩ̃ na diwr bɛrɛ a nyɩ niŋé a ɩ-ɩrɩ ɛ. A bɛ ɩ-ɩrɩ á ŋá n'a so ɩ̃ bɛ nɔ̃w a bɛ yele ɩ,

²⁴ ɛ́ yel nyɩ à ŋá: “Nyɩmɛ nɛbɛ na so a bɛ tẽw, ɩ̃ dier ʋ na kʋ̀rɛ nyɩ kɛ́ nyɩ so ʋ, tẽw bʋ̀rʋ nɩ sɩwr na gbɔlɛ a n'ʋ!” Mãa n'ɩ a Sore nyɩ Naaŋmɩn na ɩ nyɩ ɩ nyɩ tʋɔra a nɩ-bʋʋr-yoru sɔgɔ a.

²⁵ Alɛ n'a so a fɛr kɛ́ nyɩ bãwnɩ a dʋ̃-vɩɛlɩ nɩ a dʋ̃-dɛgɛ, a bʋ̃-pɩw-vɩɛlɩ nɩ a bʋ̃-pɩw-dɛgɛ. Nyɩ bɛ ƴãwnɛ dɛwr nyɩ tʋɔra, tʋɔr a al na tɛr dɛwr a ɩ: a dʋn, a bʋ̃-pɩgɛ, a dʋ̃-cãcãpili na vure a tẽw a. Ɩ̃ ƴãw nɩ a owru ŋa kɛ́ nyɩ tʋ̃ɔ́ mɩ́ bãw a al na ɩ a dʋ̃-dɛgɛ a.»

²⁶ «Nyɩ ɩ nɩ-son, be a ɩ̃ tome ƴãw, ɩ̃ na ɩ sõw a ƴãw, a mãa, a Sore. Ɩ̃ ɩ na nyɩ ɩ nyɩ tʋɔra a nɩ-bʋʋr-yoru sɔgɔ, k'ɩ̃ɩ tʋ̃ɔ́ so nyɩ.»

²⁷ «Dɛb bɩɩ pɔw wa sowre a kpɩmɛ a, a fɛr'a kɛ́ bɛ kʋ bɛ: bɛ na lɔb'ɩ bɛ nɩ kʋsɛbɛ kʋ. Bɛl yõ na so a bɛ kũu.»