Levitɩ mɩnɛ 13 - A SƐB-SÕW

A nɩsaal ƴã-gan bàal-pɛ́ɛ

¹ A Sore tɩ yel'ɩ a Moyiir nɩ a Aarɔ̃ à ŋá:

² «Ɓuuru, kpele bɩɩ zi-nyɩla kãw wa sãá nɩr ƴã-gan zu, ɛ́ sãá mɛ̃ kɔnʋ bʋʋrɛ kãw a, bɛ na tɛr'ɩ a nɩr nɛ cen nɩ a bàwr-maalɛ Aarɔ̃ zie, bɩɩ a ʋ bʋʋrɛ kãw na ɩ bàwr-maalɛ a zie.

³ A bàwr-maalɛ na jɩ́r'ɩ a ƴã-gan zie ʋl na ɩ a bàal a kaa: a kɔblʋ wa pɛlɩ ɛ́ a ƴã-gan zie ʋl ɩ bɔw a, a wul'a kɛ́ kɔnʋ n'a. A bàwr-maalɛ wa jɩ́r baarɩ daadaalɛ a, ʋ na yel'a k'aa nɩr nɛ ɩ n dɛwr sob.

⁴ A ƴã-gan zie wa nyɩlɛ, ɛ́ pɛlɩ, ɛ́ bɛ tɛr bɔw bɩɩ kɔbl-pla a, a bàwr-maalɛ na ƴãw na a bàal kpɩɛr ʋ yõ da-ɓil.

⁵ A bibie ayopõi sob, ʋ na lɛb'a jɩ́r ʋ kaa, ʋlɛ wa nyɛ̃ a ƴã-gan zie ʋ bɛ lɩɛbɩ, ɛ́ bɛ kpɛ kpɛ̃ɛ dɔwlɩ a, ʋ na ƴãw na a bàal kpɩɛr ʋ yõ, a dàrʋ ayi sob ƴãw.

⁶ A dàrʋ ayi sob ŋa wa baar'a, ʋ na lɛb'a jɩ́r ʋ kaa: a zie bɛ wa cãà nyɩlɛ, ɛ́ bɛ kpɛ kpɛ̃ɛ dɔwlɩ a, a bàwr-maalɛ na yel'a k'aa nɩr ʋl vɩɛl'a, kpele tɛwr'a. A bʋ̃-suuri tɛwr'a a fɛr k'aa nɩr nɛ pɛ́w lɛb vɩɛl.

⁷ Ɛcɛ a bàwr-maalɛ wa jɩ́r a nɩr kaa baarɩ yel k'ʋʋ vɩɛl'a, ɛ́ a pùorí a kpele yɛ́rɛ pàwr a ƴã-gan a, a sob nɛ na lɛb'a cen a bàwr-maalɛ zie.

⁸ A bàwr-maalɛ na tɩ lɛb'a jɩ́r ʋ kaa: ʋlɛ wa nyɛ̃ k'aa kpele yɛ́r a pàw a ƴã-gan a, ʋ na yel'a k'aa nɩr nɛ ɩ n dɛwr sob, kɔnʋ bʋʋrɛ kãw n'ʋ.»

⁹ «Nɩr wa tɛr a kɔnʋ bàalʋ bʋʋrɛ kãw a, bɛ na tɛr ʋ na cen nɩ a bàwr-maalɛ zie.

¹⁰ A bàwr-maalɛ na jɩ́r ʋ na kaa: a ƴã-gan wa ɓuuri pɛlɩ, ɛ́ kɔbl-pɛlɛ be be, ɛ́ ƴã-gã-nɛn-zɩɛ sãá a,

¹¹ kɔnʋ bàalʋ na cɛlɩ a n'ʋ. A bàwr-maalɛ na yel'a k'aa nɩr nɛ ɩ n dɛwr sob. A bɛ tɛr k'ʋʋ lɛb ƴãw ʋ ʋ kpɩɛr ʋ yõ ʋ bɛl kaa ɩ, bʋ̃ʋ n'ʋ vɛ̃, a sãá na ʋ na ɩ dɛwr sob a.

¹² Ɛcɛ wɔmɛ wa yi pàw a ƴã-gan za a, a zu tɩ tɔ a gbɛ́ɛ, mɛ̃ a lɛ a bàwr-maalɛ na na tʋ̃ɔ́ nyɛ̃ a,

¹³ ʋ na jɩ́r ʋ na kaa vla vla. Ʋlɛ wa nyɛ̃ k'aa wɔmɛ sɩrɩ na pàw a ƴã-gan za a, ʋ na yel'a k'aa bàalʋ ŋa bɛ ƴãwnɛ dɛwr ɛ. A nɩr ŋa vɩɛl'a, a ʋ ƴã-gan za na lɩɛbɩ pɛlɩ a ƴãw.

¹⁴ Ɛcɛ a ƴã-gã-nɛn-zɩɛ wa sãánɛ a ʋ zie a ʋlɩ bibir nɛ a, ʋ lɩɛbɛ nɩ dɛwr sob:

¹⁵ a bàwr-maalɛ na jɩ́r'ɩ a ƴã-gã-nɛn-zɩɛ zie ʋl, ɛ́ yel k'aa nɩr nɛ ɩ n dɛwr sob. A ƴã-gã-nɛn-zɩɛ tɛr'ɩ dɛwr, kɔnʋ bʋʋrɛ kãw n'a.

¹⁶ A zie ʋl a ƴã-gã-nɛn-zɩɛ na sãá a wa lɛb pɛlɩ a, a nɩr nɛ na lɛb'a cen a bàwr-maalɛ zie.

¹⁷ A bàwr-maalɛ na jɩ́r ʋ na kaa, ɛ́ ʋlɛ wa nyɛ̃ k'aa natɩr sɩrɩ na pɛlɩ a, ʋ na yel'a k'ʋʋ bɛ cãà ƴãwnɛ dɛwr ɛ, nɩ k'aa sob nɛ vɩɛl'a.»

¹⁸ «Natɩ-kpawlʋ wa tɛ nɩr wa ɓãá a,

¹⁹ ɛ́ ɓuuru na pɛlɩ bɩɩ na ɩ zɩɛ pla a wa yi a natɩ-kpawlʋ fɩl zu a, a sob nɛ na cen nɩ a bàwr-maalɛ zie.

²⁰ A bàwr-maalɛ na jɩ́r'ɩ a zie ʋl na ɩ a bàal a kaa: bɔw wa be a ƴã-ganɩ́ ɛ́ a kɔblʋ pɛlɩ a be a, a bàwr-maalɛ na yel'a k'aa nɩr nɛ ɩ n dɛwr sob, kɔnʋ bʋʋrɛ kãw n'ʋ yɛ̀rɛ a natɩ-kpawlʋ fɩl zu.

²¹ Ɛcɛ a jɩ́rʋ pʋɔ a, a bàwr-maalɛ bɛ wa nyɛ̃ kɔbl-pla a, a fɩl bɛ wa tɛr bɔw ɛ́ bɛ nyɩlɛ a, ʋ na ƴãw na a bàal kpɩɛr ʋ yõ da-ɓil.

²² Al pùorí, a bàalʋ wa yɛ́r a ƴã-gan zu a, a bàwr-maalɛ na yel'a k'aa sob nɛ ɩ n dɛwr sob, kɔnʋ bʋʋrɛ kãw n'ʋ.

²³ Ɛcɛ a ƴã-gan zie wa cãà ŋmɛ̃ ʋ ŋmɛ̃a bɛ yɛ́r dɔwlɩ a, a natɩ-kpawlʋ fɩl tɛwr'ʋ, a bàwr-maalɛ na yel'a k'aa sob nɛ vɩɛl'a.»

²⁴ «Vũu wa ɓor nɩr a, a zie ʋl a vũu na ɓor'a wa nyɩlɛ ɛ́ pɛlɩ a, bɩɩ ʋlɛ wa pɛlɩ jɛr'ɩ zɩɛ a,

²⁵ a bàwr-maalɛ na jɩ́r'ɩ a zi-bàal kaa: a kɔblʋ wa lɩɛbɩ ɩ kɔbl-pɛlɛ ɛ́ a ƴã-gan zie ʋl ɩ bɔw a, kɔnʋ bʋʋrɛ kãw n'ʋ yɛ́rɛ a be a vũu na ɓor a. A bàwr-maalɛ na yel'a k'aa nɩr nɛ ɩ n dɛwr sob.

²⁶ Ɛcɛ a jɩ́rʋ daar a, a bàwr-maalɛ bɛ wa nyɛ̃ kɔbl-pla a, a zie ʋl bɛ wa ɩ bɔw a ƴã-ganɩ́ ɛ́ bɛ nyɩlɛ a, ʋ na ƴãw na a sob kpɩɛr ʋ yõ da-ɓil.

²⁷ A bàwr-maalɛ wa nyɛ̃ a bibie ayopõi sob k'aa bàalʋ yɛ́r a pàw a ƴã-gan a, ʋ na yel'a k'aa nɩr nɛ ɩ n dɛwr sob, kɔnʋ bʋʋrɛ kãw n'ʋ.

²⁸ Ɛcɛ a zie ʋl bɛ wa lɩɛbɩ a, ʋlɛ bɛ wa yɛ́r a ƴã-gan zu, ɛ́ bɛ cãà nyɩlɛ a, a vũu ɓɔn tɛwr'ʋ. A bàwr-maalɛ na yel'a k'aa sob nɛ vɩɛl'a, bʋ̃ʋ n'ʋ vɛ̃, a vũu natɩr fɩl tɛwr'ʋ.»

²⁹ «Dɛb bɩɩ pɔw wa tɛr ƴã-gan bàalʋ kãw a zũú bɩɩ a yawlɛrɩ́ a,

³⁰ a bàwr-maalɛ na jɩ́r'ɩ a zie ʋl na ɩ a bàal a kaa: bɔw wa sãá a ƴã-ganɩ́, ɛ́ a kɔblʋ ɩ dʋɔr dʋɔr ɛ́ ɩ jeljel a, a bàwr-maalɛ na yel'a k'aa nɩr nɛ ɩ n dɛwr sob: zu-kpalɛ n'a, bàalʋ na mɩ́ nyɔw a zugan nɩ a yawlɛr a.

³¹ Ɛcɛ a jɩ́rʋ daar a, a bàwr-maalɛ wa nyɛ̃ k'aa zie bɛ ɩ bɔw, ɛ́ a kɔblʋ mɩ̀ bɛ sɔb a, ʋ na ƴãw na a bàal kpɩɛr ʋ yõ da-ɓil.

³² A bàwr-maalɛ na lɛb'a jɩ́r a bàal kaa a bibie ayopõi sob: ʋlɛ wa nyɛ̃ k'aa bàalʋ bɛ yɛ́r a, kɛ́ kɔbl-dʋɔr dʋɔr bɛ ka be, k'aa ƴã-gan zie nɛ bɛ ɩ bɔw a,

³³ a bàal na fɔr'ɩ a zu, ɛ́ tɩ jɩɩrɩ a zi-bàal bɛr, al pùorí, a bàwr-maalɛ lɛb ƴãw ʋ kpɩɛr ʋ yõ da-ɓil.

³⁴ A da-ɓil ŋa baarʋ daar a, ʋ na lɛb'a jɩ́r a zie ʋl na ɩ a bàal a kaa: a bàalʋ bɛ wa yɛ́r pàw a ƴã-gan, ɛ́ bɛ wa ƴãw bɔw a, a bàwr-maalɛ na yel'a k'aa nɩr nɛ vɩɛl'a. A ʋ bʋ̃-suuri tɛwr'a ʋ na pɛ́w lɛb vɩɛl.

³⁵ Ɛcɛ a bàwr-maalɛ wa yel k'aa nɩr nɛ vɩɛl'a, ɛ́ a pùorí a zu-kpalɛ yɛ́rɛ a,

³⁶ ʋ na lɛb'a jɩ́r ʋ kaa: a zu-kpalɛ wa sɩrɩ yɛ́r pàw a ƴã-gan a, a bàwr-maalɛ bɛ lɛb dɩ tuo bɔbr kɔbl-dʋɔr dʋɔr ɛ, bʋ̃ʋ n'ʋ vɛ̃, a sãá na k'aa nɩr nɛ ɩ n dɛwr sob.

³⁷ Ɛcɛ a zie ʋl na ɩ a bàal a wa cãà ŋmɛ̃ ʋ ŋmɛ̃a a, kɔbl-sɛblɛ mɩ̀ lɛb wa bul a, a wul'a k'aa bàalʋ sanɩ na, ɛ́ k'aa nɩr nɛ vɩɛl'a. A lɛ pʋɔ a, a bàwr-maalɛ na yel'a k'ʋʋ vɩɛl'a.»

³⁸ «Dɛb bɩɩ pɔw wa nyɛ̃ zi-pɛlɛ pɛlɛ a ʋ ƴã-gan zu a,

³⁹ a bàwr-maalɛ na jɩ́r ʋ na kaa: a ƴã-gan ziir al wa pɛlɩ ɛ́ bɛ nyɩlɛ a, a bàalʋ bɛ ɩ bàal-faa ɩ, a nɩr nɛ vɩɛl'a.»

⁴⁰ «Nɩr zukɔbɛ wa kpa lo, ʋʋ ɩ zu-kpalɛ a, ʋ cãà na vɩɛl.

⁴¹ A niŋé wa n'a a zukɔbɛ kpa lo, ʋʋ kpal a gbẽé a, ʋ mɩ̀ cãà na vɩɛl.

⁴² Ɛcɛ a ƴã-gan zie kãw wa ɩ bàal, a zi-kpalɛ pʋɔ a zu sɔwlɩsɔw bɩɩ a gbẽé, pɛlɩ jɛr'ɩ zɩɛ a, kɔnʋ bʋʋrɛ kãw n'ʋ.

⁴³ A bàwr-maalɛ na jɩ́r ʋ na kaa: ʋlɛ wa nyɛ̃ ziir na ɓɔ̃ a zi-kpalɛ pʋɔ ɩ pɛlɛ jɛr'ɩ zɩɩr, ɛ́ ŋmɛ̃ taa nɩ a kɔnʋ a,

⁴⁴ kɔnʋ bʋʋrɛ kãw páw nɩ a nɩr nɛ, ʋ ɩ n dɛwr sob. A bàwr-maalɛ na yel'a k'ʋʋ ɩ n dɛwr sob, a bàalʋ páw ʋ nɩ a zũú.»

⁴⁵ «Nɩr na tɛr a kɔnʋ bàalʋ a, ʋ na mɩ́ su n bʋ̃-zarmɛ, ɛ́ bɛr a zukɔbr a ɩ zarkpara. Ʋ na mɩ́ pàw nɩ a nɔkɔblʋ. A fɛr'a k'ʋʋ mɩ́ cɩɩrɛ yere: “Dɛwr sob wɛɛ! Dɛwr sob wɛɛ!”

⁴⁶ Lɛn daar za ʋ na ɩ a bàal a, ʋ ɩ n dɛwr sob, alɛ so a fɛr k'ʋʋ mɩ́ yi zaa a laɩ pʋɔ, tɩ kpɩɛr ʋ yõ.»

A ulu na mɩ́ be a bʋ̃-suuri zu a yele

⁴⁷ «Zi-ulsɩ wa sãá píir kɔblʋ pɛnɛ bɩɩ lɛ̃ pɛnɛ bʋ̃-suuri zu,

⁴⁸ bɩɩ píir kɔblʋ pɛnɛ bɩɩ lɛ̃ pɛnɛ zu a, gámɛ bɩɩ gámɛ bʋ̃-maalɩ zu a,

⁴⁹ a zi-ulsɩ á ŋá wa ɩ sɛblɛ mɛ̃ váar bɩɩ ɩ zɩɩr a, zi-ulsɩ a na fɛr k'aa bàwr-maalɛ jɩ́r kaa a n'a.

⁵⁰ Ʋlɛ wa jɩ́r kaa baarɩ a, ʋ na kpa n a bom ʋl bɛr da-ɓil.

⁵¹ Ʋ na lɛb'a bɛl kaa a bibie ayopõi sob: a zi-ulu wa yɛ̀lɩ a bom ʋl zu a, a ɩ n ulu bɛ na kʋ̃ tʋ̃ɔ́ ír bɛr a, a bom ʋl tɛr'ɩ dɛwr.

⁵² A lɛn daar a, a bàwr-maalɛ na nyɩw nɩ a píir kɔblʋ bɩɩ a lɛ̃ pɛn kparʋ bɛr, bɩɩ a píir kɔblʋ bɩɩ a lɛ̃ pɛn, bɩɩ a gán bʋ̃-maala nɛ. Bɛ na kʋ̃ tʋ̃ɔ́ ír a ulu bɛr a, a fɛr'a kɛ́ bɛ nyɩw a bom nɛ bɛr.

⁵³ Ɛcɛ a jɩ́r-kaafʋ daar a, a bàwr-maalɛ wa nyɛ̃ k'aa zi-ulu bɛ yɛ̀lɩ a,

⁵⁴ ʋ na ƴãw na bɛ pɛ́w a bom nɛ, ʋʋ lɛb kpa ʋ bɛr bibie ayopõi.

⁵⁵ Bɛlɛ wa pɛ́w a bom nɛ baarɩ, ʋ lɛb jɩ́r ʋ kaa nyɛ̃ a zi-ulu ʋ cãà ŋmɛ̃ ʋ ŋmɛ̃a a, ʋlɛ saa bɛ yɛ̀lɩ a, a bom tɛr'ɩ dɛwr, a fɛr'a kɛ́ bɛ nyɩw ʋ bɛr, a pʋɔ bɩɩ a pùor saa n'ʋ a ulu nyɔw a.

⁵⁶ Ɛcɛ a jɩ́r-kaafʋ daar a, a bàwr-maalɛ wa nyɛ̃ k'aa zi-ulu siwri nɩ a pɛwfʋ pùorí a, ʋ na ŋmãa nɩ a kparʋ, a gán bɩɩ a pɛn zie ʋl na uli a bɛr.

⁵⁷ A zi-ulu lɛb wa sãá a kparʋ, a pɛn bɩɩ a gán bom zu a pùorí a, a wul'a k'aa ulu lɛb'a nyɔw a bom. A lɛ pʋɔ a, bɛ na nyɩw nɩ a bom a ulu na nyɔw a bɛr.»

⁵⁸ «Bɛlɛ wa pɛ́w kparʋ, pɛn bɩɩ gán bom ulu na nyɔw a, a ulu wa yi a, a fɛr'a kɛ́ bɛ lɛb pɛ́w ʋ a gb'a ayi sob ʋ vɩɛl.»

⁵⁹ A wulu n'ɩ à á ŋá na càarɩ a zi-ulsɩ na mɩ́ be a píir kɔblʋ pɛnɛ kparɩ, a lɛ̃ pɛnɛ kparɩ, a pɛnɛ bɩɩ a gámɛ bome zu a. A wulu á ŋá mɩ́ sõw na bɛ yel kɛ́ bom na tɛr ulu a vɩɛl'a bɩɩ tɛr'ɩ dɛwr.