A Lãw-mʋɔlɛ 5 - A SƐB-SÕW

Sore e, ɩ tɩ lɛb wa a fʋ zie

¹ Sore e, ta yiiri a ʋlɩ bom nɛ na ta tɩ a ɩ. Jɩ́r nyɛ̃ a lɛ bɛ na tʋʋr tɩ a.

² A tẽw fʋ na kʋ̀ tɩ a lɩɛb'ɩ nɩ-yoru dem, a tɩ yie be n nɩbɛ tɩ na bɛ bãw a nuru pʋɔ.

³ Tɩmɛ n'ɩ bɛ ŋan ɩ bi-kpebe bɛ tɛr sãà mɩnɛ ɩ, a tɩ mã mɩnɛ ɩ na mɛ̃ pɔw-kɔbɛ a.

⁴ Tɩ mɩ́ dà n a tɩ buli kʋ̃ɔ nyũ, tɩ mɩ́ ya n libie tʋ̃ɔ́ páw a tɩ dàar.

⁵ A bɛlɩ dem na dɔwrɛ tɩ a bɛ bɛrɛ tɩ ɛ, tɩ bàl'a, ɛ́ pɩ̃ɛnʋ bɛ ka be a tɩ zie ɩ.

⁶ A Eziptɩ tẽw nɩ a Asiiri tẽw lowr'a tɩ mɩ́ tur a tɩ nuru cɔw, kɛ́ tɩ tʋ̃ɔ́ páw a bʋ̃-dɩrɩ dɩ tɩw.

⁷ A tɩ sãà mɩnɛ maal'ɩ yel-bier ɛ́ bɛ cãà ɩ, ɛcɛ tɩmɛ nɛbɛ tuo a bɛ sãwna.

⁸ Gbãgbaar nɛbɛ so tɩ, ɛ́ nɩr bɛ ka be na faa tɩ a bɛ nuru pʋɔ ɩ.

⁹ A wɛja-kpalɛ pʋɔ nɩ-kʋrbɛ zũú a, tɩ mɩ́ cɛ n kũu-pire kɛ́ tɩ tʋ̃ɔ́ páw a tɩ bʋ̃-dɩrɩ.

¹⁰ A kɔ̃ na kʋrɛ tɩ a zũú a, a ƴãw tʋl tɩ nɩ kpãkpã mɛ̃ dam a.

¹¹ A tɩ dɔ̃ dem fɛr'ɩ a pɔwbɛ gã nɩ a Sɩyɔ̃ tẽw pʋɔ, ɛ́ fɛr gã nɩ a pɔwsɩrali a Zuda tẽ-bɛrɛ pʋɔ.

¹² A bɛl tɛɛ za tɩ nyɔw nɩ a tõ-tõ-bi-bɛrɛ 'lẽ yawlɩ, ɛ́ bɛ tɩ tɛr ƴãwfʋ kãw za a nɩ-kore zie ɩ.

¹³ Pɔlbili tuo nɩ nɩɛr, ɛ́ dɛbli tuo dàar kawr lore nɩ.

¹⁴ A nɩ-kore bɛ cãà cere a tuor-taa zie ɩ, a pɔlbili bɛr'ɩ a bɛ yielu.

¹⁵ A tɩ su-nʋ̃ɔ̀ baar'a, a tɩ nʋ̃ɔ̀ bɩnɛ lɩɛb'ɩ ko-bɩnɛ.

¹⁶ Tɩ bɛ cãà tɛr yúor ɛ. Nyɛ̃ baw-bio na páw tɩ a, bʋ̃ʋ n'ʋ vɛ̃, tɩ maal'ɩ yel-bier!

¹⁷ Alɛ n'a so a tɩ socie be kpɩɛrʋ pʋɔ, alɛ n'a so a tɩ mimie bɛ lɛb cãà nyɛrɛ ɩ.

¹⁸ Bʋ̃ʋ n'ʋ vɛ̃, a Sɩyɔ̃ tãw lɩɛb'ɩ wɛja-kpalɛ, ʋ lɩɛb'ɩ tʋrbaar kpɛb zie.

¹⁹ Ɛ́ a fʋ̃ʋ a, Sore e, fʋ ɩ n nãà kʋralɛ, fʋ dɩrɛ nɩ naalʋ yome yome za.

²⁰ Bʋ̃ʋ n'ʋ so fʋ na yiire tɩ bɛrɛ kʋralɛ, fʋ na jɛrɛ tɩ bɛrɛ a tɩ cãafʋ daar za?

²¹ Sore e, ɩ tɩ lɛb wa a fʋ zie, ɛ́ tɩ na sɩrɩ na lɛb wa. Ɩ a tɩ nyɔ-vʋʋrʋ ʋ lɛb ɩ paala ŋmɛ̃ mɛ̃ a koro kãw za dem a.

²² Fʋ jɛ tɩ na bɛr a nʋɔr kʋ ʋ? A fʋ suur ìr'ɩ a tɩ ƴãw tɩ zuo bɩɩ?