A sɛb-tʋɔla a Zid na sɛb kʋ̀ a Naaŋmɩn nɩ-bʋʋrɛ a 1 - A SƐB-SÕW

A yãanɩ puoru

¹ A mãa Zid, Zakɩ yɛb, na ɩ a Yeezu Kɩrɩta tõ-tone a, ɩ̃ sɛbr'ɩ a bɛlɩ dem a Naaŋmɩn Sãà na bʋɔlɩ a, a bɛl ʋ na nɔnɛ ɛ́ ƴãw a Yeezu Kɩrɩta gù a.

² A nɩbaal-zɔba, a ƴã-ɓaarʋ nɩ a nɔ̃wfʋ, a be a nyɩ zie yaga yaga za.

A wul-wul-bɛlɛbɛlɛ mɩnɛ na páw nɩ dɔwrʋ

³ Ɩ̃ bá mɩnɛ ɛ, ɩ̃ tɩ bɔbr'a nɩ ɩ̃ pʋɔ za, k'ɩ̃ɩ sɛb nyɩ manɩ a faafʋ tɩ za na lãw a yele kʋ̀ nyɩ. Ɛcɛ a wa ɩ fɛrʋ k'ɩ̃ɩ tɩr a sɛbɛ ŋa kʋ̀ nyɩ, yel kʋ̀ nyɩ kɛ́ nyɩ ƴãw fãw mʋɔr a sàw-deb a Naaŋmɩn na kʋ̀ a ʋ nɩbɛ daƴen daadaa a ƴãw.

⁴ Bʋ̃ʋ n'ʋ vɛ̃, nɩ-faar kãw wa na wa sɔwlɩ kpɛ a nyɩ pʋɔ. Bɛ mɩ́ de nɩ a tɩ Naaŋmɩn-maalʋ tu n zi-yoru, bɔbr'ɩ kɛ́ bɛ wul kɛ́ bɛ tɛr'ɩ yel-mɩŋa a bɛ pɩ̃ɔ-ɩb pʋɔ, ɛ́ bɛ sàwr dier a tɩ Sore Yeezu Kɩrɩta na ɩ a tɩ Wul-wul-kara been yõ a ɩ. Koro za n'a a Sɛb-sõw manɛ a dɔwrʋ na na lo a bɛ zu a.

⁵ Nyɩ na saa bãw à á ŋá za baarɩ a, ɩ̃ cãà na bɔbr k'ɩ̃ɩ lɛb sɩ̃w a nyɩ tɩɛrʋ k'aa Sore na tɩ faa a ʋ nɩ-bʋʋrɛ Ɩsɩrayɛl a Eziptɩ tẽw pʋɔ baar'a, ʋ ɩ n a bɛlɩ dem na bɛ tɩ sàw de ʋ a bɛ kpi.

⁶ A malkɩ mɩnɛ na bɛ tɩ sàw tɛr a fãw ʋl tɛwr a Sore na kʋ̀ bɛ a, ɛ́ tɩ zawrɩ a bɛ kpɛb zie bɛr a, a Naaŋmɩn nyɔw bɛ na ƴãw bamɛ kʋralɛ lɔb ƴãw lige pʋɔ, gùre nɩ a ƴɛ̀rʋ-maalʋ bibi-kpɛ̃ɛ nãà wa vɩɛ a.

⁷ A Sodɔm nɩ a Gomɔɔr nɩ a tẽ-kpɔwlɩ nɩbɛ tɩ tɛr'ɩ ɩ-faar mɛ̃ a malkɩ mɩnɛ bɛ ŋa a, ɛ́ tɩ bɔbr a lãw-taa na bɛ tu sɔ́r a. Naaŋmɩn ƴãw bɛ nɩ dɔwrʋ nɩ vũu na bɛ tɛr kpiiru a, k'aa ɩ wulu a nɩbɛ za zie.

⁸ À ŋá tɔr za n'a a nɩbɛ bɛ ŋa mɩ̀ ɩrɛ: bɛ mɩ́ tuur'ɩ a lɛ a bɛ tɩɛrʋ na bɔbr a, dɛwr'ɩ a bɛ ƴã-gamɛ. Bɛ bɛ mɩ́ sàwr a Naaŋmɩn nɩ-kpɛ̃ɛnʋ a bɛ zu ɛ, ɛ́ tʋʋr a ʋ yúor-vɩɛlʋ-danʋ malkɩ mɩnɛ na be a salom zu a.

⁹ Ɛcɛ a malkɩ-kpɛ̃ɛ Mɩsɛl tɔr za bɛ ɩ à à ŋá ɩ. Ʋlɛ nɩ a Gɛgɛra na tɩ ŋmɩɛr nɔkpɛn ɛ́ zɛbr'ɩ taa a Moyiir ƴã-gan a, ʋ bɛ tɩ sàw tʋ ʋ ɛ. À ŋá tɛwr'a ʋ tɩ yel kʋ̀ ʋ: «A Sore, ʋ ƴãw fʋ dɔwrʋ.»

¹⁰ Ɛcɛ a nɩbɛ bɛ ŋa bɛl tʋʋr'ɩ bom nɛ bɛ na bɛ bãw a, ɛ́ a al bɛ na mɩ́ bãw, a bãwfʋ ɩ mɛ̃ a wɛ-dʋn bãwfʋ a, a bɛ kũu ƴãw cãà n'a.

¹¹ Baw-bio dem nɛbɛ, bʋ̃ʋ n'ʋ vɛ̃, bɛ tu n a Kayɛ̃ sɔ́r. Bɛ kpɛ n tulu pʋɔ mɛ̃ a Balaam a, libie ƴãw. Bɛ na tɩ zɛbr mɛ̃ a Koore na tɩ zɛb'ɩ a Moyiir a, bɛ kpi na.

¹² Bɛlɛ sɩrɩ nɛbɛ mɩ́ sãwnɛ a nyɩ yɛbr lãw-dɩb bɛrɛ, a lɛn daar bɛ na mɩ́ su zu dɩrɛ bɛ zɔrɛ nɩ vĩ a. Bɛ ŋmɛ̃ na mɛ̃ zũzuwe sɛsɛb na mɩ́ darɛ, ɛ́ a bɛ mɩ́ mĩ saa a. Bɛ ŋmɛ̃ na mɛ̃ tɩrʋ na bɛ wɔnɛ a, a wɔb daar saa n'a a, ɛ́ bɛlɛ wa vɔ̃ a bɛr a, ãa kpi gb'a ayi a.

¹³ Bɛ ŋmɛ̃ na mɛ̃ kʋ̃ɔ-kpɛ̃ɛ kʋ̃ɔ-mie na damnɛ nɩ fãw a, a bɛ vĩ yele na ɩ mɛ̃ a kʋ̃ɔ-puuru a mɩ́ de bɛ nɩ niwn. Bɛ ŋmɛ̃ na mɛ̃ ŋmar-bie na mɩ́ wa yi tʋ̃ɔ̀ a salom a. Naaŋmɩn bãwnɩ bɛ nɩ zie na liw ʋ za a, kʋralɛ ƴãw.

¹⁴ A bɛl ƴãw mɩ̀ n'a a Enɔkɩ, na ɩ a tɩ sãàkʋm-suwle ayopõi sob na tu a Adama zu a, tɩ ƴɛ̀r a naaŋmɩn-ƴɛ̀r-manɛ ƴɛ̀r-bie á ŋá: «A Sore n'ɩ ŋan waar, ʋlɛ nɩ a ʋ malkɩ-son tùr-piir piir,

¹⁵ k'ʋʋ wa maal'ɩ a nɩbɛ za ƴɛ̀rʋ. Ʋ na wul'ɩ a yel-bebe dem za a bɛ ɩ-faar bɛ na ɩ càar'ɩ ʋ a bɛ bɛ-wonu zũú a, nɩ a zʋmɛ ƴɛ̀r-bie a yel-bebe dem bɛ ŋa na bɛ tɛr ƴãwfʋ a na ƴɛ̀r càar'ɩ ʋ a.»

¹⁶ A nɩbɛ bɛ ŋa mɩ́ zɛbr'ɩ kʋralɛ, ɛ́ a bɛ suur bɛ nʋmɛ bɛ a bɛ nyɔ-vʋʋrʋ ƴãw ɛ. Bɛ mɩ́ tɩɛrɛ nɩ a bɛ bʋ̃-bɔbrɩ tɛwr. Pɔ̀l-ƴɛ̀rʋ n'a bɛ mɩ́ ƴɛ̀rɛ, ɛ́ bɛlɛ wa mʋʋrɛ nɩr a, bɛl mɩŋa tɔnɛ ƴãw n'a.

A Zid kpaalɛ nɩ a kɩrɩta-nɩbɛ

¹⁷ Ɛ́ a nyɩɩm, ɩ̃ bá mɩnɛ ɛ, nyɩ lɛb tɩɛrɩ a ƴɛ̀rʋ al a tɩ Sore Yeezu Kɩrɩta nɩ-toni na tɩ dãw ƴɛ̀r kʋ̀ nyɩ a.

¹⁸ Bɛ tɩ yere nɩ à ŋá kʋ́rɛ nyɩ: «A yele za baarʋ daar a, nɩbɛ na ɩrɛ nyɩ na laar ɛ́ tuur a bɛ ɩ-faar vʋla.»

¹⁹ Bɛlɛ n'ɩ bɛ ŋan, bɛl na mɩ́ ƴãwnɛ bʋ́r-taa a nɩbɛ cara pʋɔ a! A tẽw zu ka yele tɩɛrʋ tɛwr'a bɛ tɛr, bɛ bɛ tɛr a Vʋʋrʋ Sõw ɛ.

²⁰ Ɛcɛ, nyɩɩm ɩ̃ bá mɩnɛ ɛ, nyɩ cãà de a nyɩ nyɔ-vʋʋrʋ tu n a nyɩ naaŋmɩn-sàw-deb na ɩ sõw yaga za a. Nyɩ puore nɩ a Vʋʋrʋ Sõw fãw.

²¹ Nyɩ be a Naaŋmɩn nɔ̃wfʋ pʋɔ gùre nɩ kɛ́ a tɩ Sore Yeezu Kɩrɩta wa kʋ̀ nyɩ a nyɔ-vʋʋrʋ na be kʋralɛ a, a ʋ su-ɓaarʋ pʋɔ.

²² Nyɩ zɔrɛ a bɛlɩ dem na bʋ́nɛ a nɩbaalʋ.

²³ Nyɩ mɩ́ faa bɛ a vũu pʋɔ, ɛ́ a bɛ mɩnɛ a, nyɩ tɛr a bɛ nɩbaal-zɔba lãwnɩ dɛ̃bɩ̃ɛ. Nyɩ hɩ̃ɛn a bɛ ɩ-faar tɩ lãwnɩ a bɛ bʋ̃-suuri dɛwr a bɛ nɩsaal ɩ-dɛgɛ na mɩ́ wa n a.

A sɛbɛ baarʋ zie danʋ

²⁴ A Sob nɛ na na tʋ̃ɔ́ gù nyɩ nyɩ ta lo towtow a, ɛ́ ɩ kɛ̀ nyɩ vɩɛl ɛ́ be nʋ̃ɔ̀ pʋɔ àr'ɩ a yúor-vɩɛlʋ-danʋ niŋé a,

²⁵ a Naaŋmɩn-been yõ tɩ Faarɛ, ʋlɛ so yúor-vɩɛlʋ-danʋ, dɛpaalʋ, fãw nɩ kpɛnʋ a tɩ Sore Yeezu Kɩrɩta ƴãw, a dãwdãw za, a ƴɛrɛŋa nɩ kʋralɛ. Amɛn.