A Zɔb sɛbɛ 7 - A SƐB-SÕW

A Zɔb zɛbr'ɩ nɩ a Naaŋmɩn

¹ A nɩsaal nyɔ-vʋʋrʋ a tẽw zu tɛr'ɩ tuo yaga, a ʋ bibie za nyɔ-vʋʋrʋ ɩ n nuru tõ-tõ-bie nyɔ-vʋʋrʋ.

² Mɛ̃ a lɛ gbãgbaa na tone mʋ̃tɔ̃w pʋɔ bɔbr k'ʋʋ nãá kpɛ ɓaarʋ́ a, mɛ̃ nuru tõ-tõ-bie na gùre a ʋ sã-ya a,

³ lɛ n'a a ɩ̃ yele ŋmɛ̃: cuwr za a, ɩ̃ kʋ̃ nyɛ̃ bom ɛ, ɛ́ a tɩ̃ɩsɔwr ɩ kpɩɛrʋ tɩ̃ɩsɔwr a ɩ̃ zie.

⁴ Ɩ̃ mɩ́ ganɛ na wa báarɛ ɛ́ yere: «Debor'a ɩ̃ na ìr?» A zie mɩ́ sɔb'a bɛ tɛr vɩɛfʋ daar ɛ, ɩ̃ɩ mɩ́ ƴaw lɩɛbɩ a tɩ̃ɩsɔw tɩ vɩɛ nɩ a zie.

⁵ Zãzule nɩ natɩ-kowle n'a pàw a ɩ̃ ƴã-gan. A ɩ̃ ƴã-gan za pur pur'a cire mɛ̀rɛ́.

⁶ A ɩ̃ bibie tɔl'ɩ fɔ̃w zuo pɛn-wobre balɛ̃w, a vʋʋrʋ ɩ̃ na tɩɛrɛ a fomiwr baar'a, a vʋʋrʋ mɩ̀ baarɩ.

*

⁷ Naaŋmɩn i, lɛb tɩɛrɩ nyɛ̃: pɩɛlʋ tɛwr'ɩ a ɩ̃ nyɔ-vʋʋrʋ, ɩ̃ bɛ be za na lɛb bãw nʋ̃ɔ̀ ɩ.

⁸ Fʋ̃ʋ na mɩ́ tɩ jɩ́rɛ mɛ̃ a, fʋ kʋ̃ lɛb nyɛ̃ m ɛ. Fʋ na mɩ́ jɩ́r mɛ̃ na, ɩ̃ɩ kʋ̃ cãà be ɩ.

⁹ Mɛ̃ a lɛ zũzuwr na mɩ́ nyɩl ɛ́ bɔr a, lɛ n'a a nɩsaal na siwr a kpɩmɛ tẽw kʋ̃ lɛb do wa a, ŋmɛ̃.

¹⁰ Ʋ kʋ̃ lɛb wa a ʋ yir ɛ, ɛ́ bɛ yiir ʋ bɛr a be ʋ na tɩ kpɩɛr a.

¹¹ A na ɩ à ŋá a, ɩ̃ kʋ̃ cãà ɩ a gbili ɛ, suur kʋrɛ mɛ̃ na, alɛ so ɩ̃ na ƴɛ̀rɛ. A ɩ̃ suur sãw nɩ ʋ za, lɛ so ɩ̃ na zɛbr.

¹² Mãa n'ɩ a kʋ̃ɔ-kpɛ̃ɛ bɩɩ a kʋ̃ɔ-kpɛ̃ɛ Dʋ̃-bɩɛ, fʋ ƴãw gùrbɛ gù m a ziir za a?

¹³ Mãa wa yel k'ɩ̃ɩ na nyɛ̃ nɩ pɩ̃ɛnʋ a ɩ̃ gado zu a, k'aa ɩ̃ bʋ̃-gana na ɩ n a ɩ̃ kpɩɛrʋ sɛw a,

¹⁴ a lɛn daar'a fʋ mɩ́ ƴãw zán-faar a ƴãw mɛ̃ dɛ̃bɩ̃ɛ, a lɛn daar'a fʋ mɩ́ ɩ ɩ̃ nyɛ̃ bʋ̃-nyɛrɩ na vʋ̃ɔnɛ mɛ̃ pʋ̀lá a.

¹⁵ A kɔ̃tɔ̃-suwle kpɛb tɩɛrʋ be n a ɩ̃ zie. A kũu sa ɩ̃ na na cãà nyɛrɛ a kpɩɛrʋ a.

¹⁶ Ɩ̃ tobr bɛ ka be ɩ! Ɩ̃ kʋ̃ cãà kʋralɛ ɩ! A ɩ̃ nyɔ-vʋʋrʋ bɛ tɛr pɛr ɛ, bɛr mɛ̃ ɩ̃ pɩ̃ɛnɩ.

*

¹⁷ Bʋ̃ʋ n'ɩ a nɩsaal fʋ tɩɛrɛ a ʋ yele sɛw à ŋá? Bʋ̃ʋ n'ʋ so fʋ maal kaarɛ a ʋ zie sɛw à ŋá,

¹⁸ fʋ jiele ʋ kaar biɓaarɛ za, ɛ́ ɩrɛ ʋ kaar kʋrakʋralɛ?

¹⁹ Debor'a fʋ na bɛr a ɩ̃ piwru? Debor'a fʋ na bɛr mɛ̃ ɩ̃ vɔl mʋtaar?

²⁰ Ɩ̃ maal'ɩ yel-bier bɩɩ? A ɩrɛ fʋ nɩ ŋmɩn nɩsaal-piwre e? Bʋ̃ʋ n'ʋ so fʋ jɩɛrɛ mɛ̃? Ɩ̃ bɛ cãà tɛr tɛrʋ bɩɩ?

²¹ Fʋ kʋ̃ tʋ̃ɔ́ de a ɩ̃ nɩ-gaara ɩb bɛr a baar ɛ? Fʋ kʋ̃ tʋ̃ɔ́ dɩ a ɩ̃ sãwna suur kʋ̀ m ɛ? Mãa n'ɩ ŋan gã uuru pʋɔ, fʋ̃ʋ wa bɔblɛ bɔbr mɛ̃ a lɛn daar a, ɩ̃ kʋ̃ cãà ɩ.