A Zɔb sɛbɛ 6 - A SƐB-SÕW

A Zɔb sɔw nɩ a Elifaazɩ ƴɛ̀rʋ

¹ Lɛ n'a a Zɔb tɩ de a ƴɛ̀rʋ yel:

² 'Woi, bʋ̃ʋ pãa ɩ bɛ bɛ ker a ɩ̃ kpɩɛrʋ tɩbrʋ bãw a! Bʋ̃ʋ pãa ɩ bɛ bɛ wob a ɩ̃ wʋ̀ʋr dɔwlɩ bʋ̃-kera zu a!

³ A tɩbrɛ na zuo kʋ̃ɔ-kpɛ̃ɛ nʋɔr biire, alɛ so ɩ̃ bʋ̀nɛ ƴɛ̀rɛ.

⁴ Bʋ̃ʋ n'ʋ vɛ̃, a Kpɛnʋ-za-sob pime kpɛ n a ɩ̃ ƴã-ganɩ́, ɛ́ a lɔw de a ɩ̃ ƴã-gan za. Pʋl-vʋ̃ɔ bʋʋrɛ bʋʋrɛ na yi a Naaŋmɩn zie a cɔrɩ nɩ a ɩ̃ ƴãw.

⁵ Bõw-gaara dãw na àr kɔw mɔ̃-ɓaar ɛ́ kone e? Náab dãw na nyɛ̃ mʋ̃ɔ bɛr ɛ́ ùore e?

⁶ Ãa dɩrɛ bʋ̃-ɓaar-fɔb ɛ́ bɛ ƴãw nyaarʋ? Nɔ̃-jɛl-kɛr kʋ̃ɔ-pla tɛr'ɩ nʋ̃ɔ̀ ɔ?

⁷ Ɩ̃ bɛ bɔbr k'ɩ̃ɩ tɔ a bʋ̃-dɩrɩ á ŋá kãw za ɩ. A ɩ̃ kpɩɛrʋ ɩ n bʋ̃-dɩra na gele mɛ̃ pʋɔ a.

*

⁸ Ãa n'ʋ na ɩ a ɩ̃ zɛlʋ tu? Ãa n'ʋ na ƴãw a Naaŋmɩn kʋ̀ m a bom ʋl ɩ̃ na tɩɛrɛ a?

⁹ A Naaŋmɩn nãá nɩ̃ɛ ƴɛ́r mɛ̃ ŋmɛr a nʋɔr kʋ, ʋ ír a ʋ nũu na piw mɛ̃ tɛr a, ɛ́ báa kʋ m!

¹⁰ Ɩ̃ nãá nyɛ̃ nɩ mɔwlʋ blã, ɩ̃ nãá wõ n nʋ̃ɔ̀ zaa pʋrɩ a dɔwr-kpɛ̃ɛ ŋa pʋɔ, ɩ̃ kʋ̃ʋ tɩ yiiri a lɛ a Naaŋmɩn na ɩ sõw a na yel a bɛr ɛ.

¹¹ A ɩ̃ fãw wa, ɩ̃ na cãà ƴãw a ɩ̃ tɩɛrʋ bom ƴãw? Debor nɩ̃ɛ nɩ a ɩ̃ kũu daar ɩ̃ na cãà fɛrɛ ɩ̃ tʋɔra k'ɩ̃ɩ vʋʋrɛ?

¹² Pìir fãw n'a ɩ̃ tɛr bɩɩ? A ɩ̃ ƴã-gan kpɛmɛ na man kur-zɩɛ bɩɩ?

¹³ A ɩ lɛ a sõwfʋ ɩ̃ na gùre a ɩ zi-vuo bɩɩ? Ɩ̃ bɛ nyɛ̃ sõwfʋ za ʋ?

*

¹⁴ A nɩr a kanyir na baar'a sɛw na k'ʋʋ mɩ́ nyɛ̃ mɔwlʋ a ʋ tɔ zie, alɛ bɛ ɩ lɛ, ʋ kʋ̃ cãà zɔrɛ a Kpɛnʋ-za-sob ɛ.

¹⁵ A ɩ̃ bárɩ yi m'ɩ pùor mɛ̃ fʋɔla kʋ̃ɔ na zɔrɛ a, mɛ̃ kʋ̃ɔ na zɔ kɛ́ bɛr a bà-dĩo a.

¹⁶ A sa-ƴɔɔ daar a, a fʋɔlɩ mɩ́ tuore nɩ a kʋ̃ɔ-ɓʋ̃tʋrʋ, a lɛn daar a kʋ̃ɔ na gúr kpawlɩ nɩ a kʋ̃ɔ-kube na mɩ́ wa nyɩlɛ a.

¹⁷ Ɛcɛ a ũon a, a mɩ́ sɩr'a, a tʋlʋ daar a, a mɩ́ ko na gã.

¹⁸ A al ƴãw a, a nɩbɛ na mɩ́ zɔm nyɔ̃wmɩ tɔ̃w tu taa cere a, mɩ́ bɩɛ na tɔl kpɛ a wɛja-kpalɛ pʋɔ tɩ bɔr.

¹⁹ A nɩbɛ na zɔm nyɔ̃wmɩ tɔ̃w tu taa yi n Teman tẽw a, tɩ jɩ́rɛ nɩ a fʋɔlɩ á ŋá, a sɔr-tɔlbɛ na yi a Saba a tɩ tɩɛrɛ a na.

²⁰ Ɛcɛ vĩ tɩ nyɔw bɛ na bɛ na tɩ tɩɛrɛ a a. Bɛ na tɩ ta a fʋɔlɩ á ŋá pɛr a, a ɩ na mɛ̃ bɛ ɩ ŋmɩn a.

²¹ À à ŋá n'a nyɩ ŋmɛ̃ a nyɩ bá zie, nyɩ na wa nyɛ̃ a ɩ̃ kpɩɛrʋ a, dɛ̃bɩ̃ɛ nyɔw nyɩ na.

²² Ɩ̃ dãw na zɛlɩ bom a nyɩ zie e? Ɩ̃ dãw na yel kɛ́ nyɩ ír a nyɩ tɛra bʋ̃-kãw kʋ̀ m,

²³ tʋ̃ɔ́ faa mɛ̃ dɔ̃ sob kãw nuru pʋɔ ɛ́ ír mɛ̃ bɛr a po-to-sob nuru pʋɔ ɔ?

²⁴ Nyɩ caalɩ a ɩ̃ yã, ɩ̃ɩ na pàw nɩ a ɩ̃ nʋɔr. Nyɩn lowr'a ɩ̃ tuli? Nyɩ wul ɩ̃ nyɛ̃.

²⁵ Yel-mɩŋa ƴɛ̀r-bie bɛ sãwnɛ nɩr pʋɔ ɩ, ɛcɛ nyɩ na yel k'ɩ̃ɩ sãwna a, a sãwna n'ɩ buor?

²⁶ A ƴɛ̀rʋ ɩ̃ na ƴɛ̀r sãw a n'a nyɩ bɔbr kɛ́ nyɩ yere bɩɩ? Ɛcɛ, nɩr a tɩɛrʋ za na wɛ a ƴɛ̀rʋ bɛ mɩ́ tɛr pɛr ɛ.

²⁷ Nyɩ na tʋ̃ɔ́ na ŋmɛ gbãw de bi-kpieb, ɛ́ sàw nyɔw a nyɩ bá kʋɔrɩ!

²⁸ A na ɩ lɛ a, nyɩ maal jɩ́r mɛ̃! Ɩ̃ na sàw na ŋmãa ziri kpɩlɩlɩ lɛ kʋ̀ nyɩ ɩ?

^29-30 A ɩ̃ ƴɛ̀rʋ ɩ n zir-ŋmarɛ ƴɛ̀rʋ bɩɩ? Ɩ̃ na tʋ̃ɔ́ na bɛ bãw bom na ɩ faa a bɩɩ? Nyɩ jɩ́r mɛ̃ nyɛ̃: ziri ta ka mãa nɩ a nyɩɩm cará ɩ! Ɩ̃ lɛb maal yel, nyɩ jɩ́r mɛ̃ nyɛ̃, ɛ́ nyɩ na nyɛ̃ na k'ɩ̃ɩ bɛ tɛr sãwna ɩ.