A Zɔb sɛbɛ 40 - A SƐB-SÕW

A Zɔb'ʋ cɛ a sɔwfʋ

¹ A Sore tɩ bʋɔl'ɩ a Zɔb sowr'ʋ:

² Zɔb i, fʋ ŋmɩɛr'ɩ nɩ a Kpɛnʋ-za-sob nɔkpɛn, ƴɛrɛŋa a, fʋ na bɛr'a bɩɩ fʋ na sɔw na?

³ Lɛ n'a a Zɔb tɩ sɔw a Sore yel:

⁴ Ɩ̃ bɛ tɛr pɛr ɛ, bʋ̃ʋ n'ʋ ɩ̃ na sɔw fʋ? Ɩ̃ pàw nɩ a ɩ̃ nʋɔr.

⁵ Ɩ̃ ƴɛ̀r'ɩ gb'a-been, ɩ̃ bɛ lɛb ƴɛ̀rɛ ɩ. Ɩ̃ ƴɛ̀r'ɩ gb'a ayi, ɩ̃ bɛ lɛb ƴɛ̀rɛ ƴɛ̀rʋ za ɩ.

A Zɔb nɔ̃w bʋɔlɛ nɩ ʋ tʋɔra Naaŋmɩn bɩɩ?

⁶ A Sore tɩ be n a saa-sɛsɛb pʋɔ ɛ́ bʋɔlɩ a Zɔb yel ʋ à ŋá:

⁷ Cɔbrɩ gù mɛ̃ dɛb a: ɩ̃ na sowri fʋ na fʋ sɔw kʋ̀ m.

⁸ Fʋ bɔbr'a kɛ́ fʋ yel k'ɩ̃ɩ bɛ ɩ nɩ-mɩŋa ɩ? Fʋ bɔbr'a k'ɩ̃ɩ ɩ sãwna sob fʋ tʋ̃ɔ́ tɛr yel-mɩŋa a?

⁹ A fʋ kpãkpãw kpɛmɛ na man a ɩ̃ dem ɩ? A fʋ kɔkɔr mɩ́ tanɩ na mɛ̃ a ɩ̃ dem a?

¹⁰ Alɛ wa ɩ lɛ a, fʋ̃ʋ ƴãw a yúor-vɩɛlʋ-danʋ nɩ a kpɛ̃ɛnʋ pɩ̃ɛmɛ, su a dɛpaalʋ nɩ a vɩɛlʋ.

¹¹ Ɩ a fʋ su-tʋlʋ kpãkpã ìr a nɩsaalbɛ zu, jɩ́r a pɔ̀lʋ dem za gb'a-been bɛ su zu.

¹² Ʋ̃ʋ, jɩ́r bɛ gb'a-been, ɛ́ bɛ siwri bɛ tʋɔra bɛ za! Nɛb a nɩ-faar kʋ a ʋlɩ pɛr nɛ pʋɔ.

¹³ Ũù bɛ sãsaralɛ bɛr a tẽw, pàw bɛ bɛr a kũu gaso pʋɔ.

¹⁴ Lɛn daar'a mãa mɩŋa na mʋʋrɩ fʋ a fʋ fãw na ɩ fʋ zɛb tʋ̃ɔ́ a ƴãw!

A ƴɛ́n

¹⁵ Jɩ́r nyɛ̃ a ƴɛ́n a: mãa n'ʋ ír ʋ mɛ̃ ɩ̃ na ír fʋ a. Ʋ 'wɔbr'ɩ mʋ̃ɔ mɛ̃ a náab a.

¹⁶ Nyɛ̃ a fãw na be a ʋ sɩɛmɩ́ sɛw a, maal bɛl a ʋ po-jiile na kpɛmɛ a kaa!

¹⁷ Ʋ mɩ́ tãà nɩ a ʋ zʋʋr mɛ̃ sɛɛdɩr tɩɛ sɩɛ a, a ʋ gbɛbɛrɛ jiile mĩ na mɛ̃ mie a.

¹⁸ A ʋ kɔbɛ kpɛmɛ na mɛ̃ kur-dà-zɩɩr na ɩ vɛɛ a, ɛ́ a ʋ nyabie ɩ mɛ̃ kur-dàar a.

¹⁹ A ɩ̃ bʋ̃-maalɩ za pʋɔ bʋ̃-dãw n'ʋ! Mãa yõ na ɩ a ʋ íre a, mãa n'ʋ tʋ̃ɔ́ ʋ.

²⁰ Tan zu n'a ʋ nyɛrɛ a ʋ mʋ̃ɔ 'wɔbr, be a wɛ-dʋn na mɩ́ ƴawr dɩ̃ɛnɛ gʋɔr a.

²¹ Ɛcɛ tɩɩr pile n'ɩ a ʋ gaa zie, bà-ƴɔrɛ bàa-kɛkɛɛ pʋɔ n'a ʋ mɩ́ sɔwlɩ.

²² A tɩɩr na viiri koli a bàa a ɓaarʋ mɩ́ pàw ʋ na.

²³ A man saa damnɛ nɩ fãw a, ʋ bɛ mĩin a ɩ. A kʋ̃ɔ saa do tɩ tɔ a ʋ nʋɔr a, ʋ bɛ damnɛ damnʋ za ɩ.

²⁴ Ʋlɛ wa bãwnɩ a a, ãa n'ʋ na tʋ̃ɔ́ nyɔw ʋ ɛ́ cɔ̀r ʋ a nyɔbɔw puo?

A Levɩatã

²⁵ Zʋm-pĩi n'ʋ fʋ na ƴãw nyɔw nɩ a Levɩatã bɩɩ? A fʋ zʋm-pĩi n'ʋ fʋ na nyɔw nɩ ʋ a zɛl ƴãw ɩ?

²⁶ Fʋ na tʋ̃ɔ́ na tõ bàa-kɛkɛr ƴãw a ʋ nyɔbɔgɛ pʋɔ ɔ? Fʋ na tʋ̃ɔ́ na cɔ̀r a ʋ kokam puo nɩ kure dale e?

²⁷ Ʋlɛ n'ʋ na lɔbr nuru zɛlɛ nɩ fʋ, ɛ́ ƴɛ̀rɛ a fʋ zie bàalʋbàalʋ ʋ?

²⁸ Ʋ na sàw na fʋ̃ʋ nɩ ʋl maalɩ wõ-taa ʋ ɩ a fʋ gbãgbaa kʋralɛ ɛ?

²⁹ Fʋ na dɩ̃ɛnɛ nɩ ʋ na mɛ̃ mʋ̃ɔ pʋɔ lile fʋ na dɩ̃ɛnɛ nɩ a? Fʋ na 'lẽ ʋ na mɛ̃ bale a ƴãw a fʋ powli dɩ̃ɛnɛ nɩ ɩ?

*

³⁰ A zʋm-nyɔwrbɛ na tʋ̃ɔ́ na lãw taa kʋɔrɩ ʋ bɩɩ? Bɛ na tʋ̃ɔ́ na ŋma ʋ põ yɛ-yɛrbɛ ɛ?

³¹ Fʋ na tʋ̃ɔ́ na cɔ̀r a ʋ gán puori ziir za ɛ́ tɛ a ʋ zu puo o?

³² Ír nũu dɔwlɩ a ʋ zu ɛ́ nyɛ̃: a mɔb nyɩ na na mɔ̃ a tɩɛrʋ tɛwr na ɩ na fʋ bɛ lɛb ɩrɛ lɛ ɩ!