A Zɔb sɛbɛ 39 - A SƐB-SÕW

*

¹ Fʋ bãw nɩ a ʋlɩ daar nɛ a tan pʋɔ bʋʋr na mɩ́ dɔw a bili a? Fʋ dãw na nyɛ̃ a walɩ dɔwfʋ zie e?

² Fʋ sɔr'a bãw a cuwr nʋɔr a na mɩ́ tɛr a pʋɔ a? Fʋ bãw nɩ a lɛn daar a na mɩ́ dɔw a?

³ A mɩ́ dɔm'a, dɔw a bili, ɛ́ a pʋɔ 'wɔbrʋ baarɩ.

⁴ A bili mɩ́ páwr'ɩ fãw ɛ́ kɛrɛ, ɛ́ bom za bɛ fɛrɛ a ɩ, bibir kãw, a bɛr a mã ɛ́ cen bɛ lɛb wa ɩ.

*

⁵ Ãa n'ʋ ɩ a bõw-gaara ʋ so ʋ tʋɔra? Ãa n'ʋ cɛ̀r a ʋ gbɛ̀rɩ́ bɛr ʋ?

⁶ Dɩlãpʋɔ n'ʋ ɩ a yir ɩ̃ ƴãw ʋ kpɩɛr, tẽsɔw na kpɛ zɩ̃ɛ ʋ za a, be n'ɩ a ʋ kpɛb zie.

⁷ A tẽ-bɛrɛ gɔmɛ bɛ ɩrɛ ʋ bom ɛ, ʋ bɛ wone bõw sob na ŋmɛrɛ kɔkɛɛ a ɩ.

⁸ A ʋ mʋ̃ɔ 'wɔbrʋ zie n'ɩ a tan ʋ na mɩ́ cɔlɛ a, va-ɓaale nɩ mɔ̃-ɓaale za n'a ʋ mɩ́ bɔbr.

*

⁹ A wɛ-náab na sàw na tone a fʋ tome e? Ʋ na sàw na gã a fʋ zaw pʋɔ ɔ?

¹⁰ Fʋ na tʋ̃ɔ́ na fɛr ʋ ƴãw ʋ kʋɔr ɩ? Ʋ na tʋ̃ɔ́ na tawr a ku-jajaa a bà-fʋɔla pʋɔ ɔ?

¹¹ Ʋ na tɛr fãw yaga a n'a fʋ na bɛr yã ɛ́ de a fʋ tome za kʋ̀ ʋ bɩɩ?

¹² Ʋlɛ n'ʋ fʋ na gù k'ʋʋ ŋma a fʋ ble, ɛ́ de a fʋ bʋ̃-dieri za a?

*

¹³ A kʋlãdisowle mɩ́ ŋmɛ n a ʋ bɩgɛ papa! Ɛcɛ bʋ̃ʋ pãa ɩ ʋ bɛ tɛr a tɩlãtoo kɔbl-bɛrɛ nɩ a ʋ kɔbl-vʋlvʋl a?

¹⁴ Ʋ na mɩ́ zawrɩ a ʋ jɛlɛ bɛr a tẽsɔw ɛ́ ƴãw a biir-tʋlʋ ũú nɩ a,

¹⁵ ʋ mɩ́ yiir'a bɛ na na tʋ̃ɔ́ nɛb a ŋmɛr a, ʋ mɩ́ yiir'a wɛ-dʋn na na tʋ̃ɔ́ ŋmɛr a bɛr a.

¹⁶ Ʋ ko n mimir a ʋ bili ƴãw mɛ̃ ʋlɛ bɛ so a a: a bɛ ɩrɛ ʋ bom ʋ na bàl ʋ tʋɔra zawlalɛ a ɩ.

¹⁷ A pɛr lɛ k'ɩ̃ɩ sɩb ʋ nɩ a yã-bãwfʋ, ɩ̃ bɛ kʋ̀ ʋ a yã ɩ.

¹⁸ Ɛcɛ ʋlɛ dɛ wa ìre a zɔba ƴãw a, bʋ̃ʋ n'ɩ wur nɩ ʋ zɔmnɛ a ʋ zie?

*

¹⁹ Fʋ̃ʋ n'ʋ mɩ́ kʋ̀ a wur a fãw ɩ? Fʋ̃ʋ n'ʋ mɩ́ ɩ a gbɩɛrɛ bul pàw a ʋ nyũu za a?

²⁰ Fʋ̃ʋ n'ʋ mɩ́ ɩ ʋ ƴaw mɛ̃ a sãsowr a? A ʋ dɛblʋ kon mɩ́ ɩrɛ nɩ dɛ̃bɩ̃ɛ yaga.

²¹ Ʋ mɩ́ tɛ́br'ɩ a tẽw a bà-fʋɔla pʋɔ, nʋ̃ɔ̀ na ɩrɛ ʋ a ʋ fãw zũú a, ɛ́ mɩ́ ƴaw nɩ fãw tuore a dɔ̃ dem.

²² Ʋ bɛ bãw dɛ̃bɩ̃ɛ, bɛ bãw pʋl-vʋ̃ɔ ɩ, ʋ bɛ tɩ̃wnɛ pùor a zɛbr-sɔ-kpɛ̃ɛ niŋé ɩ.

²³ A zɛbr bome damnɛ nɩ a ʋ zu: a lɔw, a kafin na nyɩwrɛ a, nɩ a zɛbr-sɔ-kpɛ̃ɛ.

²⁴ Ʋ àr'a gú, ɛ́ garɛ wɩɛr tɩ bɔrɛ, a wɩ́ɛ wa pɛblɛ wa báarɛ a, ʋ mɩ́ nyɔw nɩ ʋ tʋɔra gú.

²⁵ Ʋ mɩ́ kõ na sɔw a wɩ́ɛ na pɛblɩ a. Ʋ mɩ́ wõ n a zɛbr nyũu zi-zãána, a zɛbr nɩ-bɛrɛ na ŋmɛrɛ kɔkɛɛ a, nɩ a zɛbr cɛl bɛ na lɔb a.

*

²⁶ Fʋ̃ʋ n'ʋ wul a zɩɛr-kẽkele a yã ʋ mɩ́ ƴaw ɛ́ dɔl a ʋ pɩgɛ cɔw a saa-pɛrɩ́-dʋrʋ-lowr ɩ?

²⁷ Fʋ̃ʋ n'ʋ mɩ́ ƴãw nʋɔr kʋ̀ a sɩla ʋ ƴaw, ɛ́ mɩ́ maalɩ a ʋ cow tã-kɛra zu u?

²⁸ Pìe pʋɔ n'a ʋ kpɩɛr, ɛ́ ganɛ pìir-nyɔ-ɓɩɩla na bɛ tɛr tab a zu.

²⁹ Be n'a ʋ mɩ́ zɩ̃ ɛ́ piwre a bom ʋ na na siw ɓáw a, ʋ mɩ́ zãá na ɛ́ nyɛ̃ ʋ.

³⁰ Zɩ̃ɩ n'a a ʋ bili nyúur. Be bʋ̃-kũuni na gã a, ʋ be n a be.