A Zɔb sɛbɛ 38 - A SƐB-SÕW

A SORE SƆWR'Ɩ A ZƆB 38:1—42:6

¹ A Sore tɩ be n a saa-sɛsɛb pʋɔ ɛ́ bʋɔlɩ a Zɔb sowr'ʋ:

² Ãa n'ɩ a ʋlɛ nɛ ɩ̃ na cɔbrɩ a yele bin a ɩ cãà ʋʋ sãwnɛ bɛrɛ nɩ a ʋ dãbol-ƴɛ̀rʋ a?

³ Cɔbrɩ gù mɛ̃ dɛb a: ɩ̃ na sowri fʋ na, fʋ sɔw kʋ̀ m.

Naaŋmɩn so a bʋ̃-íri na bɛ vʋʋrɛ a

⁴ Nyɩnɛ n'a fʋ tɩ be a lɛn daar ɩ̃ na tɩ sʋ̃ɔ́nɛ a tẽw pɛr a? Yel kʋ̀ m, fʋ̃ʋ na bãw a sɛw à ŋá a:

⁵ Ãa n'ʋ manɩ a ʋ zɛ̃a? Fʋ bãw ʋ na a? Bɩɩ ãa n'ʋ dɔl a miwr manɩ nɩ ʋ?

⁶ Bʋnʋ pʋɔ n'a a ʋ kpule siw kpɛ? ãa n'ʋ bin a ʋ pɛr kʋsɩɛr

⁷ a lɛn daar a zi-vɩɛ-ŋmar-bie na tɩ lãw taa yiele ɛ́ a Naaŋmɩn malkɩ mɩnɛ cáarɛ nʋ̃ɔ̀ cáarʋ a?

⁸ Ãa n'ʋ tɩ ƴãw pamɛ pàw nɩ a kʋ̃ɔ-kpɛ̃ɛ a lɛn daar ʋ na tɩ tɛbr yire a tẽsɔw pʋ̃ɔmɩ a?

⁹ a lɛn daar ɩ̃ na tɩ su ʋ a zũzuge mɛ̃ kparʋ, ɛ́ de a ulu pili pàw ʋ a?

¹⁰ Ɩ̃ bɩw ʋ na, ɩ̃ ƴãw nɩ tʋr-bɔw kʋ̀ ʋ, ɩ̃ ƴãw nɩ pan a ʋ niŋé ɛ́ jɩ̀r'ɩ dàar.

¹¹ Ɩ̃ yel ʋ na: «Fʋ na mɩ́ wa na wa tɩɛ a ka, fʋ kʋ̃ tɔl nidaa ɩ, ka n'a a fʋ kʋ̃ɔnɩ pɔ̀l-ɩb na mɩ́ tɛw!»

*

¹² Fʋ na cɔ̃ kɛ́ vʋʋrɛ a, fʋ dãw na yel a zie k'ʋʋ vɩɛ, ʋʋ vɩɛ ɛ? Fʋ dãw na wul a zi-wɛl-paala a ʋ àrʋ zie,

¹³ k'ʋʋ tʋ̃ɔ́ mɩ́ nyɔw a tẽsɔw a ʋ nɛ́ɛ ƴãw ɛ́ pĩ pĩ a nɩ-faar bɛr ɩ?

¹⁴ Lɛ n'a a tẽsɔw ŋmɛ̃a pãa mɩ́ sãá ɩ mɛ̃ yaw-nawra bɛ na nɛ̃ nɩ ŋmaarʋ-bʋ̃-ƴãwna a, ɛ́ a zie za ɩ mɛ̃ kparʋ na ƴãw pɩ̃ɛmɛ a.

¹⁵ Ɛcɛ a nɩ-faar bɛ cãà be a lige pʋɔ ɩ, ɛ́ a nũu na tɩ zɛw a ŋmɛb ƴãw a ka.

*

¹⁶ Fʋ dãw na cen tɩ ta a kʋ̃ɔ-kpɛ̃ɛ bul-nɛ́ɛ zie e? Fʋ dãw na cɔlɩ cɔlɩ a kʋ̃ɔ-kpɛ̃ɛ pɛrɩ́ ɩ?

¹⁷ Bɛ wul fʋ nɩ a kũu dɩ̃dɛɛ zie e? Fʋ nyɛ̃ nɩ a nyãakpɩmɛ tẽw dɩ̃dɛɛ ɛ?

¹⁸ Fʋ dãw na tɩɛrɩ a lɛ a tẽ-daa na yɛlmɛ sɛw a? Manɩ a lɛ ʋ na ŋmɛ̃ a, fʋ̃ʋ na bãw ʋ ʋ za a.

¹⁹ Nyɩn lowr'a a cãà kpɩɛr? Nyɩnɛ n'a a lige gánɛ?

²⁰ Fʋ nãá bɔ na tɩ nyɛ̃ a, a be a na kpɩɛr a, fʋ̃ʋ wa sɩrɩ bãw a lɛ bɛ na mɩ́ ɩ cen a cãà nɩ a lige zie a.

²¹ Fʋ bãw na, fʋ̃ʋ na tɩ dɔw a lɛn daar a, fʋ̃ʋ na nyɛ̃ cãà a daar bɛ gbʋ́r a!

*

²² Fʋ cen na tɩ ta a ziir al ɩ̃ na ƴãw a sa-bi-kube nɩ a sa-pupure a?

²³ Ɩ̃ bin a na gùre nɩ a kpɩɛrʋ daar, a mɔb bibir nɩ a zɛbr daar.

²⁴ Nyɩn lowr'a a cãà mɩ́ yi wa? Nyɩnɛ n'a a sɛsɛb-tʋlʋ mɩ́ yi wa fu pàw a tẽw?

²⁵ Ãa n'ʋ yuo tɔlʋ zie kʋ̀ a saa? Ãa n'ʋ kɔ a sɔ́r kʋ̀ a saa-nyɩwrʋ nɩ a saa-tanʋ?

²⁶ Ãa n'ʋ mɩ́ ɩ a saa wa zie nɩbɛ na bɛ kpɩɛr a? Ʋ wa wɛja pʋɔ nɩr za na bɛ ka be a,

²⁷ k'ʋʋ ɩ tẽsɔw-kpalɛ ʋ ɓãá mib ɛ́ bul mʋ̃ɔ?

²⁸ A saa tɛr'ɩ sãà a? Ãa n'ʋ dɔw a ɓɩɛlʋ?

²⁹ A kʋ̃ɔ-kuur mã n'ɩ anʋ? Ãa n'ʋ dɔw a sa-bi-mɩrmɩr na mɩ́ gúr a?

³⁰ Ƴawr wa ɩrɛ yaga yaga a, a kʋ̃ɔ mɩ́ gúr'a kpawlɩ mɛ̃ kʋsɩɛr a, a kʋ̃ɔ zu-sɔw mɩ́ gúr'a kpawlɩ gã.

*

³¹ Fʋ na tʋ̃ɔ́ na 'lẽ a kɔ̃wmɛ ŋmar-bie ɓã taa a? Bɩɩ fʋ na tʋ̃ɔ́ na cɛ̀r a baa-nɩ-ŋmãam-nɩ-pɔw-nyãw ŋmar-bie mie bɛr ɩ?

³² Fʋ na tʋ̃ɔ́ na mɩ́ ɩ a ŋmar-bie pur sãá a daar ɩ? Fʋ na tʋ̃ɔ́ na kpárɛ a Dɛ-kʋɔr-lɛjãw nɩ a ʋ bili ɩ?

³³ Fʋ bãw nɩ a nɛ́ɛ a na fɛr k'aa salom sàwr a? Fʋ̃ʋ n'ʋ mɩ́ ɩ a nɛ́ɛ á ŋá tuur a tẽw zu u?

³⁴ Tanʋ tɛwr'a fʋ mɩ́ tanɩ a zũzuge ɛ́ kʋ̃ɔnɩ cir 'habapapa pàw fʋ bɩɩ?

³⁵ A saa na mɩ́ nyɩwrɩ a, fʋ̃ʋ n'ʋ mɩ́ tõ ʋ bɩɩ? Ʋ mɩ́ sàw nɩ a fʋ nʋɔr ɩ?

³⁶ A lile ʋl bɛ na bʋɔlɛ a Ibisɩ a, ãa n'ʋ kʋ̀ ʋ a yã-bãwfʋ, ɛ́ kʋ̀ a nʋra a yã?

³⁷ Bãw-bãwnɛ buor'ʋ bãw a zũzuge sɔ́rʋ, bãw a salom wɔ-gban cɩɩlʋ mɩ́ cɩɩlɩ a kʋ̃ɔ cire,

³⁸ ɛ́ a uuru nyɔw taa ɩ mɛ̃mɛrɛ, ɛ́ a tanɛ mɛ taa ɩ tã-dɛgɛ?

Naaŋmɩn so a dʋn

³⁹ Fʋ̃ʋ n'ʋ mɩ́ bawlɩ nyɔw a bom kʋ̀ a wɛ-nãà pɔw ɩ? Fʋ̃ʋ n'ʋ mɩ́ ɩ a wɛ-nãà bili a tɩw,

⁴⁰ a lɛn daar a na mɩ́ gã a bɔw pʋɔ, bɩɩ ũù gù a bom a tuw pʋɔ a a?

⁴¹ Ãa n'ʋ mɩ́ bɔ a bʋ̃-dɩrɩ kʋ̀ a gbágba, a lɛn daar a ʋ bili na mɩ́ cɩɩrɛ cɔwr a Naaŋmɩn ɛ́ bɛ cãà tɛr fãw za a bʋ̃-dɩrɩ na bɛ ka be a ƴãw a?