A Zɔb sɛbɛ 37 - A SƐB-SÕW

¹ Alɛ n'a so a ɩ̃ socir màwr, ɛ́ tʋɔr a ɩ̃ nyãa pʋɔ.

² Nyɩ wone, nyɩ bɛrɛ wone a Naaŋmɩn kɔkɔr na pure a, nɩ a tanʋ ʋ na tanɛ a.

³ Ʋ ɩ n a saa-tanʋ ta a salom zu ziir za, ɛ́ a saa-nyɩwrʋ tɔ a tẽw zu ziir za.

⁴ Al pùorí, a Naaŋmɩn kɔkɔr ùore na, ʋ tanɛ nɩ kpɛ̃w kpɛ̃w za. Ɛ́ a ʋ kɔkɔr na dɛ wa tanɩ yi a, ʋ lɛb'a ƴãw a saa-nyɩwrʋ yi.

⁵ A Naaŋmɩn mɩ́ maal'ɩ nɔ-ɓãa-yele nɩ a ʋ kɔkɔr-kpɛ̃w, ʋ mɩ́ maal'ɩ yel-bɛrɛ a nɩsaal na kʋ̃ tʋ̃ɔ́ bãw a.

*

⁶ A lɛn daar a Naaŋmɩn na mɩ́ wa yel a sa-pupure: «Nyɩ lore a tẽw zu», a lɛn daar ʋ na mɩ́ ƴãw a saa waar, ʋ waar gbʋrʋgbʋrʋ a,

⁷ ʋ mɩ́ gbɛ̀r'ɩ a nɩsaalbɛ tome tɛr, k'aa nɩsaalbɛ ʋ na maalɩ a, mɩ́ tɩɛrɩ bãw a ʋ ɩ-ɩrɩ.

⁸ A wɛ-dʋ̃w mɩ́ lɛb'a kpɛ a ʋ gaa zie, ʋ mɩ́ kpɛ na gã a ʋ bɔw pʋɔ.

⁹ Saa-pɛrɩ́-dʋrʋ-lowr'a a saa-sɛsɛb mɩ́ yi, ɛ́ a ƴawr yi saa-pɛrɩ́-gʋba-lowr.

¹⁰ A Naaŋmɩn mɩ́ wa pɛblɩ a ʋ pɩɛlʋ a, a kʋ̃ɔ mɩ́ lɩɛb'ɩ kʋ̃ɔ-kuur, ɛ́ a kʋ̃ɔ zu-sɔw kpawlɩ mɛ̃ kure a.

*

¹¹ Naaŋmɩn n'ʋ mɩ̀ mɩ́ ɩ a zũzuge tɛr kʋ̃ɔ, ʋʋ ɩ a yaarɩ pàw a ziir za, ɛ́ ɩ saa-nyɩwrʋ tɛwr.

¹² À ŋá n'a ʋ mɩ́ ɩ a zɔrɛ gʋɔr a ziir za, k'aa maalɩ bom nɛ za ʋ na yel k'aa maalɩ a tẽ-daa zu a, k'aa maalɩ ʋ, mɛ̃ a lɛ ʋ na bɔbr a.

¹³ Alɛ n'a a Naaŋmɩn mɩ́ tõ a tẽw zu k'aa tɩ dɔwrɩ a nɩbɛ bɩɩ wul bɛ a Naaŋmɩn nɔ̃wfʋ ɩb.

*

¹⁴ Zɔb i, ƴãw tobr à á ŋá za ƴãw, ìr àr ɛ́ nyɛ̃ a Naaŋmɩn nɔ-ɓãa-yele a!

¹⁵ Fʋ bãw nɩ a lɛ a Naaŋmɩn na kaarɛ a nɔ-ɓãa-yele á ŋá zie a? Fʋ bãw nɩ a lɛ ʋ na mɩ́ ɩ a saa-nyɩwrʋ yi a zũzuge pʋɔ a?

¹⁶ Fʋ bãw nɩ a lɛ ʋ na ɩ a zũzuge àr a saa-zu ɛ́ bɛ lore a? Bãwfʋ na bãw tɔ a, nɔ-ɓãa-yel-maala n'ɩ à ŋá.

¹⁷ Fʋ̃ʋ a bʋ̃-suuri na mɩ́ tʋlɛ zuo a lɛn daar a saa-pɛrí-dʋrʋ-lowr sɛsɛb-tʋlʋ na mɩ́ ɩ a tẽsɔw tʋlɛ kpãkpã a,

¹⁸ fʋ tɩ sõwne nɩ a Naaŋmɩn na tɩ dɔlɛ a salom, ɛ́ ɩrɛ ʋ kpɛmɛ mɛ̃ kure caala a?

*

¹⁹ Wul mɛ̃ bom nɛ tɩ na na tʋ̃ɔ́ yel kʋ̀ a Naaŋmɩn a. — Tɩ kʋ̃ tʋ̃ɔ́ ƴɛ̀r ƴɛ̀rʋ na tori a ɩ, tɩ na be lige pʋɔ a ƴãw.

²⁰ Ɩ̃ na mɩ́ wa ƴɛ̀rɛ a, a mɩ́ fɛr'a kɛ́ bɛ ɩ ʋ bãwnɩ a bɩɩ? A mɩ́ fɛr'a kɛ́ bɛ yel kʋ̀ ʋ, ʋ tʋ̃ɔ́ bãwnɩ a?

²¹ A mɩ́ wa bere na a nɩbɛ bɛ cãà nyɛrɛ vla ɩ. A zũzuge mɩ́ pàw nɩ a mʋ̃tɔ̃w, al pùorí a sɛsɛb ìr fu pɩɩrɩ a cen nɩ.

²² Cãà na ɩ mɛ̃ salm-zɩɛ cãà a yi n a saa-pɛrɩ́-gʋba-lowr waar, cãà na ɩrɛ dɛ̃bɩ̃ɛ a viir'a koli a Naaŋmɩn.

²³ A Kpɛnʋ-za-sob tɩ na kʋ̃ tʋ̃ɔ́ ta a n'ʋ, ʋ ɩ n kpɛ̃ɛ a fãw nɩ a mɩnʋ lowr, ʋ bɛ dɔwrɛ sob nɛ na ɩ nɩ-mɩŋa mɩŋa a ɩ.

²⁴ Alɛ so a nɩsaalbɛ ƴãwnɛ ʋ, ɛcɛ ʋl bɛ ŋmɛlɛ kaar a bɛlɩ dem na tɩɛr kɛ́ bɛ ɩ n yã-bãwnbɛ a ɩ.