A Zɔb sɛbɛ 32 - A SƐB-SÕW

A ELIHU KPƐ NA PƲƆ A ƳƐ̀RƲ PƲƆ 32—37

¹ A Zɔb na tɩ nyɛ̃ ʋ ɩ nɩ-mɩŋa a, a ʋ bárɩ ata bɛ ŋa tɩ bɛr'ɩ a ʋ ƴɛ̀r-sɔwfʋ.

² Ɛcɛ Elihu tɩ nyɛ̃ nɩ suur. Buuzɩ nɩ-bʋʋrɛ Barakeyɛl bidɛb tɩ n'ʋ, ɛ́ ɩ Aram yir dɔwlʋ nɩr. Ʋ tɩ nyɛ̃ nɩ nɩ a Zɔb suur, ʋ na tɩ tɩɛr k'ʋʋ ɩ n mɩŋa sob zuo a Naaŋmɩn a.

³ Ʋ mɩ̀ tɩ nyɛ̃ nɩ nɩ a Zɔb bárɩ ata bɛl suur, bɛ na bɛ tɩ cãà tɛr sɔwfʋ na sɔw kʋ̀ a Zɔb a, a ɩ a lɛ a Naaŋmɩn ɩ sãwna sob a.

⁴ Ɛcɛ a Elihu bɛ tɩ ƴɛ̀r sɔw a Zɔb ɛ, a bɛ ŋa na tɩ ɩ bɛrɛ a ʋ ƴãw a zũú.

⁵ Ɛcɛ a Elihu na tɩ nyɛ̃ a nɩbɛ ata bɛ ŋa bɛ bɛ cãà tɛr sɔwfʋ na sɔw a, ʋ tɩ nyɛ̃ nɩ suur.

A Elihu manɛ nɩ a ƴɛ̀rʋ pʋɔ ʋ na kpɛ a pɛr

⁶ Lɛ n'a a Buuzɩ nɩ-bʋʋrɛ Barakeyɛl bidɛb Elihu tɩ de a ƴɛ̀rʋ yel: A mãa a, pɔlbile nɛ m, ɛ́ a nyɩɩm ɩ dɛb-nyamɛ. Alɛ n'a so a zɔba nɩ a dɛ̃bɩ̃ɛ bɛ tɩ sàw ɩ̃ ƴɛ̀r wul nyɩ a ɩ̃ bãwfʋ ɛ.

⁷ Ɩ̃ tɩ tɩɛr'ɩ ɩ̃ pʋɔ yel: «Nɩ-kore so a ƴɛ̀rʋ na ƴɛ̀r, dɛb-nyamɛ so a yã-bãwfʋ na wul!»

⁸ Ɛcɛ alɛ ɩrɛ mɛ̃ bom'ʋ a, a Naaŋmɩn Vʋʋrʋ, a Kpɛnʋ-za-sob pɩɛlʋ, ʋlɛ n'ʋ mɩ́ ɩ a nɩsaal bãw a yã.

⁹ Nɩ-kʋra ɩb bɛ n'a waar'ɩ a yã-bãwfʋ ɛ, ɛ́ dɛb-nyamɛ bɛ nɛbɛ mɩ́ bãw a lɛ-na-tu-sɔr-a ɩ.

¹⁰ Lɛ so ɩ̃ zɛlɛ nyɩ: «Nyɩ bɛr wõ a ɩ̃ ƴɛ̀rʋ: ɩ̃ mɩ̀ na manɩ nɩ a ɩ̃ bãwfʋ!»

*

¹¹ Ɩ̃ tɩ gù na kɛ́ nyɩ ƴɛ̀r tɩ baarɩ, ɩ̃ tɩ ƴãw nɩ tobr a nyɩ tɩɛrʋ ƴãw a lɛn daar nyɩ na tɩ bɔbr a nyɩ ƴɛ̀r-bie a.

¹² Ɩ̃ nyɔw nɩ ɩ̃ tʋɔra ɛ́ bɛr wõ nyɩ tɩ tɔ, ɛcɛ nyɩ kãw za bɛ sɔw a Zɔb ɛ, nyɩ kãw za bɛ ƴɛ̀r tʋ̃ɔ́ ʋ ɛ.

¹³ A na ɩ à ŋá a, nyɩ taa yere kɛ́: «Tɩ nyɛ̃ nɩ a lɛ na n'a a: Naaŋmɩn yõ n'ʋ na tʋ̃ɔ́ ʋ, nɩsaal bɛ n'ʋ ɛ.»

¹⁴ Mãa bɛ n'ʋ a Zɔb ƴɛ̀r a ʋ ƴɛ̀rʋ kʋ̀ ɛ, ɛ́ a nyɩ ƴɛ̀r-bie bɛ n'a ɩ̃ na de sɔw nɩ ʋ ɛ.

*

¹⁵ Dɛ̃bɩ̃ɛ nyɔw nyɩ na, nyɩ bɛ cãà tɛr sɔwfʋ ɛ, nyɩ bɛ cãà bãw lɛ nyɩ na na yel a ɩ.

¹⁶ Ɩ̃ gù na bàl. Ɛ́ nyɩ na bɛ cãà ƴɛ̀rɛ, ɛ́ zɩ̃ zɩ̃ kʋ̃ lɛb tʋ̃ɔ́ sɔw a,

¹⁷ mãa na ƴɛ̀r'a, mãa n'ʋ cɛ a ƴɛ̀rʋ! Ɩ̃ mɩ̀ na manɩ nɩ a bãwfʋ ɩ̃ na bãw a.

¹⁸ Ɩ̃ tɛr'ɩ ƴɛ̀rʋ yaga, ɛ́ a tɩɛrʋ na be a ɩ̃ pʋɔ a canɛ mɛ̃ a ƴɛ̀rʋ ƴãw.

¹⁹ A ɩ na mɛ̃ divɛ̃ na bɩrɛ a ɩ̃ púorí bɔbr yib zie guur a, mɛ̃ wɔ-gbã-paalɛ na bɔbr puru a.

²⁰ Nyɩ bɛr mɛ̃ ɩ̃ ƴɛ̀r ɛ́ vʋʋrɩ, ɩ̃ na háa nɩ nʋɔr ƴɛ̀r sɔw.

²¹ Ɩ̃ kʋ̃ kpɛ nɩr ɛ, ciiru n'ʋ a ɩ̃ zie, ɛ́ kʋ̃ mʋʋrɩ nɩr za ɩ.

²² Mɔ̃ mɩ̀, ɩ̃ bɛ bãw nɩr bɛ̀lʋ ɛ, alɛ bɛ ɩ lɛ a, a ɩ̃ Íre nãá kʋ m'ɩ fɔ̃wlɛ.