A Zɔb sɛbɛ 31 - A SƐB-SÕW

A Zɔb yel'a k'ʋʋ bɛ tɛr sãwna ɩ

¹ Ɩ̃ tɩ yel'ɩ a ɩ̃ mimie k'aa ta mɩ́ jɩ́r pɔwsɩrale nɩ vʋla ɩ.

² Alɛ bɛ ɩ lɛ, bʋ̃ʋ n'ʋ a Naaŋmɩn na be a saa-zu a, nãà kʋ̀ m? A Kpɛnʋ-za-sob na be a salom zu a kʋ̃ʋ kʋ̀ m maalʋ kãw za ɩ.

³ Nyɩ mɩ́ yel'a: «A kpɩɛrʋ mɩ́ páw nɩ a nɩ-faa, ɛ́ niw-sʋba tɛr a yel-fa-maalɛ.»

⁴ A Naaŋmɩn bɛ nyɛ̃ a ɩ̃ cenu bɩɩ? Ʋlɛ bɛ n'ʋ bãw a ɩ̃ gbɛ-ceni za nʋɔr ɛ?

*

⁵ Ɩ̃ tu n ziri pùor bɩɩ? Ɩ̃ paw nɩ fɔ̃w za nɩr bɛlʋ ƴãw bɩɩ?

⁶ A Naaŋmɩn, ʋ dɩ n mɛ̃ ƴɛ̀rʋ na tu yel-mɩŋa a! Ʋʋ na nyɛ̃ na k'ɩ̃ɩ zaa n'ɩ ŋa.

⁷ Mãa wa cen tuli a, a ɩ̃ pʋɔ wa bɔbr a ʋlɩ bom nɛ a ɩ̃ mimir na nyɛ̃ a, ɩ-faa wa mar a ɩ̃ nuru a,

⁸ a alɩ bome ɩ̃ na bʋ̀rɛ a, nɩ-yũo ʋ so a dɩrɛ, a ɩ̃ bʋ̃-kʋ́ɔrɩ, bɛ vɔ̃ a bɛr!

*

⁹ Mãa wa nyɛ̃ pɔw cen gúu a, mãa wa lanɩ gù ʋ a ɩ̃ tɔ sob dɩ̃dɔr ƴãw a,

¹⁰ a ɩ̃ pɔw, ʋ tone kʋ̀rɛ nɩ-yũo, ɛ́ yɛ́rɛ a sɛ̃w kʋrɛ nɩ-yũo!

¹¹ Bʋ̃ʋ n'ʋ vɛ̃, a nãá ɩ n vĩ-yel ɩ̃ maalɩ, yel-faa, a ɩ̃ ƴɛ̀r-dɩrɛ nãá kʋ̃ʋ bɛr a.

¹² A nãá ɩ n vũu dɩ m tɩ baarɩ, ɛ́ dɩ a ɩ̃ bom za sãw bɛr.

*

¹³ Mãa bɛ wa sàw a ɩ̃ tõ-tõ-bi-dɛb bɩɩ a ɩ̃ tõ-tõ-bi-pɔw yel-mɩŋa kʋ̀ ʋ a tɩ taw-taa pʋɔ a,

¹⁴ ɛ́ a Naaŋmɩn wa ìr'ɩ mɛ̃ ƴɛ̀rʋ a lɛn daar a, ɩ̃ na ɩ n ŋmɩn? Ʋlɛ wa sowre k'ʋʋ bãw a yel-mɩŋa a, ɩ̃ na yel'a kɛ́ bo?

¹⁵ A Sob nɛ na maalɩ mɛ̃ ƴãw a ɩ̃ mã púorí a, ʋlɛ bɛ n'ʋ mɩ̀ maalɩ bɛ ɩ? Naaŋmɩn-been n'ʋ maalɩ tɩ a tɩ mã púorí!

*

¹⁶ Ɩ̃ mɩ́ tɩ zawr'ɩ a nɩ-kɔmɛ sõwfʋ bɩɩ? Ɩ̃ mɩ́ tɩ bɛr'ɩ a pɔw-kʋɔr ʋ jɩ́rɛ mɛ̃ ɛ́ bɛ wa páw bom za ɩ?

¹⁷ Ɩ̃ dɩ n a ɩ̃ bʋ̃-dɩra ɩ̃ yõ, ɛ́ bɛ kʋ̀ a bi-kpieb a ʋ dem ɛ?

¹⁸ Mãa zie ʋ na baa mɛ̃ sãà zie a ʋ bibile daarɩ́ za a? Mãa na kaa a pɔw-kʋɔr zie kʋralɛ a?

¹⁹ Ɩ̃ mɩ́ tɩ nyɛ̃ nɩ bãbàal na bɛ tɛr bʋ̃-suura a, nã́w sob na bɛ tɛr bom na pàw ʋ tʋɔra a,

²⁰ ɛ́ bɛ bɛ puori mɛ̃ barka ɩ̃ na mɩ́ ƴãw bɛ su a ɩ̃ píir kɔblʋ kparɩ a ƴã-gamɛ tʋl a ɩ?

²¹ Mãa wa vɛlɩ nũu cɔw bi-kpieb ɩ̃ na bãw kɛ́ bɛ na kpɛ m'ɩ a ƴɛ̀rʋ zie a,

²² a ɩ̃ bawŋman, ʋ ɓɛl yi, ɛ́ a ɩ̃ kpãkpãw, ʋ man a kpãkpãwnyũgbiel ƴãw ɛ́ vár ŋmãa!

²³ Bʋ̃ʋ n'ʋ vɛ̃ a Naaŋmɩn dɔwrʋ tɩ n'ɩ a bom na ɩrɛ mɛ̃ dɛ̃bɩ̃ɛ a, a bɛ tɩ tɛr mɛ̃ ɩb za a ʋ niŋé ɩ, ʋl na ɩ kpɛ̃ɛ bɛ pɩɛl a.

*

²⁴ Ɩ̃ tɩ ƴãw nɩ a ɩ̃ tɩɛrʋ a salm-zɩɛ ƴãw bɩɩ? Bɩɩ ɩ̃ yel ʋ na: «Fʋ̃ʋ n'ʋ so ɩ̃ bɛr tɩɛrʋ ʋ»?

²⁵ A ɩ̃ nʋ̃ɔ̀ bɛ tɩ yi a bʋ̃-tɛrɩ ɩ̃ na tɛr yaga yaga a zie ɩ, a na-bome, a ɩ̃ nuru na tõ páw a zie ɩ.

²⁶ Mãa wa nyɛ̃ a mʋ̃tɔ̃w na nyɩwrɛ ʋ za nɩ a cuw ʋ pure waar nɩ dɛpaalʋ,

²⁷ a ɩ̃ pʋɔ sɔwlɩ nɔ̃w a, ɩ̃ɩ de a bʋɔlɛ ŋmɩmɛ ɛ́ puor a nɩ ɩ̃ tʋɔra-siwru a,

²⁸ à á ŋá mɩ̀ nãá ɩ n yel-faa na bɛ tɛr yúor póru a ɩ̃ ƴɛ̀r-dɩrɛ nãá kʋ̃ʋ bɛr a, bʋ̃ʋ n'ʋ vɛ̃, a Naaŋmɩn na be a saa-zu a n'ʋ ɩ̃ nãá zawrɩ bɛr a lɛ.

*

²⁹ Nʋ̃ɔ̀ ɩ m'ɩ a ɩ̃ dɔ̃ sob yele na sãw a ƴãw bɩɩ? Ɩ̃ cɩlɩ nɩ a lɛn daar a kpɩɛrʋ na páw ʋ a bɩɩ?

³⁰ Mãa na bɛ mɩ́ tɩ sàw na maalɩ yel-bier, háa a nʋɔr ŋmɛ ƴãw ʋ k'ʋʋ kpi a.

³¹ A ɩ̃ sãanbɛ tɛɛ za mɩ́ tɩ yel'a: «Ãa n'ʋ ʋ bɛ ƴãw ʋ 'wɔb nɛn tɩ tɩw?»

³² Sãan bɛ tɩ ganɛ yẽw ɛ, ɩ̃ mɩ́ tɩ yuo nɩ a ɩ̃ pan a sɔr-tɔlɛ kpɛ.

*

³³ Ɩ̃ sɔwl'ɩ a ɩ̃ ɩ-faar mɛ̃ a nɩ-yaga a bɩɩ? Ɩ̃ sɔwl'ɩ a ɩ̃ sãwna tɛr a ɩ̃ púorí bɩɩ?

³⁴ A nãá ɩ n a nɩbɛ nɛ́ɛ ɩ̃ na zɔrɛ a ƴãw, ɛ́ ɩ a dɛ̃bɩ̃ɛ a nɩbɛ ɩ-lab nãá ƴãw mɛ̃ bɛ sàw ɩ̃ na háa nʋɔr ɛ́ mɩ̀ bɛ sàw ɩ̃ na yi yẽw a ƴãw.

*

³⁵ 'Woi! Ãa n'ʋ pãa na bɛr wõ m a? A ɩ̃ ƴɛ̀rʋ nʋɔr kʋb zie n'ɩ a ka. A Kpɛnʋ-za-sob'ʋ cɛ na sɔw mɛ̃! Ɛ́ a ɩ̃ sãwna sɛbɛ a ɩ̃ dɔ̃ sob na sɛb a,

³⁶ ɩ̃ na ƴãw ʋ nɩ a ɩ̃ bawŋman zu, ʋ na ɩ n a ɩ̃ dɛpaal-kpawʋɔ ɩ̃ vɔblɩ.

³⁷ Ɩ̃ na man nɩ a ɩ̃ gbɛ-ceni za kʋ̀ a Naaŋmɩn, ɩ̃ na àr'ɩ a ʋ niŋé mɛ̃ nãà bie a.

*

³⁸ Mãa wa zu a tẽsɔw ɩ̃ na kʋɔr a, mãa wa faa ʋ a tẽsɔw dem zie a,

³⁹ mãa wa dɩ a bʋ̃-dɩrɩ na bul a be, ɛ́ bɛr a bɛlɩ dem na kɔ a bɛ kpiir kɔ̃ a,

⁴⁰ a lɛn daar a, a tẽsɔw ŋa ʋ búle gʋʋr ɛ́ bɛr a ble, ʋ búle mɔ̃-nyuure ɛ́ bɛr a ɔɔzʋ! Ka n'a a Zɔb ƴɛ̀rʋ baarɩ.