A Zɔb sɛbɛ 24 - A SƐB-SÕW

A Naaŋmɩn mɩ́ bɛr'ɩ a nɩ-faar bɛ ɩrɛ bɛ ɩb

¹ Bʋ̃ʋ n'ʋ so a Kpɛnʋ-za-sob bɛ ƴãw bibie k'ʋʋ mɩ́ dɩ n a nɩbɛ a ƴɛ̀rʋ? A bɛl na tu ʋ a nãá mɩ́ nyɛ̃ ʋ na ʋ dɩrɛ a ƴɛ̀rʋ.

² Nɩbɛ lɩɛbɛ nɩ a bɛ póru tʋr-bɔwrɩ ƴãwnɛ zi-yoru, ɛ́ bɛ mɩnɛ àrɛ nɩ pí-zuri.

³ A bi-kpebe bõw n'ʋ bɛ tɛr cere nɩ, a pɔw-kʋɔr náab'ʋ bɛ nyɔw bin gùre nɩ k'ʋʋ wa ya a ʋ san.

⁴ Bɛ mɩ́ dáa nɩ a bãbàalbɛ bɛr a sɔ́r zu, sɔwlʋ tɛwr'a cɛ a tẽw nan dem za.

⁵ Mɛ̃ bòn-gaarɩ na be wɛja-kpalɛ pʋɔ a, zi-lige n'a a nan dem ìre cere a tome a bɛ dɩb bɔb ƴãw, dɩlãpʋɔ pʋɔ n'a a fɛr kɛ́ bɛ bɔ a bʋ̃-dɩrɩ a bɛ bibiir ƴãw.

*

⁶ Póru pʋɔ n'a bɛ ŋmarɛ a dʋn mʋ̃ɔ, ɛ́ pɔrɛ a ɩ-fa-maalɛ divɛ̃ tɩɩr wɔmɛ.

⁷ Ƴã-gã-zawla n'a bɛ mɩ́ gã a tɩ̃ɩsɔw, bɛ na bɛ tɛr bʋ̃-suuri a ƴãw, ɛ́ ƴawr wa ɩrɛ a, bɛ bɛ tɛr gãw na pili ɛ.

⁸ A saa pɔb bɛ nɩ a tan pʋɔ bɛ ɓãá mib. Bɛ na bɛ tɛr kpɛb zie a, bɛ taw na lanɩ pìir.

⁹ A nɩ-faar kpɩr'ɩ a bi-kpieb a ʋ mã bɩrɩ́. A nã́w sob bome n'a bɛ de bin ɛ́ gùre k'ʋʋ wa ya ɛ́ de.

¹⁰ Bɛ ƴãw na bɛ cere nɩ ƴã-gã-zawlɛ, bɛ bɛ tɛr bʋ̃-suuri ɛ, bɛ ƴãw na bɛ tuore kajine nɩ kɔ̃.

¹¹ Bɛ ƴɛ́rɛ nɩ olivʋ kãá, bɛ maalɛ nɩ a divɛ̃ ɛ́ kʋ̃ɔ nyuur kpɩɛr bɛ.

*

¹² A tẽw pʋɔ a, a nɩbɛ kone na, a bàalbɛ kone na bʋɔlɛ nɩ, ɛ́ a Naaŋmɩn ɩ wõw a yel-faar á ŋá ƴãw!

¹³ A nɩ-faar nɩ a cãà bɛ tuore ɩ, bɛ bɛ bãw a ʋ sɛ́ɛ ɩ, bɛ bɛ tuur a ɩ.

¹⁴ Zi-wɛl-paala n'a a nɩ-kʋrɛ ìre, ʋ mɩ́ kʋ n a nã́w sob nɩ a nɩbaal, ɛ́ a tɩ̃ɩsɔw ʋ zure.

¹⁵ A pɩ̃ɔ-yel-maalɛ mɩ́ úore nɩ a mʋ̃tɔ̃w kpɛb yere nɩ: «Nɩr za kʋ̃ nyɛ̃ m ɛ!» Ɛ́ de bom pàw a ʋ niwn.

¹⁶ Tɩ̃ɩsɔw n'a a nyãnyuwr cɩɛr a pamɛ 'lawrɛ. A mʋ̃tɔ̃w a, bɛ mɩ́ pàw nɩ bɛ tʋɔra a yir, kʋ̃ nyɛ̃ cãà ɩ.

¹⁷ A bɛl za zie a, a zie vɩɛfʋ ɩrɛ nɩ dɛ̃bɩ̃ɛ, ɛ́ bɛ nɩ̃ɛ mili nɩ a tɩ̃ɩsɔw ɩ-faar na bɛ maal'ɩ wob a.

*

¹⁸ Ɛcɛ nyɩɩm mɩ́ yel'a: «Kʋ̃ɔ mɩ́ ɓáw nɩ a nɩ-faa tɔl'ɩ fɔ̃w, a ʋ zi-sóra mɩ́ ɩ n zi-ŋmɛ-ƴãwna a tẽw dem zie, ɛ́ nɩr bɛ dier a ʋ divɛ̃ tɩɩr póru sɔ́r ɛ.

¹⁹ Mɛ̃ tẽsɔw-kõw nɩ zi-tʋlʋ na fuore sa-pupure kʋ̃ɔ a, lɛ n'a a kpɩmɛ tẽw mɩ́ vɔl a yel-bier-maalbɛ.

²⁰ A ʋ mã mɩ́ yiir'ɩ a ʋ yele, ɛ́ zãzule wone nɩ ʋ nʋ̃ɔ̀. Nɩr za mɩ́ yiir'ɩ a ʋ yele. A ɩ-faa n'ɩ ŋa bɛ kà bɛr mɛ̃ dàa a.»

²¹ A nɩr ŋa mɩ́ dɔwrɩ nɩ a pɔw-ãan na bɛ dɔwr a, bɩɩ kpɛ mimi-kõw a pɔw-kʋɔr zie.

²² A Naaŋmɩn na mɩ́ diw a po-to-dem nɩ fãw a, ìre na, lɛ n'a a nɩr ŋa kʋ̃ cãà tɩɛrɛ k'ʋʋ na vʋʋrɛ na ɩ.

²³ Ɛcɛ, a Naaŋmɩn mɩ́ bɛr ʋ na ʋ tɩɛrɛ k'ʋʋ kʋ̃ bãw damnʋ ɛ, ʋʋ piwre a ʋ cenu.

²⁴ A nɩ-faar mɩ́ zɛw na do blãlɛ tɛwr ƴãw, ɛ́ a pùorí bɛ tɔl. Bɛ mɩ́ lo na mɛ̃ tɩɛ bɛ na cɛ a, bɛ mɩ́ ko na mɛ̃ a ka-zuru bɛ na ŋma a.

²⁵ Alɛ bɛ wa ɩ à à ŋá a, ãa n'ʋ na wul k'ɩ̃ɩ ŋmãa nɩ ziri, ɛ́ wul k'aa ɩ̃ ƴɛ̀rʋ bɛ tɛr pɛr?