A Zɔb sɛbɛ 22 - A SƐB-SÕW

A gb'a ata sob a Elifaazɩ na ƴɛ̀r a Zɔb zie a

¹ Lɛ n'a a Elifaazɩ na yi Teman a, tɩ de a ƴɛ̀rʋ yel a Zɔb:

² Naaŋmɩn na tʋ̃ɔ́ na tɛr nɩsaal yel-ɩra bɩɩ? — Nɩsaal na ɩ yã-bãwnɛ a n'ʋ mɩ́ tɛr ʋ mɩŋa yel-ɩra.

³ A fʋ mɩnʋ ɩrɛ nɩ a Kpɛnʋ-za-sob ŋmɩn? Bʋ̃ʋ n'ʋ ʋ páwr a fʋ cenu na vɩɛl a pʋɔ?

⁴ Fʋ tɩɛr kɛ́ fʋ na ƴãwnɛ a Naaŋmɩn a n'a so ʋ kpãanɛ fʋ, ɛ́ dɩrɛ nɩ fʋ ƴɛ̀rʋ bɩɩ?

⁵ A fʋ sãwna na bɛ tɛr vuo, nɩ a fʋ ɩ-faar na bɛ tɛr tɛwfʋ zie a ƴãw nɩ̃ɛ n'a.

*

⁶ A bɛ mɩ́ tɩ sɛw ɛ, ɛ́ fʋ de a fʋ yɛbr bome bin ɛ́ gùre kɛ́ bɛ wa ya a bɛ san, fʋ mɩ́ tɩ faa nɩ a bɛ bʋ̃-suuri, ɛ́ bɛr bɛ ƴã-gan zawlɛ.

⁷ Fʋ bɛ mɩ́ tɩ kʋ̀ kʋ̃ɔ a kʋ̃ɔ-nyúur sob ɛ, ɛ́ mɩ́ tɩ sɩb a bʋ̃-dɩrɩ a kɔ̃ sob.

⁸ Fʋ mɩ́ tɩ sõw nɩ a kpãkpãw-kpɛ̃w sob ʋ faa a bãbàal tẽsɔw, ɛ́ fʋ ƴãw a fʋ nɩ-nɔna ʋ kpɩɛr a be.

⁹ Fʋ mɩ́ tɩ bɛr'ɩ a pɔw-kɔbɛ bɛ lɛb kul nũ-zawlɛ ɛ́ fʋ dɔwrɩ a bi-kpebe,

¹⁰ Alɛ n'a so bɛrɩ ŋmãa jil fʋ, ɛ́ dɛ̃bɩ̃-kpɛ̃ɛ ùr nyɔw fʋ.

¹¹ Lige n'a, fʋ bɛ cãà nyɛrɛ ɩ, ɛ́ kpɩɛrʋ pili pàw fʋ.

*

¹² A Naaŋmɩn bɛ be a salom saa-zu za ɩ? Nyɛ̃ lɛ a ŋmar-bie na do saa sɛw a!

¹³ Alɛ n'a so fʋ yel kɛ́: «Bʋ̃ʋ n'ʋ a Naaŋmɩn na tʋ̃ɔ́ bãw? Ʋ na tʋ̃ɔ́ na jɩ́r a zũzuw-sɛbla pʋɔ bãw a tɩ yele bɩɩ?

¹⁴ A zũzuwe pàw ʋ nɩ a niwn, ʋ bɛ nyɛrɛ bom ɛ, a salom vilovilo tɛwr'ʋ ʋ mɩ́ cere viire!»

¹⁵ Fʋ nɔ̃w bɔbr'a kɛ́ fʋ tuur a dãwdãw sɛ́ɛ, a al a nɩ-faar na tɩ tu a bɩɩ?

¹⁶ Bɛ tɔl'a ɛ́ a bɛ daar bɛ ta ɩ, mɛ̃ dacin kʋ̃ɔ na tuo a.

*

¹⁷ Bɛ mɩ́ tɩ yere na càarɛ nɩ a Naaŋmɩn: «Ʋ bɛr tɩ zoom!» Ʋlɛ n'ɩ a Kpɛnʋ-za-sob, ɛcɛ bʋ̃ʋ n'ʋ ʋ na tʋ̃ɔ́ ɩ tɩ?

¹⁸ Ɛcɛ, ʋlɛ n'ʋ tɩ ɩ a bɛ yie tɛr a! A ɩ-fa-maalbɛ ɩ-ɩrɩ, a zãá nɩ mɛ̃.

¹⁹ A nɩ-mɩn na nyɛ̃ na ɛ́ cɩlɛ, a nɩbɛ na bɛ tɛr sãwna a na ɩrɛ bɛ na laar yere nɩ:

²⁰ «Ãw! A tɩ dɔ̃ dem'ɩ bɛ ŋa kpi pàw pɛr! Vũu dɩ n a bɛ tɛra za!»

*

²¹ A na ɩ lɛ a, ɩ fʋ̃ʋ nɩ a Naaŋmɩn lɛb kpɛ taa, ɛ́ a yele za na ɩ n vla, lɛ n'a fʋ na lɛb bãw a nʋ̃ɔ̀.

²² Sàw de a wulu na yire a ʋ nʋɔrɩ́ a, ƴãw a ʋ ƴɛ̀rʋ za a fʋ socir pʋɔ.

²³ Fʋ̃ʋ wa lɛb wa a Kpɛnʋ-za-sob zie a, ʋ na lɛb'a maalɩ fʋ ƴãw. Taa pɩɛlɛ faalʋ kãw za ɩ.

²⁴ Al pùorí, lɔb a fʋ salm-zɩɛ bɛr a tẽw, lɔb a fʋ salm-zɩɛ mɩŋa mɩŋa ƴãw bà-fʋɔla kʋsɛbɛ pʋɔ.

²⁵ Lɛ n'a a Kpɛnʋ-za-sob na ɩ a fʋ salm-zɩɛ, ʋlɛ n'ʋ na ɩ a fʋ salm-pla na gbõ gã a.

*

²⁶ Lɛ n'a ʋ na ɩ a fʋ nʋ̃ɔ̀, ʋlɛ n'ʋ fʋ na lɩɛbɩ a fʋ niwn cɔw.

²⁷ Fʋ̃ʋ wa puore ʋ a, ʋ na bɛr'a wo b, ɛ́ fʋ na ír'ɩ a nɛ́ɛ fʋ na kõ kʋ̀ ʋ a.

²⁸ Fʋ̃ʋ wa yel kɛ́ fʋ na ɩ n bom a, a na tu n vla, ɛ́ cãà na caalɛ nɩ a fʋ sɔ́r.

²⁹ Sɩza, a Naaŋmɩn mɩ́ ɩ n a pɔ̀lʋ dem tɩɛrʋ a sãw, ɛcɛ, ʋ mɩ́ ɩ n a bɛlɩ dem na siwre bɛ tʋɔra a yele maalɩ.

³⁰ Ʋ mɩ́ faa nɩ a bɛlɩ dem na bɛ tɛr sãwna a. A na ɩ lɛ a, ɩrɛ vla, ɛ́ fʋ na so nɩ fʋ tʋɔra.