A Zɔb sɛbɛ 20 - A SƐB-SÕW

A Sofaar na ƴɛ̀r a Zɔb zie a gb'a ayi sob a

¹ Lɛ n'a a Sofaar na yi Naama a, tɩ de a ƴɛ̀rʋ yel a Zɔb:

² Ɩ̃ tɩɛr tɩɛr'a, a tɩ ƴãw mɛ̃ k'ɩ̃ɩ sɔw, ɩ̃ mɩ̀ na nyɔw ɩ̃ tʋɔra gù a ƴãw.

³ Ɩ̃ wone nɩ wulu na ɩ zʋmɛ a ɩ̃ zie a, ɛcɛ a ɩ̃ yã wule mɛ̃ nɩ a lɛ ɩ̃ na na sɔw a.

⁴ Fʋ bɛ bãw k'aa dɩta-pɛ-yome za, a lɛn daar a nɩsaal na cɔ̃ kɛ́ be a tẽw zu a,

⁵ a ɩ-fa-maalɛ na mɩ́ zɛb tʋ̃ɔ́ a, a mɩ́ ɩ n ŋmãalɛ ɩ? Fʋ bɛ bãw k'aa ɩ-fa-maalɛ nʋ̃ɔ̀ bɛ kɔwrɛ ɩ?

*

⁶ Ʋlɛ saa kɛrɩ tɩ tɔ a salom, ɛ́ a ʋ zu tɔ zũzuwe a,

⁷ ʋ na bɔr'a kʋ̃ lɛb wa ɩ, mɛ̃ uuru a. A bɛlɩ dem na tɩ nyɛrɛ ʋ a na yere na: «Nyɩnɛ n'a ʋ be?»

⁸ Ʋ na tɔl'a mɛ̃ zánʋ a, nɩr kʋ̃ lɛb nyɛ̃ ʋ ɛ, ʋ na bɔr'a mɛ̃ tɩ̃ɩsɔw yel-nyɛra a.

⁹ A mimir na tɩ nyɛrɛ ʋ a, kʋ̃ lɛb nyɛ̃ ʋ ɛ, a ʋ kpɛb zie tɛɛ za kʋ̃ lɛb nyɛ̃ ʋ ɛ.

¹⁰ A na fɛr'ɩ a ʋ bibiir kɛ́ bɛ ya a ʋ samɛ, ʋl mɩŋa nuru n'a na de a ʋ na-bome tɩr.

¹¹ Ʋ tɩ nyɛ̃ na ʋ kpɛmɛ ɛ́ pɔl, ɛcɛ à á ŋá za na lãw nɩ ʋ na gã a bɔw pʋɔ.

*

¹² A yel-faa nʋmɛ nɩ a ʋ nʋɔrɩ́ mɛ̃ sɩwr a, ʋʋ de a ʋ zɛl pàw nɩ ʋ a.

¹³ Ʋ mɔwrɛ ʋ na kʋ̃ bɛr ɛ, ɛ́ tɛr ʋ a ʋ nʋɔrɩ́.

¹⁴ Ɛcɛ a bʋ̃-dɩra ŋa pʋ̃ɔ nɩ a ʋ nyagɛ pʋɔ, ɛ́ lɩɛbɩ dɔpan lɔw.

¹⁵ Ʋ na ow nɩ a na-bome al za ʋ na vɔl a bɛr, Naaŋmɩn na ɩ na ʋ ti a za.

¹⁶ Waab lɔw n'a ʋ tɩ mɔwrɛ vɔlɛ, a dɔpan na dʋ̃ ʋ na kʋ.

*

¹⁷ Ʋ kʋ̃ lɛb nyɛ̃ a sɩwr nɩ a bʋ̀r-kãá na gbɔlɛ mɛ̃ bà-fʋɔlɩ nɩ mamɛ kʋ̃ɔ a ɩ.

¹⁸ A bome al za ʋ na páw a, ʋ na de a na tɩr ɛ́ bɛ ɩ n a bom ɛ, ɛ́ bɛ wõ nʋ̃ɔ̀ nɩ a ʋ yɛ̀rʋ́ tɔn-yaga ɩ.

¹⁹ Bʋ̃ʋ n'ʋ vɛ̃, ʋ dɔwr'ɩ a nan dem, ʋ bɛ kaa bɛ zie ɩ, ʋ nãá ŋmãa yir, ʋ̃ʋ bɛr ɛ́ de a bɛ dem.

²⁰ Ʋ na tɩ dɩrɛ ɛ́ bɛ tɛr tɩwfʋ daar a, a ʋ na-bom kãw za kʋ̃ cɛ ɩ.

²¹ A ʋ bʋ̃-dɩ-nɔ̃w bɛ cɩɛr bom za bɛrɛ ɩ, lɛ so a ʋ nʋ̃ɔ̀ kʋ̃ kɔwrɩ ɛ.

*

²² A ʋ tɛra na ʋr a daar'a pʋl-vʋ̃ɔ na tɛr ʋ, nãw-woro bʋʋrɛ dem za na lo n a ʋ zu.

²³ A lɛn daar ʋ na su zu dɩrɛ k'ʋʋ paalɩ a púor a, lɛn daar'a a Naaŋmɩn suur na ìr a ʋ ƴãw, lɩɛbɩ a ʋ dɩb.

²⁴ Ʋlɛ wa zɔrɛ nɩɩrɛ a kure zɛbr bome a, kur-zɩɛ pĩi n'ʋ na cɔ̀r ʋ col.

²⁵ Ʋ vʋ̃ɔnɛ nɩ a pĩi ʋ yire a ʋ ƴã-ganɩ́, ɛ́ a pĩi-nyɔ-ɓɩlɓɩl na dɛ wa yire a ʋ sabr pʋɔ wa báarɛ a, a kũu dɛ̃bɩ̃ɛ pili na pàw ʋ.

*

²⁶ Lige n'a gùre ʋ. Vũu nɩr nũu na bɛ gbɔw a dɩrɛ ʋ na, ɛ́ dɩrɛ bom nɛ za na cɛ a ʋ pɛn-sɛw pʋɔ a.

²⁷ A salom wule nɩ a ʋ ɩ-faa ɛ́ a tẽsɔw ìr lo a ʋ zu.

²⁸ A Naaŋmɩn suur bibir a, a ʋ na-bome na tɔl a cen mɛ̃ kʋ̃ɔ na zɔrɛ a.

²⁹ Á ŋá n'a a Naaŋmɩn cɔbrɩ gùre nɩ a ɩ-fa-maalɛ, a ʋ dem n'ɩ à á ŋá a Naaŋmɩn na cɛlɛ nɩ ʋ a.