A Zɔb sɛbɛ 18 - A SƐB-SÕW

A Bɩldaadɩ na ƴɛ̀r a gb'a ayi sob a

¹ Lɛ n'a a Bɩldaadɩ na yi Suwa a, tɩ de a ƴɛ̀rʋ yel:

² Debor daar'a nyɩ na bɛr a ƴɛ̀rʋ lɛ? Nyɩ tɩɛrɩ baarɩ, ɛ́ tɩ na ƴɛ̀r'ɩ a pùorí.

³ Bʋ̃ʋ n'ʋ so tɩ bɛr ʋ bʋɔlɛ tɩ dãbole? Bʋ̃ʋ n'ʋ so ʋ nyɛ̃ tɩ, tɩ ɩ gẽgemi dem?

⁴ Ɛ́ a fʋ̃ʋ Zɔb, a suur na ƴãw fʋ dʋnɛ fʋ tʋɔra cɩɛrɛ a, fʋ̃ʋ ƴãw n'a a na fɛr k'aa tẽw gã zawla, ɛ́ a pìir ìr a ʋ beba zie cen zi-yũo bɩɩ?

*

⁵ Sɩza, a nɩ-faa cãà na kpiir'a! A ʋ dam pʋɔ vũu-zɛlɛ kʋ̃ cãà 'lere ɩ.

⁶ A cãà na lɩɛb'ɩ lige a ʋ kpɛb zie ɛ́ a ʋ zu-sɔw fɩ̃tɩlɩ kpiiri.

⁷ Ʋ na mɩ́ tɩ dãw cere kpɛ̃w kpɛ̃w za a, ƴɛrɛŋa ʋ cere nɩ bɛ̀lbɛ̀l, ɛ́ a yã ʋ na mɩ́ maal'a na ɩ na ʋ ŋmɛ gbɛ́r lo.

⁸ Bʋ̃ʋ n'ʋ vɛ̃, ʋ kpɛ n mɩ̃ɛ pʋɔ, ɛ́ a ʋ gbɛ́ɛ lɩr a mɩ̃ɛ.

⁹ Bɛra na nyɔw ʋ nɩ a gbɛnacʋ̃ʋn ƴãw, miwr yʋra na taw na fɩɩrɩ ʋ.

¹⁰ Miwr sɔwl'a gã a tẽw a ʋ ƴãw, bɛra gùre ʋ nɩ a ʋ sɔ́r zu.

¹¹ Dɛ̃bɩ̃ɛ yi n ziir za waar a ʋ ƴãw, a sɛ̀br'a tuur ʋ.

*

¹² Ʋl na tɩ kpɛmɛ kpɛmɛ a, ʋlɛ n'ɩ ŋa kɔ̃ nyɔw ɛ́ nãw-woro àr a ʋ lõbowrí.

¹³ Bàalʋ sãwnɛ nɩ a ʋ ƴã-gan, kũu kʋ̃ yaa kɛ́ kʋ ʋ ɛ.

¹⁴ Bɛ na ír ʋ nɩ a be ʋ na tɩ bɛr tɩɛrʋ ɛ́ kpɩɛr a, ɛ́ tɛr ʋ cen nɩ a kpɩmɛ tẽw nãà zie.

¹⁵ Bɛ na tʋ̃ɔ́ na kpɩɛr a yir ʋ na bɛ cãà so a, ɛ́ cir cirbi ƴãw a ʋ zi-sóra pʋɔ.

¹⁶ Ʋ na ɩ na mɛ̃ tɩɛ na kpiir a, a ʋ nyɩgɛ kore nɩ a pile, ɛ́ a wuli vàrɛ a saa-zu.

*

¹⁷ Bɛ na yiir'ɩ ʋ yele a tẽw pʋɔ, nɩr kʋ̃ lɛb por a ʋ yúor zie za ɩ.

¹⁸ Bɛ na diw ʋ nɩ a cãà pʋɔ ƴãw lige pʋɔ, bɛ na ow ʋ na bɛr a tẽ-daa nɩbɛ pʋɔ.

¹⁹ Ʋ kʋ̃ tɛr bie a ʋ bʋʋrɛ pʋɔ ʋ lɩɛrɩ ʋ ɛ, nɩr kʋ̃ cɛ vʋʋrɛ a ʋ yir za pʋɔ ɩ.

²⁰ A saa-pɛrɩ́ nɩ a mʋ̃tɔ̃w-kpɛb-lowr zie za a, bɛ na wõ n a ʋ yele, dɛ̃bɩ̃ɛ na nyɔw nɩ a nɩbɛ a ʋ ƴãw bɛ màwr.

²¹ Lɛ n'a a nɩbɛ na yere: «A ʋlɩ bom nɛ na cɛ a nɩ-faa ŋa nɩ a ʋ yir ƴãw a n'ɩ à á ŋá. Zie bɛ na bɛ tɩ bãw Naaŋmɩn a n'ɩ a ka.»