A Zɔb sɛbɛ 17 - A SƐB-SÕW

A Zɔb yel'a k'aa ʋ tɩɛrʋ za wɛ na

¹ Vʋʋrʋ ŋmaar mɛ̃ na, a ɩ̃ nyɔ-vʋʋrʋ bibie báarɛ na, yàa-bɔw yuo na gã a ɩ̃ ƴãw.

² Nɩbɛ na ɩrɛ bɛ taabɛ laar a bɛ nɛbɛ viiri koli mɛ̃ ɩ? A bɛ zʋmɛ kʋ̃ sàw ɩ̃ ũù mimir ɛ.

³ 'Woi Naaŋmɩn i, sàw ɩ a ɩ̃ faafʋ san bom a fʋ̃ʋ mɩŋa, fʋ̃ʋ bɛ wa n'ʋ a, ãa n'ʋ na sàw ɩ a ɩ̃ san-yarɛ?

⁴ Fʋ ɩ na a ɩ̃ bárɩ bɛ bãw yã towtow ɛ, a na ɩ lɛ a, fʋ kʋ̃ sàw bɛ tɛr yel-mɩŋa ɩ.

⁵ Bɛ ɩ na mɛ̃ a nɩr ʋl a zʋkpar na yere kɛ́: ʋ bʋɔlɛ nɩ a ʋ bárɩ dɩb ƴãw, ɛ́ a ʋ bibiir mɩ́ gù a bɛ dem tɩ gú.

*

⁶ A nɩbɛ ƴãw nɩ mɛ̃ nɩ nuru. Ɩ̃ ɩ n sob nɛ bɛ na cɩrɛ mʋtaar waarɛ a niwn a.

⁷ A kpɩɛrʋ ɩ na ɩ̃ cɛ blã na zɔ̃w, ɛ́ a ɩ̃ ƴã-gan bɛ cãà n'ʋ ɛ.

⁸ A ɓãá nɩ a nɩ-mɩn nʋɔr, ɛ́ a bɛlɩ dem na bɛ tɛr sãwna a suur sãw a nɩ-faa ƴãw.

⁹ Bɛ yere na: «A nɩ-mɩŋa, ʋ cãà cere vla a ʋ cenu pʋɔ, ɛ́ a nɩr a nuru na bɛ mar dɛwr a lɛb bãw ƴãw fãw!»

¹⁰ Ɛ́ a nyɩɩm a, nyɩ lɛb wa nyɩ za, nyɩ lɛb wa wɛ! A nyɩ za pʋɔ a, ɩ̃ kʋ̃ nyɛ̃ yã-bãwnɛ been ɛ!

*

¹¹ A ɩ̃ nyɔ-vʋʋrʋ baar'a, a lɛ za ɩ̃ na tɩ bɔbr k'ɩ̃ɩ ɩ a sãw na, a ɩ̃ tɩɛrʋ wɛ na!

¹² A ɩ̃ bárɩ yere na k'aa tɩ̃ɩsɔw ɩ n mʋ̃tɔ̃-tuo, k'aa cãà pɩɛl'a, ɛ́ a lige nɩ̃ɛ yɛ́rɛ pàwr a zie za.

¹³ Bʋ̃ʋ n'ʋ ɩ̃ pãa na cãà gùre a? — Kpɩmɛ tẽw n'ɩ a ɩ̃ kpɛb zie, a ʋ lige pʋɔ n'a ɩ̃ na yɛ́r a ɩ̃ bʋ̃-gana.

¹⁴ Ɩ̃ yel'ɩ a bɔw: «Fʋ ɩ n ɩ̃ sãà», ɛ́ yel a zãzule: «Ɩ̃ mã, ɩ̃ yeepuule!»

¹⁵ Nyɩnɛ n'a a tɩɛrʋ ɩ̃ na tɩɛrɛ a cen? Ãa n'ʋ nyɛ̃ ʋ?

¹⁶ A kpɩmɛ tẽw pile za n'a mãa nɩ a ʋl na siw, a lɛn daar tɩ za ayi na na ɓiile a uuru pʋɔ a.