A Zɔb sɛbɛ 16 - A SƐB-SÕW

A Zɔb sɔw nɩ a Elifaazɩ ƴɛ̀rʋ

¹ Lɛ n'a a Zɔb tɩ de a ƴɛ̀rʋ yel:

² Ɩ̃ wõ n a ƴɛ̀rʋ á ŋá taabɛ bɛ dɩ vuo ɩ. Nyɛ̃ mɔwl-mɔwlbɛ kãw a!

³ Nyɩ sowre mɛ̃ n'a: «A ƴɛ̀r-fowle á ŋá baarʋ daar'ɩ debor?» nɩ kɛ́: «Bʋ̃ʋ n'ʋ fɛrɛ fʋ fʋ cãà sɔwr a ƴɛ̀rʋ?»

⁴ Nyɩmɛ tɩ n'ɩ a mãa a, ɩ̃ mɩ̀ nãá ƴɛ̀rɛ na mɛ̃ a nyɩɩm a, ɩ̃ mɩ̀ nãá bãw nɩ a ƴɛ̀rʋ ƴɛ̀r kʋ̀ nyɩ, ɛ́ viire nɩbaal zu a nyɩ ƴãw.

⁵ A ɩ̃ nʋɔr ƴɛ̀rʋ nãá lɛb'a kʋ̀ nyɩ fãw, ɛ́ a ƴɛ̀rʋ ɩ̃ na tʋ́ɔr ƴɛ̀rɛ a siwri a nyɩ kpɩɛrʋ.

*

⁶ Ɛcɛ mãa a, mãa wa ƴɛ̀rɛ a, a ɩ̃ 'wɔbrʋ bɛ mɩ́ siwri ɛ, mãa saa wa ɩ gbili a, a 'wɔbrʋ bɛ mɩ́ bɛr mɛ̃ ɩ.

⁷ Ɛcɛ ƴɛrɛŋa a, Naaŋmɩn ɩ na a ɩ̃ fãw za baarɩ, ʋ kʋ n a ɩ̃ nɩbɛ za pàw pɛr.

⁸ A varʋ ʋ na ɩ a ɩ̃ ƴã-gan vàr a, alɛ n'a dɩrɛ a dãsɩɛ, a ɩ̃ kõwfʋ yere na k'ɩ̃ɩ sãw na, ɛ́ bʋɔlɛ mɛ̃ sãwna sob.

⁹ A Naaŋmɩn suur ìr'a, ʋ tawr mɛ̃ ɓɛlɛ, ʋ nyɩr'ɩ nyɩmɛ diwr'ɩ mɛ̃, ʋl na ɩ a ɩ̃ dɔ̃ sob a, ʋ ɓar'ɩ mimir ƴãw mɛ̃.

¹⁰ Bɛ háa nɩ a nɛ́ɛ mɛ̃ wɛ-dʋn a, kɛ́ bɛ ƴãw mɛ̃ dɛ̃bɩ̃ɛ, bɛ ɓarɛ mɛ̃ na, kɛ́ bɛ ɩ m la, bɛ gbone nɩ taa a ɩ̃ ƴãw.

¹¹ Naaŋmɩn de m'a ƴãw bibi-pʋrmɛ nuru pʋɔ bɛ dɩ̃ɛnɛ nɩ mɛ̃, ʋ de m'a kʋ̀ yel-fa-maalbɛ.

*

¹² Ɩ̃ bɛ tɩ bãw damnʋ ɛ, ʋʋ wa dam mɛ̃, ʋ nyɔw mɛ̃ nɩ kpalimí zɛw lɔb'ɩ tẽw, ʋ jɩɛrɛ mɛ̃ na,

¹³ a ʋ pime jil'a pàw mɛ̃ a ziir za. Ʋ cɔ̀rɛ nɩ a ɩ̃ sabr cɩɛrɛ ɛ́ bɛ zɔrɛ nɩbaalʋ ɛ, a ɩ̃ kalɩ̃kaar ŋmɛr a cire tẽw.

¹⁴ Ʋ lo n a ɩ̃ zu mɛ̃ zɛbr sob na lo a ʋ dɔ̃ sob zu a, ʋ ŋmɩɛr mɛ̃ na ƴãwnɛ bàalʋ dɔwlɛ taa.

¹⁵ A wahala kparʋ bɛ yire a ɩ̃ ƴã-ganɩ́ ɛ, ɩ̃ɩ de a ɩ̃ gbẽ nɛr uuru pʋɔ.

¹⁶ Ɩ̃ kõ na tɩ mʋ̃ɔ mimie, ɛ́ a ɩ̃ mimi-kowtɩɛ sɔb a za.

¹⁷ Ɛcɛ a ɩ̃ nuru bɛ tɩ tõ po-to-fãw tome ɩ ɛ́ a ɩ̃ puoru tɩ vɩɛl ʋ za.

*

¹⁸ Tẽsɔw i, taa sɔwlɛ a ɩ̃ zɩ̃ɩ ɛ, ɛ́ a ɩ̃ kon a, a taa nyɛrɛ tɛwfʋ zie ɩ.

¹⁹ Ɩ̃ tɛr'ɩ dãsɩɛ sob baarɩ ʋ be a salom zu, sɩza, ɩ̃ tɛr'ɩ nɩr a saa-zu ʋ dɩrɛ a ɩ̃ dãsɩɛ.

²⁰ A ɩ̃ bárɩ ɩrɛ mɛ̃ na laar, ɛcɛ Naaŋmɩn n'ʋ ɩ̃ kone cɔwr.

²¹ A ɩ̃ dãsɩɛ sob, ʋ ƴɛ̀r faa mɛ̃ a Naaŋmɩn zie, mɛ̃ a lɛ nɩsaal na mɩ́ ƴɛ̀r faa ʋ nɩsaal-tɔ a.

²² Ɛcɛ a ɩ̃ yome nʋɔr sɔ́r'a, ɩ̃ lore nɩ a sɔ́r ʋl bɛ na mɩ́ lo cen bɛ lɛb wa a.