A Zɔb sɛbɛ 15 - A SƐB-SÕW

A Elifaazɩ na ƴɛ̀r a Zɔb zie a gb'a ayi sob a

¹ Lɛ n'a a Elifaazɩ na yi Teman a, tɩ de a ƴɛ̀rʋ yel a Zɔb:

² Bãwfʋ na bɛ tɛr pɛr a n'a a yã-bãwnɛ mɩ́ sɔw nɩ a ƴɛ̀rʋ bɩɩ? Sɛsɛb'ʋ ʋ mɩ́ nyũ paalɩ a pée bɩɩ?

³ Ƴɛ̀r-bi-fowle n'a ʋ mɩ́ manɛ nɩ a ʋ yel-mɩŋa bɩɩ? Ƴɛ̀rʋ na bɛ tɛr pɛr a n'a bɩɩ?

⁴ Fʋ tɛr'ɩ lɛɛɛ bɛ tɩ cãà zɔrɛ a Naaŋmɩn ɛ, ɛ́ sãwnɛ a puoru bɛrɛ!

⁵ A fʋ sãwna n'a ƴãw fʋ ƴɛ̀rɛ, fʋ ƴɛ̀rɛ mɛ̃ a nɩsaal-libelibe a.

⁶ Fʋ̃ʋ n'ʋ ƴɛ̀rɛ nyɔwr fʋ tʋɔra, mãa bɛ n'ʋ ɛ, a fʋ mɩŋa ƴɛ̀r-bie n'a dɩrɛ a fʋ sãwna dãsɩɛ.

*

⁷ Fʋ̃ʋ nɔ̃w n'ɩ a Adama na de niwn dɔw a nɩsaalbɛ za ƴãw bɩɩ? Fʋ̃ʋ n'ʋ de niwn nyɛ̃ cãà a tãli ƴãw ɩ?

⁸ Fʋ bãw nɩ a Naaŋmɩn yel-sɔwlɩ bɩɩ? Fʋ yõ n'ʋ tɛr a yã-bãwfʋ bɩɩ?

⁹ Bʋ̃ʋ n'ʋ fʋ bãw ɛ́ tɩɩm bɛ bãw? Bʋ̃ʋ pɛr ʋ fʋ bãw ʋʋ ɩ bʋ̃-sãan a tɩ zie?

¹⁰ Bɛl nyɛ̃, a tɩ pʋɔ a, dɛb-nyamɛ na bãw bom a be n be, a bɛ yome zuo nɩ a fʋ sãà yome bɛ gbʋ́r ɛ.

¹¹ Fʋ tɩɛr kɛ́ a mɔwlʋ a Naaŋmɩn na kʋ̀rɛ fʋ nɩ a tɩ ƴɛ̀r-bàalʋ bàalʋ ɩ n pʋrɩ zuo?

*

¹² Bʋ̃ʋ so a suur ƴãw fʋ ɩrɛ à ŋá? Ɛ́ bʋ̃ʋ so fʋ mʋ̃ɔ a mimie?

¹³ Bʋ̃ʋ so fʋ tɛr su-sãwna a Naaŋmɩn ƴãw? Bʋ̃ʋ so fʋ ƴɛ̀rɛ a ƴɛ̀rʋ á ŋá taabɛ?

¹⁴ Ãa n'ɩ a nɩsaal na tɩɛrɛ k'ʋʋ bɛ tɛr dɛwr? Ãa n'ɩ a pɔw bʋ̃-dɔwra na yel k'ʋʋ ɩ n nɩ-mɩŋa?

¹⁵ A Naaŋmɩn bɛ mɩ́ wa ƴãw a ʋ tɩɛrʋ a ʋ malkɩ mɩnɛ tɛɛ za ƴãw a, ɛ́ a ʋl zie a salom bɛ mɩ́ wa vɩɛl parpar a,

¹⁶ ŋmɩŋmɩn n'a a na ŋmɛ̃ a nɩsaal na ɩ bʋ̃-jewra a ƴãw, a nɩ-faa ŋa na mɩ́ maalɩ a yel-faa mɔlɛ lɛ mɛ̃ ŋmale nʋɔr kʋ̃ɔ ʋ na nyũ a?

*

¹⁷ Bɛr wõ, ɩ̃ wul fʋ yã. A ʋlɩ bom nɛ ɩ̃ na nyɛ̃ a, ɩ̃ na man ʋ na kʋ̀ b,

¹⁸ a yã-bãwnbɛ wulu za, a yele a bɛ sãàkʋm-kore na lʋɔrɩ kʋ̀ bɛ a.

¹⁹ Bɛl tɛwr nɛbɛ a Naaŋmɩn tɩ kʋ̀ a tẽw, ɛ́ nɩ-sãan kãw za bɛ tɩ jɛr a bɛ pʋɔ sɛr ɛ:

²⁰ «A nɩ-faa nyɔ-vʋʋrʋ mɩ́ ɩ n kpɩɛrʋ bibie za, ɛ́ a po-tuo sob yome nʋɔr sɔ́r bin.

²¹ Kɔkɛɛ na ɩrɛ dɛ̃bɩ̃ɛ a gɔmɛ mɩ́ paal'ɩ a ʋ tobe. Nyãnyuwr mɩ́ lo n a ʋ zu a ƴã-ɓaarʋ daar.

²² Ʋ bɛ tɩɛrɛ k'ʋʋ na tʋ̃ɔ́ na yi zaa a kũu pʋɔ ɩ, ʋl a zɛbr-sɔ-kpɛ̃ɛ na jɩɛrɛ a,

²³ a ʋ ƴã-gan na ɩ n sidume dɩb, ʋ bãwnɩ a na ʋ na kʋ̃ yaa kɛ́ kpi a.

²⁴ A kpɩɛrʋ nɩ a pʋl-vʋ̃ɔ ƴãwnɛ ʋ nɩ dɛ̃bɩ̃ɛ, a waar'ɩ a ʋ zu mɛ̃ nãà na cɔbrɩ gù zɛbr a.»

²⁵ Bʋ̃ʋ n'ʋ vɛ̃, ʋ gùr'ɩ nũu cɔw Naaŋmɩn ɛ́ garɛ baw a Kpɛnʋ-za-sob zu.

*

²⁶ Ʋ su n zu ɛ́ wɩɛr a Naaŋmɩn ƴãw, a ʋ zɛbr-kur-pãgala tɩbrʋ na pàw ʋ tɛr a ƴãw.

²⁷ Ʋ ɩ n kɔrɛ lɔmãlɔmã ɛ́ yi pée kɔkɔɩ.

²⁸ Ʋ tɩ kpɩɛr'ɩ ten zɛbr na sãw bɛr a, yie bɛ na bɛ tɩ cãà kpɩɛr a na tɩ bɔbr loba a ƴãw.

²⁹ Ɛcɛ ʋ kʋ̃ kpɛ naalʋ ɛ, a ʋ naalʋ kʋ̃ àr ɛ. Ʋ kʋ̃ ɩ nɩ-tɩbrʋ a tẽw pʋɔ ɩ.

³⁰ Ʋ kʋ̃ nɩɩrɩ a kũu lige bɛr ɛ. Ʋ na lɩɛb'ɩ tɩɛ vũu na dɩ a wuli a! A Naaŋmɩn pɩɛlʋ na ɓáw ʋ na cen nɩ zi-zãána.

*

³¹ Ʋ ta ɩrɛ ƴãwn ʋ na ɩ yúor sob a ƴãw ɛ, bʋ̃ʋ n'ʋ vɛ̃, ʋ na tuli nɩ ʋ tʋɔra.

³² À á ŋá za na tu na, ʋʋ bãw kpi, ɛ́ a ʋ wuli kʋ̃ lɛb tɔm ɛ.

³³ Ʋ na bɛr'ɩ a ʋ wɔ̃-kɛrɛ a pɔr lo mɛ̃ divɛ̃ tɩɛ a, ɛ́ a ʋ puuru suori mɛ̃ olivʋ tɩ-puuru a.

³⁴ Sɩza, a nɩ-faar bɛ ŋa kʋ̃ tɛr bʋʋrɛ ɩ. Vũu dɩrɛ nɩ a nɩr bɛ na mɩ́ ŋmɛ a nʋɔr a yir.

³⁵ Sob nɛ na tɛr kpɩɛrʋ pʋɔ a na dɔw nɩ yel-faa, ɛ́ a tɩɛrʋ na bɩ a ʋ puori a, ʋlɛ n'ʋ na bɛlɩ ʋ.