A Zɔb sɛbɛ 14 - A SƐB-SÕW

A Zɔb sɔwfʋ pɛ-baara: a nɩsaal nyɔ-vʋʋrʋ ɩ n ŋmãalɛ

¹ A nɩsaal, a pɔw bʋ̃-dɔwra, a ʋ nyɔ-vʋʋrʋ ɩ n ŋmãalɛ, ɛ́ ɩ niw-sʋba tɛwr.

² Ʋ mɩ́ ìr'a mɛ̃ mɔ̃-puuru na pu a, ɛ́ a pùorí ʋ vàr. Mɛ̃ ɓaarʋ na lɩɛbɛ a, ʋ bɛ mɩ́ yaa kɛ́ tɔl ɛ.

³ Ɩ̃ Naaŋmɩn i, à á ŋá n'a fʋ piwre, ɛ́ mãa n'ʋ fʋ bʋɔlɛ ƴɛ̀rʋ-dɩb zie e?

⁴ Ãa n'ʋ na ɩ bʋ̃-vla yi bʋ̃-dɛwr pʋɔ? Nɩr bɛ ka be ɩ.

⁵ Bʋ̃ʋ n'ʋ vɛ̃, a nɩsaal nyɔ-vʋʋrʋ tɛr'ɩ baarʋ daar, fʋ sɔr'ɩ a ʋ cuwr nʋɔr bin, fʋ ƴãw nɩ tʋr-bɔw ʋ na kʋ̃ tʋ̃ɔ́ gãw a.

⁶ Lɩɛbɩ a fʋ niwn bɛr zi-yũo a nɩsaal ŋmɛ pɩɛlʋ blã, ʋ tʋ̃ɔ́ wõ a ʋ pɩ̃ɛnʋ nʋ̃ɔ̀ mɛ̃ tõ-tõ-bie a.

*

⁷ Bʋ̃ʋ n'ʋ vɛ̃, a tɩɛ mɩ́ cãà na tɩɛrɛ baafʋ: bɛlɛ saa cɛ ʋ bɛr a, ʋ mɩ́ lɛb'a tɔm, ʋ mɩ́ tɩɛr'ɩ pɩrmɛ kʋralɛ.

⁸ A ʋ nyɩwr saa kor a tẽsɔw pʋɔ a, a ʋ pɛ-kpur saa ɩ mɛ̃ ʋ kpi n a uuru pʋɔ a,

⁹ ʋlɛ wa wõ a kʋ̃ɔ nyũu a, ʋ mɩ́ lɛb'a tɔm, ʋ mɩ́ vo n wuli mɛ̃ tɩ-pɔl a.

¹⁰ Ɛcɛ a nɩsaal mɩ́ kpi na a ʋ fãw baarɩ. Ʋlɛ wa ŋmãa vʋʋrʋ a, nyɩn lowr'a ʋ pãa mɩ́ be a?

¹¹ A kʋ̃ɔ-kpɛ̃ɛ kʋ̃ɔ na zɔ na, a man na sɩr'a ko.

¹² Ɛcɛ a nɩsaalbɛ na kpi a kʋ̃ lɛb ìr ɛ, bɛ kʋ̃ lɛb ìr ɛ, ɛ́ gù a salom bɛ tɩ cãà ɩ, bɛ kʋ̃ zaw ìr a bɛ gʋ̃ɔ zu ɛ.

*

¹³ Ɩ̃ Naaŋmɩn i, fʋ̃ʋ nɩ̃ɛ tɩ sàw sɔwlɩ mɛ̃ a kpɩmɛ tẽw a, fʋ̃ʋ tɩ piw mɛ̃ tɛr ɛ́ gù a fʋ suur tɩ tɔl a! Fʋ̃ʋ tɩ ƴãw dàa kʋ̀ m fʋ na na lɛb tɩɛrɩ a ɩ̃ yele a!

¹⁴ — Ɛcɛ nɩsaal na kpi a na tʋ̃ɔ́ na lɛb vʋʋrɛ ɛ? — Ɩ̃ nãá nyɔw nɩ ɩ̃ tʋɔra a ɩ̃ tome daar za, ɛ́ gùre fʋ tɩ ta a lɛn daar bɛ na na lɩɛrɩ mɛ̃ a.

¹⁵ A lɛn daar a, fʋ nãá mɩ́ bʋɔlɩ mɛ̃ na, ɩ̃ɩ nãá mɩ́ sɔw fʋ na, fʋ nãá mɩ́ bɔbr'ɩ a fʋ nuru bʋ̃-maala tuotuo!

¹⁶ Fʋ kʋ̃ʋ cãà ŋmɛlɛ kaar a ɩ̃ sãwna ɩ, ɛcɛ ƴɛrɛŋa a, fʋ sɔrɛ nɩ a ɩ̃ gbɛ-ceni.

¹⁷ Fʋ nãá ŋmãa nɩ váar pàw a ɩ̃ ɩ-faar, fʋ nãá de nɩ a ɩ̃ sãwna bɛr a baarɩ.

*

¹⁸ Ɛcɛ a tan mɩ́ árɛ na lore tɩ ár lo, ɛ́ pie ìr a beba zie tɩ be zi-yũo.

¹⁹ A kʋ̃ɔ mɩ́ tʋ̃ɔ́ na cɩɩbɩ kʋsɛbɛ, ɛ́ a kʋ̃ɔ na gbɔlɛ a tuw bɔwrɩ a tẽ-buwr zu, lɛ n'a fʋ mɩ̀ mɩ́ ɩ a nɩsaal tɩɛrʋ wɛ.

²⁰ Fʋ mɩ́ nyɔw ʋ na lɔb tẽw ʋ kpi, a kũu mɩ́ ɩ na a ʋ niwn bɛ tɛr jɩ́rʋ ɛ, ɛ́ fʋ diw ʋ bɛr.

²¹ A ʋ bibiir nyɛrɛ nɩ ƴãwfʋ bɩɩ? Ʋ bɛ bãwnɩ a. Bɛ ɩrɛ bɛ na laar bɩɩ? Ʋ bɛ bãw ɛ.

²² Ʋl yõ n'ʋ wone a ʋ ƴã-gan 'wɔbrʋ, ʋl yõ tɩɛrʋ n'ʋ be wahala pʋɔ.