A Zɔb sɛbɛ 13 - A SƐB-SÕW

A Zɔb na cãà sɔw a ƴɛ̀rʋ a: ʋ bɔbr'a kɛ́ ʋlɛ nɩ a Naaŋmɩn nãá ƴɛ̀r sɔw taa

¹ Sɩza, a ɩ̃ mimir nyɛ̃ nɩ à á ŋá za, a ɩ̃ tobr wõ a na, ɩ̃ɩ bãw a pɛr.

² A bom nɛ nyɩ na bãw a, ɩ̃ mɩ̀ bãw ʋ na, ɩ̃ bɛ gem zuo nyɩ ɛ!

³ Ɛcɛ mãa a, a Kpɛnʋ-za-sob zie n'a ɩ̃ na ƴɛ̀rɛ: a Naaŋmɩn zie n'a ɩ̃ bɔbr k'ɩ̃ɩ ƴɛ̀r wul k'ɩ̃ɩ bɛ tɛr sãwna ɩ.

⁴ Ɛ́ a nyɩɩm a, zir-pɛlɛ n'a nyɩ ŋmarɛ pàwr'ɩ a yel-mɩŋa. Nyɩ ɩ na mɛ̃ dɔwtarɩ na mɩ́ kʋ̀ bàal tɩ̃ɩ na bɛ sanɛ a.

⁵ Bʋ̃ʋ pãa ɩ nyɩ bɛ ɩ zaa gbili a? A nãá wul'a kɛ́ nyɩ ɩ n yã-bãwnbɛ!

⁶ A na ɩ à ŋá a, nyɩ ƴãw tobr ɩ̃ ƴɛ̀r wul a ɩ̃ yel-mɩŋa.

⁷ A Naaŋmɩn yúor ƴãw n'a nyɩ na mɩ́ yel yel na bɛ tori a bɩɩ? Ziri n'a nyɩ na ŋmarɛ kpɩɛr'ɩ ʋ bɩɩ?

⁸ A Naaŋmɩn n'ʋ nyɩ kpɩɛr bɩɩ? Ʋlɛ n'ʋ nyɩ tɩ́ɛrɛ kɛ́ nyɩ ƴɛ̀r faa bɩɩ?

⁹ Ʋlɛ jɛlɛ a nyɩ yele kaar a, a na vɩɛl'ɩ nyɩ zie e? Bɩɩ nyɩ bɛ̀lɛ ʋ na mɛ̃ nɩsaal bɛ na mɩ́ bɛ̀lɩ a?

¹⁰ Bʋnʋ bɛ ka be ɩ, ʋ na yere nyɩ na, nyɩ na sɔwlɩ kpɛ ʋ a ƴãw.

¹¹ Nyɩ bɛ zɔrɛ ʋ, ʋ na ɩ kpɛ̃ɛ a ɩ? A ʋ dɛ̃bɩ̃ɛ bɛ ɩrɛ nyɩ ɛ?

¹² A ƴɛ̀rʋ nyɩ na puule a ɩ n zʋkpaɩ na bɛ tɛr pɛr mɛ̃ tãpɛlʋ vũu na dɩ ɛ́ cɛ a, a ƴɛ̀r-bie nyɩ na ƴɛ̀rɛ kɛ́ nyɩ ƴɛ̀r faa nɩ nyɩ tʋɔra a a bɛ tɛr fãw ɛ, mɛ̃ yawra bome a ɩ.

¹³ Nyɩ pàw a nyɩ nɛ́ɛ! Nyɩ bɛr mɛ̃! Mãa n'ʋ cɛ na ƴɛ̀r, ɛ́ bom nɛ wa ɩrɛ mɛ̃ a, ʋ̃ʋ ɩ!

¹⁴ Ɩ̃ cɔbrɩ na gù bom za, mãa saa na cɛ kũu-pire a.

¹⁵ A bɛ tɛr vɛb ɛ, a Naaŋmɩn na kʋ m a, ɩ̃ bɛ cãà tɩɛrɛ bom za ɩ. Ɛcɛ ɩ̃ na ƴɛ̀r'a wul a ɩ̃ yel-mɩŋa a ʋ niŋé.

¹⁶ Alɛ n'a na faa mɛ̃, bʋ̃ʋ n'ʋ vɛ̃, nɩ-faa bɛ àrɛ a ʋ niŋé ɩ.

¹⁷ Nyɩ ƴãw fãw bɛr wõ a ɩ̃ ƴɛ̀rʋ. A manʋ ɩ̃ na manɛ a, a lo a nyɩ tobe pʋɔ.

¹⁸ A na ŋmɛ̃ à ŋá a, ɩ̃ cɔbr'ɩ a ƴɛ̀rʋ, ɩ̃ɩ bãwnɩ a na, mãa n'ʋ na tɛr a yel-mɩŋa.

¹⁹ A na ɩ à ŋá a, ãa n'ʋ bɔbr k'ʋʋ ƴɛ̀r wul a ɩ̃ sãwna? Mãa wa sɩrɩ tɛr sãwna a, ɩ̃ na pàw nɩ a ɩ̃ nʋɔr ƴɛrɛŋa ɛ́ kpi.

*

²⁰ Ɩ̃ Naaŋmɩn i, kʋ̀ m bome ayi tɛwr, ɩ̃ɩ kʋ̃ cãà sɔwlɛ a fʋ niŋé ɩ:

²¹ De niwn ír a fʋ nũu na dɔwrɛ mɛ̃ a bɛr a ɩ̃ zu, ta cãà ƴãwnɛ mɛ̃ dɛ̃bɩ̃ɛ ɩ.

²² Al pùorí, ƴɛ̀rɛ, ɩ̃ɩ na sɔw fʋ na, bɩɩ mãa wa n'ʋ ƴɛ̀rɛ a, fʋ̃ʋ sɔw mɛ̃.

²³ A ɩ̃ sãwna nɩ a ɩ̃ yel-bebe ɩ n a ŋmɩn? Wul mɛ̃ a ɩ̃ zu-kpɛnʋ nɩ a ɩ̃ yel-bebe.

²⁴ Bʋ̃ʋ so fʋ sɔwlɛ a fʋ niwn a ɩ̃ ƴãw, ɛ́ ɩrɛ mɛ̃, mɛ̃ a fʋ dɔ̃ sob a?

²⁵ Va-ŋman sɛsɛb na ɓáw a n'ʋ fʋ ta tu u? Mɔ̃-kõw n'ʋ fʋ diwr ɩ?

²⁶ Fʋ sɛb'ɩ a ɩ̃ sãwna ƴãw a ƴɛ̀r-dɩrɛ sɛbɛ pʋɔ, fʋ ɩ na a ɩ̃ pɔ̀lʋ daar sãwna lo a ɩ̃ zu.

²⁷ Fʋ ƴãw nɩ kpule a ɩ̃ gbɛ́ɛ ƴãw ɛ́ piwre a ɩ̃ ɩ-ɩrɩ za, ɛ́ jiele a ɩ̃ gbɛ-ceni za.

²⁸ Ɛcɛ a nɩsaal mɩ́ yʋʋrɛ na mɛ̃ dà-pʋ̃ɔn a, mɛ̃ fɔbr mɔwr na mɔw a.