Ɩzayi 9 - A SƐB-SÕW

¹ A nɩbɛ na cere a lige pʋɔ a, nyɛ̃ nɩ cãà-kpɛ̃ɛ. Cãà nyɩwrɛ nɩ a bɛlɩ dem na kpɩɛr a lige tẽw a ƴãw.

² Sore e, fʋ ɩ na a cɩlʋ laarɩ bɛ, fʋ ɩ na a bɛ nʋ̃ɔ̀ kpɛ kpɛ̃ɛ. Bɛ cɩlɛ nɩ a fʋ niŋé mɛ̃ kɔb bome bɛ na mɩ́ dier cɩlɛ nɩ a, mɛ̃ dɔ̃ dem na-bome bɛ na mɩ́ pone ŋmɩɛr'ɩ nʋ̃ɔ̀ cɛlsɩ a.

³ A dàa na ɩ a dɔwrʋ bɛ na dɔwrɛ bɛ a bãwfʋ a, a dabɔl na vàrɛ a bɛ bawŋmamɛ a, a dakpuli-ŋmãa bɛ na ŋmɩɛr'ɩ bɛ a, fʋ kar a na bɛr, mɛ̃ a lɛ fʋ na tɩ ɩ a ʋlɩ bibir fʋ na zɛb tʋ̃ɔ́ a Madian tẽw dem a.

⁴ A dɔ̃ dem nafaw-kpowtɩɛ za na nɛbr a tẽsɔw ʋ gbiwre a, a kpar-bɛrɛ za na ɩ zɩ̃ɩ tɛwr a ɩ n bʋ̃-nyɩw-bɛra, vũu dɩ a na.

⁵ Bʋ̃ʋ n'ʋ vɛ̃, bie dɔw nɩ a tɩ ƴãw, bɛ kʋ̀ tɩ nɩ bidɛb. Naaŋmɩn kʋ̀ ʋ nɩ a nɩ-kpɛ̃ɛnʋ. Bɛ por ʋ nɩ a yúor kɛ́: Yã-wule vla vla, Naaŋmɩn-Gãdaa, Sãà kʋralɛ, Ƴã-ɓaarʋ nãà.

⁶ Ʋ na dɩ n a nɩ-kpɛ̃ɛnʋ yaga za, ɛ́ ɩ ƴã-ɓaarʋ na bɛ tɛr baarʋ a ʋ be be. Ʋ na zɩ̃ n a Daviir naalʋ-dà-kɔw zu, ɛ́ dɩ naalʋ a ʋ naalʋ-tẽw zu. Ʋ na ɩ n a lɛ-na-tu-sɔr-a nɩ a mɩnʋ a be be, k'ʋʋ tʋ̃ɔ́ ɩ a ʋ naalʋ-tẽw ʋ be be, ɛ́ kpɛmɛ a ƴɛrɛŋa nɩ a kʋralɛ. A yel ŋa n'ʋ a Sore, a kpɛnʋ-za-sob na maalɩ, a ʋ nɔ̃wfʋ na dɩrɛ mɛ̃ vũu a ƴãw.

A Sore nũu cãà na zɛw

⁷ A Sore ƴɛ̀r'ɩ ƴɛ̀rʋ a Zakɔb bʋʋrɛ ƴãw, a ƴɛ̀rʋ lo n a Ɩsɩrayɛl naalʋ-tẽw zu.

⁸ A nɩbɛ za bãwnɩ a na, a Efarayim naalʋ-tẽw za nɩ a Samaari tẽw dem. A nɩbɛ bɛ ŋa tɩ ɩ n nyʋ̀ʋ́r nɩ pɔ̀lʋ tɛwr yere nɩ:

⁹ «A birkiri dacine lo na, tɩ na lɛb'a mɛ a nɩ kʋsɛ-pɛnɩ! A Sɩkomɔɔr tɩɩr wɛwr kar'a, tɩ na lɩɛr'a na nɩ sɛɛdɩr tɩɩr wɛwr!»

¹⁰ Lɛ n'a a Sore ɩ a Eresin dɔ̃ dem na ɩ a Asiiri tẽw dem a, ìr a Ɩsɩrayɛl ƴãw. Ʋ dɔ n a bɛ dɔ̃ dem ƴãw bɛ:

¹¹ a Siiri tẽw dem be a niŋé, a Filisɩtɛ̃ mɩnɛ be a pùorí. Bɛ sɛ̀m'ɩ a Ɩsɩrayɛl paalɩ nʋɔr 'wɔb. Ɛcɛ a na saa ɩ à à ŋá a, a Sore suur cãà bɛ ɓãa ɩ, a ʋ nũu cãà na zɛw.

¹² A na ɩ lɛ a, a Sore ŋmɛ n a ʋ nɩ-bʋʋrɛ, ɛcɛ a Ɩsɩrayɛl nɩbɛ bɛ lɛb wa a sob nɛ na ŋmɩɛr bɛ a zie ɩ, bɛ bɛ bɔ a Sore, a kpɛnʋ-za-sob ɛ.

¹³ Lɛ n'a a Sore tɩ ŋmãa a zú nɩ a zʋʋr, a kpãkparmɛ tɩɛ wule nɩ a bàa-kɛkɛr a Ɩsɩrayɛl tẽw pʋɔ, bibi-been.

¹⁴ A nɩ-kore nɩ a nɩ-yée n'ɩ a zú, a naaŋmɩn-ƴɛ̀r-manbɛ na wule a ziri a n'ɩ a zʋʋr.

¹⁵ A nɩbɛ bɛ ŋa wul-wulbɛ tuli bɛ na, a bɛlɩ dem bɛ na wule a lo sɔr-faa.

¹⁶ Alɛ n'a so a Sore pʋɔ bɛ pɛlɩ a bɛ pɔlbili ƴãw ɛ, ʋ bɛ zɔrɛ a bɛ bi-kpebe nɩ a bɛ pɔw-kɔbɛ nɩbaalʋ ɛ. Bʋ̃ʋ n'ʋ vɛ̃, nɩ-faar'ɩ bɛ za na ɩrɛ ɩ-faar a. A alɩ bome nɛ bɛ na mɩ́ yere a faa tɔ. Ɛcɛ a na saa ɩ à à ŋá a, a Sore suur cãà bɛ ɓãa ɩ, a ʋ nũu cãà na zɛw.

¹⁷ A po-tuolu 'lere na mɛ̃ vũu na dɩrɛ a gɔ̀-pɛ-bʋʋrɛ za a. A nyɔw nɩ a tuw pʋɔ va-pɔrɛ, ɛ́ ɩ zʋ̀ʋ́r ŋmɛlɛ dúor a salom zu.

¹⁸ A Sore, a kpɛnʋ-za-sob, suur ƴãw a, a tẽw 'lere nɩ vũu. A ɩ na mɛ̃ vũu dɩrɛ nɩ a nɩbɛ a. Nɩr za bɛ bɛrɛ a ʋ yɛb ɛ.

¹⁹ A nɩbɛ mɩ́ ŋmãa nɩ a dʋrʋ lowr, ɛ́ a kɔ̃ cãà kʋrɛ. Bɛ mɩ́ vɔl'ɩ a gʋba lowr ɛ́ bɛ tɩw ɛ. Ŋa za mɩ́ ìr'ɩ a ʋ tɔ sob ƴãw:

²⁰ Manase dɔwlʋ mɩ́ ìr'ɩ Efarayim dɔwlʋ ƴãw, Efarayim dɔwlʋ ìr Manase dɔwlʋ ƴãw, ɛ́ a za ayi lãw taa Zuda dɔwlʋ ƴãw. Ɛcɛ a na saa ɩ à à ŋá a, a Sore suur cãà bɛ ɓãa ɩ, a ʋ nũu cãà na zɛw.