Ɩzayi 8 - A SƐB-SÕW

Zɔ fɔ̃wlɛ a zɛbr na-bome ƴãw, zɔ cen tɩ za!

¹ A Sore tɩ yel mɛ̃ na: «De dapawli-kpɛ̃ɛ, sɛb a zu nɩ sɛbrʋ na tɛr kanʋ a kɛ́ “Fɔ̃wlɛ-a-zɛbr-na-bome-ƴãw-Zɔ-a-zab-ƴãw”.»

² Ɩ̃ tɩ wul'ɩ a dapawle yel-mɩn dem ayi fʋ na na tʋ̃ɔ́ ƴãw a fʋ tɩɛrʋ a bɛ ƴãw a: a bàwr-maalɛ Uriya nɩ Yeverekɩahu bidɛb, Zekarɩahu.

³ Al pùorí, ɩ̃ tɩ páw nɩ a pɔw-naaŋmɩn-ƴɛ̀r-manɛ, a ɩ̃ pɔw. Ʋ tɩ tɛr'ɩ pʋɔ dɔw dɛb. Lɛ n'a a Sore tɩ yel mɛ̃: «Por ʋ “Fɔ̃wlɛ-a-zɛbr-na-bome-ƴãw-Zɔ-a-zab-ƴãw”.

⁴ Bʋ̃ʋ n'ʋ vɛ̃, a bie kʋ̃ bãw “Ɩ̃ sãà” bɩɩ “Ɩ̃ mã” bʋɔlʋ sɛr ɛ, ɛ́ bɛ tuo a Damasɩ tẽw na-bome nɩ a Samaari tẽw zɛbr-na-bome cen nɩ a Asiiri tẽw nãà niŋé.»

A Asiiri tẽw dem waar'a mɛ̃ man kʋ̃ɔ na paalɩ pàw bom za a

⁵ A Sore tɩ cãà na lɛb yel mɛ̃ à ŋá:

⁶ «A Zuda nɩbɛ bɛ bɔbr a Silowe bɔw-wɛra kʋ̃ɔ na zɔrɛ bɛ̀lbɛ̀l a ɩ. Ɛ́ a bɛ tɩɛrʋ bàl a Eresin nɩ a Eremalyahu bidɛb ƴãw.

⁷ A lɛ n'a so ɩ̃ na ɩ a Efaratɩ man kʋ̃ɔ na yãwmɛ ɛ́ darɛ taa nɩ fãw a, a do wa páw bɛ, —a Asiiri tẽw nãà nɩ a ʋ fãw-kpɛ̃ɛ—. A Efaratɩ man na paal'ɩ a ʋ bà-dĩo a ziir za, paalɩ tɩ yi nɛ́ɛ.

⁸ Ʋ na tɩ tɔ n a Zuda naalʋ-tẽw, ʋ na paal'a yi nɛ́ɛ, paalɩ pàw ʋ, do tɩ ƴãw ʋ a kɔkɛɛ. Ʋ na yɛ̀lɩ na, a ʋ kõkowe tɩ zãá, ʋ na pàw nɩ a fʋ tẽw yɛ̀lʋ za, Ɩmanɩɛl i.»

A nɩ-bʋʋr-yoru kʋ̃ tʋ̃ɔ́ ɩ a Naaŋmɩn nɩ-bʋʋrɛ bom ɛ

⁹ Nɩ-bʋʋrɛ ɛ, nyɩ màwr, ɛ́ a pʋl-vʋ̃ɔ kʋ nyɩ! Nyɩ cɛlɛ be, tẽ-zãánɩ za a! Nyɩmɛ saa nɔnɛ nyɩ cɔbrɩ a zɛbr ƴãw, a pʋl-vʋ̃ɔ gùre nyɩ na. Ʋ̃ʋ, nyɩmɛ saa nɔnɛ nyɩ cɔbrɩ a zɛbr ƴãw, a pʋl-vʋ̃ɔ gùre nyɩ na!

¹⁰ Nyɩmɛ nɔ̃w nyɩ tɩɛrɩ yele bin, a na wɛl'a yaarɩ. Nyɩ ŋmɛ a nɔkpɛn bin a lɛ nyɩ na na ɩ a ƴãw, a kʋ̃ nyɔw ɛ. Bʋ̃ʋ n'ʋ vɛ̃, a Naaŋmɩn be n tɩ zie.

A Sore yõ n'ʋ a sɛw kɛ́ bɛ zɔrɛ

¹¹ A Sore nyɔw mɛ̃ na ɛ́ yel mɛ̃ k'ɩ̃ɩ taa cɔwrɛ a nɩbɛ bɛ ŋa ɩb ɛ. À ŋá n'a ʋ yel mɛ̃:

¹² «Nyɩ kʋ̃ bʋɔlɛ “bʋ-taa” ʋlɩ bom nɛ za a nɩbɛ bɛ ŋa na bʋɔlɛ “bʋ-taa” a ɩ. Nyɩ kʋ̃ zɔrɛ a ʋlɩ bom nɛ bɛ na zɔrɛ a ɩ, nyɩ taa zɔrɛ ʋ ɛ.»

¹³ A Sore, a kpɛnʋ-za-sob'ʋ nyɩ na bãw k'ʋʋ ɩ n sõw. Ʋlɛ n'ʋ a fɛr kɛ́ nyɩ zɔrɛ, ʋlɛ n'ʋ a sɛw k'ʋʋ ɩrɛ nyɩ dɛ̃bɩ̃ɛ.

¹⁴ Ʋ na ɩ n zi-sõw, kʋsɩɛr ƴãw bɛ na ŋmɩɛr gbɛ́ɛ a, pìir kʋsɩɛr na ɩrɛ bɛ lore a, a Ɩsɩrayɛl yie a za ayi ƴãw. Ʋ na ɩ n mɩ̃ɛ nɩ bɛra a Zerizalɛm tẽw dem ƴãw.

¹⁵ Ʋ na mɩ́ ɩ na nɩ-yaga kàwr tɩ lo kar. A bɛra na mɩ́ nyɔw bɛ na bɛ kʋ̃ tʋ̃ɔ́ faa ɩ.

A naaŋmɩn-ƴɛ̀r-manɛ ɩ n gbili ɛ́ cɛlɛ

¹⁶ Ɩ̃ maal'a bine a ɩ̃ ƴɛ̀rʋ sɛbrʋ, ɩ̃ kpàrɛ nɩ a wulu a na sɛw k'ɩ̃ɩ lʋɔrɩ tɩr a bɛrɛ: a ɩ̃ po-tuurbɛ tɛwr nɛbɛ ɩ̃ dier a kʋ̀rɛ.

¹⁷ Ɩ̃ gùre nɩ a Sore. Ʋ bɛ ŋmɛlɛ kaar a Zakɔb yir dem a ƴɛrɛŋa ɩ, ɛcɛ ʋl ƴãw n'a ɩ̃ ƴãw a ɩ̃ tɩɛrʋ.

¹⁸ A mãa mɩŋa, nɩ a bibiir a Sore na kʋ̀ m a, tɩ ɩ n bãwfʋ, nɩ a lɛ a nɩdaar yele na na ɩ a bãwfʋ a Ɩsɩrayɛl tẽw pʋɔ, a Sore, a kpɛnʋ-za-sob, na kpɩɛr a Sɩyɔ̃ tãw zu a yúor ƴãw.

¹⁹ Bɛ mɩnɛ yere na: «Nyɩ sowri a kpɩmɛ na mɩ́ waalɛ ɛ́ 'hũ'hune yere a nɩdaar yele a. A tɛr'ɩ sɔ́r kɛ́ nɩ-bʋʋrɛ kãw mɩ́ sowre a ʋ ŋmɩmɛ ɛ́ kabrɛ a kũuni a nɩ-vʋʋrɩ ƴãw.» Bɛlɛ wa yere à à ŋá a nyɩ zie a,

²⁰ nyɩ na sɔw na: «A wulu nɩ a Sore ƴɛ̀rʋ lɛb-deb'a fɛrɛ.» Nɩr bɛ wa ƴɛ̀r à à ŋá a, ʋ kʋ̃ nyɛ̃ a zi-wɛl-paala ɩ.

Lige na vʋ̃ɔnɛ pʋ̀lá a

²¹ A nɩbɛ na tɔlɛ nɩ a tẽw pʋɔ, bàl bɛ za ɛ́ kɔ̃ kʋrɛ. A kɔ̃ na ɩ na bɛ nyɛ̃ suur, wa tɩ ŋmɩɛr ƴãwn a bɛ nãà nɩ a bɛ Naaŋmɩn. Bɛ na mɩ́ lɩɛb'a kaa a salom,

²² al pùorí bɛ jɩ́r a tẽw nyɛ̃ a ɩ kpɩɛrʋ tɛwr, lige, lige na vʋ̃ɔnɛ pʋ̀lá a, tɩ̃ɩsɔw-varkpara.

²³ Sob nɛ na be a tɩ̃ɩsɔw ŋa pʋɔ a kʋ̃ tʋ̃ɔ́ yi zaa a ʋ pʋɔ ɩ. A koro za a, a Sore tɩ ɩ na a Zabulɔ̃ nɩ a Nɛfɩtali ten nyɛ̃ vĩ. Ɛcɛ a nɩdaar a, ʋ na ɩ na a sɔ́r na lanɛ a kʋ̃ɔ-kpɛ̃ɛ a, a tẽw na be a Zurdɛ̃ man saa-pɛrɩ́ a, nɩ a Galile na ɩ a sãanbɛ vuo a, a tɛr yúor.