Ɩzayi 7 - A SƐB-SÕW

Ƴɛ̀rʋ a Sore na ƴãw bɛ ƴɛ̀r kʋ̀ a nãà Akaazɩ a

¹ A Zuda tẽw nãà Akaazɩ na ɩ Yotam bidɛb, ɛ́ ɩ Ozɩasɩ yãw a, daar tɩ n'a. Siiri tẽw nãà, Eresin, tɩ wa na, ʋlɛ nɩ a Ɩsɩrayɛl tẽw nãà Peka na ɩ Eremalyahu bidɛb a, kɛ́ bɛ wa zɛb'ɩ a Zerizalɛm. Ɛcɛ bɛ bɛ tɩ tʋ̃ɔ́ zɛb'ɩ ʋ ɛ.

² Bɛ tɩ yel'ɩ a Daviir bʋʋrɛ nɩr Akaazɩ nɩ a ʋ tõ-tõ-bi-bɛrɛ à ŋá: «A Siiri tẽw dem maal'ɩ a bɛ zɛbr laɩ a Efarayim tẽw pʋɔ.» A yel ŋa tɩ dam'ɩ a nãà nɩ a ʋ nɩbɛ mɛ̃ sɛsɛb na mɩ́ fu dam tuw tɩɩr a.

³ Lɛ n'a a Sore tɩ yel a Ɩzayi: «Tɛr a fʋ bidɛb Seyaar-Yasuvʋ yi tuor'ɩ a Akaazɩ. Ʋ be n a kʋ̃ɔ-ƴãwfʋ-zie ʋl na be a saa-zu a, a bɔw-wɛra baarʋ zie, a sɔ́r na cere a fɔbr-pɛwrbɛ púo pʋɔ a zu.

⁴ Fʋ na tɩ yel ʋ na: “Cɛlɛ be! Ta damnɛ ɩ, ta zɔrɛ dɛ̃bɩ̃ɛ ɩ. A fʋ socir, ʋ ta màwr a Siiri tẽw Eresin nɩ a Eremalyahu bidɛb su-tʋlʋ kpãkpã ƴãw ɛ. Da-ŋmaarɛ ayi na ɩrɛ zʋ̀ʋ́r a tɛwr nɛbɛ.

⁵ Yel-mɩŋa n'a, a Siiri tẽw dem, de nɩ a Peka nɩ a Efarayim zɛbr-nɩbɛ yel'a kɛ́ bɛ na maalɩ fʋ nɩ faa. Bɛ yel'a:

⁶ “Nyɩ ɩ tɩ cen a Zuda naalʋ-tẽw ƴãw! Tɩ tɩ ƴãw ʋ dɛ̃bɩ̃ɛ, ɛ́ fɛr ʋ ƴãw ʋ tu tɩ! Ɛ́ tɩ ƴãw Taveyɛl bidɛb ɩ a nãà a be.”

⁷ Ɛcɛ à ŋá n'a a Sore Naaŋmɩn yere: “A bɛ nyɔwr ɛ, a bɛ ɩrɛ ɩ!”

^8-9 Bʋ̃ʋ n'ʋ vɛ̃, a Siiri tẽw tẽ-kpɛ̃ɛ n'ɩ Damasɩ, ɛ́ a Damasɩ tɛwr'a a Eresin ɩ a nɩ-kpɛ̃ɛ. Yome lɩz'a ata nɩ a nũu n'a cãà cɛ, ɛ́ a Efarayim bʋʋrɛ kʋ̃ cãà ɩ. Bʋ̃ʋ n'ʋ vɛ̃, Samaari n'ɩ a Efarayim tẽw tẽ-kpɛ̃ɛ ɛ́ a Samaari tɛwr'a a Peka ɩ a nɩ-kpɛ̃ɛ. Nyɩmɛ bɛ wa sàw de a, nyɩ kʋ̃ cãà be ɩ.”»

A Ɩmanɩɛl bãwfʋ a Sore na tɩr a

¹⁰ A Sore tɩ cãà na ƴɛ̀r a Akaazɩ zie à ŋá:

¹¹ «Zɛlɩ bãwfʋ kãw a Sore fʋ Naaŋmɩn zie a kpɩmɛ-tẽw pɛrɩ́ za, bɩɩ a saa-zu za a salom zu.»

¹² Ɛcɛ a Akaazɩ tɩ sɔw na: «Ɩ̃ bɛ zɛlɛ ɩ, ɩ̃ bɛ ɩrɛ a Sore kaar ɛ.»

¹³ Lɛ n'a a Ɩzayi tɩ yel: «Nyɩ bɛrɛ wone, Daviir yir dem i! Pʋrɩ n'a a ɩ nyɩ na bàlɛ a nɩsaalbɛ a a, nyɩ mɩ̀ bàlɛ a ɩ̃ Naaŋmɩn ɩ?

¹⁴ A na ɩ à ŋá a, a Sore mɩŋa na kʋ̀ nyɩ nɩ bãwfʋ: a pɔwsɩra na tɛr'ɩ pʋɔ dɔw dɛb por ʋ Ɩmanɩɛl, a pɛr lɛ kɛ́ “Ŋmɩn-be-n-tɩ-zie”.

¹⁵ Bʋ̀r-jɛ̃jɛlɛ nɩ sɩwr'a ʋ na dɩrɛ tɩ ta a lɛn daar ʋ na na bãw a faa zawr-bɛrʋ nɩ a vla kaa-íru a.

¹⁶ A bie kʋ̃ bãw a faa zawr-bɛrʋ nɩ a vla kaa-íru sɛr ɛ, ɛ́ a nɩbɛ bɛr a tẽw a na-mɩnɛ ayi na ɩrɛ fʋ dɛ̃bɩ̃ɛ a, ʋ gã.

¹⁷ A Sore na ɩ na bibie kãw vɩɛ a fʋ zu, a fʋ nɩ-bʋʋrɛ zu, bibie na bɛ vɩɛ a lɛn daar za a Ɩsɩrayɛl naalʋ-tẽw na bʋ́r yi a Zuda naalʋ-tẽw pʋɔ wa tɔ a ka a. — A Asiiri tẽw nãà yele n'a.—»

A Asiiri tẽw dem kpɛ na so a tẽw

¹⁸ Bibir kãw, a Sore na pɛbl'ɩ wele bʋɔlɩ a nazʋʋr na be a be a Nɩl man kʋ̃ɔ na zɔrɛ kpɩɛr a kʋ̃ɔ-kpɛ̃ɛ pʋɔ a Eziptɩ tẽw a, nɩ a sɩw-bie na be a Asiiri tẽw a.

¹⁹ A za na wa na wa dɔm a fʋɔl-cũgbuli pʋɔ, a pì-wɛrsɩ pʋɔ, a tuwr za pʋɔ nɩ a ziir al za kʋ̃ɔ na be a.

²⁰ A ʋlɩ bibir a, a Sore na ya n bʋra ʋ na na tõ n ɛ́ lɛb tɩr a Efaratɩ man gãwn a —a Asiiri tẽw nãà n'ʋ—, ʋ na fɔr'ɩ nɩ a nyɩ zuru, ɛ́ põ a nyɩ ƴã-gamɛ kɔblʋ za, tɩ lãwnɩ a nyɩ tɩ̃ɛmɛ.

²¹ A ʋlɩ bibir mɩ̀ a, ŋa za na mɩ́ guole nɩ na-nyãw nɩ bʋ-nyan ayi,

²² ɛ́ a bʋ̀rʋ na na mɩ́ ʋr a zũú, a nɩbɛ na dɩrɛ nɩ bʋ̀r-jɛ̃jɛlɛ. A bɛlɩ dem za na na cãà be a tẽw pʋɔ a na sɩrɩ na dɩrɛ bʋ̀r-jɛ̃jɛlɛ nɩ sɩwr.

²³ A ʋlɩ bibir lɛb maalɛ, púo na mɩ́ tɩ tɛr divɛ̃ tɩɩr túr a dàarʋ ta salm-pla libie túr a, na mɩ́ gã na ɩ gɔ-tuwr.

²⁴ A nɩbɛ na mɩ́ tɛr'ɩ tamɛ nɩ lɔwr wa bawlɛ nɩ a be. Bʋ̃ʋ n'ʋ vɛ̃, a tẽw za na ɩ n gɔ-tuwr tɛwr.

²⁵ A tãli bɛ na tɩ kʋɔr'ɩ kùur a, nɩr kʋ̃ mɩ́ lɛb sàw cen a be ɩ, a gɔ-tuwr bɛ na zɔrɛ a ƴãw. A na lɩɛb'ɩ nĩi mʋ̃ɔ 'wɔbrʋ zie nɩ píir àrʋ zie.