Ɩzayi 65 - A SƐB-SÕW

A Sore na dɩ n nɩ a ʋ nɩ-bʋʋrɛ nɩbɛ za ƴɛ̀rʋ

¹ A Sore yere na: Ɩ̃ bɛr'a nɩbɛ na bɛ tɩ zɛlɛ bom a bɔbr mɛ̃. Ɩ̃ bɛr'a nɩbɛ na bɛ tɩ bɔbr mɛ̃ a nyɛ̃ m. Ɩ̃ yel'ɩ nɩ-bʋʋrɛ na bɛ tɩ bʋɔlɛ a ɩ̃ yúor a: “Mãa n'ɩ ŋan, mãa n'ɩ ŋan!”

² Ɩ̃ tur'ɩ nũu kʋralɛ cɔw nɩ-bʋʋrɛ na gaarɩ a, nɩbɛ na tuur sɔr-faa ɛ́ ɩrɛ lɛ tɛwr bɛ na tɩɛrɛ a.

³ A nɩbɛ bɛ ŋa càar'a kʋrɛ mɛ̃ suur kʋralɛ: bɛ maalɛ nɩ bagɛ a zaadɛnɩ pʋɔ, ɛ́ nyɩwr parfɛnɩ birkiri bàwr-maal-kube zu a ŋmɩn-bɛlmɛ ƴãw.

⁴ Bɛ zɩnɛ nɩ a yàa bɔwrɩ pʋɔ, bɛ kpɩɛrɩ tan bɔwrɩ pʋɔ. Bɛ 'wɔbr'ɩ dobaa nɛn, ɛ́ a bɛ labɛ mɩ́ paalɩ bʋ̃-dɩ-dɛgɛ.

⁵ Bɛ mɩ́ yere nɩ a nɩbɛ zie: «Nyɩ taa tawr pɩɛlɛ ɩ, nyɩ taa tʋɔr mɛ̃ ɩ. Bʋ̃ʋ n'ʋ vɛ̃, ɩ̃ nãà ɩ na nyɩ ɩ bʋ̃-tuor». A nyɩ ɩ-ɩrɩ á ŋá za mɩ́ ɩ na nyɛɛ karɛ mɛ̃, a ɩ̃ suur mɩ́ ìr'a 'lere mɛ̃ vũu a, kʋralɛ.

⁶ Ɛcɛ ɩ sɛb'ɩ à á ŋá za. Ɩ̃ bɛ ɩrɛ gbili ɛ, ɩ̃ɩ na ɩ na bɛ ya

⁷ a bɛ sãwna san vla vla, lãwnɩ a bɛ sãàkʋm-kore dem. A bɛ sãàkʋm-kore nyɩw nɩ parfɛ̃ a tan zu, ɛ́ ɩ m la a tãli zu. A na ɩ à ŋá a, ɩ̃ na ɩ na bɛ ya a koro za ɩ-ɩrɩ san vla vla. A mãa, a Sore, mãa n'ʋ yere.

⁸ À ŋá n'a a Sore yere: Bɛlɛ wa nyɛ̃ divɛ̃ tɩ-wɔ̃-cãacul na mʋ̃ɔ̀ vla vla a, a nɩbɛ mɩ́ yere na: «Nyɩ ta sãw ʋ bɛr ɛ, ʋ nãà wa tɩr'ɩ divɛ̃-nʋ̃ɔ̀ nʋ̃ɔ̀.» «À à ŋá mɩ̀ n'a ɩ̃ na ɩ a bɛlɩ dem na tone a ɩ̃ tome a zũú. Ɩ̃ bɛ sãwnɛ a za bɛrɛ ɩ.

⁹ Ɩ̃ na kʋ̀ n bʋʋrɛ a Zakɔb nɩbɛ, a Zuda dɔwlʋ nɩbɛ. Bɛ na so nɩ a ɩ̃ tan. A bɛlɩ dem ɩ̃ na kaa ír a na so a na, a bɛlɩ dem na tone a ɩ̃ tome a na kpɩɛr'ɩ a be.

¹⁰ A Saron tɩ̃tal na lɩɛb'ɩ píir àrʋ zie, ɛ́ a Akɔɔr fʋɔla lɩɛbɩ nadʋʋra a ɩ̃ nɩbɛ na na bɔ m a ƴãw.

¹¹ Ɛcɛ a nyɩɩm a, nyɩ zawrɩ mɛ̃ na bɛr, nyɩ yiir'ɩ a ɩ̃ tãw-sõw bɛr, nyɩ kʋ̀rɛ nɩ bʋ̃-dɩrɩ a Gadɩ, a bawson ŋmɩn, nyɩ kʋ̀rɛ nɩ divɛ̃ na jɛr taa a a Meni, a lɛ a yele na na ɩ a baarʋ daar a ŋmɩn.

¹² A na ɩ à ŋá a, ɩ̃ na bɛr nyɩ na kʋ̀ a nyɩ dɔ̃ dem. Nyɩ na gbĩ n dume bɛ ŋmaarɩ nyɩ a kɔkɛɛ. Bʋ̃ʋ n'ʋ vɛ̃, ɩ̃ bʋɔl'a, ɛ́ nyɩ bɛ sɔw ɛ. Ɩ̃ ƴɛ̀r'a, ɛ́ nyɩ bɛ bɛr wõ ɩ. Nyɩ ɩ n a lɛ na bɛ vɩɛl a a ɩ̃ zie, nyɩ kaa na ír a bom nɛ na bɛ pɛlɩ a ɩ̃ pʋɔ a.

¹³ Alɛ n'a so ɩ̃ yere à ŋá, a mãa, a Sore Naaŋmɩn: a ɩ̃ tõ-tõ-biir na mɩ́ dɩ na, ɛ́ a nyɩɩm a, nyɩ na mɩ́ bãw nɩ a kɔ̃. A ɩ̃ tõ-tõ-biir na mɩ́ nyũ na, ɛ́ a nyɩɩm a, kʋ̃ɔ-nyúur na mɩ́ kpɛ nyɩ na. Nʋ̃ɔ̀ na mɩ́ ɩrɛ nɩ a ɩ̃ tõ-tõ-biir, ɛcɛ a nyɩɩm a, vĩ na mɩ́ nyɔw nyɩ na.

¹⁴ A ɩ̃ tõ-tõ-biir na mɩ́ cáarɛ na, ɛ́ nʋ̃ɔ̀ paalɩ a bɛ socie! Ɛcɛ a nyɩɩm a, 'wɔbrʋ n'a na mɩ́ 'wɔbr nyɩ nyɩ cɩɩrɛ, ɛ́ a nyɩ socie paalɩ kpɩɛrʋ. Nyɩ na mɩ́ 'huore na, ɛ́ a tɩɛrʋ sãw ʋ za!

¹⁵ A bɛlɩ dem ɩ̃ na kaa ír a, na mɩ́ de nɩ a nyɩ yúor, ɛ́ a ɩ ŋmɛ-ƴãw tɛwr ƴãw, bɛ mɩ́ yel: “A Sore Naaŋmɩn, ʋ ɩ fʋ kpi mɛ̃ bón bɩɩ bón a!” Ɛcɛ a ɩ̃ tõ-tõ-biir ƴãw a, yo-yũo n'ʋ bɛ na mɩ́ de.

¹⁶ A tẽw pʋɔ a, nɩr na bɔbr k'ʋʋ ƴɛ̀r nɔ-vla a ʋ tɔ sob ƴãw a, na mɩ́ ƴɛ̀r'ɩ a Naaŋmɩn na ŋmɛ̃ ʋ ŋmɛ̃a a yúor ƴãw. Nɩr na bɔbr k'ʋʋ pɔ a, na mɩ́ pɔ n a Naaŋmɩn na ŋmɛ̃ ʋ ŋmɛ̃a a yúor ƴãw.» A Sore yere na: Bɛ na yiir'ɩ a koro za kpɩɛrʋ bɛr, a na bɔr'a zãá a ɩ̃ zie.

Naaŋmɩn na ír'ɩ salom-paala nɩ tẽsɔw-paala

¹⁷ Bʋ̃ʋ n'ʋ vɛ̃, ɩ̃ na ír'ɩ salom-paala nɩ tẽsɔw-paala. Nɩr bɛ lɛb ƴɛ̀rɛ a koro za yele ƴɛ̀rʋ ɛ, bɛ kʋ̃ lɛb tɛr a tɩɛrʋ towtow ɛ.

¹⁸ Nʋ̃ɔ̀, a paalɩ nyɩ laarɩ, nyɩ cɩlɛ kʋralɛ a ʋlɩ bom nɛ ɩ̃ na na ír a ƴãw. Ɩ̃ na ɩ na a Zerizalɛm ɩ tẽ-kpɛ̃ɛ nʋ̃ɔ̀ na paalɩ a, ɛ́ a ʋ nɩbɛ ɩ nɩ-bʋʋrɛ cɩlʋ na tɛr a.

¹⁹ Ɩ̃ na cɩlɛ nɩ a Zerizalɛm ƴãw, nʋ̃ɔ̀ na paalɩ mɛ̃ na laarɩ a ɩ̃ nɩ-bʋʋrɛ ƴãw. Bɛ kʋ̃ cãà wone kon nɩ cɛlsɩ a bɛ pʋɔ ɩ.

²⁰ Bibie à ŋá tɛwr bi-pɩɩla bɛ lɛb kpiir a be ɩ. Dɛnyãw na bɛ ta a ʋ daar a bɛ lɛb kpiir ɛ. Nɩr na tɛr yome kʋba (100) kpi n a, ʋ ɩ n pɔlbile ɛ́ kpi. Ɛ́ nɩr bɛ wa ta yome kʋba (100) a, bɛ na jɩ́rɛ ʋ na mɛ̃ nɩr bɛ na ŋmɛ ƴãw a.

²¹ A ɩ̃ nɩbɛ na ŋmarɛ nɩ yie kpɩɛr, bɛ na sɛlɛ nɩ divɛ̃ tɩɩr ɛ́ dɩrɛ a wɔmɛ.

²² Bɛ kʋ̃ lɛb ŋmarɛ yie nɩ-yoru kpɩɛr ɛ, bɛ kʋ̃ lɛb sɛlɛ divɛ̃ tɩɩr nɩ-yoru dɩrɛ a wɔmɛ ɩ. Bʋ̃ʋ n'ʋ vɛ̃, a ɩ̃ nɩbɛ na mɩ́ kòr'a mɛ̃ a tɩɩr a. A bɛlɩ dem ɩ̃ na kaa ír a na mɩ́ so nɩ a bɛ nuru bome dɩrɛ.

²³ Bɛ kʋ̃ mɩ́ cãà bàlɛ bɛ tʋɔra zawla ɩ, bɛ kʋ̃ mɩ́ lɛb dɔw bibiir kʋ̀ a kũu ɛ. Bʋ̃ʋ n'ʋ vɛ̃, bɛ ɩ n a nɩbɛ bɛl yir ɩ̃ na maalɛ a, bɛlɛ nɩ a bɛ bibiir.

²⁴ Bɛ kʋ̃ mɩ́ bʋɔlɩ sɛr ɛ, ɩ̃ɩ sɔw bɛ. Bɛ kʋ̃ mɩ́ ƴɛ̀r baar ɛ, ɩ̃ɩ wõ a bɛ ƴɛ̀rʋ.

²⁵ A wɛ-baa nɩ a péle na lãw na 'wɔbr a mʋ̃ɔ. A gbẽw na 'wɔbr'ɩ mʋ̃ɔ mɛ̃ a náab a. A waab na dɩrɛ nɩ tanɛ. Yel-faa za nɩ yel-sãwna za bɛ lɛb maalɛ a ɩ̃ tãw-sõw za zu ɛ. A mãa, a Sore, mãa n'ʋ yere.