Ɩzayi 64 - A SƐB-SÕW

¹ Fʋ nãá ɩ na mɛ̃ vũu na mɩ́ dɩ a tuwr a, bɩɩ na mɩ́ ɩ a kʋ̃ɔ a karɛ a. À ŋá n'a fʋ nãá ɩ a fʋ dɔ̃ dem bãw a fʋ yúor. A nɩ-bʋʋr-yoru nãá màwr'ɩ a fʋ niŋé,

² fʋ nãá maal'ɩ pʋl-vʋ̃ɔ yele nɩr na bɛ gùre a. Lɛ n'a, fʋ nãá siw na, ɛ́ a tan nãá dam'ɩ a fʋ niŋé.

³ Nɩr bɛ dãw wõ a ɩ, nɩr bɛ dãw wõ bɛ yel ɛ, mimir bɛ dãw nyɛ̃ kɛ́ ŋmɩn kãw ɩ n à à ŋá nɩr na ƴãw a ʋ tɩɛrʋ a ʋ ƴãw a, a bɛ ɩ a fʋ̃ʋ ɛ.

⁴ Fʋ mɩ́ cen na tuori sob nɛ na tuur a mɩnʋ pùor nɩ nʋ̃ɔ̀ a, na mɩ́ lɛb tɩɛrɩ a fʋ yele k'ʋʋ tʋ̃ɔ́ tuur a fʋ sɔ́r a. Fʋ nyɛ̃ nɩ suur a tɩ sãwna zũú. Ɛcɛ tɩ na nyɛ̃ nɩ a faafʋ, a fʋ koro za sɛ́ɛ tɩ na na tuur a ƴãw.

⁵ Tɩ za, tɩ ɩ na mɛ̃ nɩbɛ na tɛr dɛwr a, ɛ́ a tɩ ɩ-vɩɛlɩ za gele pʋɔ mɛ̃ pɛn na mar pɔw-sɩɛ zɩ̃ɩ a. Tɩ za, a tɩ ɩ-faar ɓáw tɩ na cere nɩ mɛ̃ va-ŋmamɛ sɛsɛb na wob cen nɩ a.

⁶ Nɩr bɛ cãà bʋɔlɛ a fʋ yúor ɛ, nɩr bɛ cãà ganɛ ìre sowre a fʋ yele ɩ. Bʋ̃ʋ n'ʋ vɛ̃, fʋ bɛ cãà bɔbr a tɩ nyɛ́b ɛ, ɛ́ bɛr tɩ kʋ̀ a tɩ ɩ-faar a so tɩ.

⁷ Ɛcɛ, Sore e, fʋ̃ʋ n'ɩ a tɩ sãà. Tɩ ɩ n a yawra ɛ́ fʋ ɩ a mɩɛ-mɩɛrɛ. A fʋ nuru n'a mɛ tɩ tɩ za.

⁸ Sore e, ta nyɛ̃ suur tɩ gãw ɛ, ta tɩ́ɛrɛ a tɩ sãwna kʋralɛ ɩ. Sàw jɩ́r nyɛ̃, tɩ za ɩ n a fʋ nɩbɛ.

⁹ A fʋ tẽ-bɛr-son bɛ cãà tɛr nɩbɛ ɩ. A Zerizalɛm lɩɛb'ɩ wɛja-kpalɛ, a Sɩyɔ̃ ɩ n tẽw na kpal gã a.

¹⁰ A Ŋmɩn-yir-sõw-vla vla, a be a tɩ sãàkʋm-kore na mɩ́ tɩ danɛ fʋ a dɩ n vũu. A bome al za tɩ na tɩ nɔnɛ a sãw sãw na.

¹¹ Sore e, fʋ na tʋ̃ɔ́ na nyɛ̃ a kpɩɛrʋ á ŋá ɛ́ nyɔw fʋ tʋɔra a? Fʋ na tʋ̃ɔ́ na ɩ gbili ɛ́ ƴãw tɩ a vĩ tɩ dɔwlɩ ɩ?