Ɩzayi 62 - A SƐB-SÕW

A Zerizalɛm na tɛr'ɩ yo-paala

¹ A nɔ̃wfʋ ɩ̃ na nɔnɛ fʋ a ƴãw a, Zerizalɛm i, ɩ̃ bɛ ɩrɛ gbili ɛ. A nɔ̃wfʋ ɩ̃ na nɔnɛ fʋ a ƴãw a, Sɩyɔ̃ i, ɩ̃ bɛ zɩnɛ zoom ɛ, ɛ́ gù a fʋ mɩnʋ tɩ sãá mɛ̃ cãà a, ɛ́ a fʋ faafʋ 'lere mɛ̃ mɔ̃-'lena vũu a.

² A nɩ-bʋʋrɛ na nyɛ̃ nɩ a fʋ mɩnʋ, ɛ́ a na-mɩnɛ za nyɛ̃ a fʋ yúor-vɩɛlʋ-danʋ. Fʋ na tɛr'ɩ yo-paala a Sore na na por a.

³ Fʋ na ɩ na mɛ̃ nãà-kpawɔ-vla vla a Sore nũú a, mɛ̃ nãà zu-pɛn-vila a fʋ Naaŋmɩn nũú a.

⁴ Bɛ kʋ̃ cãà bʋɔlɛ fʋ “Tẽ-kpɛ̃ɛ bɛ na zawrɩ bɛr a ɩ”, bɛ kʋ̃ lɛb por a fʋ tẽw “Tẽw na sãw ʋ za a ɩ”. Bɛ na nɩ̃ɛ na bʋɔlɛ fʋ “Sore nʋ̃ɔ̀”, ɛ́ por a fʋ tẽw “Pɔw na kul sɩr vla a”. Bʋ̃ʋ n'ʋ vɛ̃, fʋ na sɩrɩ na ɩ a Sore nʋ̃ɔ̀, ɛ́ a fʋ tẽw na tɛr'ɩ sɩr.

⁵ Mɛ̃ a lɛ pɔlbile na mɩ́ kul pɔwsɩrale a, lɛ n'a a sob nɛ na lɛb mɩɛr fʋ a na ɩ a fʋ sɩr. Mɛ̃ a lɛ pɔw-sãan na mɩ́ ƴãw a ʋ sɩr nʋ̃ɔ̀ a, lɛ n'a fʋ na ƴãw a fʋ Naaŋmɩn nʋ̃ɔ̀.

⁶ Zerizalɛm i, a fʋ dacĩ-bɛrɛ zu a, ɩ̃ ƴãw nɩ zi-gùrbɛ. Bɛ bɛ be za na ɩ gbili a mʋ̃tɔ̃w nɩ a tɩ̃ɩsɔw ɛ. «Nyɩɩm na lɛb sɩ̃wnɛ a Sore tɩɛrʋ a Zerizalɛm ƴãw a, pɩ̃ɛnʋ bɛ ka a nyɩ zie ɩ!

⁷ Nyɩ taa bɛrɛ ʋ ʋ pɩ̃ɛnɛ ɩ, ɛ́ gù ʋ wa tɩ lɛb maalɩ a Zerizalɛm ƴãw, ɛ́ ɩ k'ʋ lɩɛbɩ danʋ bom a tẽw za zie.»

⁸ A Sore pɔ n nɩ a ʋ kpɛnʋ na ɩ kpɛ̃ɛ a, yel: «Ɩ̃ bɛ be za na lɛb bɛr a fʋ dɔ̃ dem bɛ dɩ a fʋ ble ɩ. A fʋ divɛ̃ ƴãw fʋ na bàl fʋ tʋɔra a, a sãanbɛ kʋ̃ lɛb nyũ a ɩ.

⁹ Ɛcɛ a bɛlɩ dem na na ŋma a ble a, bɛlɛ nɛbɛ na dɩrɛ a danɛ nɩ a Sore. A bɛlɩ dem na na pɔr a divɛ̃ tɩɩr wɔmɛ a, bɛlɛ nɛbɛ na nyũ a divɛ̃ a ɩ̃ zi-sõw pʋɔ.»

¹⁰ Zerizalɛm tẽw dem i, nyɩ yi, nyɩ yi a tẽ-kpɛ̃ɛ pʋɔ fɔ̃w! Nyɩ puo a sɔ́r kʋ̀ a ɩ̃ nɩ-bʋʋrɛ. Nyɩ paalɩ a bɔwrɩ, nyɩ ír a kʋsɛbɛ bɛr, nyɩ bà bãwfʋ ʋ zɛw a nɩ-bʋʋrɛ ƴãw.

¹¹ A Sore ɩ na bɛ wõ a ʋ kɔkɔr tɩ tɔ a tẽw baarʋ zie. Nyɩ yel a Sɩyɔ̃ tẽ-kpɛ̃ɛ: «A fʋ Faarɛ tarɛ na. Ʋ tɛr'ɩ a nɩbɛ ʋ na páw a lɛb waar'ɩ, ʋ lɛb'a waar'ɩ a ʋ tuo bom.»

¹² Bɛ na bʋɔlɛ bɛ nɩ “Nɩ-bʋʋr-sõw”, “nɩbɛ a Sore na ya de a”. Ɛ́ fʋ̃ʋ, Zerizalɛm i, bɛ kʋ̃ cãà bʋɔlɛ fʋ “a tẽ-kpɛ̃ɛ bɛ na zawrɩ bɛr a ɩ”, bɛ na bʋɔlɛ fʋ nɩ “tẽ-kpɛ̃ɛ bɛ na bɔbr a”.