Ɩzayi 60 - A SƐB-SÕW

A Zerizalɛm na ɩ n cãà a tẽ-daa ƴãw

¹ Ìr àr, Zerizalɛm i! Nyɩwrɛ fʋ za. Bʋ̃ʋ n'ʋ vɛ̃, a fʋ cãà waar'a, a Sore yúor-vɩɛlʋ-danʋ pure nɩ a fʋ zu!

² Jɩ́r nyɛ̃: lige pàw nɩ a tẽw, ulu pili na pàw a nɩ-bʋʋrɛ. Ɛcɛ fʋ̃ʋ a, a Sore pure nɩ a fʋ zu mɛ̃ mʋ̃tɔ̃w a, ɛ́ a ʋ yúor-vɩɛlʋ-danʋ nyɩwrɛ a fʋ zu.

³ A nɩ-bʋʋr-yoru na cere na wɩɛr a fʋ cãà zie, ɛ́ a na-mɩnɛ wɩɛr a fʋ cãà na pùr caalɩ a zie.

⁴ Dʋɔ a zu a ziir za ɛ́ nyɛ̃: bɛ za ɓanɛ nɩ taa, bɛ waar'ɩ a fʋ zie. A fʋ bidɛbr yi n zi-zãána tarɛ, ɛ́ nɩbɛ pɛ̀w pɛ̀w a fʋ pɔwyaar.

⁵ Fʋ na nyɛ̃ na, ɛ́ a fʋ niwn caalɩ, nʋ̃ɔ̀ na ɩrɛ fʋ na ɛ́ ƴãw cɩrɛ fʋ. Bʋ̃ʋ n'ʋ vɛ̃, a kʋ̃ɔ-kpɛ̃ɛ na-bome na waar'ɩ a fʋ zie, a nɩ-bʋʋr-yoru tɛra na wa na wa ta a fʋ zie.

⁶ Nyɔ̃wmɩ na yɛ̀r'a pàw a fʋ tẽw, Madian nɩ Eifa ten nyɔ̃wmɩ-pɔlɛ. A Saba tẽw dem za na wa na. Bɛ na wa n nɩ salm-zɩɛ nɩ tɩ-suur-zɔ̃-na-nyùur-vla-vla-a, yiele danɛ nɩ a Sore.

⁷ A Sore yere na: «A Kedaar tẽw bʋʋr nɩ píir na ɓã n taa a fʋ zie. Fʋ̃ʋ na so a Nebayɔtɩ tẽw pʋ́rɩ a fʋ bagɛ maalʋ ƴãw. Bɛ na mɩ́ de a na tɩr a ɩ̃ bàwr-maal-kuur zu, ɛ́ a na mɩ́ ɩ n bàwr na pɛlɩ a ɩ̃ pʋɔ a. À ŋá n'a ɩ̃ na wul a ɩ̃ yir vɩɛlʋ-danʋ.

⁸ Tẽbowle n'ɩ a nɩbɛ bɛ ŋa na mɩ́ ƴáw mɛ̃ zũzuwr a, mɛ̃ naŋmamɛ na ƴáwr cere a kpɛb zie a?

⁹ A tẽ-zãánɩ dem tɩ́ɛrɛ mɛ̃ na. A Tarsisɩ tẽw gbor-bɛrɛ duwre nɩ a nidaa, k'aa lɛb tɛr a fʋ bibiir zi-zãána zãána wa n, lãwnɩ a bɛ salm-pla nɩ a bɛ salm-zɩɛ. Bɛ waar'a kɛ́ bɛ́ wa ír a ɩ̃ yúor-vɩɛlʋ-danʋ, a mãa, fʋ Naaŋmɩn, a Ɩsɩrayɛl Naaŋmɩn na ɩ sõw a, a mãa na ɩ kɛ̀ fʋ nyɛ̃ a ƴãwfʋ ŋa a.»

¹⁰ A Sore yere nɩ a Zerizalɛm zie: Sãanbɛ nɛbɛ na lɛb mɛ a fʋ dacĩ-bɛrɛ, ɛ́ a bɛ na-mɩnɛ be a fʋ tome tob ƴãw. Bʋ̃ʋ n'ʋ vɛ̃, ɩ̃ tɩ nyɛ̃ nɩ suur, ŋmɛ b. Ɛcɛ ƴɛrɛŋa a ɩ̃ pʋ-pɩɛlʋ pʋɔ a, ɩ̃ lɛb'a wule fʋ a ɩ̃ nɔ̃wfʋ.

¹¹ A fʋ dɩ̃dɛɛ na mɩ́ yuo na gã kʋralɛ. Bɛ bɛ pàwr a a mʋ̃tɔ̃w nɩ a tɩ̃ɩsɔw ɛ. Lɛ n'a bɛ na ɩ a nɩ-bʋʋr-yoru na-bome kpɛ a fʋ pʋɔ, lãwnɩ a bɛ na-mɩnɛ na cɔrɩ tu taa a.

¹² A nɩ-bʋʋrɛ bɛl bɩɩ a naalʋ-tẽw ʋl nãà wa zawrɩ na tone a fʋ tome a, bɛ kʋ̃ cãà ɩ. A nɩ-bʋʋrɛ bɛl na lo n pelẽpelẽ.

¹³ A tɩ-vɩɛlɩ na ɩ a Libã tẽw dɛpaalʋ a, a sɩpɩrɛ tɩɩr, a pɛ̃ tɩɩr nɩ a biwi tɩɩr dàar na ta n a fʋ zie, k'aa wa ɩ a ɩ̃ zi-sõw ʋ vɩɛl. À ŋá n'a ɩ̃ na ɩ, a zie ʋl ɩ̃ na be a tɛr yúor.

¹⁴ A bɛlɩ dem na tɩ dɔwrɛ fʋ a na su n zuru taw pɩɛl'ɩ fʋ, a bɛlɩ dem za na tɩ ɩ b la a na lo na vɔblɩ muru a fʋ pile. Bɛ na bʋɔlɛ fʋ nɩ “A Sore tẽ-kpɛ̃ɛ”, “A Ɩsɩrayɛl Naaŋmɩn na ɩ sõw a Sɩyɔ̃”.

¹⁵ A nɩbɛ tɩ zawrɩ fʋ na bɛr, bɛ bɛ tɩ nɔnɛ fʋ ɛ, ɛ́ nɩr za bɛ tɩ tuur yire a fʋ zie ɩ. Ƴɛrɛŋa a, ɩ̃ na maalɩ fʋ na fʋ vɩɛl kʋralɛ, mɩ́ ƴãw a nɩbɛ cɩlɛ yome yome za.

¹⁶ Fʋ na nyúur'ɩ a nɩ-bʋʋr-yoru bʋ̀rʋ, fʋ na dɩrɛ nɩ a bɛ na-mɩnɛ na-bome. Lɛ n'a fʋ na bãw k'aa mãa, a Sore, mãa n'ɩ a fʋ faarɛ, k'aa mãa, a Zakɔb Naaŋmɩn, na tɛr kpɛnʋ a, mãa n'ɩ a fʋ ya-diere.

¹⁷ Ɩ̃ na ɩ na salm-zɩɛ lɩɛrɩ kur-zɩɛ wa, salm-pla lɩɛrɩ kure wa, kur-zɩɛ lɩɛrɩ a dàar wa, kure lɩɛrɩ a kʋsɛbɛ wa. A ƴã-ɓaarʋ n'ʋ ɩ̃ na ƴãw ʋ jɩ́rɛ fʋ, ɛ́ a mɩnʋ dɩrɛ naalʋ a fʋ zu.

¹⁸ Nɩr kʋ̃ lɛb wõ bɛ ƴɛ̀r po-to-fãw-ɩb ƴɛ̀rʋ a fʋ tẽw pʋɔ ɛ, bɛ ƴɛ̀r zie na sãw a nɩ kpɩɛrʋ ƴɛ̀rʋ a zie a fʋ tʋr-bɔwrɩ na viiri koli a pʋɔ ɛ. Fʋ na bʋɔlɛ nɩ a fʋ dacĩ-bɛrɛ “Faafʋ”, ɛ́ bʋɔlɛ a fʋ dɩ̃dɛɛ “Danʋ”.

¹⁹ A mʋ̃tɔ̃w bɛ n'ʋ na cãà ɩ a fʋ bibir cãà ɩ, ɛ́ a cuw ɩ a fʋ tɩ̃ɩsɔw cãà ɩ. A mãa, a Sore fʋ Naaŋmɩn, ɩ̃ na caalɛ fʋ nɩ kʋralɛ, ɩ̃ na caalɛ fʋ na nɩ a ɩ̃ cãà na na caalɩ ʋ za a.

²⁰ A fʋ mʋ̃tɔ̃w bɛ lɛb kpɩɛr ɛ, a fʋ cuw bɛ lɛb kpiir ɛ, bʋ̃ʋ n'ʋ vɛ̃, a mãa, a Sore a, ɩ̃ na caalɛ fʋ nɩ kʋralɛ. A fʋ wahala bibie na baar'a.

²¹ A fʋ nɩbɛ za na ɩ n nɩ-mɩn, bɛ na so nɩ a tẽw ŋa kʋralɛ. Ɩ̃ ír bɛ na nɩ a ɩ̃ nuru kɛ́ bɛ wule a ɩ̃ yúor-vɩɛlʋ-danʋ. Bɛ ɩ na mɛ̃ tɩɩr mãa mɩŋa na sɛl a.

²² A bɛ pʋɔ a, a pʋrɩ za na lɩɛb'ɩ nɩbɛ túr, a bãbàal woro na lɩɛb'ɩ nɩ-bʋʋrɛ na kpɛmɛ a. A mãa, a Sore a, ɩ̃ na páw nɩ fɔ̃w maalɩ a yel ŋa, a daar wa ta a.